Iribaha Uairuru: POVU TIMOR HO NINIA IDENTIDADE

POVU TIMOR HO NINIA IDENTIDADE

Husi: Carlos da Silva L.F.R. Saky

Introdusaun

Estudos barak ona ho dalen oioin kona-ba povu Timor. Antropologu barak halo estudu kona-ba orijen ema Timor nian, maibe seidauk iha estudu ruma hateten kategorikamente, ema Timor puru ka rai-na’in, mak rasa ka etnia ida nebe.

Bainhira ita koalia kona-ba ema puru, ka ema rai-na’in, ita nia hanoin ba kedas ema nebe hela nanis ka moris nanis iha rai ne’e, la’os mai husi rai seluk. Maibe rai-na’in bele mos refere ba ema nebe hela uluk iha rai ne’e, hanesan ema sira hela iha kontinente Australia, nebe ema bolu Aborijen. Konsidera sira mak ema rai na’in tanba sira mak hela uluk iha Australia molok ema mutin sira mai. Ema rai-nain dala ruma bolu mos ho indigena ka nativo.

Estudos antropolijikus sira hotu, kuaze ko’alia hanesan, povu Timor, mai husi rai seluk, mai husi Sudeste Aziatiku, hanesan mos ema Aborijen sira, iha Australia.

Ema Timor sira nia bei-ala, mai no hela iha Timor, tinan rihun molok Kristu (m.K). Sira mai kedas ona iha Idade Pedra (Zaman Batu ka Otas Fatuk), liuliu iha Idade Mesolítico ka Otas Mezolitiku. Otas Fatuk fahe ba faze haat: paleolítico/paleulitiku, mesolítico/mezolitiku, neolítico/neolitiku no megalítico/megalitiku.

Otas fatuk refere ba periudu ida nebe ferramenta sira nebe ema uza, dominantemente, halo ho fatuk, maibe ferramenta suporte balun mos husi ai, au ka ruin sira. Ferramenta sira nebe halo ho ai no ruin sira lahusik hela leut, tanba ninia materia organika, ne’eduni la-dura kleur. Ferramenta sira nebe ema halo sei simples no rudementar (kasar) tebes tanba hodi responde de'it ba nesesidade moris nian. Otas fatuk mosu mais ao menos tinan 600.000 liu ba.

Otas Paleulitiku, refere ba fatuk tuan (inicial), hatadak ho utilizasaun ferramenta sira nebe primitivu tebes. Fatuk nebe sira uza sei rudementar (kasar) tebes, sei tomak, seidauk kadi. Karakteristika ema husi Otas ida ne’e nian mak moris iha grupu, moris besik mota, iha fatuk kuak ka ai-hun. Ai-han sira hetan husi natureza, liu husi halibur hahan no soro (caça), tan ne’e sira lahela metin iha fatin ida, sempre muda husi fatin ida ba fatin seluk (nómada). Ferramenta nebe sira uza mak fatuk naruk nebe iha kaer fatin ho tutun meik no fatuk nebe ninin kroat hodi tesi ka ko'a ai no loke animal nia kulit.
.

Otas Mezolitiku mak ida nebe ema halibur ai-han sei iha nivel kontinuidade, nebe hahuu husi Otas Zelo (Zaman Es ka Idade Zelo) mais ao menos tinan 10.000 liu ba. Karateristika ema sira nebe moris iha Otas ida ne’e mak ema sira melanezoide ka melaneziu, bei-ala ema Papua, Semang, Aeta, Sakai, no Aborijen sira nian; Iha Otas ida ne’e ema sei halibur aihan, hela iha fatuk kuak (gruta ka gua) sira; ferramenta nebe sira uza mak baliu Sumatra, ferramenta sira husi animal sira nia ruin no ferramenta sira meik no kro’at husi fatuk.

Otas Neolitiku mak otas fatuk foun (nurak). Otas Neolitiku mais ao menos hahuu tinan 1500 m.K. Ninia karateristika mak ema hahuu produz hahan, liu husi fila rai no hakiak animal; moris/hela iha uma ain aas hodi sees husi animal fuik/siak; Iha mudansa iha estilos de vida (revolusaun kultural); Ferramenta nebe sira uza mak fatuk kuadrangular (sikun haat) ho tutun kro’at no fatuk naruk ho tutun meik. Ferramenta sira sei halo ho fatuk maibe kadi ona, halo meik no kro’at ona.

Enkuantu Otas Megalitiku mak Otas ida nebe ema kuinese ona fiar dinamizmu, mak fiar ba klamar bei-ala sira nian. Leut ka ferramenta sira husik hela husi Otas Megalitiku hetan iha Nias, Sumba, Flores, Sumatra Sul, Sudeste Sulawesi, Kalimantan no iha Timor-Lorosa'e. Ferramenta sira nebe hetan mak: Menhir (monumentu fatuk hanesan fatin hodi halo adorasaun no hamulak). Harii husi fatuk ida ka fatuk butuk nudar fatin hodi adora no hamulak ba bei-ala sira. Hetan iha Sumatra, Sulawesi Sul no Kalimantan; dolmen (meja husi fatuk hodi rai ofertoriu sira), dala ruma hodi halot mate iha laran hodi animal fuik sira labele han. Tau mate iha laran depois taka metin. Hetan iha Jawa, Sumatra no NTT; sarkafogus (konstrusaun ho forma kuak hanesan kaixaun); rate fatuk (fatuk belar sira hada sa’e malu hodi hakoi mate); Punden berundak (konstrusaun andar nudar fatin ba hamulak ka adora bei-ala sira); Arca (Halo sujeitu iha forma ema ka animal hodi adora).

Estudu antropolijuku sira hatudu, rasa 4 mak tama uluk iha Timor, mak vedo-australoide, papua-melanezia, proto-malaiu no deutero-malaiu. Aleinde rasa 4 ne’e, tanba prosesu naruk no kruzamentu entre povu sira ne’e, hamosu mos grupu etniku, dalen (lingua) no dialetu oioin, nebe namakari iha Timor laran tomak.

Bainhira ita koalia kona-ba povu ida, mak ita koalia kona-ba ema sira moris iha territoriu ida, nasaun ida no sosiedade ida nebe iha lian, kustume no interesse sira hanesan, iha istoria no tradisaun ka kultura komum. Enkuantu rasa refere ba karateristika fiziku ema nian, hanesan estrutura ruin no kor kulit, kor matan, kor fuk, forma ka bentuk matan ka fuk.

Aleinde rasa iha mos etnia. Rasa ida bele forma husi etnia ida ka liu. Etnia refere ba ran ka desendensia nebe hanesan. Grupu etniku ida reprezenta husi kultura nebe hanesan, lingua ka dalen nebe hanesan, fiar nebe hanesan, modu hatais nebe hanesan, komportamentu nebe hanesan no fiziku ka karateristiku bilojiku nebe hanesan.

Povu ida-idak iha ninia kultura. Kultura husi fatin ida ba fatin seluk bele hanesan ka diferente. Kultura iha Tetun ita kuinese ho lisan. Kultura karateriza ho lingua ka dalen, ho arte, ho fiar no pratika sira nebe la’o, repete no repete hikas husi sosiedade ka povu ida. Ho kultura ita bele haree diferensa entre grupu ida ho seluk hanesan lian, ritual, arte, hatais, dansa, desportu no relijiaun.

Tanba rasa oioin mak tama iha Timor lori mos linguas no dialetus oioin. Dalen ka lingua mak lian sira nebe ema uza hodi komunika ba malu, maibe lian ida ho lian seluk diferente tebes. Hanesan Makasae ho Naueti, lingua rua diferente tebes. Bee iha Makasae, ira no iha Naueti wai. Enkuantu dialetu refere ba dalen sira nebe sira nia lingua ka dalen inan hanesan, entre sira sei iha liafuan barak hanesan. Por exemplo entre Waima’a no Naueti, dalen rua ne’e hotu bolu wai ba bee.

Iha Timor, ita nia bei-ala sira mai kedas ona ho sira nia kultura ka sira kria kultura foun, kria regras, normas no valores hodi regula sira nia moris.

Iha artigu ida ne’e sei foka ba povu husi rasa oioin nebe mai iha Timor nune’e mos kona-ba grupu etnolinguistiku sira nebe eziste iha Timor, inkluindu pratika kultural balun nebe sira halo iha uma lisan ka uma lulik sira. Aleinde ida ne’e, halo mos komparasaun ba grupu dalen austronezia balun, liuliu haree oinsa sira sura numeru Kapital husi ida (1) to’o sanulu (10) nebe kuaze atu hanesan ka hanesan loloos. Ita hahuu ho haree hamutuk orijen ema Timor nian.

Orijen Povu Timor

Atu hatene povu ka rasa husi nebe mak tama uluk iha Timor, mak ita tenki buka nia leut sira. Leut sira nebe ita nia bei-ala sira husik hela hanesan instrumentu ka ferramenta (peralatan) sira nebe sira produz no uza, nebe hetan iha Timor no mos iha rai seluk. Nune'e mos kona-ba dalen sira nebe iha similaridade ka hanesan. Por exemplo, iha Naueti, Waima'a no dalen Hawaii, hotu-hotu dehan wai, ba bee. Ahi, iha dalen Tetun no dalen Hawaii, hanesan. Matan iha Bahasa Indonesia mata, iha Somoa, mata, iha Hawaii, maka, iha Tagalog, mata, iha Naueti, mata. Ulun, iha Samoa, ulu, iha Naueti, ulu, iha Tagalog, ulo. Liman iha Malagacy (Malagaskar), tanana, iha Makasai, tana, iha Samoa, lima, iha Hawai, lima.

Iha 1953, Missão Antropológica de Timor, hetan fatuk (lítico) sira nebe hanesan: lascas, lâminas, raspodores no nucleos. Ferramenta sira ne’e pertense ba Otas Paleoliku Inferior, Mediu no Superior. Ikus mai, hetan tan serie 3 iha Gossi-Liu, iha Laga.[1] Iha fatin ne’e heatn tipu utensiliu oioin.

Arkeologu fransez, H. Breuil, iha ninia estudu hateten katak, ferramenta hirak temi iha leten no objetu sira seluk, materia-prima hanesan jaspe ka fatuk kinur ka mean, calcedônia (berlian), ágata[2], carolina[3] no sílica[4], husi interior Laga. Ho leut sira ne’e, nia konsidera provavel tebes ema antigu, moris iha ilha Timor. Ema hirak ne’e provavelmente tun iha kosta norte (pantai utara) Timor.[5]

Iha 1963, investigador seluk, António de Almeida, hetan no halibur pesa ki’ik sira husi fatuk lascada (fatuk rahun) hamutuk 32. Nia hetan iha fatuk kuak ida iha Lene Hara, Munisipiu Lautem. Fatuk sira ne’e pertense ba Otas Mezolitiku nian.[6]

Molok ida ne’e, iha 1962, Rui Cinatti, observa pintura 3 nebe hetan iha estasaun 3 iha Munisipiu Lautem. Dahuluk iha rai-naruk Tutuala nian; daruak iha Ili Kere Kere; no datoluk iha fatuk kuak Lene Hara. Husi pintura sira ne’e hatudu ema halo dansa guerreiru ka ho manu rapina (makikit) nia ulun, mesak ka iha grupu 4; Balun hanesan embarkasaun transporte mate nian no ninia motivu sira mos hanesan. Tuir Rui Cinatti, pintura sira ne’e hatudu momos hakarak ida atu hetan poder majiku husi elementu sira nebe reprezentadu iha pintura sira. Sira hakarak hetan protesaun no tulun husi poder sira nebe sira pinta tan ba fatuk sira.[7] Besik mos iha fatin hirak ne’e, iha leut, fatin ba kultu no selebrasaun ritual sira. Pintura hirak temi iha leten, hanesan ho pintura sira nebe hetan iha Sulawesi, iha Ceram, nsst. Iha ne’e hatudu momos Timor nia bei-ala sira iha relasaun ho influensia husi sivilizasaun sira iha Indonezia. Ida ne’e mos hatudu katak Timor nia bei-ala ho ema Sulawesi, Ceram, nsst, mai husi hun ida.[8]

Molok ne’e, iha 1930, kapitaun Correia de Campos, hetan no halibur espólios sepulcrais ka objetu lubun ida nebe hakoi iha rai laran, iha Postu Administrativu Alas. Objetu sira nebe nia hetan halo husi ruin, nebe ema baibain uza hodi hafurak-an. Objetu sira ne’e hanesan kadeli husi elefante nehan, osa-mean, osa-mutin, brinku husi osa-mean, osa-mutin no riti. Seluk ho objetu sira ne’e, iha belak, kelu husi osa-mean no osa-mutin. Hetan mos keramik lokal no husi li’ur ninia rahun sira.[9]

Iha Sentro Leste, liuliu iha Postu Administrativu Baguia, investigador sira, hetan mos leut husi Timor oan sira nia bei-ala. Iha 1936, Buhler, hetan iha fatuk koak ida, fatuk rahun balun, nebe pertense ba Otas Mezolitiku ka Proto-neolitiku sira. Objetu sira ne’e depois estuda husi Sarasin, no nia klasifika objetu sira ne’e iha relasaun ho kultura neolitiku husi Papua Guine no ilha sira Almirantado no Salomão.[10] Ne’e mos nudar prova ida, bei-ala sira iha neba, iha ligasaun ka mai husi rasa Papua ka hun ida ho ema Papua sira.

