POZISIONAMENTU
POLITIKU TUIR IDEOLOJIA ESKERDA NO DIREITA
Husi: Carlos
da Silva L.F.R. Saky
INTRODUSAUN
Bainhira ita koalia kona-ba
pozisionamentu politiku no ideolojiku mak ita koalia kona-ba ideolojia
sira nebe existe, nune’e mos ita koalia kona-ba eskerda no direita, ita
koalia kona-ba liberal no konservador, ita koalia kona-ba kapitalizmu,
sosializmu no komunizmu.
Iha artigu ida
ne’e, autor lasei koalia kona-ba ideolojia sira seluk, maibe konsentra de’it ba
sira nebe temi iha leten.
Iha politika,
kestaun la’os de’it hadau malu kadeira ka poder, maibe tenki hatene mos
pozisionamentu politiku no ideolojiku, hatene prinsipiu no valor politiku,
ekonomiku no sosiu-kultural sira nebe iha, hodi bele hatuur-an.
Pozisionamentu
ideolojiku importante hodi ema ka grupu politiku ida-idak hatuur-an
politikamente, nudar ema eskerda ka direita, bazeia ba vizaun, prinsipiu,
ideolojia no valor sira nebe ema ka grupu ida-idak fiar ka komunga.
Nune’e, iha
artigu ida ne’e, ita sei haree hamutuk no buka hatene saida mak ideolojia,
eskerda, direita, liberal, konservador, kapitalizmu,
sosializmu no komunizmu. Ho kuinesimentu ba konseitu hirak ne’e,
tulun ita hodi defende politika, ideolojia no valor sira nebe diak liu ba ita
nia sosiedade, ka hakarak harii sosiedade ida nebe ita nudar individu ka grupu
idealiza.
Iha tempu uluk,
kuinesimentu ba konseitu hirak temi iha leten importante tebes, tanba bazeia ba
hanoin ka pensamentu estabelesidu ne’e mak sira hatuur-an, sira atua no sira
haketak ho sira seluk politikamente hanesan bee ho mina haketak malun.
Kuinesimentu ba ideolojia eskerda no direita mos importante hodi determina
koligasaun partidu sira iha ukun, katak koligasaun entre eskerda no eskerda
sira iha sorin ida, no direita ho direita iha sorin seluk. Maibe, ikus-ikus
ne’e, liu-liu iha rai sira subdezenvolvidu, inkluindu Timor-Leste, dala barak
halo politika sira pragmatizmu nian, sira nia koligasaun latau iha
konsiderasaun kestaun ideolojiku, maibe tetu liu oinsa tama ukun. Sira lahalo
koligasaun ideolojiku, maibe koligasaun tatiku hodi ukun hamutuk no ignora tiha
ideolojia nebe importante tebes, nebe sai razaun ida mos ba harii partidu ida
nian.
Iha artigu
ne’e, sei koalia kona-ba definisaun no diferensa entre eskerda no direita,
liberal no konservador, kapitalizmu no sosializmu
ka sosializmu no komunizmu, nune’e mos sira nia vantajen ho
desvantajen sira.
Ita hahu ho
ideolojia.
SAIDA MAK
IDEOLOJIA?
Liafuan
ideolojia mai husi liafuan ingles “idea” ka hanoin, konseitu ka
aspirasaun, no lifuan “logi” mai husi lian Grega “logos”,
signifika siensia ka kuinesimentu.
Iha definisaun
barak no oioin kona-ba ideolojia. Iha ne’e ita foti definisaun balun hodi
kumprende saida mak ideolojia.
Ideolojia iha
sentidu luan, signifika buat nebe ideal, ka ita hakarak halo no hatuur buat ida
ideal, ka harii sosiedade ida ideal, tuir ita nia hakarak.
Tuir sensu
komum, ideolojia mak buat ida nebe ideal, nebe kontein konjuntu ida husi ideias,
pensamentos, doutrinas ka vizaun kona-ba mundu husi
individu ida ka determinadu grupu, nebe orienta ninia asaun sosial no politika
sira.
Autor oioin
haree ideolojia, tuir konsepsaun kritika nian, konsidera ideolojia hanesan
instrumentu dominasaun ida nebe atu liu husi meiu konvensimentu (konvense ema)
ka persuasaun (dada ema), la’os ho forsa fizika, aliena konsiensia ema
nian.
Termu ideolojia
uza ho forma ida markante tebes husi filozofu fransez, Antoine Destutt de
Tracy, no filósofo alemaun, Karl Marx, nebe liga ideolojia ba sistema teoriku
sira (politiku, moral no sosial sira).
Destutt de
Tracy, define ideolojia nudar siensia ida nebe aborda formasaun no konstrusaun
ideia sira. Tuir filozofu fransez ne’e, maneira di’ak liu hodi estuda ideia
sira tuir dalan sientifiku no istorikamente mak liu husi dalan ideolojia nian.
Nia fiar katak Revolusaun Franseza nudar dalan nebe di’ak liu hodi promove
mudansa nesesaria iha sosiedade franseza hodi nune’e Fransa bele la’o ba oin ka
progride. Nia ema antimonarkista konviktu ida, nomos konsideradu pensador
materialista ida. Tuir pensamentu materializmu nian, faktu konkretu no material
sira mak tenki serve hanesan baze ba kualker kumpreensaun kona-ba mundu,
valoriza siensia no lasimu metafizika no relijiaun ka kualker tipu abtrasaun ka
idealizmu. Ba filozofu fransez ne’e, ideolojia serve hodi kumpreende no
organiza istorikamente konjuntu husi ideia formulada sira husi sosiedade.
Ba ema sira
nebe kritiku ba ideolojia, sira haree ideolojia serve hodi mantein diskursu
sira nebe ema hanoin buat loos ida, maibe afinal buat falsu loloos ida, ho
objetivu atu mantein estrutura dominasaun ba ema ka halo ideia falsa ka ki’ik
ida hanesan ejemonia ka domina buat hotu.
Karl Marx,
kritiku ida husi kritiku barak ba ideolojia. Nia haree ideolojia hanesan buat
negativu ida. Materializmu istoriku Marx nian, laharee ideolojia hanesan
possibilidade ida hodi haketak produsaun ideia sira husi realidade istoria no
material. Nia defende katak, ideia sira mosu iha determinadu kontestu, no husi
determinadu motivu.
