LEI PENSAUN MENSAL VITALISIA: MANTEIN KA PRESIZA ALTERASAUN?
Husi: Carlos da Silva L.F.R. Saky
Iha kampaine iha eleisaun lejislatif sira liu ba, partidu sira, kuaze hotu-hotu, promete atu halu revizaun ba LPMV, maibe to’o agora seidauk bok. Iha eleisaun lejislatif ida ikus mos partidu sira hotu rame-rame reafirma no halu promesa hanesan, atu halu revizaun ba lei ne’e. Liu tiha tinan rua ona, lei ne’e sei seidauk hetan alterasaun. Haree hanesan interese pesoal membru orgaun soberania sian nian sei maka’as liu duke kualker vontadi politik hodi hadia LPMV.
Da’et ho kestaun pensaun vitalisia ne’e, orgaun soberanu sira mos haree hanesan joga pimpong hela, Governu baku ba Parlamento Nasional (PN) no PN dudu fila ba Governu. Laiha ida mak hakarak ninia pimpong mate, tanba kestaun ne’e da’et ho sira hotu nia interese. PM Rui Maria de Araujo, hateten katak: “Kona-ba [pensaun mensal vitalisia] ida ne’e Parlamentu hanesan orgaun soberania para halo [alterasaun ba lei] ida ne’e, kuandu iha desizaun [ona] governu [prontu] ezekuta” (TP, 31/03/2015). Iha fatin seluk membru Komisaun A PN, deputadu, Paulo Moniz Maia, husi FRETILIN, dudu fali ba Governu. Deputadu ne’e hateten katak: “PN nia serbisu la’os atu hetan pensaun vitalisia, maibe atu halo lei hodi regula interese Nasaun povu hotu nian. Tanba ne’e atu altera lei ida ne’e depende mos ba governu nia proposta ba iha Parlamento atu diskute”(STL, 01/04/2015). Dudu malu ida ne’e sei lapara bainhira titular ho membru orgaun soberania foun sira seidauk hala’o sira nia knaar to’o fulan 42 nebe hanesan kondisaun ida atu hetan PMV ne’e. Dala ruma sira hein, lejislatura ida ne’e kompleta lai fulan 42 mak foin tau iha ajenda hodi diskuti no halu alterasaun, tanba halu alterasaun kedas husi agora titular ho membru orgaun soberania barak sei laiha direitu ona ba PMV 100%. Tuir prinsipiu lei nian, lei so bele aplika ba oin, labele aplika ba kotuk, tanba ne’e, dala ruma sira sei hein kompleta lai fulan 42 mak halu alterasaun, nune’e lei nebe hetan alterasaun ne’e labele aplika ba sira. Karik iha lejislatura ida ne’e la tau ba ajenda hodi halu diskusaun no aprovasun, mak proposta alterasaun ba LPMV nebe hatama ona iha tinan kotuk mos sei kaduka hotu hanesan proposta sira nebe hatama uluk iha lejislatura sira liu ba. Ne’e signifika iha lejislatura mai tenki hatama proposta foun tanba proposta tuan kadukadu ona. Tuir loloos PN labele hein fali husi Governu tanba PN nia knaar prinsipal ida mak halo halu lei ka halu alterasaun ba lei sira.
Seluk ho dudu malu sira iha leten, PM, Rui Maria de Araujo, mos koko reduz ejijensia publik nian atu hadia LPM ba ejijensia NGO sira nian, hanesan nia rasik afirma: “Kestaun Pensaun Vitalisia povu la eziji, maibe hau hatene NGO sira maka eziji, tanba ne’e Parlamento maka bele muda lei Pensaun Vitalisia, Governu prontu ezekuta” (STL, 31/03/2015). Maski PM, Rui Maria de Araujo, afirma katak povu la ijiji halu alterasaun ba LPMV, maibe iha dialog ida entre populasaun sira iha Suku Uma Uain Kraik-Lakluta ho Prezidenti Republik, Helena Herique Xavier ho Carlos da Silva, bele dehan reprezenta lian husi povu ka sidadaun baibain sira nian hodi fo hanoin ba PR Taur Matan Ruak kona ba PMV ne’e. Helena Henrique Xavier, fo hanoin ba Prezidenti Republik Taur Matan Ruak: “Hau sei lembra ita boot [Taur Matan Ruak] nia kampaina atu reduz pensaun vitalisia, maibe seidauk realiza, husu atu reduz pensaun vitalisia, kuandu mina hotu no rikusoin hotu lori saida sustenta estado?” (STL, 28/03/2015). Iha biban hanesan, sidadaun seluk, Carlos da Silva, reprezenta joven sira, husu ba Prezidenti Republik Taur Matan Ruak atu reduz pensaun vitalisia: “Hau husu Prezidente Republika se bele karik halo reduz ba pensaun vitalisia, tanba pensaun ne’e halo fali rekrutamentu ba Parlamentu Nasional kuandu mandatu remata hetan pensaun maske sira asumi kargu tinan lima