Husi fatin no objetu sira nebe investigador sira hetan, sira konklui katak, iha laloran ema sira antigu liu, husi Otas Paleolitiku nian, tama ona iha ilha Timor, sira tama husi kosta norte, no liu iha neba husi periudu oioin hafoin Otas Fatuk.[11]

Tuir mos investigador sira, bazeia ba leut no evulusaun hirak nebe hetan iha Timor no ilha sira Indonezia nian, hanesan iha ilha Jawa, Kalimantan, Flores, nsst, hatudu katak, ema antigu sira, uluk, hela iha parte oioin iha arkipelagu Sunda no Timor. Maibe tanba iha kuak boot ida, tasi, nebe haketak Australia no Nova-Guine, impede introdusaun fauna mamiferu boot sira, nudar proto tipu dahuluk. Nune’e iha faze dahuluk povoamentu, loloran ikus nebe tama iha Timor lato’o liu ba iha zona sira iha periferia.[12] Iha Timor ita so hetan mamiferu boot mak karau, maibe animal boot seluk hanesan elefante, ipopotamu, nsst, lahetan iha Timor, maibe hetan iha Jawa, Sumatra no Kalimantan.

Deskoberta arkelojika hirak ne’e hatudu mai ita katak, kleur tebes ona, iha okupasaun iha ilha Timor, okupa husi ema husi rasa oioin. Estudu sira hotu hatudu, bei-ala sira ema Timor nian mai husi Sudeste Aziatiku (Asia Tenggara), husi nukleu populasaun eterojenea sira hanesan Proto-malaio, Deutero-malaio, Negritos, Vedaikus, Dravidikus no Melanezius. Ema nebe bolu Negritus mak ema kulit nakukun no fuk ben ka ondas sira. Diferente ho ema Papua ka afrikanu sira nebe metan no fuk kribu ka kriting. Ema vedaikus mak ema sira pertense ba rasa Vedas nebe hetan iha India. Ema sira koalia sansikerto ka sansekerta iha India, sira nia bei-ala mak Vedaiku. Dravidikus hanesan mos Vedaikus, hetan iha India, liliu iha Sul India no Norte Srilanka. Dravidikus diferente ho sansikertu. Enkuantu Melanesziu mak ema kulit metan no fuk kriting sira nebe espalhadu iha ilhas sira iha pasifiku.

Ema husi rasa sira temi iha leten, tama iha Azia no husik hela marka sira nia prezensia, hatudu husi deskoberta ba objetu sira nebe hanesan, nune’e mos husi karateristika morfolojika no kultura nebe hanesan ho ema sira nebe ohin loron moris iha ilha sira Insulindia (Nusantara), inkluindu Timor.

Ema sira austro-aziatiku, pertense ba Proto-malaio. Austro-aziatiku, refere ba ema ka povu sira husi hun ida, nebe hetan iha Sul Azia (Asia Selatan) no Sudeste Aziatiku. Dalen nebe tama iha austro-aziatiku mak dalen Vietname, Khemer no Mon nebe iha rejistu istoriku naruk. Dalen Vietname no Khemer nudar dalen ofisial iha Vitname no Komboja, enkuantu dalen Santali no Khasai nudar dalen ofisial iha Estadu balun iha India. Dalen austro-aziatiku namakari ketak-ketak iha India no Bangladesh, Sudeste Aziatiku, haketak husi rai sira nebe koalia dalen seluk. Dalen austro-aziatiku nudar dalen orijinal populasaun lokal sira iha Sudeste Aziatiku no parte Oriental India. Dalen inan austro-aziatiku nian mak austronezia, nebe forma hun boot ida, bolu Astriku.

Sivilizasaun austro-aziatiku sai komum iha Sueste Aziatiku, nebe identifika ho era metal ka besi, nebe hahuu husi Peninsula (tanjung) Indoxina por volta de 600 a.K., no serka de tinan 300 tuir mai. Iha era ida ne’e, ema Proto-malaio seidauk kuinese eskrita, nune’e mos sira nia teknika no kultura seidauk evoluida.[13]

Em jeral, estudus sira iha sekulu XX nia hatudu, sivilizasaun Timor nian pertense ba austro-aziatiku, pertense ba ramu austronezoide. Austronezoide ne’e mak rasa austronezia, nebe namakari iha ilhas sira iha Insulindia, inkluindu Timor balun. Dalen Austronezia nian, mak dalen nebe namakari luan iha mundu rai kalaran. Husi Taiwan no Hawai iha extremu norte to’o iha Nova Zelandia (Aotearoa) iha extremu sul no husi Madagaskar iha extremu oeste to’o ilha Paskoa (Rapanui) iha extremu oriente.

Husi estudus sira hatudu, iha Sudeste Aziatiku no Insulindia, iha sivilizasaun komum ida, liuliu iha kultura indoneziu nian ka malaiu nian, nebe karateriza husi nivel sivilizasional rua: ema indoneziu antigu no foun, hatadak ho uza hahuk (zarabatana), hatudu ninia kultura sobrevivensia ida. Enkuantu ema malaiu uza besi, uza bero (roo oan) no iha vida politika, ekonomika, sosial no kultural. Buat hirak ne’e hotu hatudu katak etapa siklu sivilizasaun ema austronezoide nian aas.

Estudu sira hotu hatudu katak, rasa nebe sama uluk ain no hela uluk iha Timor, mak rasa Papua. Ikus mai, rasa sira seluk tama no hela kahur malu, hodi hamosu grupu etniku oioin iha Timor-Lorosa’e.

MIGRASAUN POVU SIRA NIAN

Iha sekulu XIX nia klaran, Alfred Russel Wallace, konsidera ema foho husi parte Lorosa’e Timor nian pertense ba rasa Papua. Enkuantu Henry Forbes, iha 1880, hetan, ema rasa oioin iha Timor, hanesan Malaius, Papuas no Polinezius. Malaiu, mak ema sira hela iha peninsula (semenanjung) Malaia, Sul Tailandia, Filipinas, Singapura, Sentru Leste iha Sumatra no ilhas Riau. Papua mak ema metan no fuk kriting sira nebe hela iha Papua. Iha rasa rua lahanesan mak hela iha Insulindia (Nusantara). Rasa Mongoloide nebe okupa parte Oeste no Norte. Enkuantu iha Leste no Sul okupa husi rasa Austromelanesoide. Fisikamente, fasil distingui entre rasa rua ne’e. Ema Papua reprezenta rasa austro-malaio no ema malaiu reprezenta rasa mongoloide. Enkuantu ema polineziu mak ema sira nebe halo parte husi Austronezia orijinal iha ilhas sira Polinezia, sanak ida husi subfamilia Oseaniku husi lia inan Asutronezia. Ema Polinezia orijinal iha Nova Zelandia no Hawaii, ohin loron sai minoria iha sira nia rain.

Alfred Russel Wallace iha ninia estudus sira iha meadus sekulu XIX, nia konsidera ema Timor sira hela iha parte Lorosa’e, tipu ema Papua. [14] Maibe Henry Forbes iha dekada 1818 hetan ema ho tipu estatuaria oioin iha Timor. Nia dehan ema rai na’in sira Timor nian, tipu ema Malaius, Papuas no Polinezias. Nia hatur ipoteze ida katak ema Negritos sira mak sira nebe ho estatuaria ki’ik nebe hetan iha Matebian.[15] Ipoteze ne’e bele loos haree ba estrutura fizika, kor kulit no fuk metan no ondas husi ema sira nebe hela hadulas iha foho Matebian hun, nebe klasifika ba Negritos. Maibe ema sira nebe hela hadulas iha Matebian hun mos iha ema fuk mean. Seidauk iha estudus ruma mak identifika, sira ne’e mai husi nebe. Ema konta husi ibun de’it katak fuk mean sira ne’e desendente husi ema Noruega. Dehan tinan rihun atus liu ba, roo-ahi Noruega nian ida mak encalhado (terdampar) iha kosta norte, sira mak hela tiha iha neba no ninia desendente mak fuk mean sira ne’e. Maibe seidauk iha estudus ruma hodi konfirma ida ne’e.

Iha 1898, mediku Barros e Cunha bainhira halo observasaun ba koleksaun ida husi kranios ema rai na’in (indegenas) 35 nian nebe hetan iha Timor-Lorosa’e no rai ona iha Muzeu Universidade Coimbra, nia konklui katak, Timor hetan influensia husu Papua.[16]

Molok ne’e, iha 1893, Ten Kate, nebe halo estudus kona-ba povu sira iha Insulindia, inkluindu Indonezia, nia hateten katak, pelo menos, iha ilha Timor iha elementu oioin mak kontribui maka’as ba eterojeneidade nebe iha.[17] Ten Kate mai reforsa tan estudus sira Quatrefages no Hamy nian katak, ema Negrito no Papua sira dezempenha papel importante iha etnojenia Timor nian, maibe sira nia destribuisaun iha ilha Timor lahanesan. Iha populasaun mista ho ran melaneziu no Indoneziu mak predomina liu duke negroide iha Oeste no amarelo iha sentru (rai klaran).[18]

Liu tiha tinan balu, Ten Kate rasik reforsa ideia eterojeneidade rasa nebe hatudu husi elementu malaneziu-papua no negrito-papua. Nia dehan raru (jarang) hetan ema puru, liuliu iha parte osidental ilha Timor, iha Flores, iha Solor, nune’e mos iha Sunda no Savu.[19] Konkluzaun hirak ne’e lahan malu no kontraria ho korrente dominante, liuliu liga ho parte oriental ilha Timor.

Ikus mai, husi dokumentu “Album Fontoura” nebe kompostu husi fotografias naturais sira husi rejiaun oioin iha parte oriental, Mendes Correia konklui katak, rasa proto-malaio mak domina iha Timor-Leste, hamutuk ho rasa sira deutero-malaio, vedo-australoide, melanezoide, ho proporsaun ida nebe ki’ik, liuliu ida ikus, maibe hetan barak iha Atoni sira iha parte Indonezia nian no Oekuse.[20] Enkuantu Atauro, tuir Antonio Leite de Magalhães, iha 1918, katak iha mestisajen ka ran kahur husi rasa kinur (amarela) nebe fuk ben no metan nebe fuk krespu, kruzamentu husi dolicocéfalo (berkepala lonjong) ho branquicefalo (oin naroman), hanesan ema Papua Nova Kaledonia nian.[21]

Husi estudu hirak ne’e hotu, Luís Filipe Tomás, halo rezumu ida kona-ba ema Timor. Investigador ne’e konklui katak, iha rasa haat mak kahur malun iha Timor. Rasa haat nebe tama uluk iha Timor mak: 1) Vedo-australóide, ho trasu sira atu hanesan ho ema Aborijen sira iha Australia no Vedo-Ceilão (Srilangka). Rasa ida ne’e hetan iha Otas Mezolitiku. Sira ne’e mai Timor iha tinan 7.000 m.K. no konstitui 15 to’o 20% populasaun Timor; 2) Papua-Melanezia, ho karater negroides, mai husi Indonezia Oriental, liuliu husi Papua, por volta de 3.500 m.K. nebe reprezenta 7 to'o 8% populasaun Timor. Rasa ida ne’e hetan iha Otas Neolitiku; 3) Proto-malaiu, mos mai husi Indonezia, liuliu husi Sumatra no Kalimantan, tama iha Timor por vota de 2.500 m.K., konstitui serka de 60% ema Timor, iha Otas Neolitiku nebe avansadu liu, Megalitiku. Rasa ida ne’e mak husik hela lingua ka dalen austronazias ka malaio-polinezias no elementu fundamental seluk ba kultura Timor oan sira nian. Ikus liu, 4) deutero-malaio, fuzaun husi populasaun mongoloide no proto-malaiu, tama iha Timor por volta de 500 a.C. no reprezenta 20% husi populasaun Timor. Rasa ida ne’e mak hahu introduz uzu metal (besi) sira iha Otas Bronze (Zaman eerungu).[22] Haree ba persentajen nebe iha, rasa Proto-malaiu mak predominante iha Timor (60%) no rasa Papua-Melanezia okupa persentajen nebe ki’ik liu (7-8%) husi ema Timor.

Vedo no Australoide, rasa rua ne’e ninia bei-ala sira mai husi parte Este Hindustan depois liu ba Indoxina no ilhas sira Malaio. Rasa Vedo iha papel ba formasaun rasa tranzisaun ida iha Sul India (Dravidia). Rasa Vedo namakari iha parte Oeste hodi halo formasaun ba Vedo-australoide. Buat nebe karateriza liu husi rasa Vedo mak ema ho grupu etniku sira hela iha Leste India no Srilangka. Ne’e inklui sira nebe hela iha ailaran tropiku no komunidade etniku balun. Rasa Vedo ne’e hetan iha populasaun sira iha Sul India. Jeralmente ema India iha karateristika ema rasa Vedo nebe mai husi grupu linguistiku oioin. Rasa Vedo husi Srilangka ne’e kuinese mos ho Ceilão. Suku balu iha Indonezia nebe klassifikadu nudar desendente Vedo nian mak suku Kubu, Sakai, Toala, Tokea no Tomuna. Iha Timor-Leste, ema Atoni sira, husi nia fizika no koor kulit hanesan ema husi Srilangka. Sira ne’e, possivelmente desende husi rasa Vedo ka Ceilão. Enkuantu rasa Australoide namakari iha Sul Azia, Sudeste Aziatiku, Australia, Melanezia no Leste Azia. Rasa Australoide rasa ida “espesial” tanba ninia kulit nakukun. Rasa Vedo iha Sul Azia, inkluindu sira nebe hela iha Srilangka, ninia kulit metan no fuk ondas. Enkuantu grupu Melanesoide ninia fuk kriting. Rasa Australoide namakari iha area Sudeste Aziatiku, Sul Azia no Australia. Hanesan ema sira hela iha Papua, Aborijen Australia, Melanezia (Fiji, Nova Kaledonia no Vanuatu) no ninia populasaun nebe klassifikadu ba Negroide mak ema Andaman, Semang, Manik, Aeta, Ati no grupu etniku oioin iha Filipinas. Grupo rasa Vedo iha Srilangka nebe ninia kulit nakukun hanesan ema Munda, mos tama iha klasifikasaun rasa husi Australoide. Karateristika rasa Australoide mak kulit nakukun (cokelat kehitaman), kor matan metan, fuk ondas to’o kriting, ninia ruin mata fukun aas (menonjol), nia keixu (rahang) boot no mahar, ninia oin dolicocéfalo (oval). Ema vedo-australoide tipu atu hanesan ho ema aborijin Australia.