Ba Marx,
ideolojia sai ona instrumentu dominasaun husi klase dominante (burguesia) ba
klase dominada (proletariado). Tuir Marx, iha infraestrutura (ekonomia) ida
nebe mantein sistema kapitalista ba dominasaun. Infraestrutura ida ne’e apoiada
no lejitimada husi supraestrutura ida mak estadu, politika, kultura, relijiaun
no ideolojia sira. Marx fiar katak iha kriasaun aparatu ideolojiku boot ida
hodi halo manutensaun no predominu interesse sira burguezia nian ba interesse
proletariadu sira nian hanesan buat ida lejitimu, tuir moral no loos. Ho ida
ne’e, estadu mosu hanesan mekanizmu dominasaun ida ho sistema politiku. Kultura,
relijiaun no ideolojia sai nudar meiu dominasaun kultural, iha nebe halo ema
proletariadu sira simu dominasaun husi klase dominante sira. Ideolojia nudar
meiu ida hodi mantein ema kalmu liu husi dalan iluzaun ka mehi mamuk ida katak:
kapitalizmu no propriedade privada hanesan meiu justu. Ho lifuan badak, Marx
hakarak dehan, ideolojia husi klase dominante ho ninia objetivu atu mantein ema
sira riku liu hodi kontrola sosiedade, kontrola klase sira dominadu, mak klase
trabalhador ka proletariadu sira nebe barak liu iha sosiedade nia laran, klase
ida nebe esploradu husi klase dominante (burguesia).
Ita bele dehan
Ideolojia nudar konjuntu husi konviksaun ka hanoin boot sira nebe rasionalizadu
no sistimatizadu nebe ema ka grupu sira kaer hodi la’o tuir, hodi forma
sosiedade ideal ida tuir sira nia ideia ka pensamentu. Nune’e, laiha partidu
ida sein ideolojia. Ideolojia hanesan isin no klamar partidu nian. Partidu sira
kesi-an ba ideolojia politika, kesi-an ba doutrina politika, kesi-an ba valor
sira nebe sira fiar no kaer. Nune’e, ideolojia sai
hanesan lilin no matadalan ba ema ka partidu politiku sira hodi tuir, hodi to’o
ba sosiedade ida nebe sira idealiza.[1]
ORIJEN TERMU
ESKERDA NO DIREITA
Molok ita
koalia kona-ba eskerda no direita, ita buka hatene uluk istoria eskerda
no direita mosu iha nebe no mai husi nebe.
Termu politiku eskerda
no direita hahuu mosu iha sekulu XVIII durante Revolusaun Franseza
(hahuu iha 1789) no bazeia iha arranju sira iha Assembleia Nasional Fransa
nian.
Durante prosesu
revolusionariu la’o iha Fransa, sira nebe bolu “girondinos”, konsideradu
ema moderadu no konsiliador liu, tuur iha sorin direita husi Assembleia
Nasional Fransa, no sira nebe bolu “jacobinos” nebe radikal no exaltadu
liu, tuur iha sorin eskerda. Ida ne’e mak nomenklatura politika nebe karateriza
pozisionamentu politiku sira iha sistema kontemporanea nia laran.
Polarizasaun
ida ne’e hamosu problema no polemika barak, liuliu tanba, hahuu husi sekulu
XIX, mosu radikalizasaun ideolojika atu husi eskerda ka direita.
Dezenvolvimentu ideia sira husi autor sira nebe konsideradu direita nian,
hanesan Donoso Cortez no Charles Maurras, nune’e mos husi sira nebe eskerda
nian, hanesan Karl Marx no Bakunin, no sira seluk tan, estimula ona jerasaun
intelektual, movimentu politiku no ativista sira, halo no lori sira ida-idak
hodi fiar ba sira nia ideolojia.
Jeralmente,
segmentu ideolojiku rua ne’e, atu husi eskerda ka direita,
bainhira evolui to’o ona iha ninia forma estrema, dezenvove perspetiva
idealizadora ho objetivu atu halo “transformsaun ba mundu”. Perspetiva utopika
ne’e iha ninia fudamentu sira, atu husi eskerda ka direita, iha
sekularizasaun ba espetativaa apokaliptika kristan, nebe, tuir sentidu orijinal
nian, iha ninia meta hein Jesus mai daruak no juizu final. Ho mundu modernu
nebe mai ona, espetativa sira ne’e transfere ona ba dominiu terrenu no, barak liu,
halai ba asaun politika no ninia prinsipal ajente transformasaun mak
Estadu.
Hanesan temi
ona iha leten, “jacobinos” sira nebe tuur husi eskerda husi Prezidente
Parlamentu nia liman karuk ka eskerda, apoia revolusaun no kontra monarkia.
Sira ne’e favorese ba mudansa radikal ida, halo lakon monarkia iha Fransa no fo
poder ba povu. Tan ne’e, ideolojia eskerda iha relasaun liu ho luta trabalhador
sira nian.
Sira nebe tuur
iha kuana ka direita, nebe bolu “girondinos” apoia rejime tuan, rejime
monarkiku. Bainhira sira kontra maka’as liu tan mudansa no ninia hakarak atu
kaer metin sosiedade tradisional, sira ne’e ba direita liu tan. Tradisaun,
relijiaun institusional no privatizasaun ekonomia, konsideradu nudar valor
fundamental sira direita nian.
SAIDA MAK
ESKERDA NO DIREITA?
Ideolojia eskerda
defende governu tenki garante bem ba sidadaun sira. Ba ida ne’e, governu tenki
boot no forte, kontrola setor hotu-hotu iha sosiedade, regula empreza sira no
kobra impostu sira. Ninia ideia sira inspira husi sosializmu no komunizmu nebe
ita sei haree iha oin. Enkuantu ideolojia direita, defende partisipasaun
governu nian iha sosiedade labele maka’as ka boot liu, husik ba merkadu mak
determina ka dita rasik ninia regra sira. Direita defende
responsabilidade individual mak boot liu no autonomia iha empreza sira, no
labele iha impostu no regulamentasaun boot. Direita ninia hanoin boot mai husi
teoria liberalizmu nian.