de’it” (STL, 28/03/2015). Iha biban ne’e, maski PR, Taur Matan Ruak, la hatan ho firmi, maibe antes, iha biban ida, nia koalia ho forma ida klaru tebes, katak: “Sira simu pensaun vitalisia labele 100 porsentu, ne’e terlalu [demaziadu] liu, la loos no ladun diak... Loloos hau mos nonok de’it, tanba agora ha’u Presidente, hau mos aban bainrua sei iha direitu atu simu, maibe ha’u sente kalan toba la dukur ne’ebe di’ak liu altera” (Independente, 19/05/2014). Ita la hatene se entidadi sira nebe simu ona PMV ho sira nebe kandidatu daudaun atu simu pensaun ne’e iha loron oin, sira hotu toba ladukur hanesan PR, Taur Matan Ruak, nebe haree Lei ne’e injusta ka lae? Ka keta balun toba ladukur tanba iha presaun atu halakon ka hamenus PMV ne’e? Sira rasik mak hatene. Balun bele dehan sidadaun na’in rua ne’e nia lian la signifika buat ida, maibe iha sosiedade ida iha nebe ema barak ladun iha meios hodi hato’o sira nia hanoin, lian rua ne’e iha signifikadu boot tebes, lian nebe reprezenta ema rihun ba rihun nia hanoin. Karik haree husi aspektu legal no konstitusional nian mos ladun loos bainhira hateten katak povu la interese ho LPMV ne’e, tanba povu nia reprezentante iha PN mos husu ona atu halu alterasaun ba lei ne’e, so PPN mak seidauk hatun ba Komisaun A hodi halu diskusaun hodi altera lei ne’e. Iha lejislatura ida uluk, iha deputadu hamutuk 33, husi partido oioin, asina hamutuk proposta ida hodi husu alterasaun ba LPMV. Iha lejislatura atual, PD hatama hihas proposta foun ba Meja PPN hodi husu alterasaun ba LPMV, tanba proposta ida hatama iha lejislatura kadukadu ona.
Klaru hanesan we turu iha talas tahan katak sosiedade sivil la’os reprezentante lejitima povu nian, tanba sira la hetan lejitimidadi formal no konstitusional ba ida ne’e. Maibe klaru mos ba ema hotu, sosiedade sivil nudar parte ida husi estrutura sosiedadi nian. Tan ne’e, buat nebe sira koalia reprezenta mos preokupasaun husi sosiedadi nian rasik. Ba politik na’in sira, no politik na’in nebe di’ak, labele ignora total preokupasaun ho persepsaun sira nebe mosu iha sosiedadi nia leet, tanba preokupasaun ho persepsaun sira ne’e mak sei fo konfiansa ou lae ba politik na’in ka partidu politik sira. Tan ne’e presiza mos tetu lian sira mosu iha komunidade nia leet.
Sosiedadi sivil balun, liu husi sira nia diretor sira ka reprezentanti sira, halu ona kritik maka’as hasoru LPMV no kontinua ijiji hadi’a lei ne’e. Tuir Diretor FONGTIL, Arsenio Pereira, katak: “Tuir hau nia hanoin, Parlamento Nasional tenke halakon duni pensaun vitalisia ne’e, tanba povu barak sei kiak ... (TP, 31/03/2015). Iha fatin seluk, Diretor Luta Hamutuk, Mericio Akara, hateten katak: “Ami nia hare pensaun vitalisia nee sei fo todan ba orsamentu estado, ida nee ladun justu, tanba ita fo nafatin osan ba ema nebe mak la produtivu, nee diak liu ita fo osan ba ema nebe iha kapasidade atu kontinua nia estudo no seluk tan” (STL, 01/04/2015). Ba Jestor Programa ONG, AJAR, Inocencio Xavier, katak: “Pensaun vitalisia nee hanesan hakiak ema nebe la servisu, maibe fulan-fulan simu osan, nee halo kiak povu, tanba nee ami nafatin koalia” (STL, 01/04/2015). Enkuantu Diretor Asosiasaun HAK, Manuel Monteiro, hateten katak, “pensaun vitalisia halo kiak de’it povu, hariku grupu balun, tanba nee husu ba Parlamento Nasional atu diskute lais lei pensaun vitalisia hodi fo benefisiu ba povu” (STL, 01/04/2015). Iha fatin seluk, Jose Luís de Oliveira, Diretor ONG AJAR, hateten katak “Preokupasaun Sosiadade Sivil nian konaba pensaun vitalisia nee ho rajaun oin-oin ida maka lei pensaun vitalisia nee kontra konstitusaun tanba lei nee rasik halo diskriminasaun social ida tan mak lei pensaun vitalisia sei lori estadu ida nee sai bangkrut ou monu tanba agora dadaun estadu kontinua hasai osan ba iha grupu eis deputadu no ministru no tinan ba tinan sei kontinua amenta ba bebeik” (STL, Noticias Online, 01/04/2015).