Melanezia, husi dalen Gregu, katak ilha metan. Melanezia mak ilha sira hahu husi Papua no Aru depois ba Este to’o Pasifiku parte Oeste, Norte no Este tasi Australia nian. Rai sira nebe ukun an ona no halo parte Melanesia mak Fiji, Vanuatu, Solomon Islands, Papua New Guinea. Ema papua-melanosoide ninia estatura ki’ik, kulit nakukun/metan, fuk kriting (frizado), oin kabuar (fronte arredondada).

Ema Proto-malaiu mak rasa nebe iha ninia kultura orijinal no mai iha Insulindia (Indonezia) nudar laloran dahuluk serka de 1500 a.K. Sira ne’e bolu Malaiu tuan tanba sira mak mai uluk kompara ho Deutero-malaiu. Desendete husi rasa ne’e nian mak suku Dayak, Mentawi, Batak no Toraja, inkluindu maioria husi Timor oan sira.

Enkuantu ema Deutro-malaiu mak rasa Malaiu nebe mai iha Insulindia nudar laloran daruak serka de 400 m.K. Sira ne’e ninia kultura relativu avansada liu Proto-malaiu. Desendente sira husi Deutero-Malaiu ema sira husi suku Jawa, Malaio, Bugis, Bali no Makasar. Ema Deutero-malaio aas liu Proto-malaio no mutin (branquicefalo), no ema mongoloide naroman liu tan.

Prosesu mistisajen iha Timor lori tinan rihun ba rihun. Se ita haree ba karateristika ema Timor nian, rasa nebe predomina liu mak Proto-malaiu nebe karateriza ho estatura ka isin badak, kulit naroman, fuk metan, oin losângica no dolicocéfalo.

Aleinde rasa haat temi iha leten, mai mos malae mutin sira liu husi kolonizasaun portugueza iha Timor. Nune’e mos ema husi Xina, India, Arabi no Afrika. Ema Xina, Afrika no India mai hamutuk ho kolonialista portugues, balun nudar ezersitu, balun hanesan funsionariu. Aleinde nudar ezersitu no funsionariu balun mos nudar komersiante no deportadu. Deportadu sira mai husi Portugal no Makau. Iha Timor, ema husi rasa oioin sira ne’e kruza malu no kaben, no sira nia oan sira kuinese ho mestisus.

Molok portugues sira mai Timor iha 1515, Xina sira mak mai uluk, mai iha 1212, nebe temi iha dokumentu ofisial husi dinastia Ming (1436) nian, iha nebe koalia kona-ba Timor no sandalo.[23] Aleinde Xina mai mos ema India. Xina ho India, sira nia sivilizasaun aas liu iha Azia. Kleur ona ema Xina halo komersiu mai iha Sudeste Aziatiku, maibe sira nia influensia ladun boot hanesan ema India nian, tanba ema Xina sira taka-an ba ema lokal sira, lahanesan ema India. India iha influensia boot liu tanba sira iha kultura eskrita, iha relijiaun (budizmu no hinduizmu) nebe organizada, iha direitu kodifikadu, iha estadu sentralizadu, nsst.

Indianu sira mak lori influensia boot mai Sudeste Aziatiku, liuliu mai Indonezia. Sira mak lori relijiaun Hindu no Budizmu mai Indonezia, no hamutuk ho ema Arabi, sira introduz Islam iha Indonezia. Islam sa’e maka’as iha sekulu XVI, sa’e iha periudu nebe kristianizmu mos tama iha Sudeste Aziatiku, liu husi missionarius no komersiante portugues sira. Ema India iha influensia maka’as iha Indonezia maibe ladun iha influensia iha Timor. Ladun iha influensia ida ne’e, ita bele nota husi influensia, Islam, Hindu no Buda nian ladun maka’as iha Timor. Katolisizmu mak iha influensia maka’as iha Timor, liu husi missionariu Portugues sira, maski nune’e, antes de 1975, populasaun Timor nebe tuir relijiaun Katolika, laliu 30%. Numeru ema Katoliku iha Timor foin aumenta maka’as, sa’e ba 90%, hafoin invazaun Indonezia nian. Numeru nebe haksoit maka’as ne’e nudar reasaun no rezistensia hasoru Indonezia nebe maioritariamente Islam. Antes de 1975, maioria Timor oan sira fiar tuir animizmu nian. Biar numeru Katolika nian sa’e maka’as, maibe ita bele dehan, to’o ohin loron, maioria husi Timor sira kontinua kaer metin pratika sira animizmu nian. Marka animizmu nian ida mak refleta iha pratika sira iha uma lulik sira nebe namakari iha Timor laran tomak, nebe Timor oan sira kaer metin hodi halo nia ritual sira hodi evoka ka hamulak ba bei-ala sira, kontinua fiar no adora foho lulik, fatuk lulik, bee lulik, nsst.

Indiano no Arabi sira mai ikus, mai iha sekulu XIX ka inisiu sekulu XX. Iha 1860, ema husi Afrika, nudar ezersitu portugues, hamutuk 100 mai Timor atu funu hasoru Timor oan sira nebe halo revolta iha fatin oioin iha Timor. Iha 1912, mai tan soldadu na’in 190. Barak husi militar afrikanu sira ne’e kaben ho feto Timor sira.[24] Husi sira ne’e mak ita hetan mos Timor oan sira metan no fuk kribu hanesan ema Afrika sira.

Aleinde rasa sira temi ona iha leten, povu Timor mos konstitui husi grupu etniku oioin. Ita bele dehan, grupu etniku sira Timor nian mai husi rasa ka desendente husi rasa haat temi iha leten.

Sivilizasaun austro-aziatiku korresponde ba unidade linguistika nebe hanesan, pertense ba familia malaiu-polinezia, nebe kobre Insulindia tomak, espasu nebe Timor mos tama iha laran.

António de Almeida, konklui katak iha afinidade boot bio-sanguineas, la’os de’it entre grupu etnolinguistiku sira iha Timor, maibe mos ho ema Indonezia, Papua, Australia, Maori, Filipina no Hawaii.[25] Iha ne’e, ita bele dehan la’os ran de’it mak kahur malu, maibe dalen mos. Iha dalen Hawai nian, wai signifika bee hanesan mos iha Naueti no waima’a. Ka numeru kardinal, tolu, lima, hitu no walu nebe hanesan ka kuaze hanesan entre dalen sira Austronezia, Bali, Jawa Antigu, Malagasi (Madagaskar), Fiji, Samoa, Tongan no Tetun, hatudu sira mai husi hun ka fatin hanesan. Similaridade sira ne’e hanesan P. Rivet, hateten iha ninia estudu katak, komunidade linguistika nebe boot, mai husi laloran ema nebe sai husi fatin ka rejiaun nebe hanesan ka besik malu[26].

Iha tabela iha okos, ita bele haree grupu dalen Austronezia, nebe ninia numeru kardinal barak kuaze hanesan, inkluindu dalen balun husi Timor-Lorosa’e nian.

Tabela iha okos, dezenvolve husi autor, bazeia ba tabela ida hetan iha Wikipedia, Daftar angka dalam berbagai bahasa.[27] Iha tabela ne’e, autor hatama dalen sira Timor nian balun iha laran.
.

Dalen

Proto-austronezia

esa/isa

dusa

teli

sepat

lima

enem

pito

walu

siwa

Sa(-)puluq

Grupu Dalen Formoza/Taiwan

Amis

cecay

tosa

tolo

spat

lima

enem

pito,

falo

siwa

moˆtep

Sakizaya

cecay

tosa

tolo

spat

lima

enem

pito

walo

siwa

Cacay a bataan

Seediq

kinjal

daha

teru

sepac

rima

mmteru

mpitu

mmsepac

mngari

maxal

Grupu Dalen Indonezia

Aceh

Sifar/soh

duwa

lhee

peuet

limong

nam

tujuh

lapan

sikureueng

siploh

Bali

nul

besik/siki

dua

telu

papat

lime

nenem

pitu

kutus

sia

dasa

Banjar

asa

dua

talu

ampat

lima

anam

pitu

walu

sanga

sapuluh

Batak

sada

dua

tolu

opat

lima

onom

pitu

ualu

sia

sampulu

Bugis

ceddi

dua

tellu

empa

lima

eneng

pitu

arua

asia

seppulu

Cia-Cia

dise/ise

ghua

tolu

pa’a

lima

no’o

picu

walu/oalu

siua

ompulu

Cham

dua

klau

pak

lima

nam

tujuh

delapan

salapan

sapluh

Bahasa Indonesia

nol/kos-ong

satu

dua

tiha

empat

lima

enam

tujuh

delapan

sembilan

sepuluh

Jawa Kuno

das

sa/sá/sak

rwa

telu

pat

lima

nem

pitu

walu

sanga

sapuluh

Madura

nol

settong

dhuwa´

tello

empa´

lema´

ennem

petto´

ballu

sanga´

sapolo

Makasar

nolo´

Se’re

rua

tallu

appa´

lima

anang

tuju

sangantuju

salapan

sampulo

Malaio

kosong/sifar

satu/suatu

dua

tiga

empat

lima

enam

tujuh

lapan

sembilan

sepuluh

Minangkabau

ciek

dua

tigo

ampat

lima

anam

tujuah

salapan

sambilan

sapuluah

Tetun

mamuk

ida

rua

tolu

haat

lima

neen

hitu

walu

sia/siwi

Sanulu

Wama’a

kairuo

kaitelu

kaiha

kailime

kainina

laohitu

kaikaha

kaisiwe

base

Naueti

kairua

kaitelu

kaiha

kailima

kailima resi se

kailima resi kairua

kailima resi kaitelu

kailima resi kaiha

weli se

Mambae

tel

Fat/pat

lim

Limnainide/hohnid

Limnairu/hohoru

Limnaitelu/hoho teil

Limnaifata/hoho pat

sagul

Kemak

sia

rua

teilu/telu

Paata/pat

lima

neeme/nem

hitu/ichu

balu

sibe

sapulu

Galoli

nehe

irua

itelu

ihat

ilima

inen

ihitu

ihao

isia

sanulu

Lawangan

eray

duaq

toluu

opaat

limaq

jawatn

turu

walo

sie

sepuluh

Cebuano

wala/sero

usa

duha

tulo

upat

lima

unom

pito

walo

siyam

napulo/pulo

Malagasy

aotra

isa/iray

roa

telo

efatra

dimy

enina

fito

valo

sivy

folo

Sangar-Minahasa

sembau

darua

tatelu

epa

lima

eneng

pitu

walu

sio

mapulo

Tagalog

wala/sero

isá

dalawá

tatló

apat

limá

anim

pitó

waló

siyám

sampú

Waray-Waray

waray/sero

usá

duhá

tuló

upat

limá

unóm

pitó

waló

siyám

napúlo

Dalen

Fiji

saiva

dua

rua

tolu

vaa

lima

ono

vitu

walu

civa

tini

Hawaii

ole

`e-kahi

`e-lua

`e-kolu

`e-ha

e-lima

è-ono

è-hiku

è-walu

è-iwa

ùmu

Kiribati

akea

teuana

uoua

tenua

aua

nimaua

onoua

itua

wanua

ruaiwa

wina

Maori

tahi

rua

toru

wha

rima

ono

whitu

waru

iwa

Tekau/ngahuru

Rapuni

tahi

rua

toru

rima

ono

hitu

va’u

iva

angahuru

Samoa

tasi

lua

tolu

lima

ono

fitu

valu

iva

sefulu

Tahiti

hō'ē/tahi

piti

toru

maha

pae

ono

hitu

va’u

iva

Ho’e ‘ahuru

Tongan

noa

taha

tolu

nima

ono

fitu

valu

hiva

Hongofulu/taha noa

Tuvalu

tahi/tasi

lua

tolu

lima

ono

fitu

valu

iva

sefulu

Grupu Dalen Trans Papua New-Gunea

Fataluku

Ukane/ukani

ece

utue

Ufate/fate

lime

neme

fitu

kafa

siva/xiwa

tane/ta’ane

Makasai

lola’e

lolitu

loloha/lolowa

lima

daha/da

fitu

afo

siwa

ru’u/ruru’u

Bunak

uen

hili’o

goni’on

goni’il

gonicet

thomol

pithu

walu

siwi

sogo

Grupu Dalen Papua Osidente

Ternate

rimói

romdidi

Range (ra:anje)

raha

romoha

rara

tomdi

Tufkange (tufkanje)

sio

Niagimoi (njagimoi)

Tidore

rimoi

malofo

range

raha

romtoa

rora

tomdi

tofkanje

sio

nagimos

Autor barak halo estudus kona-ba grupu etnolinguistiku iha Timor, maibe hola konkluzaun lahanesan kona-ba numeru dalen (lingua) no dialetu sira iha Timor. Nune’e mos naran lingua ka dialetu sira nebe sira temi mos balu ladun loos no hamosu konfuzaun barak. Autor ida ho autor seluk hakerek dalen nia naran mos lahanesan, por exemplu balun hakerek tocudédé balun hakerek tokodédé, balun hakerek tocodéd, balun hakerek quemaque no balun hakerek kemak, nsst. Naran sira nebe autor sira hakerek lahanesan, parese sira hetan informasaun husi ema neba lahanesan ka rona laloos, balun hakerek tuir ortografia portugues nian no balun lae. Aleinde ida ne’e, mosu mos konfuzaun tanba grupu etnolinguistiku ida nia naran sai tiha hanesan grupu rua, maibe iha realidade naran mak rua maibe grupu ida de'it, hanesan Fataluku nebe bolu ho naran seluk Dagada.