DIFERENSA
PRINSIPAL SIRA ENTRE ESKERDA NO DIREITA
Ema eskerda
sira fiar katak tenki iha sistema pagamentu adekuadu ida ba impostu sira, iha
nebe ema hotu tenki selu kuantia espesifika husi buat hotu nebe sira manan
(ganha). Enkuantu direita sira fiar katak tenki selu impostu uituan, labele
boot, husi ema sira nebe produz barak, hodi nune’e sira bele kontribui ba bem
estar sosiedade nian.
Hanesan iha
kazu saude no edukasaun, eskerda sira fiar katak governu tenki iha papel
boot, fornese instalasaun kuidadu saude sira no sistema edukasional ida
gratuitu no asesivel ba ema hotu. Enkuantu ba direita sira hanoin katak,
saude ho edukasaun tenki fornese husi entidade privada sira.
LIBERAL NO
KONSERVADOR
Uluk liu,
konseitu sira liberal no konservador ligadu ho permanensia ka lae
sistema politiku nebe iha. Enkuantu koservador sira hakarak governu sentral ida
forte ka sentralizadu, liberal sira hakarak governu ida desentralizadu. Maibe,
ho instaurasaun ba demokrasia, termu liberal no konservador uza
barak liu hodi define pauta seluk grupu nian,
atu iha kontestu sosial ka ekonomiku nian.
Bainhira trata
kontestu sosial, konservador sira iha vizaun ida tradisional liu, kontra
pauta sira hanesan kazamentu homosexual, legalizasaun
ba drogas, abortu, prostituisaun no migarasaun. Ba ida ne’e, baibain liberal
sira mos apoia ka a favor ba pauta ida ne’e. Maibe, bainhira liga ho kestaun
sira hanesan pena de morte no legalizasaun ba armas, iha diverjensia
entre konservador no liberal sira. Konservador sira
jeralmente apoia pena de morte no legalizasaun de armas, enkuantu liberal sira
kontra.
DIFERENSA ENTRE
ESKERDA, DIREITA, LIBERAL NO KONSERVADOR
Diferensa
prinsipal entre ideolojia sira eskerda no direita nian hetan no
hadulas iha direitu individu no papel Estadu ka Governu nian. Enkuantu termu ka
konseitu sira liberal no konservador, uza hodi define pauta sira nebe sai suporte ba eskerda no direita.
Ema eskerda sira
fiar katak sosiedade sei sai di’ak liu bainhira governu iha papel boot, hodi
garante direitu sira no promove igualdade ba ema hotu. Enkuantu ema direita
sira fiar katak sosiedade ida progride ka buras ba oin bainhira direitu
individu sira nian no liberdade sivil sira hetan prioridade, no poder governu
nian labele boot ka maka’as liu.
Tuir mai ita
haree fali diferensa entre liberal no konservador. Ema liberal
sira iha vizaun ida progressista ka iha oin liu no sira a favor ba mudansa
sira, enkuantu ema konservador sira iha vizaun ida tradisional liu kona-ba
orden sosial nebe iha. Sira kaer metin ba valor tuan sira no lasimu
mudansa.
Importante
tebes halo klaru katak, konseitu sira direita, eskerda, liberal
no konservador muda barak ona kompara ho tempu nebe konseitu no pratika
sira ne’e mosu ka moris. Ohin loron iha linha divizora entre konseitu sira ne’e
ladun boot kompara ho tempu uluk, tanba tempu muda no ema barak halai ba pragmatizmu
hodi solusiona problema sira nebe lorloron hasoru. Maibe atu kumprende di’ak
liu konseitu hirak temi iha leten, di’ak liu ita haree hamutuk iha tabela iha
okos, nudar pauta nebe sai linha divizora ba
konseitu hirak ne’e tuir ideolojia politika ida-idak.
|
Eskerda
|
Direita
|
|
|
Filozofia
politika
|
Liberal
|
Konservadora
|
|
Estadu
|
Ema
eskerda sira defende Estadu tenki boot ka forte, nebe iha papel hodi halo
sosiedade sai fatin oportunidade nebe hanesan ka igual ba ema hotu.
|
Ema
direita sira prefere Estadu ki’ik, labele forte, hodi permite ka fo fatin ba
inisiativa individual sira.
|
|
Empreza
sira
|
Eskerda
sira luta no defende halo regulamentasaun maka’as no tau/kobra impostu boot
ba empreza sira.
|
Direita
sira defende impostu ki’ik no labele halo regulamentasaun maka’as ba empreza
sira.
|
|
Politika
Ekonomika
|
Eskerda
sira defende governu tenki iha programa sosial no infraestrutura sira, tenki
halo regulamentasaun liu tan ba negosiu sira.
|
Direita
sira defende redusaun ba impostu sira no regulamentasaun ki’ik ka uituan ba
empreza sira, redusaun ba gastu publiku.
|
|
Gastu
Publiku sira
|
Ema
eskerda sira hein governu bele garante bem-estar sosial, tan ne’e ninia gastu
sira aas.
|
Ema
direita sira defende redusaun gastu governu nian no ninia programa sira ho
karakter assistensialista ka fo tulun ka karidade sira.
|
|
Igualdade
Rendimentu
|
Hamosu
husi impostu proporsional sira ba ema riku hodi kria igualdade iha renda.
|
Ema
direita sira fiar katak sira nebe iha kapasidade no privilejiu sira atu manan
sira tenki livre halo hodi manan.
|
|
Politika
Saude nian
|
Ema
eskerda sira fiar katak asesu ba kuidadu saude nudar direitu fundamental ida
ba ema hotu, ba ida ne’e tenki garante husi Estadu.
|
Ema
direita sira kontra espanzaun programa saude husi governu no husik ba
inisiativa privada sira.
|
|
Abortu
|
Ema
eskerda sira jeralmente a favor ba politika planeamentu familiar,
legalizasaun ba abortu no halo peskiza ho celulas-tronco.
|
Ema
direita sira kontra abortu no kontra peskiza ho celulas-tronco.
|
|
Droga
|
Eskerda
defende legalizasaun ba droga hodi bele kontrola.
|
Direita
kontra legalizasaun ba droga.
|
|
Prostituisaun
|
Ema
eskerda sira hakarak halo legalizasaun ba prostituisaun hodi bele kontrola
moras sira, no haree ida ne’e hanesan mos profissaun ida.