Atu hatene barak liu tan saida mak sidadaun ho intelektual sira hanoin kona-ba pensaun vitalisia, bele vizita ba http://forum-haksesuk.blogspot.com/search?q= LEI+PENSAUN+Vitalisia, hodi haree artigu sira nebe da’et ho asuntu ne’e.
Kritik ho preokupasaun sira, atu husi NGO sira nian ka husi sidadaun baibain sira nian, da’et ho pensaun vitalisia, mesak lejitima no validas. Maibe ladun justu mos bainhira hateten katak deputadu sira ou partido sira la preokupa liu kedas ho lei ne’e. Preokupasaun sira ne’e balun reflekte iha intervensaun sira nebe sira halu ka husi proposta sira nebe sira halu hodi hatama ona ba Meja PPN nian. Iha lejislatura anterior, deputadu sira husi partidu oioin, hamutuk na’in 33, asina hamutuk proposta ida hodi husu halu revizaun ba LPMV. Iha tinan kotuk, PD hatama tan proposta ida hodi husu nafatin atu halu alterasaun ba LPMV ne’e. Faktu hirak ne’e hatudu iha preokupasaun husi deputadu sira, maibe tanba interese la hanesan, deklarasaun barak sai retorika de’it, no laiha ida mak hakarak dudu ho seriu hodi aselera prosesu aleterasaun ba LPMV.
Iha tinan 2011, saudozu La Sama, nudar Prezidente PN, iha biban nebe hala'o surumutu ida entre membru AMP (Aliansa Maioria Parlamentar) sira nebe mai husi parlamentar sira husi AMP nian no membru governu AMP tomak, iha ninia Rezidensia iha Farol, La Sama dehan sei halu diskusaun hodi halu alterasaun ba LPMV depois de OJE2011, nebe nia mos konsidera injusta no, nia hakarak hatun husi 100% ba iha 25%:”Alterasaun husi 100% simu pensaun ba 25%, tanba Lei antigo ne’e injustisa bot ida” (http://forum-haksesuk.blogspot.com/search?q= LEI+PEN-SAUN+Vitalisia).
Kala iha presaun husi fatin ruma, tan ne’e, maski Prezidenti PN, La Sama hateten ona katak sei halu ajendamentu ba diskusaun depois OJE2011, maibe to’o ninia mandatu hotu lato’o halu diskusaun ruma kona-ba asuntu ida ne’e. Proposta husi deputadu na’in 33 ne’e sai kadukadu ona, nudar konsekuensia husi segunda lejislatura ramata ona ninia mandatu iha 2012, agora ita iha 3ª lejislatura, tan ne’e presiza proposta foun.
Partidu sira hotu koalia atu hatama proposta hodi halu alterasaun ba LPMV ne’e, maibe tanba interese la hanesan, neduni intensaun barak hela iha nivel retorika de’it. PD lakohi atu adia ba beibeik diskusaun ka alterasaun ba LPMV, tanba ne’e, partidu ne’e hola inisiatif mesak hodi aprezenta hikas proposta foun ida iha nebe husu atu halu alterasaun ba artigu lubun ida husi LPMV nian nebe konsidera la justu. Projetu PD nian ne’e hatama ba Meja PPN nian desde loron 02 fulan Juinu tinan 2014, maibe to’o agora, sei budu nafatin, enkuantu publik sira hein bainhira mak halu diskusaun hodi hadia LPMV ne’e.
