TATOLI HUSI KARAU ATAN

TATOLI HUSI KARAU ATAN

Tur iha ai-dak hun

Hu ha’u nia kaiohi

Hodi dada anin mos no horon natureza nia morin

Anin moos no morin dame no hakmatek nian

Nebe lahetan iha sidade bulak sira nian

Husi ai-dak hun ha’u haree

Manu lakateu sira tuur ho laran susar iha ai-lok leten

Kakatua no loriku taka ibun iha ai-dik leten

Falur sira tuur muron iha hali leten

Lamukan sira nonok iha ai-talik laran

Hotu-hotu nonok hamutuk ho anin no kalohan

Laiha ida hakarak see tilun ba ha’u nia kaiohi lian

Sira hotu hirus no laran susar

Husi dok ha’u rona karau atan ida hu nia kaiohi husi mota sorin

Lian kro’at haborus abat sira iha mota ibun

Knananuk laran susar nian

Lori ha’u hodi hanoin destinu no moris ne’e

Ha’u nia matan mamuk hateke ba Matebian tutun

Foho ida nakonun ho ruin, ran no matan-wen

Klamar sira bali malu iha nakukun laran

Ha’u nia hanoin semo namalele iha kalohan mutin sira nia leten

Semo to’o iha funu ida uluk hasoru asu-fuik sira iha mota sorin

Uluk funu mai ho mehi ida

Fatin ida ne’e sei nakonun ho ai-fuan buras no morin sira

Balada sira sei moris haksolok iha ninia mundu

Lakateu, falur, loriku, kakatua no lamukan sira sei hananu furak iha abat laran ne’e

Lasei iha tan funu

Lasei iha tan injustisa

Lasei iha tan fahe malu

Lasei iha tan odio ho vingansa

Iha de’it hakmatek

Iha deit dame

Iha deit unidade

Iha de’it serbisu hamutuk

Maibe…

Mehi sira ne’e dok tan no dok tan de’it

Hanesan fitun lotuk nebe dook tebes no lakon iha loron manas

Loron kalan haree de’it karau aman sira tuku malu

Haree de’it asu fuik sira les malu

Fahi fuik sira tata malu

Leki, laku no meda sira sadik malu

Laho ho busa sira hafuhuu malu

Ular no fohorai sira bobar malu

Hotu-hotu hadau malu atu sai liurai abat laran

Laran ne’e susar no susar tebes

Hu kaiohi lalian

Hu pokotere lalian

Hu nagu lalian

Fekit guitara lalian

Ko’a violinu lalian

Dere babadok lalian

Dere lakadou lalian

Hotu-hotu nonok no lalian

Hotu-hotu laran susar

Hotu-hotu rona

Karau atan nia tatoli husi kaiohi lian

Lalika sadik malu, lalika tuku malu no les malu

Lalika hadau malu no bobar malu

Abat ne’e boot tebes ba hotu-hotu

Hotu-hotu iha fatin

Ida-idak iha ninia fatin

Hotu-hotu sei hetan han no hemu

Bebonuk, 15/04/2023