|
Ema
direita sira kontra legalizasaun ba prostituisaun tanba pratika prostituisaun
ba sira latuir moral.
|
|
Direitu
Homosexual
|
Eskerda
sira jeralmente apoia kazamentu homossexual no lei sira kontra diskriminasaun
|
Ema
direita sira kontra kazamentu homosexual.
|
|
Porte
de Armas
|
Eskerda
sira a favor ba dezarmamentu ka labele hela/la’o ho kilat.
|
Direita
sira a favor ba liberasaun porte de armas
|
|
Ezemplo
partidu sira iha Portugal
|
PS,
PCP, Bloku Eskerda
|
PSD,
PP
|
|
Personalidade
|
Albert
Einstein, Chico Buarque, Karl Marx.
|
Margareth
Thatcher, Adam Smith.
|
ESKERDA NO
DIREITA IHA POLITIKA ATUAL
Tinan la’o
nafatin, divizaun entre eskerda no direita sai kompleksu liu tan,
tanba iha exijensia foun no interesse oioin mosu. Nune’e, konseitu sira eskerda
no direita nian la-sufisiente ona atu define idea politiku partidu sira
nian.
Entaun tenki hamosu tan divizaun sira
seluk hodi esplika partidu oioin ho sira nia reivindikasaun sira. Nune’e,
ikus-ikus ne’e, ita rona no uza termu barak hanesan: estrema eskerda, eskerda,
sentru-eskerda, sentru, sentru direita, direita no estrema
direita. Grupu nebe bolu Sentru mak sira nebe hetan iha klaran,
Sentru-eskerda ka Sentru-direita mak sira nebe besik ba klaran. Eskerda ka
direita mak sira nebe besik ba Sentru-eskerda ka Sentru-direita. No grupu sira
ho ideia sira radikal liu no estremista sira hela iha rohan ka ninin liu.
Sira nebe hetan
iha Sentru mak partidu sira nebe moderadu liu, no sira nebe iha Sentru-eskerda
no Sentru-direita mak partidu nebe tolorante. Partidu sira Sentru,
Sentru-eskerda no Sentru-direita, tanba moderadu no tolerante, sira hetan apoiu
eleitoral boot liu duke sira nebe estremista ka radikal.
Seta iha karaik
hatudu pozisionamentu politiku no ideolojiku individu ka partidu politiku
nian.
Aleinde
divizaun hirak ne’e, grupu balun nebe baibain konsideradu nudar eskerda mak: progressistas,
ambientalistas, sosial-demokratas, sosiais-liberais, libertarius-sosialistas,
komunistas no anarkistas. Enkuantu direita sira mak kapitalistas,
neoliberais, konservadores, ekonomiku-libertarius, anarkokapitalistas,
neokonservadores no nasionalistas.[2]
Tuir mai ita
haree kapitalizmu no sosializmu.
SAIDA MAK
KAPITALIZMU NO SOSIALIZMU?
Kapitalizmu nudar teoria ka sistema organizasaun
sosial ida nebe bazeia iha merkadu livre, iha propriedade privada no ninia
operasaun sira iha fin lukrativu. Iha sistema ne’e, propriedade pertense ba
individu ka empreza sira. Kapitalizmu defende liberdade escolha
konsumidor sira nian. Enkuantu sosializmu nudar teoria ka sistema
organizasaun sosial ida nebe bazeia ba esplorasaun bens em komum, iha nebe
propridade atribui ba trabalhador sira no iha instansia ikus liu, ba iha
Estadu. Sosializmu defende Estadu kontrola ekonomia, Estadu mak
responsavel ba halo planu esplorasaun no distribuisaun ba bens produzidu sira.
DEFERENSA
ENTRE KAPITALIZMU NO SOSIALIZMU
Diferensa entre
kapitalizmu no sosializmu hetan ka hadulas iha papel propriedade,
governu no ekonomia. Kapitalizmu nudar direita, defende Estadu ki’ik, no
sosializmu nudar eskerda defende esplorasaun komun ba bens sira, nebe
tenki kontrola husi governu no ninia lukru tenki fahe entre membru sosiedade
sira.
Atu hatene diak
liu tan diferensa entre sistema rua ne’e, mai ita haree hamutuk tabela iha
okos.
|
Kapitalizmu
|
Sosializmu
|
|
|
Definisaun
|
Kapitalizmu
nudar teoria ka sistema organizasaun sosial ida nebe bazeia iha merkadu
livre, iha propriedade privada no ninia operasaun sira iha fin lukrativu. Iha
sistema ne’e, propriedade pertense ba individu ka empreza sira.
Kapitalizmu
defende liberdade escolha konsumidor sira nian.
|
Sosializmu
nudar teoria ka sistema organizasaun sosial ida nebe bazeia ba esplorasaun bens
em komum, iha nebe propridade atribui ba trabalhador sira no iha instansia
ikus liu, ba iha Estadu.
Sosializmu
defende Estadu kontrola ekonomia, Estadu mak responsavel ba halo planu
esplorasaun no distribuisaun ba bens produzidu sira.
|
|
Ideia sira
|
Iha hanoin
boot rua iha kapitalizmu. Ida defende, Estadu bele halu intervensaun direkta
iha ekonomia nudar investidur boot (a mais). Seluk defende intervenesaun
governu nian iha ekonomia labele maka’as ka boot, tanba sira fiar merkadu
livre produz rezultadu ekonomiku nebe di’ak liu ba sosiedade.
Ho forma
saida de’it, hanoin boot rua ne’e hotu enfatiza lukru individual, la’os ba
trabalhador sira, nebe sei lori benefisiu ba sosiedade tomak. Ida ne’e mak
sai pontu prinsipal kritiku husi septiku sira ba sistema ekonomia ida
ne’e.
|
Iha
sosializmu, labele iha propriedade privada. Iha industria sira ho eskala boot
tenki hanesan bens koletivu, nune’e, retornu husi organizmu sira ne’e tenki
benefisia sosiedade tomak.
Sosializmu
buka halo transformasaun ba sosiedade liu husi distribuisaun ekilibrada ba
propriedade no rikeza sira, ho nune’e haki’ik distansia entre ema riku ho
kiak sira.