Tuir deputadu balun, problema la’os iha deputadu sira, maibe iha Prezidenti Parlamentu, Vicente Guterres. Deputado Arão Noe de Jesus Amaral, husi CNRT, nebe reprezenta lian balun husi deputadu sira nebe direita ka indireitamente fo sala ba Prezidenti Parlamentu, Vicente Guterres. Deputado Arão hateten katak: “Prezidente [Parlamento Nasional] mak iha kompetensia haree no analiza [proposta sira] hodi baixa ba komisaun sira, hanesan hau dehan bei-beik katak komisaun hanesan dapur, atu tein saida deit prezidente mak haruka ba atu tein, kuandu la haruka ba entaun iha komisaun labele halo buat ida” (STL, 01/04/2015). Deklarasaun husi deputadu Arão Noe nian ne’e hakarak hateten, Prezidenti Parlamentu, Vicente Guterres mak budu hela proposta PD nian ne’e, unika proposta nebe iha, iha ninia gaveta laran hodi la hatun ba Komisaun kompetenti sira hodi diskuti. Tanba saida mak PPN hakarak budu hela proposta sira iha ninia gaveta laran? Ita la hatene loloos ninia motivu. Karik nudar titular, Prezidenti Parlamentu mos hakarak hein hodi kompleta lai fulan 42 mak sei hatun ba Komisaun kompetente hodi haree, nune’e nia mos bele hetan PMV 100% tuir lei neba agora vigora. Ka tanba razaun seluk Prezidenti Parlamentu rasik mak hatene. Iha afirmasaun balun, Prezidenti Parlamentu, Vicente Guterres, hateten katak, sira nebe halu kritika hasoru pensaun vitalisia tanba sira “inveja karik” (RTL,04/02/2011, dader). Inveja ka laran moras tanba haree sira simu PMV 100% ho regalias oioin. Iha tinan kotuk, tanba mosu presaun maka’as no iha spanduk balun nebe tara iha estrada ninin sira iha edifisiu PN nia sorin, ijiji maka’as halakon ka hamenus PMV. Iha mos rede sosial, sidadaun balun halu kaixa hodi halibur osan besi 5 sentimus, atu haruka ba Prezidenti Parlamentu, nudar osan ba pensaun vitalisia nian. Hatan ba kritika no ejijensia sira, Prezidenti Parlamentu, Vicente Guterres, hateten: “Hau dehan beibeik tiha ona, iha país nebe de’it liu-hosi funu konflitu, pelumenos iha sektor rua ita rezolve mak kestaun politikus no kestaun veteranus. Se ita la-haree ba sektor rua ne’e, ita iha problemas, exemplu ita haree de’it Afrika” (TP, 23/06/2014). Karik razaun ida ne’e mak halu Prezidenti Parlamentu, Vicente Guterres, lakohi halu ajendamentu hodi halu diskusaun kona-ba LPMV. Infelizmente Dr. Vicente Guterres la esplika ho klean kestaun politik ho veteranu sira liga ho pensaun vitalisia ne’e oinsa. Tanba laiha esplikasaun klaru ka kle’an ida, entaun obriga ema ida-idak halu interpretasaun ba deklarasaun ne’e. Interpretasaun posivel ida, bele de’it, PPN, Vicente Guterres, hakarak hateten katak entidadi sira nebe ohin loron sai ema politik na’in sira iha Timor-Lorosa’e, entidadi sira ne’e mesak veteranu sira de’it, tan ne’e, se halakon ka hamenus PMV ba sira sei hamosu problema ka konflitu, tanba depoisde sira ne’e sai eis-titular ka eis-membru orgaun soberania ona, susar ba sira atu hetan serbisu no manan salariu nebe di’ak ka boot hanesan nebe ohin loron sira simu, tanba sira ne’e ninia formasaun akademika ladun boot. Se sira la hetan serbisu no moris aat halu sira nia dignidadi lakon. Serake dignidadi ema nian sukat ho osan no moris di’ak? Oinsa ho ema sira laiha osan, kiak no moris aat? Serake ema sira la iha osan no moris aat la iha dignidadi? Karik ne’e los, entaun maioria husi Timoroan sira ninia dignidadi laiha, tanba barak liu mak ohin loron laiha osan no moris aat, maioria absoluta sei moris iha lina pobreza nia okos. Tuir autor nia hanoin, ema nia dignidadi la’os sukat ho osan, maibe sukat ho prinsipiu ho valor sira, sukat ho integridadi moral sira. Korruptor ida bele iha osan barak, moris di’ak ho sasan luxu sira, maibe ninia dignidadi laiha, tanba laiha integridadi moral, bassa, sasan sira nebe nia hetan la’os liu husi dalan sira nebe sosiedadi admiti, maibe liu husi na’uk ka dalan sira laiha moral nian. Maibe autor konkorda katak osan bele halu ema nia dignidadi lakon. Ema nebe toman ona kaer osan boot no toman ona goza ho sasan sira luxu, teki-teki la iha osan no moris aat, halu nia bele involve iha krimi ka asaun sira nebe halu ninia dignidadi lakon. Maibe mos ladun loos ka justu, ita adopta politik ida hodi benefisia grupu ki’ik ida sein fo atensaun ba ema rihun nebe moris iha susar, kiak ho terus nia laran.
Fo hanoin de’it, ema ida disidi-an atu sai politik na’in, nia buka atu realiza nia idealizmu politik sira nebe hakarak luta ba povu tomak nia moris diak, ida ne’e mak baibain politik na’in sira haklaken iha kampaine sira no iha PN. Se politik na’in ida luta ba ninia interese mesak, sein haree ba povu tomak nia moris, mak politik na’in ida ne’e la’os de’it laiha dignidadi maibe laiha moral mos, tanba laiha integridadi politik no moral. Povu fo fiar ba nia no nia uza tiha povu nia naran hodi hetan tiha pozisaun nebe nia buka, evezde buka defende interese povu nian, nia buka defende ninia tasu mesmesak. Nia lohi povu hodi povu fo tiha konfiansa ba nia, depois nia halu traisaun husi kotuk. Trai povu nebe nia dehan nia reprezenta no serve ne’e.
