Belun Karakol

Belun Karakol

Biar O mesak
O dolar ho neineik
O hakat ho neineik
Maibe hakat ho fiar an
Hakat ho serteza
Tanba O hatene atu ba nebe
No to'o ba nebe

Belun Karakol
O iha O nia uma rasik
O la sai husi O nia uma
O tuba to'o mate
Biar hasoru sadik oioin

Belun Karakol
O iha O nia dignidade rasik
O iha O nia identidade rasik
O la'os laho
Nebe buka kose tun sa'en
Nauk mai ne'e, na'uk ba neba
Tanis tun, tanis sa'en iha ema seluk nia uma
Dun tun dun sa'e ba ema seluk
Buka bibi metan hodi taka nia sala no kanten sira
O lakoalia
O nonok maibe firmi no onestu

Belun Karakol
O tutur O nia uma ho antena rua ba nebe de'it
Laho ida sei la eskapa husi O nia antena
O rona no haree laho halo festa no kontente
Depois tanis no halerik
Tanba lahetan buat nebe nia buka

Belun Karakol
Tanba O nonok no neineik
Laho buka fase liman, fila-an tun sa'en
Lakohi rekuinese no assume ninia sala
Nia buka dun sala hotu ba O
Maibe O nia onestidade sei derrota ninia bosok
Hakat nafatin ba oin belun Karokol
Vitoria so hetan husi posiensia
Laho sei monu hokurai iha bosok no kanten nia okos

Bebonuk, 22/05/2020