LABELE NONOK TAN

LABELE NONOK TAN

Jerasaun Rezistensia labele nonok tan ona

Haree jerasaun tuan sira ukun laloos

Ukun nebe domina ho odiu no vingansa

Ukun nebe hariku-an an no hariku nia kroni sira

Ukun nebe explora de’it povu terus na’in sira nia emosaun

Ukun nebe uza de’it povu no veteranus sira

Ba sira nia interesse politiku no ekonomika sira

Jerasaun Rezistensia tenki hamrik ona
Harahun mitos sira irrasionais
Nebe taka ema hotu nia matan
Taka ema hotu nia kakutak
Taka ema hotu nia hanoin kritiku

Hader no hamrik ona

Hodi salva povu no Nasaun

Hodi harii metin Timor ida

Timor ida nebe
Mai husi hun ida, abut ida, povu ida no rai Timor ida deit

Jerasaun Rezistensia sira tenki hamrik ona

Hodi fo fali konfiansa ba povu

Katak ukun-an ne’e ba povu

Ukun-an ne'e atu proteje povu
Ukun-an atu fo moris diak no hakmatek ba povu tomak

Laiha tan diskriminasaun no arbietrariedade

Laiha tan injustisa no eskluzividade

Timor ba Timor oan tomak

Heroi sira

Matebian sira

Foho lulik sira
We matan lulik sira

Laloran no anin sira

Hamrik no fo forsa ba Jerasaun Rezistensia sira

Hodi lori hikas rai ida ne’e ba dalan loos

Dalan demokrasia nian

Dalan respeita ema hotu nian

Dalan justisa no igualdade nian

Dalan solidariedade no fraternidade nian
Dalan unidade nasional nian

Dalan hakoak ema hotu nian

Dalan fo moris diak no hakmatek ba Timor oan tomak

Bebonuk , 10 de Junho de 2020