Laiha liurai ida moris kiak liu povu! Iha rai demokratik hotu-hotu povu mak liurai, entaun povu tenki moris diak liu, la’os ida reprezenta ou ida halu serbisu ba liurai. Maibe iha sosiedadi moderna, atu labele iha rai-ketan nebe dook liu ba malun entre liurai ho ninia reprezentanti no servidor sira, tuir ideal nian, hotu-hotu tenki moris diak hanesan ou labele dok liu ba malu. PMV halu povu ho ninia reprezentanti no servidor sira, hanesan fali ida moris iha rai no seluk moris iha lalehan, moris ida dok ba malu tebes. Maioria husi Timoroan sira nein manan salariu minimu kada fulan (Salariu minimu kada fulan USD$115), enkuantu eis titular ho eis membru orgaun soberania sira manan osan kada fulan, sein halu buat ida, rihun ba leten.
Iha Timor-Lorosa’e, veteranu sira mos iha ninia subsidiu ka pensaun mensal veteranus nian rasik, la hanesan iha Afrika nian nebe veteranus sira ladun ou la hetan liu atensaun husi estadu. Tan ne’e, veteranu politik na’in ida molok atu halu problema ida, nia mos tenki hanoin dala rua, tanba veteranu ka kombatente libertasaun nasional sira nebe nein hetan sentimu ida husi estadu mos rihun ba rihun. To’o agora seidauk iha estudu ruma hodi hatene loloos veteranu sira hamutuk hira mak hanesan eis-membru orgaun soberania ka kandidatu ba eis-membru orgaun soberania, no hira mak iha direitu ba pensaun veteranu nian ho hira mak laiha direitu ba pensaun veteranu nian. Lia-husuk seluk tan mak serake eis-membru orgaun soberania sira hotu mesak veteranus ka kombatentes libertasaun nasional de’it, ka balun uluk keta “cuek habis” ka nein hakarak luta tan, ka balun keta uluk aktif tebes luta kontra ukun-an? Pergunta hirak ne’e mosu la’os ho objetivu atu soro “bruxa” ka “buang” sira, maibe evita atu aumenta tan numeru veteranu falsu sira. Tanba bainhira uza razaun veteranu hodi defende mantein LPMV, hanesan de’it ita atu dehan politik na’in sira ohin loron iha Timor ne’e mesak veteranus deit, maibe iha realidadi la’os hanesan ne’e. Diak liu uza razaun seluk, tanba uza razaun ida ne’e sei ofende tan deit veternus “isin ho klamar” sira. Ohin loron iha veteranu falsu sira barak tebes, hein katak PN mos labele uza argumentu jeneralizadu ida ne’e hodi aumenta tan numeru ba veteranu falsu sira. Keta haluha, sira nebe uluk terus dolar didiak, rihun ba rihun mos to’o agora Lei Veteranu nian la kobre sira hotu, tanba sira lahalu parti kategoria ida bolu dedikasaun eskluzif, maibe iha asaun balun nebe sira involve iha laran determina mos rumu ho trajetu funu nian. Hanesan asaun husi jovens, estudantes no aktivista sira klandestina nian. Sira ne’e barak simu tortura maka’as husi militar sira Indonezia nian. Se haree hotu fali ba numeru sira ne’e, mak kuantitativamente numeru ida inkomparavel entre eis-membru soberania sira nebe hanesan veteranu ho sira nebe la’os membru orgaun soberania sira nebe ohin loron sei moris kiak nafatin, maibe la halu problema ruma ba estadu, tanba sira iha konsiensia labele sobu estadu nebe sira rasik lori terus oioin hodi sosa.
PROPOSTA PD NIAN ATU HALU ALTERASAUN BA LPMV
Independentemente husi hanoin sira pro ho kontra kona-ba pensaun vitalisia, agora daudaun iha Meja PPN nian, iha proposta ida mai husi Bankada PD nian. Proposta ne’e hakarak halu alterasaun ba artigu sira husi Lei N.º 1/2007 nebe aprova kona-ba Rejimi Pensaun Mensal Vitalisia Deputados sira nian no Regalias sira seluk no, Lei N.º 7/2007 nebe aprova Estatutu Titular husi Orgaun Soberania sira nian. Artigus sira nebe PD hakarak hetan alterasaun mak artigu sira 1º, 2º, 4º, 5º no 6º husi Lei N.º 1/2007 no artigu sira 1º, 16º, 17º, 18º, 29º, 31º, 32º no 33º husi Lei N.º 7/2007.