Ho nune’e,
individu hotu-hotu tenki iha asesu ba sasan baziku sira konsumu nian.
|
|
Ideia
prinsipal husi defensor teoriku sira
|
Adam Smith, Friedrich
Hayek, Karl Polanyi, Richard Cantillon, Émile Durkheim, Alfred Marshall,
nsst.
|
Karl Marx,
Vladimir Lenin, Friedrich Engels, Charles Fourier, Robert Owen, nsst.
|
|
Sistema
politiku
|
Kapitalizmu
bele moris hamutuk ho sistema politiku oioin, inkluindu ditadura,
demokrasia reprezentativa, republika ka monarkia parlamentarista, no sst.
|
Sosializmu
mos bele moris hamutuk ho sistema politiku oioin, maibe, maioria husi
sosialista sira defende demokrasia partisipativa, nebe bele garante
possibilidade interferensia direta husi sidadaun sira iha prosesu desizaun
Estadu nian.
|
|
Estrutura
Sosial
|
Klase sira
ejiste tuir ninia relasaun ho kapital. Kapitalista sira iha meiu produsaun
sira, simu lukru husi meiu ne’e, enkuantu klase trabalhadora depende ba
salariu.
|
Sosializmu
buka halo ki’ik diferensa entre klase sira. Nune’e, status mai husi
dinstinsaun politika sira la’os husi distinsaun klase sira.
|
|
Relijiaun
|
Kapitalizmu
defende liberdade relijiaun
|
Sosializmu defende
relijiaun nudar assuntu privadu ida. Iha sentidu ida ne’e, individu ida-idak
livre hodi tuir relijiaun nebe de’it, maibe laiha subvensaun ruma husi Estadu
no di’ak liu halo lakon totalmente husi rejime/governu
|
|
Propriedade
Privada
|
Ho protesaun
Estadu nian, propriedade hotu-hotu transforma ba kapital, nebe bele utiliza
ba forma oioin. Direitu ba propridade funsiona iha sistema propriedade formal
ida nia laran, iha nebe propriedade no operasaun sira hotu tenki rejistada.
|
Propriedade
tenki sai publika ka kolektiva nian, inkluindu meiu produsaun sira, nebe
pertense ba Estadu, maibe kontrola husi trabalhador sira.
|
|
Livre escolha
|
Individu
ida-idak hola desizaun sira ba nia-an no tenki moris ho konsekuensia husi nia
asaun sira. Ne’e lasignifika sees husi mensajen husi konsumu nebe bele
halakon ninia liberdade escolha.
Liberdade
escolha permite ba konsumidor sira hodi impulsiona ekonomia.
|
Individu iha
ninia liberdade kondisionada ho ideolojia Estadu nian.
|
|
Koordenasaun
ekonomika
|
Merkadu mak
determina desizaun investimentu, produsaun no distribuisaun.
Iha medida
ki’ik, Estadu mos bele deside kapital atu la’o ba nebe.
|
Sosializmu
depende ba planeamentu ida dirijidu husi Estadu hodi determina produsaun no
oinsa halo investimentu.
|
|
Exemplos
|
Parte boot
husi ekonomia mundial moderna opera tuir prinsipiu kapitalizmu nian. Estadus
Unidus da Amerika exemplo ida husi Kapitalizmu.
|
Rai
sosialista sira mak sira nebe sira nia konstituisaun sira deklara ona laiha
propriedade privada. Exemplo hanesan Xina (maski iha tinan hirak ikus hetan
mudansa barak), Koreia do Norte, Kuba, nsst.
|
|
Estrutura
propriedade
|
Meiu
produsaun sira na’in ba propriedade privada sira, operadu no negosiadu hodi
hamosu lukru ba proprietariu sira.
Empreza sira
bele na’in ba individu sira, kooperativa trabalhador sira nian ka asionista
sira.
|
Meiu
produsaun na’in ba propriedade sosial, no ninia lukru distribuidu entre
sosiedade (iha kazu sira hanesan propriedade publika), ka ba
funsionariu-membru empreza nian hotu-hotu (iha modelo propriedade
kooperativa)
|
|
Movimento
politiku sira
|
|
|
|
Primeirus ramanescentes
|
Ideia sira
komersiu, kompra no venda, ejiste desde mosu inisiu sivilizasaun.
Enkuantu
ideia kapitalizmu nian kona-ba merkadu livre (laissez-faire) nebe
aprezenta ona ba mundu durante sekulu 18 husi John Locke no Adam Smith, nudar
alternativa ba merkantilizmu.
|
Iha 1516,
Thomas More hakerek kona-ba sosiedade ida bazeia iha propriedade komun de
bens, iha ninia livru nebe bolu “Utopia”.
Ikus mai, iha
kriasaun baze ba teoria sosialista sira, Conde de Sain-Simon, Charles
Fourier, Louis Blanc no Robert Owen, mai no konsideradu “sosialista utopiku”.
|
INFOGRAFIKU
KOMPARATIVU
KARATERISTIKA
PRINSIPAL KAPITALIZMU NO SOSIALIZMU NIAN
Kapitalizmu
karakterizadu ho ekonomia ida bazeada iha merkadu, komposta husi komprador
(ema) no vendedor sira (empreza privada no kooperativa); Bens no serbisu nebe
produzidu destina ba halo ka kria lukru: Governu tenki proteje merkadu
livre, tanba nia mak determina investimentu, produsaun, distribuisaun bens
sira; Interferensia governu nian so bele halo no aplika regra ka politika sira
de’it nebe regula konduta negosiu sira nian; Ejiste nesesidade produsaun ida no
kompra kontinu hodi ekonomia kapitalista funsiona efisientemente. Enkuantu
sosializmu karaterizadu ho meiu produsaun propriedade empreza publika ka
kooperativa sira nian, no individu sira hetan kompensasaun tuir baze prinsipiu
igualdade nian; Ejiste oportunidade hanesan ba ema hotu; Industria sira ho
eskala boot nudar esforsu husi kooperativa sira nian, nune’e, retornu husi
industria sira tenki dezenvolvidu no fo benefisiu ba sosiedade tomak; Atividade
ekonomika no produsaun planeia husi autoridade sentral ba projetu sira ho baze,
liuliu, iha nesesidade konsumu ema nian; Forma tradisional sosiedade
kapitalista, hanesan propriedade privada, tenki halo lakon.