Ita fila fali ba grupu etniku sira iha Timor-Leste. Osorio de Castro iha ninia Livru “A Ilha Verde e Vermelha de Timor”, afirma katak dalen sira prinsipal iha Timor mak Tetun, Nogo, Tokodede ka Tokode, Manua (ka Manura?), Bunak, Manuga, Mambai, Ida ka Idate, Galoli, Damata, Loulei, Nukaek, Makasai, Naima, Midiki, Naueti, Dagueda, Kairrui, Raraek, Namalua (?) no Lakalei. Nia agrupa lian sira Kemak ka Ladabala no Tetun Terik ba dialetu Tetun, no Edi hanesan dialetu Galoli nian, Kei ka Keha dialetu Tokodede nian, no sita opiniaun Jansen Alves nian, iha nebe ida ne’e klasifika Nogo nudar Kemak. Nia distingui dalen Atauro (ho dalen Bellai no Karrili. Nia afimra dalen Timor nian no dialetus hamutuk 20 resin.[28]

Padre Alves da Silva, nebe hakerek gramatika dalen Galoli, iha 1900, dehan dalen sira Timor nian mai hotu husi dalen Malaiu, Tetun, Galoli, Naima, Makasai no Midiki.[29] Dalen sira Waima’a, Naueti, Karui no Mediki, nebe pertense ba grupu dalen ida, mos mai husi dalen Malaiu.

Teofilo Duarte temi dialetu 20 iha Timor. Padre Abilio Fernandes, iha 1931, lakonkorda ho numeru nebe Teofilo Duarte temi. Nia agrupa dalen iha Timor hamutuk 15, mak Tetun, Galoli, Idate, Makasai, Naima, Agada (Dagada), Midiki, Naumik, Naueti, Bunak, Baikenu, Mambai, Tokodede, Kemak no Lakalei. Nia fundamenta ninia razaun ho distingue lingua no dialetu. Nia dehan dalen balun iha Timor ladun iha diferensa ba malun hanesan portugues no espanhol nebe ladun iha diferensa ba malun. Nia uza liafuan “depressa” iha portugues hodi traduz ba lian oioin iha Timor hanesan tuir mai: iha Tetun, lai-lais; iha Galoli, ta-toi; iha Mambai, huro-horo; iha Makasai, bessi-bessi; iha Tokodede, bre-bre; iha Lakalei, ama-re; iha Kemak, mila-mila, iha Dagada, vala-le; iha Bunak, lau-laun.[30] Iha Naueti hroba-hroba.

Padre Artur Basilio reduz liu tan ba 9 mak Tetun, Galoli, Mambae, Tokodede, Kemak, Baikenu, Dagada, Makasai no Bunak. Simões Martinho dehan iha dalen 16 no 15 nebe Padre Abilio Fernandes temi ona, no nia konsidera dalen 7 deit mak ema koalia liu, mak Tetun, Mambai, Bunak, Tokodede, Galolen no Makasai[31], inkluindu Fataluku.

Ba Leite de Magalhães (1918), dalen iha Timor liu 20. Aleinde Baikenu iha Oekusi, iha mos dalen Hahak no Baba iha Atauro. Nia rejista dalen sira seluk mak hanesan Kemak, Nogo, Manuk, Gari, Mambai, Tokodede, Keha, Tetun, Damata, Edi, Bunak, Galoli, Idat, Lakalei, Nukaek, Karrui, Midiki, Waima’a, Abu, Makasai, Naunete no Dagada.[32] Magalhães, koko agrupa dalen sira iha Timor, la-inklui Baikenu, hanesan tuir mai:

1º Grupu, Kemak, Nogo, Manua, Gari, Mambai, Tokodede no Kella;

2º Grupu, Tetun, Damata no Edi;

3º Grupu, Bunak;

4º Grupo, Galoli, Idate, Lakalei, Nukaek, no dialetu rua seluk Atauro nian, Hahak no Baba;

5º Grupu, Kairrui, Midiki, Naima no Abu;

6º Grupu, Kakasai no Nanete;

7º Grupu, Dagada.

Tuir Magalhães, 1º,2º, 5º no 6º, ninia orijen husi Malaiu, no sira seluk la’os. Husi agrupamentu ne’e mos ita haree dalen no dialetus barak lamosu.

Mendes Correia mos tau duvida uituan ba klasifikasaun husi Leite de Magalhães nian, tanba tuir nia haree, klasifikasaun balun ladun loos, por exemplo nia duvida Tetun no Kemak tama hamutuk iha grupu etnolingustiku ida, nsst.[33]

Tetun antigu mak Tetun Terik nebe hetan iha kosta sul, Mambai hetan iha kosta sira besik Dili ba kosta sul depois faixa Sentro Norte Sul, Kemak lokalizadu iha Noroeste no iha zona fronteira. Bunak namakari iha Bobonaro no iha Sudoeste, Tokodede koalia iha Noroeste, Oeste Dili, iha rejiaun Maubara, Likisa, no Bazartete. Makasai abranje norte Baukau no Lautem, mai hamutuk ho lian sira seluk, Midiku no Naueti, iha kosta sul, iha rejiaun Viqueque, Uatu-Lari, Uatu-Karbau no Ilomar. Dagada koalia iha extremu oriente Timor. Baikenu koalia iha Oekusi.

Enkuantu António de Almeia, xefe Missão Antropológica de Timor, rejista grupu etnolinguistiku 31 iha Timor, maibe nia konsidera grupu dalen 3 mak hahoris dialetu sira seluk. Ba nia, sira nebe importante liu mak Mambae, Tetun no Makasai, depois mak tuir dialetu sira Bunak, Fataluku, Baikenu no Midiki. Dialetu sira nebe Missão Antropológica de Timor rejista mak Baikenu, Bekais, Bunak, Dadu’a, Dagada ka Fataluku, Galoli, Habo, Idate, Isni, Lakalei, Lolen, Lavaia-Epulo ka Maku’a, Makalero, Makasai, Mambai, Marae, Midiki, Nai Damo, Na-Ine, Na-Naheke, Naueti, Oso-Moko, Kemak, Resuk, Sa-Ani, Tetun, Tokodede, Uaima’a, Raklu’un, Rai-Eso no Oko Midiki.[34]

Maibe, sensu 2015 nian hatudu lingua no dialetu sira Timor nian hamutuk 32, la’os 31 mak: Tetun Prasa ka Tetun Dili, Tetun Terik, Adabe, Atauran, Baikenu, Bekais, Bunak, Dadu’a, Fataluku, Galoli, Habun, Idalaka, Idate, Isni, Kairui, Kawaimina, Kemak, Lakalei, Lolein, Makalero, Sa’ani, Makasai, Makuva, Mambai, Midiki, Nanaek, Naueti, Rahesuk, Raklungu, Resuk, Tokodede, no Waima’a.[35]

Data sensu 2015 parese kompletu liu tanba halibur husi Timor oan sira rasik no lahalo duplikasaun ba naran etnolinguistiku sira nebe ejiste iha Timor. Dialetu balu nebe investigador sira husi rai-liur sira temi iha sira nia estudus, ita lahetan iha sensu 2015 nian. Sera ke lingua ka dialetu sira ne’e lakon tiha ona ka investigador sira mak hakerek naran sira laloos ka hakerek naran sira nebe ema ladun uza? Presiza estudus tan hodi hatan ida ne’e.

Husi grupu etnolinguistiku sira ne’e hotu, investigador sira kuaze iha konkluzasaun hanesan katak grupu prinsipal ka boot liu iha Timor mak Tetun, Mambai, Makasai, Fataluku, Kemak no Bunak. Ne’e la-signifika dalen sira seluk la-importante. Importante maibe sira nia expressaun ladun boot hanesan dalen sira temi iha leten. Husi dalen 31 nebe iha, provavelmente dalen 15 mak bainhira koalia la-entende malu kompletamente. Dalen sira nebe bainhira ko’alia la-entende malu kompletamente mak klasifika ba iha lingua no sira nebe ko’alia entede malu ho diferensas balun bolu dialetu hanesan Tetun Dili no Tetun Terik ka Waima’a, Naueti, Midiki no Kairui.

Dalen Tetun iha rua, Tetun Terik no Tetun Dili ka Prasa. Tetun Terik mak hahoris Tetun Dili no hariku liu tan ho lian portugues no Bahasa Indonesia. Tetun Terik koalia iha area sira deskontinuadas, katak hetan izoladamente iha pontu balu-balun iha Timor, no laiha ligasaun fronteira ba malu. Grupu etniku Tetun Terik, possivelmente, uluk ida de’it, maibe tanba funu no ka buka fatin moris, sira haketak malun iha fatin keta-ketak. Independentemente husi saida mak halo sira hetan iha fatin ketak-ketak, Tetun Terik hetan ka koalia iha Balibu, Suai, Alas, Lakluta no Vikeke, nomos koalia iha Timor Osidental, nebe kuinese ho Tetun Belu.

Tuir investigador sira, Tetun sai dalen veikular tanba liga ho konkista ilha Timor nia sorin, husi aristokrasia militar sira nebe koalia dalen Tetun Terik. Tuir istoria, datu sira husi Belu nebe ninia Sentru politiku iha reinu Behali ka Wehali, sira konsegue konkista metade husi ilha Timor no tanba ne’e mak halo dalen Tetun sai tiha dalen veikular. [36]Tetun Terik, kuinesidu iha parte Timor Osidental nudar Tetun Belu.

Tetun ikus mai sai evoluidu liu tan no ema barak mak koalia tanba missionariu sira uza, hodi hakerek livru sira kona-ba orasaun, hodi hanorin doutrina no hodi halo missa no evanjelizasaun. Missionariu balun mos dedika sira nia tempu hodi hakerek gramatika no disionariu Tetun. Tetun sai dezenvolvidu no evoluidu liu tan ho dezenvolvimentu Dili nudar sentru komersial no administrativu. Ida ne’e mak ajuda halo difuzaun ba dalen Tetun Dili sai maka’as liu tan no sai dalen franka.

Mambai nudar dalen daruak nebe koalia husi ema barak iha Timor hafoin Tetun. Mambai koalia husi grupu etnolinguistiku sira namakari iha Munisipiu sira Ermera, Aileu, Ainaru no Manufahi. Ema Mambai sira moris tuir sistema patrilinear, no tiun maternu sira hetan fatin destake. Agrikultura nudar aktividade predominante husi grupu etnolinguistiku ne’e.

Maibe Mambai Ermera no Manufahi nia iha diferensa uituan iha liafuan balun. Por exemplo Mamabae Ermera nian ho Mambae Manufahi nian sura ida (1) to’o lima (5) hanesan maibe husi neen (6) to’o to’o sanulu (10) lahanesan, hanesan mos Waima’a no Naueti, husi ida (1) to’o lima (5) hanesan, maibe husi neen (6) to’o sanulu (10) lahanesan. (Haree iha tabela iha leten).

Iha tempu uluk, grupu etnolinguistiku husi Mambai atu hetan ema ida sala ka loos, sira rekorre ordália, tipu justisa ida nebe involve natureza iha laran. Prosesu nebe baibain halo mak obriga suspeitu foti fatuk nebe tau iha sana kidun nebe nakonun ho bee manas.[37] Molok hatama liman, hamulak uluk, se suspeitu lasala mak nia liman sei la sofre buat ida, se nia sala duni mak nia liman sei aat hotu. Ema nebe kulpadu, tanba tauk no fiar katak se nia hatama liman ba bee nakali, nia liman sei dodok. Tan ne’e, sira rekuinese uluk sira nia sala hodi lahatama liman ba bee nakali. Maibe, ema inosente balun mos bele sai vitima bainhira obriga hatama liman ba bee nakali. Maibe ida ne’e mak Timor nian fiar ida, dalan ida hodi halo justisa. Tipu justisa sira hanesan ne’e ho objetivu atu buka justisa, maibe bele mos hamosu injustisa no sofrimentu ba suspeitu sira. Tipu justisa sira involve natureza iha laran hetan mos iha grupu etnolinguistiku sira seluk, ninia forma mak lahanesan.

Elizabeth Traube estuda ona relasaun entre klasifikasaun simbolika no vida sosial em termos de obrigasaun ho kosmos [38] sira. Tuir investigadora ne’e, iha prinsipiu resiprosidade nebe integra polu estremu rua hamutuk. Vida ho mate hanesan prestasaun mutua no doasaun komplementar nebe hato’o ba malun iha relasaun de troka ida. Nudar nia konsekuensia, resiprosidade entre estremu rua forma estrutura ba sistema ritual nebe fahe ba kategoria rua: mutin (buti) no metan (meta). Ritimika alternansia entre dikotomia ne’e, vida no mate, no fo no simu, konstitui baze ritual Mambai nian.[39]

Grupu etnolinguistiku nebe iha espressaun boot hafoin Mambai mak Makasai. Makasai namakari iha munisipiu sira Baukau no Vikeke. Grupu etnolinguistiku ne’e ninia orijen husi Melanezia. Linhajen ema Makasai nian tuir sistema patrilinear. Iha kazamentu involve barlaki, fo tomak ka fo uluk sorin ba familia feto nian. Feto nudar rendimentu ba familia maibe ladun iha papel ativu no hola desizaun. Iha divizaun knaar, feto sira serbisu iha uma no mane sira halo serbisu iha li’ur.