Iha hakerek ida ne’e, autor so bele hakerek kona-ba proposta PD nian tanba seidauk iha proposta husi partidu sira seluk nian. Tanba seidauk iha proposta husi partidu sira seluk nian, labele halu komparasaun proposta ida nebe mak justu liu ou hatan ba ejijensia publik nian.
Pontu importante no foun balun nebe mosu iha proposta alterasaun PD nian, tuir rezumu nian hanesan tuirmai:
Ida, PD hakarak altera PMV ba PR no PM husi 100% husi sira nia salariu baze (art. 16º, Lei N.º 7/2007) ba iha 75%. Enkuantu ba PPN, membru PN no membru Governu, PD propoin atu altera husi 100% husi salariu baze (art. 16.º, Lei N.º 7/2007, art. 1º, Lei N.º 1/2007 no art. 31.º, Lei Nº 7/2007) ba iha 65%.
Rua, PD propoin atu membru Governu no membru Parlamentu Nasional so bele hetan PMV bainhira hala’o knaar tinan 5 kompletu, labele tuir Lei atual nian, art. 1º, Lei N.º 1/2007 no art. 31.º, Lei Nº 7/2007, nebe kompleta fulan 42 heta ona direitu ba pensaun vitalisia. Proposta ne’e mosu ho objetivu atu evita membru orgaun soberania sira nebe hakarak sai deputadu ka deputada hodi buka PMV de’it, tanba balun, bainhira kompleta ona fulan 42, sira husu sai ona husi deputadu ka deputada, tanba hetan tiha ona direitu ba PMV. Izemplu hanesan deputadu Vital dos Santos, husi PD, husu rezigna-an husi deputadu bainhira ninia prestasaun serbisu iha PN kompletu fulan 42 tanba nia iha ona direitu ba PMV. Ladun justu, ema ida serbisu fulan 42 de’it hetan ona PMV ida boot tebes, 100%, karik traduz ba iha salariu, fulan-fulan eis-membru orgaun soberania ida simu osan US$1.500.00 ba leten, enkuantu veteranu ida funu tinan 24 iha ai-laran, fo nia vida tomak ba Nasaun ho Estadu, tahan terus oioin, hetan subsidiu fulan-fulan nebe menos husi USD$600.00 kada fulan.
Tolu, PD mos propoin, eis-membru orgaun soberania ida bainhira hala’o nia knaar kompleta tinan 5 no la kontinua ona knaar nudar membru orgaun soberania, labele hetan kedas PMV, maibe so bele hetan pensaun ne’e bainhira ninia idadi atinji ona tinan 55. Tanba idadi nebe menos husi tinan 55 konsideradu nudar ema nebe produtif no bele halu serbisu iha nebe de’it no sa serbisu de’it. Lei atual la preve kona-ba idadi, nune’e bainhira membru orgaun soberania ida, bele ho idadi 30 bele hetan ona PMV, naran katak hala’o nia knaar kompleta fulan 42.
Haat, kona-ba benefisiariu sira nebe mate, PD propoin bainhira PR ka PM mate, mak ninia kaben nebe sei moris ho oan sira nebe sei ki’ik iha direitu ba PMV benefisiariu nian 70% husi sira nia salariu baze, katak hatun 5% husi 75% (art. 17º, Lei N.º 7/2007) ba 70%. Ba Prezidenti Parlamentu Nasional bainhira mate mak nia kaben nebe sei moris ho oan kiik sira iha direitu ba PMV benefisiariu sira 55%, hatun 20% husi 75% (art. 17.º, Lei N.º 7/2007) ba iha 55%. Enkuantu ba membru Parlamentu Nasional ida bainhira mate mak ninia kaben nebe sei moris ho oan ki’ik sira hetan PMV benefisiaru nian 55%, hatun husi 100% salari baze (art. 2.º, Lei N.º 1/2007). Pensaun sira ne’e hapara bainhira, kaben ka oan husi entidadi sira ne’e (PR, PM, PPN, membru PN ka membru Governu) nian mate hotu ona ka oan ki’ik sira boot hotu ona (art. 17º, Lei N.º 7/2207, ).
Lima, iha lei atual la preve bainhira PR hetan asidenti ka moras ruma nebe halu nia sai inkapasitadu fizika ka psikikamente durante hala’o nia knaar. PD propoin atu hatama tan artigu foun ida hodi kobre situasaun ida ne’e. Nune’e mak PD propoin bainhira PR hetan asidenti ka moras ruma nebe halu nia sai inkapasitadu fizika ka psikikamente durante nia hala’o nia knaar mak nia iha direitu ba PMV 75% husi ninia salariu baze, maski nia seidauk hala’o ninia mandatu kompletu (art. 17.º - A no art. 18.º C, Lei N.º 7/2007). PD mos propoin hatun PMV husi salariu baze ba membru Governu ida nebe sai inkapasitadu fizika ka psikikamente durante hala’o nia knaar husi 75% husi ninia salariu baze (art. 29º, Lei N.º 7/2007) ba 60%.
