HUSI RAI OKOS AMI HAKILAR

HUSI RAI OKOS AMI HAKILAR

Iha rai okos

Ami koalia nafatin

Biar rai taka ona ami nia ibun

Iha rai okos

Ami haree nafatin

Biar rai taka ona ami nia matan

Iha rai okos

Ami nia fuan sei tuku nafatin

Biar tudik no kilat musan haborus ona ami nia fuan

Iha rai leten imi hakilar no tebe rai

Imi sama ami nia ulun no fuan

Hodi dehan imi mesak mak funu no terus ba rai ida nee

Ami mate hodi imi moris

Hodi konta no sura buat sira ita halo hamutuk

Hodi kontinua buat loos no diak sira

Ohin ami nia matan wen suli nonok iha rai okos

Kahur ho ran mean sira

Tanis tanba manipulasaun sira imi halo iha rai leten

Rona didiak

Ukun-an ne’e ita hotu nia kosar wen

Ami lori isin no ran hodi sosa ukun rasik an

Ami nia isin mak mate

Ami nia klamar moris nafatin

Moris ba rai ida ne’e

Maun-alin funu na’in

Keta trai ami nia ran no ruin

Keta trai ami nia isin no klamar

Keta haluha ita nia juramentu

Jura ba ran no ruin sira

Harii Timor ba Timor oan tomak

Bebonuk, 28/03/2020