Grupu etniku Makasai reprezenta numeru ida iha espresaun boot, tanba em termos de kuatitativu, Makasai okupasaun zona planaltika luan no boot ida, hahu husi Munisipiu Baukau no Munisipiu Vikeke sorin, iha Postu Administrativu sira Ossu tomak, Uatu-Lari no Uatu-Karbau sorin.

Fataluku mos iha espressaun signifikante. Vizinho sira Fataluku nian bolu grupu etnolinguistiku ne’e ho naran Dagada. Fataluku hetan iha rohan lorosa’e, habit husi grupu sira Na-Ine, Sa’ani, Makasai no Makalaero. Nunue’e ema Fataluku hanesan komunidade ida nebe relativu izolada, ninia ema sira mos taka an, raru kahur malu ho elementu sira husi grupu sira seluk, iha nebe halo sira sai sosiedade ida omojeneo kompara ho grupu etnolinguistiku sira seluk iha Timor. Hafoin Timor ukun-an, ema Fataluku sira hahuu nakloke.

Iha tempu kolonial portugues nian, ema Fataluku sira tanba taka-an, sira pratikamente lahatene koalia Tetun. Sira nebe ba eskola, hatene koalia deit sira nia dalen ho portugues.

Investigador dor balun hola konkluzaun katak Fataluku hanesan mos Makasai, ninia orijen husi Melanezia, maibe husi estatura no koor kulit, ita haree ema Fatuluku balun atu hanesan ho ema Makasar. Grupu etniku Fataluku tuir linhajen patrilinear exojemika, no fahe ba sublinhajen ratu no patxa, nebe forma konjuntu endojemiku rua, iha nebe ida-idak halo prosesu troka feto, katak kazamentu so bele halo entre ratu ho ratu no patxa ho patxa. Iha grupu etniku sira seluk mos funsiona norma ida ne’e, datu (nobre) ho datu nia oan sira mak bele hola malu. Ohin loron ladun funsiona rijidu hanesan uluk, nudar konsekuensia husi modernizmu, liberdade no globalizasaun, nebe influensia jerasaun sira ikus, hodi fihir parseiru ba an rasik, no inan-aman sira limita de’it tuur hamutuk hodi formaliza sira nia relasaun liu husi kazamentu tradisional no Katolika nian.

Vida relijioza ema Fataluku nian halo liu husi kultu ba bei-ala sira husi linhajen sira temi iha leten, halo ketak-ketak ho ritual periodiku sira dirije husi entidade oioin nebe konsidera hanesan senhor mundu vejetal no animal nian.

Grupu etnolinguistiku Kemak mos iha espressaun signifikante. Ema Kemak sira hela iha foho, sira nia sentru nebe importante liu mak iha Marobo no planaltu (dataran tinggi) Maliana. Ema Kemak sira uluk, nudar ema agricultor sedentário ka halo aktividade agrikultura ida nebe lahalo metin iha fatin ida, maibe muda fatin hela de’it.

Divizaun sirbisu klaru iha grupu etnolinguistiku ida ne’e. Feto sira serbisu iha kampu, kuda no ku’u produtu sira husi to’os. Sira suru tais, halo atividade artesanal nebe iha papel importante hodi satifaz nesesidade lokal no troka ho sira seluk. Serbisu nebe kuaze okupa barak liu sira nia moris mak kuda algudaun hodi halo tais. Ohin loron, ema Kemak sira, feto no mane, liuliu ema Atsabe sira, sai ema negosiante maka’as.

Biar grupu etnolinguistiku ida ne’e predominantemente iha foho, maibe sira komunidade ida nakloke ba influensia sira husi liur.

Grupu etnolinguistiku seluk nebe iha mos expresaun signifikante mak Bunak. Bunak sira hetan iha parte sentral no foho sira iha Timor-Lorosa’e, fahe entre Timor-Lorosa’e no Timor Osidental. Bunak hadulas husi dalen Tetun, Mambai no Kemak, hahuu husi Bobonaro to’o kosta sul. Dalen Bunak tama iha grupu etnolinguistiku papua-melaneziu.

Bunak, predominantemente pertense ba grupu negroide ka melaneziu. Uluk hela iha litoral sul, ikus mai dudu ba foho, liuliu husi Tetun no Kemak.

Estrutura sosiu-politiku tradisional Bunak tuir sistema matrilinear. Bunak hanesan mos grupu etniku sira seluk iha Timor, kaer metin sira nia uma lulik nebe bolu Deu Pho. Biar predomina husi sistema matrilinear no na’in ba uma lulik, feto Bunak sira halo serbisu domestika mak barak liu, laiha papel destakada ruma hanesan mane sira iha sistema patrilinear nebe iha poder de desizaun.

Se haree ba similaridade lingua, ita bele klasifika dalen sira Tetun, Kemak, Mambae, Tokodede, Galole, Baikenu, Naueti, pertense ba grupu lingua Malaiu ka Austronezia nian. Enkuantu Makasae, Bunak, Dagada ka Fataluku no sira seluk pertense ba grupu Papua-melanezia.

Grupu linguistiku Austronezia iha rai seluk hetan iha arkipelagu sira Sudeste Aziatiku no Oseania Pasifiku. Hetan mos iha rai boot balun iha Azia nebe namkari (espalha) husi Taiwan, Hawai, iha rohan Norte, to’o Nova Zelandia, liuliu iha Aotearoa, iha rohan Sul no husi Madagaskar (besik Afrika), iha rohan Osidente to’o iha Easter (Rapuni) iha rohan Leste.

Ema Austronezia, sai foufoun husi Xina, halo migarasaun serka de 4.000 anos liu ba, ba ilha Taiwan no husi neba espalha ba Filipinas, Indonezia, depois Madagaskar no Oseania Pasifiku tomak. Husi Filipina no Indonezia mak liu mai iha Timor. Grupu lingua Austronezia ne’e fahe ba grupu boot rua mak lian Taiwan no dalen Malaiu-polinezia. Malaiu-polinezia ne’e namkari iha ilha sira Indonezia nian hanesan Sumatra, Jawa, Kalimantan, Sulawesi, Maluku no Nusatenggara, eseptu Halmahera no Papua.

Iha Timor-Lorosa’e, linhajen desendensia membru etnia ida nian jeralmente determina husi linhajen patrilinear (tuir aman nian) hanesan Fataluku, Makasae no sst., no tuir linhanjen matrilinear, hanesan Bunak no sst.

Ema husi rasa ida ka husi etnia ida kaben ho rasa seluk ka etnia seluk, ninia oan bolu mestisus. Ita bele klasifika mestisu sira ba mestisu lokal no mestisu internasional. Mestisu lokal mak oan sira husi kazamentu entre grupu etniku sira iha Timor, hanesan Mambai ho Fataluku. Mestisu internasional mak oan sira husi kazamente entre etniku Timor ida ho ema husi rai seluk. Hanesan ema husi Bunak kaben ho ema Europa, ema Baikenu sira kaben ho ema Afrika, ema Makasai kaben ho ema Xina ka ema Kemak kaben ho ema India, ka ema Fataluku kaben ho ema Indonezia.

Jeralmente, iha sosiedade Timor, karik influensia husi koloniazasaun nebe tau ema kolonialista sira aas liu ema rai na’in sira, mestisu internasional sira nia estatutu aas liu mestisu lokal sira. Diferensa ida ne’e influensia husi kondisaun ekonomika nebe iha. Jeralmente, ema sira mai husi li’ur, ninia kondisaun ekonomika diak liu sira nebe husi rai laran tanba sira besik liu ba kolonialista ka tanba hetan serbisu diak nudar funsionariu publiku.

Mestisu sira, atu lokal ka internasional, hanesan mos sira nebe la-mestisu, hotu-hotu iha ninia uma lulik, tuir nia ama ka tuir nia inan, eseptu sira nebe inan no aman laiha uma lulik, tanba sira mai husi li’ur. Biar inan no aman laiha uma lulik, maibe sira nia oan mane ka feto, bainhira kaben ho sira nebe iha uma lulik, direita ka indireitamente sira mos bele halo parte ona uma lulik nebe iha, nebe bolu kaben tama. Ka tenki integra-an ba uma lulik ida. Se laiha uma lulik, susar atu tuur no koalia lia moris ka lia mate ho familia seluk. Situasaun ida ne’e obriga sira nebe laiha uma lulik tenki hili, tuir nia inan ka nia aman nia uma lulik, ka integra ba uma lulik nebe bele simu sira. Hanesan ita haree ona iha leten, uma lulik nudar instituisaun fundamental ida iha Timor, reguladora ba vida sosial tradisional hotu-hotu. Nune’e, iha sistema patrilinear nebe predomina iha Timor, bainhira halo ona kazamentu ida, feto tenki sai husi ninia aman nia uma lulik hodi ba integra fali iha uma lulik ninia la’in nian, mak nesesariu ba mane ida tenki iha ninia uma lulik ida.

Iha exemplo ida kona-ba ema nebe laiha uma lulik maibe tanba nesesidade tradisaun nian, obriga nia tenki halo opsaun. António Horta, ninia inan no aman, deportado portugues nia oan, laiha uma lulik. Bainhira António Horta atu kaben ho Alzira, liurai Barike nia oan, ijiji ba nia tenki iha uma lulik ida. Ema nebe laiha uma lulik, signifika ema ne’e laiha estatutu irarkia sosial tradisional no susar atu tuur hamutuk hodi koalia lia ho familia sira husi uma lulik seluk. Tan ne’e, hakarak ka lakohi, Antonio Horta, tenki tuir ritual ida hodi nia bele halo parte familia uma lulik liurai Samoro nian hodi nia bele iha pozisaun sosial ida digna hodi kaben ho liurai Barike nia oan. Bainhira halo parte tiha uma lulik liurai sira Samoro nian, familia liurai Samoro nian mak reprezenta António Horta hodi halo negosiasaun ho familia liurai Barike nian.[40] Ne’e la’os aplika de’it ba klase elite tradisional Timor sira, maibe mos ba ema baibain sira, tanba sira hakarak sira nia oan ho desendente sira hela iha uma mahan ida, iha uma lulik ida nia okos. Nune’e sira nebe laiha uma lulik, hili tama iha uma lulik ida hodi fo mahan ba sira.

Ikus mai, António Horta nia alin sira, Jose Manuel Ramos-Horta no Arsénio Horta mos tuir nia maun nia dalan, integra iha uma lulik iha Samoro, hodi nune’e bele integra totalmente iha kultura Timor nian. Ida ne’e hanesan nesesidade ida hodi hetan identidade nudar Timor oan. Hola parte iha uma lulik ida, signifika assume identidade ida no kulturalmente sai ema Timor nebe kompletu.

Uma lulik la’os deit espasu fiziku ida nebe halibur jerasaun sira, maibe mos nudar instituisaun reguladora, integradora no unifikadora ida iha irarkia sosial tradisional Timor nian. Lasu sai metin no rede familia sai boot bainhira iha ligasaun entre uma lulik ida ho uma lulik sira seluk liu husi kazamentu sira.

Ho prezensa ema husi rasa no etnia oioin iha Timor, halo Timor-Lorosa’e sai sociedade pluralista ida ho multi kultura, rasa, etnia no lingua ka dialetu. Rasa no etnia sira ne’e hotu mak forma povu Timor ho ninia kultura rasik, kultura nebe riku tanba mai husi kultura oioin husi etnia oioin. Uma lulik mak nudar hun no abut komum Timor oan sira nian tanba iha grupu etniku hotu-hotu iha uma lulik, no husi uma lulik mak sira halo la’o nia fiar hodi hamulak, hahii no hana’i ninia bei-ala sira. Ida ne’e hanesan fiar ka krensa kolektivu Timor oan tomak nian.

Ho sosiedade ida pluralista, mai husi rasa no etnia oioin, laiha fatin ba rasizmu no senofobu iha Timor-Lorosae, tanba halo oinsa ba mos, hotu-hotu mesak lao rai, balun to’o uluk na balun to’o ikus.

Identidade Kultural

Molok ita ko’alia kona ba identidade kultural, ita buka hatene uluk saida mak kultura no identidade. Iha konveersa sira loron baibain, ita uza liafuan kultura, halo ita hanoin kedas oinsa kultura reprezenta “buat sira aas liu husi ispiritu, hanesan arte, literatura, muzika, no pintura. Tuir Antony Giddens, sosiologu kontemporaneo ida, kultura la’os fiar, arte, muzika no pintira de’it, liu tan ida ne’e. Kultura refere ba modu moris sosiedade ida nian ka grupu nebe pertense ba sosiedade ne’e, inkluindu modu oinsa hatais, formas de kazamentu no familia, padraun serbisu, seremonia ka ritual relijioza sira no aktividade lazer sira.[41] Kultura ka lisan, refere ba karateristika sira nebe sosialmente hetan (herdada) no aprendida, nebe individu hetan (adquire) husi konviviu sosial. Entre karateristika sira ne’e mak lingua, kulinaria, modu hatais, krensa ka fiar relijiozas, normas no valores. Trasu kultural hirak ne’e hetan influensia direkta kona-ba konstrusaun ita nia identidade sira. Kultura konstitui parte boot husi konjuntu atributu sira nebe forma kontestu komum entre individu husi sosiedade ida nian no nudar parte fundamental komunikasaun nian no kooperasaun entre sujeitu sira. Enkuantu identidade refere ba parte ida nebe individual liu, husi sujeitu sosial, maski nune’e totalmente dependente ba ambitu komum no konvivensia sosial. Iha forma jeral, entende identidade mak buat nebe relasiona ho konjuntu entendimentu sira nebe ema ida hetan kona-ba nia an rasik no kona-ba buat hotu nebe iha signifikativu ba nia. Entendimentu ida ne’e konstruidu husi determinadas fontes, konstruida sosialmente, hanesan jenereu, nasionalidade ka klase sosial, nebe individu sira uza hanesan plataforma konstrusaun ba ninia identidade.