VANTAJEN
HUSI KAPITALIZMU NO SOSIALIZMU NIAN
Vantajen
husi kapitalizmu nian mak:
Poder escolha husi konsumidor. Individu sira bele escolha sa mak sira
atu konsumu, no escolha ida ne’e mak halo hodi konkorrensia aumenta, no hamosu
produtu no serbisu diak; Efisiennsia iha ekonomia. Bens no serbisu sira
nebe produzidu ho baze iha prokura nebe kria insentivu hodi reduz kustu sira no
evita desperdisiu ka kerugian sira; Kresimentu ekonomiku no espansaun.
Konkorrensia buka hodi haluan merkadu, aumenta Produto Nasional Bruto (PNB) no
hasa’e pradraun vida nian. Enkuantu vantajen husi sosializmu nian mak: Diminui
dezigualdade. Iha sosializmu, ema individu ida labele iha liu duke seluk,
no empreza sira na’in ba governu. Osan la’os fator nebe hodi kontrola iha
sosiedade sosialista ida; Nesesidades atendidas. Nesesidades ema hotu
nian tenki hetan satisfasaun hotu. Ne’e signifika kuidadu saude tenki
universal, edukasaun gratuita, asesu ba abitasaun ka uma no fasilita buat sira
nesesariu ba vida; Mobilizasaun merkadoria sira. Tipu dezastre hotu-hotu
bele akontese iha sa tempu de’it, no bainhira akontese, kuantidade boot ida
husi serbisu no sasan ka bens nesesariu duni hodi garante katak ema hotu seguru
no hetan atendimentu. Iha sosializmu, governu iha kontrolu total ba sasan sira,
bele utiliza iha area sira nebe presiza; Direitu umanu baziku sira garantidu.
Ideia sosializmu nian balun utiliza iha pratika iha rai hotu-hotu, maibe lahalo
rai sira nebe sai Estadu ho rejime sosialista. Ideia hirak ne’e hanesan dalan
ida hodi garante direitu no bens baziku no nesesariu sira tenki fornese ba ema
hotu. Exemplo balun husi sira ne’e mak sistema edukasaun publika iha Brazil no
sistema universal saude iha Kanada.
DESVANTAJEN
HUSI KAPITALIZMU NO SOSIALIZMU NIAN
Desvantajen
husi kapitalizmu nian
mak: Monopoliu poder. Empreza sira bele kria monopoliu ba
merkadu balun nebe bele abuza pozisaun ida ne’e, bele dezenvolve asaun
prejudisial sira ba sosiedade no kobransa ba presu sira nebe aas ba produtu
balun. Ho poder nebe boot tebes ba konsumu ema nian, kapitalizu ho forma
esplorasaun ekonomika no kultural oioin, hanesan trabalhador sira, no balun
to’o promove alienasaun sosial; Desigualdade. Iha sosiedade kapitalista
sira, bens nebe na’in ba individu, jeralmente passa husi jerasaun ida ba
jerasaun seluk. Entaun, se ema grupu ki’ik ida domina rikeza, no kontinua hatutan
ba ema nebe hanesan, dezigualdade no divizaun sosial, ho tempu, nia sei buras
no boot ba nafatin. Konsentrasaun ba rikeza nudar rin ida husi sosiedade
kapitalista, no kriteriu sira husi sistema sustena, katak ida ne’e aumenta
dezigualdade, tanba ema sira laiha kapital presiza fa’an nia forsa de trabalho
ba sira nebe iha kapital; Resesaun no dezempregu. Ekonomia ida bazeia
iha merkadu konsumidor no produtor sira bele iha osilasaun barak, tanba depende
iha oferta no prokura. Ho ida ne’e, bainhira iha deminuisaun ba prokura,
empreza taka no aumenta dezempregu, no tama iha siklu krize ekonomiku ida. Desvantajen
husi sosializmu nian mak: Falha istorika. Iha mundu tomak, rai barak
koko kuda hanoin sosializmu nian, maibe hotu-hotu falha. La-importa ajuste
oioin mak governu aplika, istorikamente prova ona katak sistema nee la-funsiona
ho ninia totalidade. Maibe, rai barak, hatama medida balun nebe konsiderada
sosialista iha sira nia governu; Laiha buat ida mak ninian. Labele iha
propriedade privada iha sosiedade sosialista ida. Ida ne’e halo individu ida
lana’in ba buat ida, tanba sasan hotu na’in ba “ema hotu” ka na’in ba governu; Inovasaun
no kresimentu ki’ik. Ho sosializmu, nesesidade bazika sira tenki atendida,
entaun individu ida la-preokupa atu haka’as an hodi hetan propriedade ida
hanesan imovel ida. Ida ne’e haree hanesan di’ak, maibe susar atu fiar bele
akomoda ema. Ho ida ne’e, inovasaun, kriatividade, motivasaun no forma
avansu husi sosiedade sai deminuida; Kustu karun. Kuantia osan barak
hodi garante nesesidade ema hotu nian, no osan ida ne’e tenki mai husi fatin
ruma. Entaun, osan hotu nebe sidadaun sira halo, selu iha ho taxa ho
persentajen boot tebes hodi taka kustu hotu-hotu.
Bele
dehan kapitalizmu mos bele kusta karun, bainhira selu taxa barak tau iha
pratika. Balun selu liu, balun selu uituan, fila fali ba dezigualdade nia
ruin-dalen, hetan kritika barak husi sira nebe lafiar ba kapitalista.[3]
SAIDA
MAK SOSIALIZMU NO KOMUNIZMU?
Sosializmu nudar sistema ekonomiku nebe
buka alkansa igualdade entre membru sira sosiedade nian, mantein bens produsaun
nudar bens koletivu nian. Enkuantu komunizmu nudar sistema ekonomiku no
politiku nebe defende sosiedade ida sein klase. Iha komunizmu, meiu produsaun
no bens sira seluk pertense ba governu no produsaun fahe ka dividida hanesan
entre ema hotu.