Neen, PD propoin membru Parlamentu no membru Governu sira bainhira hala’o sira nia knaar menus husi tinan 5 iha direitu ba subsidiu reintegrasaun ida nebe ekivalente ba sira nia salariu baze tinan ida nian. Lei atual, art. 5º, Lei N.º 1/2007 no art. 33º, Lei N.º 7/2007, preve membru Parlamentu ka membru Governu sira hetan subsidiu reintegrasaun ida ekivalente ho salariu baze fulan 12 nian bainhira sira hala’o sira nia knaar liu fulan neen (6) no menos husi fulan 42.
Hitu, tuir art. 18º, Lei N.º 7/2007, PR iha iha regalias sira hanesan:: a) Uma nebe diak; b) Kareta Estadu, kondutor ho kombustivel; c) Direitu ba protesaun pesoal no rezidensia; d) Direitu ba Gabinete ida hodi serbisu, ho telefone 2, internet, telemovel, sekretaria pessoal no asesor ida mai husi funsionariu publik; e) Direitu ba ajuda kustu sira nebe lei aplika hodi tulun deslokasaun PR, PPN no PM, bainhira ba hala’o serbisu ofisial sira fora husi sira nia rezidensia abitual nebe labele liu loron 15; f) Viajen anual internasional ho ema rua akompaina;g) Direitu ba livre-tranzitu no pasaporte diplomatik ba ninia-an ho ninia familia direktu sira, iha deslokasaun sira iha rai laran ou iha liur;h) Direitu ba Asistensia medika iha rai laran ka se konsidera nessariu iha rai liur; i) Direitu ba hatama kareta ba uzu pesoal iha kada tinan 5, ho material nesesariu hotu-hotu hodi halu konstrusaun no mobiliariu ba rezidensia privada ida nebe livre husi taxa aduaneira nian; j)Ba eis titular sira ho nia familia, iha direitu ba fatin onra, iha seremonia ofisial sira. PD propoin PR bainhira hala’o nia knaar mandatu ida kompletu ka liu, mak sei hetan regalias sira hanesan: a) Uzu kareta Estadu, ho kondutor nia kombustivel litru 70 semana ida; b) Gabinete hodi serbisu, ho telefone ida ho ligasaun ba internet, sekretariu ho assessor ida nebe mai husi funsionariu publiku; c) Ajudu ba kustus sira tuir lei bainhira halu deslokasaun ofisial sira nudar eis-Xefe Estadu nebe sai husi ninia rezidensia baibain; d) Direitu ba livre tranzitu no passaporte diplomatik ba nia-an ho nia kaben, iha ninia deslokasaun sira ba rai seluk.
Walu, membru Parlamentu sira nebe iha direitu ba PMV, sei hetan regalia sira hanesan: a) Direitu ba asistensia medis iha rai laran, bele mos iha rai-liur bainhira konsidera nesesariu; b) Direitu ba hatama kareta ida husi rai-liur ba uzu pessoal, la selu taxa ka la selu osan ba buat sira nebe tuir lolos tenki selu ho osan ba sasan sira nebe importa husi liur nian; c) Iha direitu ba hatama material hotu-hotu husi rai-liur hodi halu uma privada ida nebe livre husi selu osan ba sasan sira nebe hatama husi rai liur nebe tuir lolos tenki selu; d) Direitu ba livre tranzitu ho passaporte diplomatik, inkluindu ba kaben ho oan sira; e) Kartaun identidadi nudar eis-deputadu PN nian (art. N.º 4, Lei N.º 1/2007). PD propoin halakon tiha regalias sira iha pontu c, nebe membru PN sira iha direitu ba hatama material konstrusaun hotu-hotu husi rai-li’ur hodi halo uma privada ida sein selu taxa ruma ba estadu.
Husi proposta PD nian iha leten, klaru ke balun aseita no balun sei la aseita. Ba membru orgaun soberania sira, klaru balun sei la aseita ho hatun PMV husi 100% tun mai iha 65% maibe sira nebe hanoin rasional duni katak, ohin loron ema kiak sei barak, sira labele moris di’ak mesamesak, sira ne’e sei aseita ho 65% ka tun tan. Maibe ba sosiedade sivil, balun mos bele aseita ho persentajen nebe PD aprezenta ho hanoin ida hatun PMV ne’e gradualmente, labele tun dala ida maka’as kedas. Balun sei la aseita tanba haree ba persentajen ne’e sei boot no balun hakarak hatun tan ou halakon total.