Identidade kultural refere ba konstrusaun identitaria kada individu nian iha kontestu kultural. Ho liafuan seluk, identidade kultural relasiona ho forma oinsa ita haree mundu exterior no oinsa ita hatuur-an relasiona ho mundu exterior ne'e. Prosesu ida ne’e kontinuu no rohan laek (perpetuo), katak identidade sujeitu ida nian sempre sujeitu ba mudansa sira. Iha sentidu ida ne’e, identidade kultural prenxe espasu mediasaun entre mundu “interior” no mundu “exterior, entre mundu pessoal no mundu publiku. Iha processo ida ne’e, mak ita projeta dala ida ita nia partikularidade sira kona-ba mundu exterior (asaun individual ho vontade ka hakarak partikular), maibe mos internaliza mundu exterior (normas, valores, lingua …). Iha relasaun ida ne’e mak ita konstroe ita nia identidade.

Povu Timor ninia identidade hetan iha ninia partikularidade hanesan lingua no dialetus sira, tebe, bidu, dahur, halo lia moris no lia mate, halo nia ritual sira, halo la'o nia fiar sira nebe hahii no hana'i ninia bei-ala sira, nsst. Buat hirak ne’e hotu hetan no aprende husi ita nia bei-ala sira.

Uma lisan ka uma lulik, nebe ita nia bei-ala sira halo no husik hela mai ita, ita kontinua kaer no hametin nudar identidade povu Timor nian ida. Partikularidade sira ne'e mak marka diferensa ho kultura rai seluk nian. Timor oan sira hetan no aprende kultura husi nia bei-ala sira, husi jerasaun ba jerasaun.

Timor oan sira, nudar povu, dezenvolve ninia habito ka lisan rasik. Lisan hirak ne’e mak repete hikas husi tempu ba tempu, no passa husi jerasaun ida ba jerasaun seluk nebe sai modu moris Timor oan sira nian. Modu moris ida ne’e mak varia husi fatin ida ba fatin seluk, husi etnia ida ba etnia seluk.

Povu Timor dezenvolve ona, iha sekulu barak, modo moris oioin: lingua, modo hatais, bali balada, fila rai (agrikultura), soro (caça), peska, tebe, bidu, dahur, badaen halo instrumentu no artesanatos, badaen halo pintura no bahat (eskultura), kazamentu, halo seremonia hamulak, hahii no hana'i ninia bei-ala sira (relijiaun), pratika desporto tradisional sira hanesan atletizmu, kuda halai taru, futu manu, tebe malu tradisional nsst. Buat hirak ne’e hotu mak bolu identidade kultural no sai identidade nasional Timor nian.

Iha komunikasaun entre Timor oan sira, hanesan temi ona iha leten, iha dialetus oioin tuir grupus etnikus sira nebe iha. Tanba dialetu nebe oioin no susar entende malu mak dezenvolve lian Tetun hodi fasilita komunikasaun entre grupu etnolinguistiku sira nebe lahanesan. Tetun sai lingua franka tanba nudar dalen nebe uza hodi kumunika entre grupu etnolinguistiku sira nebe lahanesan.

Merkadoria no kazamentu entre etnia ida ho etnia seluk kontribui ba dezenvolvimentu dalen Tetun no sai mos dalen unifikador, nune’e mak dalen Tetun ohin loron sai dalen nasional no ofisial, hamutuk ho dalen portugues.

Tuir mai ita haree uma lisan ka uma lulik nebe nudar partikularidade Timor nian ida.

Uma Lulik

Biar Timor oan sira mai husi rasa no grupu etniku oioin, maibe iha buat komum ida, kuaze iha Timor laran tomak iha uma lulik. Timor oan sira, kuaze 100%, iha ninia uma lulik, ho esepsaun balun, hanesan temi ona iha leten. Sira nebe laiha uma lulik mak sira nebe mai husi rai-li’ur tanba sira mai ho kultura seluk, kultura sira nebe laiha uma lulik, ka sira balun nebe sunu tiha ona sira nia uma lulik tanba halo tuir missionariu portugues sira haruka ka sira hanoin uma lulik mak halo sira nia jerasaun sira atu mate mohu neduni sira sunu tiha.

Uma lulik kuinese mos ho naran uma lisan. Grupu etniku hotu-hotu iha Timor, husi lorosa’e to’o loromonu, husi tasi feto to’o tasi mane, hotu-hotu iha ninia uma lulik rasik. Raro tebes ita hetan Timor oan mak laiha uma lulik. Uma lulik balun hamrik mesak, independente, no balun iha fali uma lulik seluk nia mahan, katak iha uma boot ida, nebe baibain sira bolu uma liurai, mak fo mahan ba uma lulik seluk.

Bainhira ita ko’alia kona-ba uma lulik mak ita koalia kona-ba lisan no lulik. Lisan, habito, tradição (adat) ka kultura, hatudu ba pratika sira iha moris nebe halo repetitivu, husi jerasaun ba jerasaun. Lisan nudar regras no valores nebe estabelesidu husi bei-alan sira hodi sira no sira nia jerasaun sira moris tuir. Ema hotu moris iha sosiedade nia laran, iha kultura, iha regras, normas no valores nebe sira fiar no moris tuir. Regras, normas no valores sira ne’e nudar lei ida nebe regula sira nia moris, saida mak bele halo tuir no saida mak labele halo tuir (proibido).

Enkuantu lulik, refere ba buat sira sagrado. Konseitu lulik, kuaze hetan iha dalen hotu-hotu Timor nian maski bolu ho termu nebe lahanesan. Iha Tetun Terik bolu lulik, iha Bunak bolu “po”, iha Naueti, Mambae no Galoli bolu “luli”, iha Fataluku bolu “tei” no iha Makasae bolu “phalun”.

Lulik hanesan buat ida sagradu no tabu. Lulik mak determina komportamentu Timor oan sira nian iha sosiedade nia laran, iha sira nia interasaun sosial. Lulik nudar padraun moral ida tanba bandu no admite saida mak ema ida bele halo no saida mak labele halo.

Josh Trindade, deskreve lulik hanesan orden filozofiku, relijioziku no moral ida nebe reprezenta nukleu

ka esensia husi valor sira ema Timor nian, tan ne’e nia sai nafatin matadalan importante ida ba ema

Timor nia intensaun no asaun sira iha vida sosial tomak[42].

Lulik hanesan mos buat tabu ida, ema labele koalia arbiru ka temi sira nia naran. Tuir Timor nia fiar, bainhira temi buat nebe tabu mak bele hetan moras, sai bulak ka mate. Hanesan labele temi bei-ala sira nia naran. Iha kultura balun, hahu konsidera lulik, bizavo ba leten, nune’e labele temi sira nia naran. Tanba dehan lulik, sira labuka hatene tuir, sira nia bei-ala sira nia naran. Ho nune’e, ema barak lahatene sira nia bei-ala sira nia naran, jerasaun ka dalas 3 ka 4 ba leten, tanba lulik.

Foho balun konsidera lulik, nune’e, bainhira liu iha fatin ne’e tenki hasai xapeu, labele koalia maka’as ka hakilar, no labele mos temi foho ne’e nia naran. Liu tiha area foho ne’e nian mak tau fali xapeu ko koalia makas no bele temi ka koalia kona-ba foho ne’e. Iha Uatu-Lari iha fatin ida naran Boroloisoba, harii uma lulik lubuk ida iha neba. Iha estrada nebe liu iha uma lulik nia sorin, harii sinal ida iha estrada ninian, ho mensajen, “labele taka xapeu”.

Iha mos fatin balun nebe konsidera bee lulik, nune’e to’o fatin ne’e labele koalia maka’as no labele temi bee ho fatin ne’e nia naran. Se temi, bele hetan moras, bulak ka mate. Karik ema ruma liu iha fatin lulik sira hanesan foho lulik ka bee lulik, mak hetan moras ka bulak, Timor oan sira dehan foho ka bee nia na’in mak foti ka dadur ona sira nia klamar. Nune’e tenki halo ritual ruma hodi halo loos hodi liberta hikas klamar ne’e.

Tanba konsidera foho ka bee lulik, bainhira jura katak nia lahalo buat aat ida, nia jura ba foho ka bee lulik ne’e. Ka hotar malu, lori foho ka bee lulik nia naran.

Iha Uatu-Lari, foho ida nebe bolu foho Babulu, konsidera foho lulik. Foho ne’e bolu mos foho liurai. Bainhira ba halo ritual iha leten, ema sira sa’e ba leten labele hatais sapatu, labele tau kamiza no labele haree ka hateke ba kotuk. Nune’e mos foho Matebian, konsidera foho ne’e lulik no Timor oan sira hela besik iha neba, fiar katak sira nia bei-ala sira ho sira hotu nebe mate, sira nia klamar ba hela hotu foho ne’e, tanba ne’e mak bolu foho Matebian. Foho Matebian hanesan uma ba matebian sira. Nune’e, uluk liu, ema lanaran sa’e ba foho Matebian. Seluk ho foho Matebian, foho Ramelau mos nudar foho lulik tanba ema Mambae sira fiar katak, sira nia bei-ala sira nebe mate ona, sira nia klamar hela iha foho Ramelau.

Iha Lautem, ema Fataluku sira ninia prinsipal kultu mak klamar sira bei-ala sira nian. La’os ema Fataluk sira deit, maibe kuaze iha Timor laran tomak. Iha Manufahi la’os adora joia no ruin sira deit, maibe mos objetu balun, ai, mota no lulik balun, pratika ida nebe kuaze halo iha Timor laran tomak.

Iha fatin balun, Timor oan sira halo lulik tiha objetu kolonial nian balun, hanesan bandeira monarkia Portugal nian, xapeu kolonial nian, no rota. Objetu sira ne’e sira tau iha uma lulik laran no adora. Estranho uituan, iha fatin balun nebe mosu revolta sira kontra Portugal, nebe dehan anti-kolonial, hanesan iha Uatu-Lari, Uatu-Karbau no Vikeke, sira kontinua adora objetu sira nebe mai husi Portugal nian. Karik konsidera lulik ona, no sira fiar husi jerasaun ba jerasaun ona, entaun, sira kontinua mantein objetu ka atributu sira husi Portugal nian nudar objetu lulik.

Lafaek, animal ida nebe lulik liu ba Timor oan sira. Tan ne’e, labele oho lafaek. Timor oan sira uluk nian, prefere lafaek mak han sira duke sira mak halo aat ba lafaek, tanba sira konsidera lafaek la’os lulik de’it maibe mos hanesan avo.

Iha Lautem, bainhira oho animal ruma, sira sempre rai hela na’an rohan ruma iha mota ibun hodi lafaek han, no sira hein atu hetan protesaun husi lafaek. Dala ruma lafaek tata animal ruma iha mota ninin no han lahotu, ka husik hela rohan ruma, Fataluku oan sira fiar katak avo lafaek mak hakarak fahe sorti ne’e ho sira, nudar rekompensa ba prezente ka na’an sira nebe sira sempre mos rai hela ba lafaek.

Lafaek animal ida siak no tata ema ka animal sira nebe iha sira nia oin. Ohin loron lafaek tata ema iha fatin oioin. Timor oan sira fiar katak lafaek nebe tata ema ne’e la’os avo maibe lafaek mai husi fatin seluk. Se lafaek avo mak tata, Timor oan sira fiar katak, vitima ka ninia familia mak halo sala buat ruma mak halo lafaek tata ka vitima rasik halo aat ba lafaek. Iha fatin balun, Timor oan sira hamulak, halo lafaek sai maus, sira halimar ho lafaek no dala ruma sa’e ba lafaek nia leten. Haree hanesan sira iha relasaun espesial ruma ho lafaek, sira ne’e ema dehan lafaek nia na’in ka sira nia bei-ala mak lafaek duni.

Lafaek lulik ba Timor oan sira hanesan mos javanez sira konsidera lafaek nudar klamar bei-ala sira nian. Se ema balun oho no han lafaek mak bainhira nia tama iha bee, sei hetan tata ka tolan husi lafaek. Timor oan sira, baibain ba hakail ka tiha ikan no boek iha fatin sira nebe nudar lafaek nia habitat, sira kesi tali tahan iha sira nia liman rua, kesi besik kaliling, ho fiar ida atu lafaek labele tata. Tali nebe kesi iha liman hodi fo sinal ba lafaek katak bei-oan sira mak ba buka moris iha mota ka iha debu, atu nune’e lafaek labele tata.

Timor oan sira fiar ba objetu balun no sira konsidera lulik ka iha virtude majika. Iha fatuk buisole ka fatuk lulik nebe diak no aat. So ema antigu sira mak bele distingui ida nebe mak diak no ida nebe mak aat.