ORIJEN NO
IDEIA SIRA SOSIALIZMU NO KOMUNIZMU NIAN
Sosializmu
aproveita ideia iluminista balun no estudu sira dahuluk artikuladu husi Henri
de Saint-Simon (1760-1825) no ninia seguidor sira Robert Owen, Charles Fourier,
Pierre Leroux no Pierre-Joseph Proudhon, nebe dezenvolve ona sosializmu
utopiku.
Pensador sira
ne’e aprezenta ona ideia sira kona-ba distribuisaun ida mais igualitaria iha
riqueza, kondisaun trabalho nebe di’ak liu, propriedade komum ba rekursu
produtivu sira no sensu solidariedade ida entre klase trabalhadora.
Balun mos
defende katak Estadu tenki assume papel sentral ida iha produsaun no
distribuisaun de bens. Marxizmu emerje iha meiu ida ne’e, no Engels bolu nia ho
“sosializmu sientifiku”.
Enkuantu komunizmu
ninia orijen mai husi "Manifesto Komunista", dokumentu ida nebe Karl
Marx no Friedrich Engels aprezenta iha 1848. Iha manifestu ne’e, hatudu ona
teoria kona-ba luta entre klase ekonomika sira, nebe sei hatun ka harahun
sosiedade kapitalista ho violenta, hanesan mos uluk halo rahun ka halo lakon
sosiedade feudal durante Revolusaun Francesa.
Hafoin
revolusaun komunista, trabalhador sira sei kontrola meiu produsaun sira. Ho
tempu, governu sei lakon, bainhira trabalhador sira harii sosiedade sein klase
ida no ekonomia ida bazeia iha propriedade komum.
Tuir teoria,
produsaun no konsumu sei alkansa ekilibriu ida, tanba ninia premissa bazeia iha
“ema ida-idak kontribui tuir ninia abilidade no simu tuir ninia nesesidade
sira”. Aleinde ida ne’e, relijiaun no instituisan kontrolu seluk mos sei
hotu.
Ideolojia
revolusionaria Marx nian inspira ona movimentu sosial sira iha sekulu XIX no XX
ho Komuna iha Paris. Exemplo seluk mak Revolusaun Bolchevique iha 1917, nebe
hatun czar russo, hafoin Guerra sivil ida, nebe harii ona Uniaun Sovietika.
Maibe, biar
Uniaun Sovietika governa ona husi Partido Komunista, nia la-konsegue harii
sosiedade ida sein klase, sein estadu no iha nebe populasaun hetan
koletivamente meiu produsaun. Uniaun Sovietika nunka sai realmente komunista.
DIFERENSA
ENTRE SOSIALIZMU NO KOMUNIZMU
Sosializmu
nudar sistema ekonomiku no ideolojiku ida nebe buka atinji igualdade entre
membru sira sosiedade nian. Enkuantu komunizmu, iha sorin seluk, nudar rezultadu
husi implantasaun ideia sira sosialista nian, ninia objetivu prinsipal mak buka
igualdade entre membru sira sosiedade nian. Nune’e, governu, nebe formadu husi
klase trabalhadora, nudar proprietariu prinsipal no iha poder desizoriu iha
assuntu hotu-hotu.
Tuir mai ita
haree iha tabela diferensa entre sosializmu no komunizmu.
|
Sosializmu
|
Komunizmu
|
|
|
Definisaun
|
Sosializmu
nudar sistema ekonomiku nebe buka al-kansa igualdade entre membru sira sosiedade
nian, mantein bens produsaun nudar bens koletivu nian.
|
Komunizmu
nudar sistema ekonomiku no politiku nebe defende sosiedade ida sein klase.
Iha komunizmu, meiu produsaun no bens sira seluk pretense ba governu no
produsaun fahe ka dividida hanesan ka igual entre ema hotu.
|
|
Sistema
politiku
|
Sosializmu
mos bele moris hamutuk ho sistema politiku oioin, maibe, maioria husi
sosialista sira defende demokrasia partisipativa.
|
Sosiedade
komunista ida laiha patria, tanba klase trabalhadora hotu-hotu sei hamutuk
iha ideal boot ida nebe boot liu patria.
|
|
Filozofia
|
Ema ida-idak
kontribui tuir ninia abilidade no simu tuir ninia kolaborasaun.
|
Ema ida-idak
koopera tuir ninia abilidade no simu tuir nia nesesidade.
|
|
Primeirus
remanescentes
|
Iha 1516,
Thomas More hakerek iha ninia livru “Utopia”, sosiedade ida bazeada iha
propriedade komum.
|
Komunizmu
teorizadu iha meadu sekulu 19 husi Karl Marx no Friedrich Engels, nudar
alternativa ba kapitalizmu
|
|
Propriedade
privada
|
Iha tipu
propriedade rua: Propriedade pessoal (item nebe pertense ba
individu, hanesan uma no ropa;
Propriedade
publika, nebe inklui
meiu produsaun. Ida ne’e propriedade Estadu nian, maibe trabalhador sira mak
kontrola.
|
Laiha
propriedade. Konseitu propriedade substituidu ho bens komun.
|
|
Estrutura
sosial
|
Distinsaun
klase sira diminuida. Status rezulta prinsipalmente husi distinsaun
politika, la’os husi distinsaun klase.
|
Laiha
distinsaun klase. Hotu-hotu na’in ba meiu produsaun sira no ninia empregadu
rasik.
|
|
Sistema
ekonomiku
|
Empreza publika
ka kooperativa sira mak na’in ba meiu produsaun sira. Individu sira
kompensadu ho baze tuir prinsipiu kontribuisaun individual.
|
Meiu
produsaun sira mak na’in ba propriedade komum no produsaun sira organiza
de’it hodi atende nesesidade ema nian.
|
|
Relijiaun
|
Relijiaun,
ne’e espresaun burgueza sira nian, tenki elimina husi sosiedade sosialista.
|
Hamos husi
sosiedade komunista
|
|
Movimentu
politiku sira
|
Sosializmu
demokratiku, sosializmu libertariu, anarkizmu sosial no sindikalizmu.
|
Komunizmu
marxista, leninizmu no marxizmu-leninizmu, estalinizmu, trotskizmu, maoizmu.
|
|
Exemplo
istoria sira
|
Exemplu
istoriku sosialista sira inklui Komuna iha Paris, Hungria, Romenia no
Bulgaria. Maibe laiha ida husi rai sira ne’e ida mak ohin loron iha governu
sosialista ida.
|
Partidu
prinsipal komunista sira nian inklui Partidu Komunista Uniaun Sovietika
(1912-1991), Partidu Komunista China (1921-to’o agora), Partidu Komunista
Kuba (1965-to’o agora).
|
PRINSIPAL
DIFERENSA EKONOMIKU ENTRE KOMUNIZMU NO SOSIALIZMU
Sosializmu no
komunizmu defende rekursu ekonomia tenki sai propriedade koletiva, maibe
sira iha diferensa iha kestaun jestaun no kontrole ba ekonomia.