Iha rai barak ka kuaze iha rai hotu-hotu, eis-titular no eis-membru orgaun soberania sira iha direitu ba PMV. Tan ne’e, ejijensia ida atu halakon total PMV bele dehan imposivel. Bele hetan PMV, importante mak tenki reflete mos ba realidadi ekonomik ho sosial ita nian rain nian hodi labele hamosu rai-kuak luan entre eis-membru orgaun soberania sira ho povu.
Razaun sira Lori PD Hakarak Halu Alterasaun ba LPMV
Tuir deputada Lurdes Maria Bessa, nebe mos nudar Prezidenti Bankada PD nian, sira hakarak halu alterasaun ba LPMV tanba: 1) Hakarak reduz ka halakon enkargus excessivos sira ba rekursu finanseiru publik; 2) Lei sira ne’e lori impaktu ida todan tebes ba orsamentu Estadu nian; 3) Hakarak fo resposta loloos ba justisa no ekilibriu finanseiru; 4) Halakon imajen no persepsaun publik negatif ba instituisaun sira orgaun soberania nian; 5) Maioria husi timoroan sira sei moris iha kiak ho mukit laran; 6) PMV hamosu insatisfasaun sosial tanba kondisaun moris ida nebe halu raik-kuak boot tebes entre ukun-na’in sira, reprezentanti povu nian ho povu rasik; 7) Lakohi kria klase barukten tanba ema balu ho otas produtif la serbisu ona maibe simu osan de’it; 8) Presiza poupa osan Estadu ho povu nian hodi investe iha programa sira nebe lori benefisiu ba Timor oan tomak; 9) Veteranus ba libertasaun nasional barak sei moris iha kiak ho susar nia laran. Sira balu iha direitu ba subsidiu veteranu sira nian maibe sira nia subsidiu ki’ik liu dala rua ka dala tolu husi PMV nebe autoridadi ho reprezentanti sira povu nian simu; no 10) Maioria husi Timor oan sira la iha serbisu.
Alemde razaun sira iha leten, razaun balun tan, tuir deputada Lurdes Bessa mak iha presaun husi partidu laran rasik ka husi sosiedade sivil no povu rasik, maibe mos atu kumpri promesa eleitoral tanba iha kampaine eleisaun lejislativa liu ba, PD promote ona atu halu revizaun ba lei nebe sira rasik konsidera la justu.
Proposta PD nian ne’e hatudu katak sira iha sensibilidadi rona preokupasaun ho lamentasaun husi povu, veteranu no sosiedade sivil sira kona-ba povu nia moris nebe sei hasoru susar oioin.
Ita hotu hatene ohin loron mosu prekupasaun barak kona-ba difikuldades oioin nebe ita nia povu hasoru. Problema sira ne’e balu hanesan laiha bee mos, la iha ospital. Ospital ka klinika sira nebe iha, barak laiha kondisaun nebe diak hodi atende komunidadi sira. Fatin barak laiha eskola no barak laiha fasilidadi sira hanesan meja, kadeira, bibleoteka ho seluk-seluk tan hodi tulun prosesu aprendizajen labarik sira nian. Veteranus barak, nebe fo sira nia vida tomak ba luta ukun-rasik-an nian, barak sei moris iha susar nia laran. Ema barak ohin loron seidauk hetan serbisu, numeru ema kiak sei aas tebes. Haree ba realidadi sira ne’e hotu, maka hatun PMV 100% ba 65% ba membru Governu ho membru Parlamentu sira no ba Prezidente Republik ho Primeiru Ministru husi 100 mai iha 75% hanesan hakat pozitivu ida. Se partidu boot sira hanesan CNRT ka FRETILIN hakarak hatun husi 100% mai iha 50% ka 40%, ka ki’ik liu tan ida ne’e, autor fiar katak proposta ne’e sei liu, tanba partidu boot rua ne’e ninia votos determina liu duke partidu ki’ik sira hanesan PD ho FM. Partido ki’ik sira nian votos so sai determinante kuandu votos husi partido boot sira nian fahe malu, maibe se sira rua iha konsensu hodi vota hamutuk, mak kualker proposta atu diak ka aat mos sempre hetan aprovasaun.
Ho hatun PMV husi 100% tun mai iha 65% ka ki’ik liu tan, signifika bele poupa osan balun husi Estadu nian hodi investe fali ba area sira nebe afekta direitamente ba povu nia moris, hanesan bele dada tan bee-mos ba suku ka aldeia ruma, bele hadia ka harii tan uma eskola balun ka hadia tan fasilidadi balun hodi tulun prosesu hanorin ho aprendijajen nebe diak ba labarik sira, hadia tan fasilidadi ospital ka klinika sira nian hodi atende populasaun sira ho diak liu tan.
* Artigu ida ne’e nudar opiniaun pesoal ida, la reprezenta instituisaun ka orgaun nebe autor hala’o ninia knaar ba.
No comments:
Post a Comment