Timor oan sira mos fiar, hali hun boot iha na’in. Baibain sira dehan hali nia na’in nakfilak an ba ema, nakfilak ba feto, mane ka labarik. Ninia kor mean, isin no fuk mean, no hasarahun mean se mane. Mean sira ne’e Timor oan sira fiar nudar rai na’in. Timor oan sira nebe fuk mean dala ruma hetan bully husi sira seluk katak sira rai na’in nia oan.

Timor oan sira fiar no konsidera bei-ala sira nia klamar nebe diak hanesan Maromak ba sira. Sira adora, hamulak no husu protesaun ba bei-ala sira nia klamar. Lifuan Maromak husi “maroma” ka “naroman”, bele mai husi Timor oan sira nia fiar ba naroman, hanesan sira fiar ba loron no fulan. Hanesan iha Naueti sira bolu wula-lara, iha Makasa’e uru-watu, iha Fataluku uru-watxu. Sira fiar fulan no loron hanesan Maromak, nune’e bainhira sira defende an husi akuzasaun falsu ruma ka atu konvense ema seluk, ema Makasai, Naueti no Fataluku sira, jura ba wula-lara, uru-watu ka uru-watxu, tanba fulan no loran ba sira hanesan Maromak.

Fiar hanesan iha mos Sulawesi. Uluk liu, molok ema Sulawesi sira konverte ba Islam, sira fiar no adora loron no fulan. Iha ne’e bele iha ligasaun ruma husi bei-ala ema Timor no Sulawesi sira nebe mai husi hun ida, husi rasa austronezia.

Iha Timor laran tomak namakari uma lulik, hanesan fatin hodi rai sasan lulik sira no halo ritual sira. Maibe preokupasaun boot liu Timor oan sira nian mak ho klamar bei-ala sira nian, nebe sempre moris permanentemente iha sira nia sorin, nebe lori felisidade ka aat ba sira. Felisidade baihira lori matak no malirin, fo sorte diak ka halo moris no buat hotu sai no la’o diak. Aat bainhira hamosu moras no buat aat oioin no halo ema mate. Timor oan sira fiar katak uma lulik sai si’ak no halo aat ba ninia membru sira, tanba membru sira halo sala, lahalo tuir regras, normas no valores sira uma lulik nian, tan ne’e mak bei-ala sira hasee ka hirus. Nune’e tenki buka halo loos fukun nebe provoka moras no mate sira ka halo moris sai susar.

Iha funu, ema Timor sira uluk nian, sempre tesi ulun inimigu nian, ho fiar ida katak, atu evita mate sira ne’e nia klamar labele tuir sira. Nune’e, bainhira fila husi funu ka oho ema ruma, sira ba mota halo ritual hodi fase an, hamos an tiha husi buat foer sira. Fase an la’os ba ema deit, maibe mos ba karau nebe bolu fase karau ain hafoin halai natar hotu hodi halo karau isin diak nafatin no labele hetan moras.

Iha saserdote ka datu lulik hodi halo kultu, hamulak hodi haree manu, fahi, bibi ka karau nia aten. Timor oan sira fiar ba sinais ka informasaun sira mai husi animal nia aten ka urat. Atu ba funu, sira sei haree uluk manu nia aten ka urat, iha sinal diak ka aat. Se iha sinal diak sira hakat ba funu, maibe se sinal ladiak mak ba funu, sei hetan susar, mate ka lakon funu. Nune’e, tenki halo buat hotu loos mak hakat ba funu.

Uma lulik, nudar elementu identitariu nebe tuan liu husi povu Timor nian. Uma lulik hanesan mos dalen Tetun nebe reziste ba koloniazasaun portugueza no okupasaun Indonezia. Laiha eskola ruma mak dezenvolve lian Tetun, maibe nia lamate, nia moris iha povu. Uma familia Timor ida-idak nian no merkadu sira mak sai eskola ba dalen Tetun rasik tanba husi uma no merkadu sira mak dalen Tetun reziste no evolui. So Igreja de’it mak dezenvolve Tetun hodi hakerek orasaun sira, maibe governu kolonial portugues no okupante Indonezia nunka hanoin dezenvolve Tetun, sira so impoin sira nia dalen ba Timor oan sira.

Uma lulik mos reziste, desde inisiu to’o fin kolonizasaun portuguesa nian. Kolonialista portugues mai hamutuk ho missionariu katoliku sira. Liu husi missionariu sira, husu Timor oan sira labele adora lulik, tanba adora lulik nudar pratika animista nian. Sira haruka Timor oan sira sunu sira nia uma lulik, tanba pratika ritual sira nebe halo iha uma lulik, sira konsidera adora lulik, la’os adora Maromak. Timor oan ida rua halo tuir no sunu nia uma lulik, maibe barak reziste no lahusik sira nia fiar ba lulik sira. Balun lori padre sira ba sarani tiha sira nia uma lulik, maibe kalan sempre mehi aat no dala ruma haree lulik nia na’in la’o tun sa’e iha uma laran, halo sira toba ladiak, mak sira fila adora hikas lulik sira nebe sarani ona.

Timor oan sira fiar ba deuse ka dewa nebe sira konsidera lulik. Ba sira, dewa sira mak lulik no aas liu, dewa sira mak sei proteze sira husi susar no buat aat hotu-hotu. Timor oan sira fiar ba loron, fiar ba fulan, fiar ba foho lulik, aihun lulik, fatuk lulik, bee matan lulik, nsst. Buat hotu nebe halo diak, sira nia dewa mak ida ne’e. Biar Timor oan sira fiar ba buat hirak ne’e hotu, maibe sira mos fiar katak sei iha ida mak aas liu tan mak sira bolu Maromak. Humberto Leitão hakerek kona-ba Timor oan sira nia fiar: “Ema indijena Timor fiar katak iha buat ida aas liu mak Maromak”.[43]

Timor oan sira haree Lulik ho Maromak hanesan osan ida ho matan rua nebe labele haketak malun. Tan ne’e sira tama Katoliku maibe sira mos kontinua fiar sira nia lulik sira, hanesan mos sira la-falta ba uma kreda iha loron boot sira, maibe sira mos la-falta ba sira nia uma lulik hodi simu bua malus, hodi hamulak ba bei-alan sira iha loron sau batar, sau haree ka iha seremonia no ritual seluk.

Timor oan sira ta’uk liu lulik duke Maromak. Bainhira husu kontribuisaun ruma hodi hadia ka halo Uma Kreda ruma, sira sei hanoin dala rua fo kontribuisaun boot. Maibe atu halo ka hadia uma lulik, familia sira hotu lahanoin dala rua, kokir mos hotu osan sira nebe iha, no lahanoin dala rua oferese animal hodi halo serimonia tradisional sira, tanba sira tauk, se lahalo tuir bele hetan babeur husi bei-ala sira.

Povu Timor agora daudaun maioritariamente Katoliku, maibe maioria ida ne’e foin hahu fo hakat boot iha 1975, nudar afirmasaun rezistensia hasoru invazor indoneziu, nebe maioritariamente musulmanu. Hori uluk horiwa’in kedas Timor oan sira iha ninia fiar ba ritu animista sira. Biar sira sai ema Katoliku ona, maibe sira nunka husik hela sira nia fiar tradisional.

Iha periudu rezistensia nian, guerrilheiros sira mos fiar ba Maromak ho lulik dala ida. Ita haree guerrilheiros sira tara tersu no kakaluk hamutuk iha kakorok, kakaluk husi sira nia uma lulik, ka objetu sira nebe sira konsidera lulik nebe sira hetan husi natureza, hanesan fatuk, ai-abut, ai-kulit ka lafaek no fahi fuik nia nehan.

Knua nebe nudar fatin harii uma lulik ba, la'os fatin hodi halo ritual tradisional sira de'it, maibe mos sai fatin ba halo misa. Timor oan sira haree no fiar katak fiar tradisional no fiar ba Maromak la'os kontraditoria ba malu, ida-idak iha nia fatin no kompleta malu, tan ne’e sira nunka husik sira nia fiar tradisional sira biar sira sai ema Katolika ona.

Povu Timor iha fiar no tradisaun ida maka’as. Sira fiar ba sira nia bei-alan sira. Sira fiar katak mate hanesan muda fatin de'it, husi mundu nebe haree ho matan (visível) ba mundu seluk nebe laharee ho matan (invisível). Tuir fiar no tradisaun Timor oan sira nian, bei-alan sira nebe muda ona ba mundu invisível hamaluk nafatin vida husi jerasaun sira tuir mai. Tan ne’e, liu husi ritu sira iha uma lulik, sira sempre husu bei-ala sira hodi proteje sira husi buat aat hotu-hotu no fo isin di’ak ho susesu ba sira nia moris. Nune’e, uma lulik nudar fatin lulik nebe halibur familia tomak, jearsaun sira hotu, sira nebe ba ona mundu seluk no sira nebe sei moris.

Uma lulik konsideradu nudar fatin hasoru malun entre jerasaun sira hotu, uluk ho futuru, entre ema ho natureza. Iha ne’e mak uma lulik so kontroe ho elementu sira natureza nian. Uma lulik nudar fatin kultu iha nebe hodi halo no fo omenajen ba bei-ala sira nebe muda ona ba mundu invizivel, fatin hodi hamulak, hahii no hana’i orijen komum ida, husi nukleu familiar ida nian, linhajen ida no ninia ligasaun solidariedade entre familia sira. Uma lulik nudar fatin ida nebe Timor oan sira hatudu sira nia hun, sira mai husi nebe no sempre fila ba hun ne’e. Biar la’o no hela dok, sira nunka haluha sira nia uma lulik, sira nia hun.

Nune’e, uma lulik la’os funsiona fizikamente nudar fatin kultu, maibe simbolikamente funsiona mos nudar estrutura ida nebe vida sosial tradisional Timor oan sira nian sadere-an ba. Uma lulik hanesan fatin ida hodi regula, organiza irarkia sosial husi determinada ema, familia, kumunidade no ninia ligasaun ida-idak. Tan ne’e, Timor oan sira hotu, ida-idak pertense ba uma lulik sira nebe iha, no membru husi uma lulik ida, ida-idak iha ninia papel definidu ona no respeitadu husi membru sira seluk.

Iha Timor-Lorosa'e eziste sistema patrilinear no matrilinear. Iha sistema patrilinear mane ka oan mane sira mak na'in ba uma lulik. Nune'e oan mane sira hotu no oan feto sira nebe sei klosan ka sira nebe lakaben, hamutuk ho sira nia feto foun sira mak na'in ba uma lulik. Sira ne'e hotu bolu klan ida. Bolu klan ida tanba pertense ba uma lulik ida. Enkuantu sistema matrilinear feto ka oan feto sira mak na'in ba uma lulik. Ne'e signifika oan feto sira bele kaben ho mane husi klan seluk mos sira kontinua ho sira nia klan, sira la-muda sira nia klan tuir klan mane nian. Ne'e signifika mane mak husik hela nia klan hodi tama fali ba klan feto nian. Diferente ho sistema patrilinear, bainhira oan feto kaben, nia sai husi nia klan hodi integra fali iha klan nia la'in nian, nia lahalo parte ona uma lulik nia aman nian, maibe nia halo parte fali uma lulik nia la'in nian. Maibe iha esepsaun balun ba kazamentu mista entre patrilinear no matrilinear, ida-idak bele kontinua ho ninia uma lisan ka klan.

Kultura barlake nudar elementu fundamental ida ba Timor oan sira. Tuir David Hicks, liafuan barlaki mai husi lian Malaiu, berlaki nebe signifika “to take a husband” ka hola mane.[44] Barlaki involve troka de bens, tan ne’e mak bolu hafolin, signifika familia mane nian tenki fo bens ruma ba familia feto nian maibe familia mane nian mos hetan rekompensa ruma husi familia feto nian. Jeralmente familia feto nian, umane, simu karau, kuda, belak no morten, no nudar nia rekompensa, familia mane nian, fetosan, mos simu fahi, bibi no tais husi umane sira. Ohin loron sasan sira ne’e, barak liu, troka ho osan.

Hafolin halo ho objetivu atu hametin lasu entre familia rua. Ida ne’e hanesan akordu vitalicio ka rohan laek ida. Akordu ka paktu ne’e halai ba koperasaun entre grupu rua, la’os entre ema rua, nune’e noivus sira pratikamente rona no halo tuir de’it inan no aman sira nia hilin. Ida ne’e hanesan akordu ida entre familia rua hodi estabelese lasu no kompromete atu serbisu hamutuk no tulun malu.

Iha relasaun entre familia rua ne’e bolu uma mane ka umane (nebe fo feto) no feto-saa ka fetosan (nebe simu feto). Iha relasaun ne’e hanesan forma de pozisionamentu sosial ida. Umane sempre iha pozisaun ida aas duke fetosan, iha regras no normas lubun ida nebe parte ida-idak tenki tuir. Mane ida labele ba hola feto iha uma lulik nebe ninia feton ida kaben no hela ona iha neba. Katak grupu ida nebe relasiona ho grupu seluk, bainhira nudar fetosan, labele sai umane dala ida iha sistema ida nia laran. Neduni tenki ba buka no hola feto iha fatin seluk.

Iha regras no normas seluk tan. Primas no primus sira bele hola malu katak kazamentu entre tunangan sira. Ne’e signifika, oan mane husi feton nian, bele hola oan feto husi naan nian, hodi tutan dalan husi nia tian nian. Maibe oan mane husi naan nian labele hola oan feto husi feton nian. Oan mane ho oan feto husi naan sira nia mos labele hola malu, nune’e mos oan mane no oan feto sira husi feton sira nia, tanba oan sira ne’e, sira bolu sira nia oan hotu kedas.