Iha sosializmu,
sidadaun sira hola desizaun ekonomika liu husi komuna ka conselho sira,
enkuantu iha komunizmu, iha uniku partidu autoritariu ida, mak responsavel ba
kontrolu ekonomia.
Sosializmu no
komunizmu mos difere ka haketak malu iha forma destribuisaun ba rikeza
produzida sira. Sosializmu defende katak bens no serbisu produzidu sira tenki
fahe tuir baze produtividade individu ida-idak nian. Enkuantu komunizmu sira
defende rikeza sira tenki fahe hanesan ba ema hotu ho baze tuir nesesidade
individu ida-idak nian.
Diferensa boot seluk entre sosializmu no
komunizmu hetan iha propriedade. Iha sosializmu ejiste tipu propriedade rua: propriedade
pessoal individu ida nian no propriedade industrial nebe pertense ba
sosiedade. Hanesan exemplo, individu sira bele iha televizaun, maibe labele iha
fabrika nebe produz televizaun, tanba kapasidade produsaun televizaun tenki sai
propriedade komum nian nebe jere husi governu. Enkuantu ba komunizmu, bens no
serbisu hotu-hotu, tenki sai propriedade publika nian.
PRINSIPAL
DIFERENSA POLITIKA ENTRE KOMUNIZMU NO SOSIALIZMU
Diferensa
politika entre sosializmu no komunizmu ladun boot, tanba sosiedade komunista so
bele harii liu husi sosializmu. Maibe, ho diverjensia doutrinaria sira durante
sekulu XIX no XX bele destaka distinsaun ruma.
Iha komunizmu
laiha distinsaun ba klase, tanba ema hotu efetivamente hetan tratamentu
hanesan. Enkuantu sosializmu, hakiik de’it klase sira maibe sei iha nafatin
klase, tanba sei iha meius ema balun riku liu sira seluk.
Komunizmu haree
tranzisaun kapitalizmu hanesan revolusaun violenta ida, tanba trabalhador sira
hamrik kontra klase media no alta sira hodi harahun kapitalista. Iha sorin
seluk, sosializmu defende tranzisaun gradual kapitalizmu liu husi prosesu
lagais no politiku, liu husi elesoens.
KOMUNIZMU NO
SOSIALIZMU IHA PRATIKA
Nunka iha
estadu ida mak komunista lolos. Uniaun Sovietika, Xina, Vietname, Kuba, Koreia
do Norte, hanesan exemplo nebe besik liu, maski nein husi sira ne’e ida konsege
estrutura komunista ida lolos.
Iha rai sira
ne’e, maski governu iha papel dominante, sira nunka halo lakon ho loloos
propriedade pessoal, halo lakon kapital no halo lakon sistema klase nian.
Sosializmu mos
nunka adopta totalmente iha rai ruma. Maibe, rai balun hanesan Noruega, Suesia
no Kanada, iha sira nia politika sosial barak liga ho sosialista, hanesan
sistema saude gratuita, aleinde governu iha papel boot balun iha setor barak.[4]
KONKLUZAUN
Ideolojia
hanesan hanoin no pensamentu ida nebe ema ka pensador sira esbelese atu halo ka
to’o ba iha fatin ida ideal, atu lori sosiedade ba fatin ida ideal.
Eskerda no
direita, pozisionamentu politiku no ideolojiku, nebe lori ema ida-idak
atu halis ba nebe tuir hanoin no valor sira nebe sira fiar. Eskerda favorese ba
kontrole Estadu nian ba ekonomia no interferensia ativa governu nian ba setor
hotuhotu vida sosial nian, hatuur ideal igualitariu iha konsiderasaun sira
seluk nia leten, atu moral, kultural, patriotika ka relijioza. Enkuantu direita
favorese ba merkadu livre, defende direitu individual no poder sosial
intermediaria sira kontra intervensaun Estadu nian no hatuur patriotizmu no
valor relijiozu no kultura tradisional sira iha kualker projetu reforma
sosiedade nian leten.
Liberal sira
iha hanoin iha oin liu kompara ho konservador sira. Liberal sira aseita halo
mudansa ka transformasaun enkuantu konservador sira defende status quo,
la-aseita ho mudansa sira no hakarak manein tradisaun no valor tuan sira.
Kapitalizmu
defende merkadu livre no fo liu valor ba ema nudar individu. Defende Estadu
labele halo intervensaun maka’as ba merkadu hodi nune’e sira bele produz bens
no serbisu di’ak no barak liu. Enkuantu sosializmu no komunizmu fo liu valor ba
propriedade kolektiva, maski sosializmu admite propriedade pessoal. Sosializmu
defende rekursu ekonomia jere no kontrola husi ema rasik liu husi conselho,
enkuantu iha komunizmu, jestaun no kontrolu iha uniku partidu autoritariu nia
liman. Sosialista defende fahe riku soin ho baze iha esforsu produtivu husi
individu ida-idak, enkuantu komunista sira fahe riku soin bazeia tuir
nesesidade ema ida-idak nian. Sosialista sira defende bele iha propriedade
pessoal, enkuantu iha komunizmu bens hotu-hotu nudar propriedade kolektivu
nian. Sosializmu permite kapitalizmu bele iha entre sira, enkuantu komunizmu
buka elimina ka hamos kapitalizmu husi mundu.
[2]
Haree mos iha https://www.diferenca.com/esquerda-e-direita-na-politica/
[3]
Haree mos iha https://www.diferenca.com/capitalismo-e-socialismo/
[4]
Haree mos iha https://www.diferenca.com/socialismo-e-comunismo/
No comments:
Post a Comment