Timor ninia kultura, relasaun entre familia sira, diferente ho kultura rai seluk nian. Iha Timor, oan ida bele iha aman barak. Baibain sira bolu aman boot, aman klaran no aman ki’ik ka inan boot, inan klaran no inan ki’ik. Oan feto no mane, bolu nia aman nia maun alin sira, labolu tiun, maibe bolu aman, nune’e mos oan feto no mane sira, bolu ninia inan nia bin ka alin sira, bolu inan, labolu tia. Tiu mak sira nia inan nia naan sira ka tia mak sira aman nia feton sira.

Atu selebra uniaun ida, hahuu uluk ho negosiasaun entre familia rua, jeralmente uza manu-ain ka intermediariu sira. Biar liafuan barlaki ka hafolin signifika fo buat ruma ba familia feto nian, maibe iha realidade, familia feto nian mos fo buat ruma ba familia mane nian hanesan temi ona iha leten.

Iha tempu uluk, kazamentu sira planeia husi inan aman sira, ho objetivu atu evita desendete husi elite sira labele kaben ho klase sira ki’ik liu, hodi mantein estatutu sosial nebe iha.

Iha hafolin nia sorin, iha mos buat ida bolu habani. Iha habani la-involve folin, iha situasaun ida ne’e mane ba hela iha feto ninia inan aman sira nia uman. Habani ne’e jeralmente halo husi ema baibain sira, entre ema simples ka ki’ik sira.

Iha diferensa balun entre valor sira Katoliku nian no tradisional nian. Tuir Katoliku nian, feto ida ho mane ida molok moris hamutuk, tenki kaben uluk iha Igreja, la-interesse atu iha oan ka lae. Iha tradisaun Timor nian, ladun rijidu ba ida ne’e, tanba buat nebe sira hakarak liu mak tenki iha desendensia. Nune’e se feto ida ho mane ida hola malu, iha ejijensia aas, tenki iha oan. Se laiha oan, sira sente folin sira nebe fo ba feto, hanesan lakon lerek de’it, tanba laiha desendensia hodo kontinua assegura sira nia uma lulik. Iha ne’e dala ruma mosu injustisa, mane mak ki’uk maibe kulpa feto mak lori tomak. Dala barak, bainhira laiha desendensia, provoka divorsiu ka poligamia. Maibe divorsiu lori kustus, katak se inisiativa husi mane, signifika nia sei fo buat ruma ba feto tuir ezijensia familia feto nian no folin sira nebe fo tiha ona mos labele hetan hikas. Se inisiativa mai husi feto, signifika fo fila hotu folin sira nebe familia mane nian fo ba familia feto nian. Iha situsaun sira hanesan ne’e feto dignifikada liu duke mane, maibe iha pratika dala barak feto sai vitima ba barlaki, tanba bainhira feto sira la-kumpri diak ninia responsabilidade mak mane sira dala barak halo tratamentu aat ba feto sira, ho razaun katak sira fo folin karun.

Timor oan sira fiar uma lulik hanesan sira nia abut, sira nia hun no sira nia identidade. Sira nebe hetan fiar husi familia uma lulik hodi halo ritual lulik sira no tesi lia bolu lia na’in. Lia na’in la’os kualker ema ida, maibe ema sira nebe iha kuinesimentu luan no klean ligadu ba uma lulik nian, ema sira nebe hatene lisan, hatene hamulak, hahii no hanai’i ba bei-ala sira, hatene regras, normas no valores sira vigora iha uma lulik ne’e. Lia na’in bele hanesan mos datu lulik ida nomos porta-voz uma lulik nian. Katak iha lia moris no lia mate, nia mak sei tuur koalia ho ema husi uma lulik seluk.

Uma lulik nudar fatin ida nebe Timor oan sira hatudu sira nia hun, sira mai husi nebe no sempre fila ba hun ne’e. Biar la’o no hela dok, sira nunka haluha sira nia uma lulik, sira nia hun. Timor oan sira fiar uma lulik hanesan sira nia abut, sira nia hun no sira nia identidade.

Bei-ala sira, biar nunka liu iha banku eskola sira, maibe sira ema matenek, ema vizionariu. Sira hamosu lisan, regras, normas no valores, biar la-eskrita, maibe bele passa husi jerasaun ba jerasaun. Ne’e hatudu katak, koezaun familia Timor nia metin no la’o diak to’o ohin loron tanba bei-ala sira ho ninia jerasaun sira kaer nafatin ba lisan no fiar ida nebe kesi sira nudar ema kriatura nebe uniku iha tinan rihun atus nia laran. Sira moris ho konsiensia umana aas iha natureza ida nia okos. Nune’e lisan nebe bei-ala sira hamosu hanesan baze fundamental ida ba Timor oan sira atu hatene sira ne’e se, mai husi nebe. Oinsa Timor oan sira nia bei-ala ho nia jerasaun sira hahu sira nia moris. Oinsa Timor oan sira nia moris la’o to’o ohin loron no ba oin.

Iha funu, uma lulik barak hetan sunu. Ohin loron, iha fatin barak, Timor oan sira hahuu harii hikas sira nia uma lulik, inkluindu sira balun nebe kleur ona husik hela sira nia uma lulik tanba razaun ida ne’e ka ida neba Padre no madre Timor oan sira mos lahusik sira nia uma lulik, biar ritual tradisional balun nebe konsideradu nudar pratika animizmu nian sira latuir, maibe sira respeita. Ne’e la-signifika ita atu fila fali ba dalan orijinal ita nia beiala sira nian, maibe oinsa prezerva, konserva no dignifika identidade Timor oan sira nian iha mundu globalizasaun. Uma lulik, nudar identidade ida nebe lori valores pozitivus, nudar elementu regulador, integrador no unifikador tanba uma lulik sira unifika no fortefika lasu familia nian, lasu entre uma lulik sira nebe hametin liu husi kazamentu sira, liu husi fetosan no umane. Karik lahahu, jerasaun tuir mai sei lahatene no lakon kontaktu ho identidade kultural nebe tuan liu. La’os ne’e de’it, bele lakon ninia hun, ninia abut no identidade, no lakon lasu familia boot nebe pertense ba uma lulik ida.

Iha rai seluk, konseitu familia mak inan, aman no oan, no maun-alin mak inan no aman ida. Iha Timor nian oinseluk, familia no maun-alin mak ema hotu nebe pertense ba uma lulik ida.

Konkluzaun

Povu Timor mai husi rasa haat, Vedo-austroloide, Papua-melanezia, Proto-malaiu no Deutero-malaiu. Kruzamentu husi rasa sira ne’e hotu forma fali grupu etnolinguistiku oioin iha Timor-Lorosa’e ho kultura oioin. Kultura oioin sira ne’e mak sai identidade nasional Timor nian.

Biar Timor oan sira husi grupu etnoliguistiku oioin, maibe iha dalen ida mak unfika sira, mak Tetun. Alein de Tetun, uma lulik sai elementu fundamental ida iha kultura no irarkia sosiedade Timor nian, tanba uma lulik la’os funsiona hanesan espasu fiziku ida de’it, maibe nudar elementu regulador, integrador no unifikador. Unifika bei-alan sira ho jerasaun sira tuir mai, unifika membru hotu-hotu nebe halo parte uma lulik ida. Membru uma lulik sira hotu kumpri regras, normas no valores sira nebe estabelese husi uma lulik.

Timor oan sira bele tuir relijiaun Katolika maibe sira mos lahusik sira nia fiar ba lulik sira, nebe laseluk ida mak fiar ba sira nia bei-ala sira nebe mate ona maibe ninia klamar kontinua moris hamutuk ho sira no proteje sira husi buat aat sira hotu. Tanba sira fiar katak fiar tradisional no Katolika nian, kompleta malu.

Povu hotu-hotu iha ninia identidade kultural. Povo Timor mos iha ninia identidade kultural rasik. Laiha povu ida sein kultura. Kultura mak iis, mak isin no klamar Nasaun no Povu ida nian. Povu Timor nia iis, nia isin no klamar mak uma lulik, tanba uma lulik nudar sentru husi vida sosial Timor oan tomak nian.

Povu Timor ninia identidade mak ninia diversidade rasik. Diversidade ida nebe mak forma sosiedade pluralista nebe riku tebes ho kultura oioin husi rasa no grupu etniku oioin.

[1] in,Fernando Augusto Figueredo. Timor: A Prezensa Portuguese (1769-1945), Universidade do Porto, Faculdade de Letras, 2004, p.55.

[2] Ágata, subvariedade ida husi calcedônia ho kor oioin.

[3] Carolina, materia ida ligada ho variedade ai-han ka foz ida.

[4] A sílica mak mineral dioxide husi silisiu nebe hetan iha fatuk, raihenek no material sira seluk.

[5] in, Fernando Augusto Figueredo. Timor: A Prezensa Portuguese (1769-1945), Universidade do Porto, Faculdade de Letras, 2004, p.55.

[6] Idem

[7] Idem, p. 56

[8] Idem, p. 56

[9] Idem, pp.56-57.

[10] Idem, p. 57

[11] Idem

[12] Idem

[13] Idem, pp.56-57

[14] Idem, p. 58

[15] Idem

[16] Idem, p.59

[17] Idem

[18] Idem

[19] Idem

[20] Idem, p. 60

[21] Idem

[22] Idem, pp.60-61

[23] in, Benjamim Cardoso. Timor Leste Um Povo Três Direitos: D. Boaventura – Liurai de Manufahi. Volume 1, p.20

[24] Idem

[25] in, Fernando Augusto Figueredo. Timor: A Prezensa Portuguese (1769-1945), Universidade do Porto, Faculdade de Letras, 2004, p.63.

[26] Idem

[27] Haree iha loron 18/07.2029, iha https://id.wikipedia.org/wiki/Daftar_angka.dalam_berbagai_bahasa#Rumpun_bahasa_Austronesia

[28] in, Luna de Oliveira. Timor na História de Portugal, I Volume, Agência Geral das Colónias, 1949, p. 47

[29] Idem, pp. 47-48

[30] Idem, p. 48

[31]in, Benjamim Cardoso, Timor-Leste Um Povo Três Direitos: D. Boaventura –Liurai de Manufahi, p. 22.

[32] Idem, p.47

[33] in, Luna de Oliveira. Timor na História de Portugal, I Volume, Agencia Geral das Colonias, 1949, pp. 47-48

[34] in, Benjamim Cardoso, Timor-Leste Um Povo Três Direitos: D. Boaventura –Liurai de Manufahi, p. 22.

[35] Haree iha https://www.statistics.gov.tl/category/publications/census-publications/2015-census-publications/volume-2-population-distribution-by-administrative/4-language/

[36] in, Fernando Augusto Figueredo. Timor: A Prezensa Portuguese (1769-1945), Universidade do Porto, Faculdade de Letras, 2004, p.63.

[37] in, Fernando Augusto Figueredo. Timor: A Prezensa Portuguese (1769-1945), Universidade do Porto, Faculdade de Letras, 2004, p.66.

[38] Kosmos refere ba haree mundu nudar sistema ka entidade nebe kompleksu no ordeiru, inversu husi runguranga.

Kosmo no ita nia komprensaun kona-ba ezistensia no ninia signifikadu, estuda iha kosmolojia – disiplina ida luan tebes

 nebe involve reflesaun sientifika, relijiozu, ka filozofia saida de’it kona-ba universu no nia karakter, ka razaun ninia

ezistensia nian. Aprosimasaun relijioza no filozofia bele inklui sira nia konseitu kosmos ba entidade espiritual oioin ka

assuntu sira seluk nebe konsidera fora husi mundu fiziku.

[39] in, Fernando Augusto Figueredo. Timor: A Prezensa Portuguese (1769-1945), Universidade do Porto, Faculdade de Letras, 2004, p.63.

[40] Madalena Ceppas Salvação Barreto (2015). Timor do século XX: deportação, colonialismo e interações culturais. Dissertação de Mestrado em Antropolojia- Culturas Visuais. Faculdade de Ciencias Sociais e Humanas. Universidade Nova de Lisboa.

[41] Haree iha Anthony Giddes, Sociologia, 2ª Edicão, Fundação Calouste Gulbenkian, Liboa, 2000, p. 36

[42]Trindade, J. (2011). ‘Lulik: The core of Timorese values’, paperpresentedat Communicating New Research on Timor‐Leste. The 3rd Timor‐Leste Study Association (TLSA) Conference, Dili, Timor‐Leste (30th June).

[43] in, Benjamim Cardoso, Timor-Leste Um Povo Três Direitos: D. Boaventura –Liurai de Manufahi, p. 24.

[44] in, Madalena Ceppas Salvação Barreto (2015). Timor do século XX: deportação, colonialismo e interações culturais. Dissertação de Mestrado em Antropolojia- Culturas Visuais. Faculdade de Ciencias Sociais e Humanas. Universidade Nova de Lisboa, p. 52

2 comments:

Unknown17 July 2020 at 09:38
Parabens maun Saky, artigu exelente
Unknown21 July 2020 at 03:18
Sr. Carlos Saky, tetun nia hun hosi hela mambae. Mambae maka hahoris tetun. Quandu ita apresenta ona mambae ho tomak iha Dicionárius no gramátikas sira maka sei facilita hela historiadores sira, linguistas sira, sei modifika hela teoria lobuk kb línguas, dialetus sira, no Ukun real nebé existe iha Raí Timor.