REFLESAUN TINAN 50 REPUBLIKA DEMOKRATIKA TIMOR-LESTE

 

REFLESAUN TINAN 50 REPUBLIKA DEMOKRATIKA TIMOR-LESTE

 

Husi: Carlos da Silva L.F.R. Saky

 

Loron ida-ne’e, pas tinan limanulu desde FRETILIN proklama unilateralmente Republika Demokratika Timor-Leste (RDTL) iha loron 28 fulan novembru 1975. Dehan unilateral tanba la'os de'it partidu sira seluk hanesan UDT, APODETI, KOTA no Trabalhista la-rekuinhese, maibe, liuliu, la-rekuinhese husi Portugal hanesan potensia administrante nomos Nasoins Unidas.

 

Ohin halo tinan limanulu, nasaun ne’e halo reflesaun hikas konaba ninia perkursu nebe nakonu ho kanek, aten-barani, no lisaun sira. Perkursu ida-ne’e nunka semo loos de’it hanesan rama oan ida ka fasil: nia forma husi funu, husi okupasaun, husi refujiadu, husi rezistensia, husi vitoria politika, no prosesu naruk harii Estadu. Atu kumprende di’ak Timor-Leste ohin loron, ita presiza haree ho matan moos faze tolu istoria RDTL nian: faze harii, faze konzelamentu, no faze restaurasaun.

 

Faze dahuluk hahuu ho proklamasaun iha 1975, bainhira RDTL moris hanesan espresaun dignidade nasaun no determinasaun atu moris independente. Maibe liberdade ida ne’e dura de’it loron 9 tanba Timor-Leste hetan invazaun militar Indonezia iha loron 7 fulan dezembru 1975 no okupadu durante tinan ruanulu resin haat (1975-1999). Hafoin okupasaun hahuu, RDTL la’o nafatin, maibe la’o ho kude’ik tanba tenki hakiduk ba ai-laran, funsiona iha Baze Apoio sira, husi 1975 to’o 1983, maibe, pratikamente, funsiona hanesan Estadu ida, to’o de’it iha 1978, bainhira Baze Apoio sira rahun hotu ona. Husi 1978 ba oin, lafunsiona ona governu ruma.

 

Hafoin invazaun, maski la-kontrola tomak ona territoriu fizikamente, republika ne’e moris nafatin hanesan estrutura politika nebe opera iha situasaun funu nian. Buat nebe suporta kontinuidade husi republika ida-ne’e nian la’os forsa armada de’it, FALINTIL, maibe determinasaun povu nian: Ema Timor hamutuk rihun atus mak sakrifika nia moris durante tinan ruanulu resin haat rezistensia, atu iha foho, iha sidade, iha rede klandestina sira. Iha diplomasia internasional mos barak halo sakrifisiu hodi mantein moris nafatin problema Timor nian iha forum internasional. Sira mak aliserse moral husi perkursu tomak RDTL nian.

 

Faze daruak hahuu bainhira lider sira rezistensia nian desidi konzela ka hapara RDTL iha 1983, laliu husi desizaun formal ruma tanba obriga husi situasaun, hanesan estratejia ida hodi hasoru dinamika politika foun no global. Konzelamentu ida-ne’e la’os rejeisaun ba proklamasaun nebe halo tiha ona, maibe mudansa tatika atu luta bele la’o efetivu liu tan, bele simu husi mundu internasional. Foku rezistensia nian muda husi asegura estadu nebe proklamadu ona sai ejijensia ba direitu autodeterminasaun. Durante faze ida-ne’e rezistensia luta ho objetivu ida de’it: ijiji direitu autodeterminasaun atu povu Timor hili rasik ninia futuru. Iha loron 30 fulan agostu 1999, liu husi referendum nebe organiza husi Nasoins Unidas, povu hili ukun-an. Ho vitoria iha referendum ne’e, luta naruk durante tinan ruanulu resin haat hetan nia dalan ona.

 

Faze datoluk hahuu husi loron 20 fulan maiu 2002, bainhira restaura hikas ukun-an hanesan Estadu soberanu. Restaurasaun ne’e hatada ho hamosu Asembleia Konstituinte, halo no aprova konstituisaun, harii instituisaun judisial, forsa armada no polisia nasional, no instituisaun moderna sira nebe sai koluna vertebral Estadu nian. Maibe restaurasaun ida-ne’e hanesan faze hahuu ida. Difisil liu duke hetan ukun-an mak harii governu nebe bele serbi povu no responde nesesidade tempu nian.

 

Durante tinan limanulu ne’e, Timor-Leste rejista susesu importante balun. Vitoria ba direitu autodeterminasaun mak susesu boot nebe muda perkursu istoria nasaun nian. Timor-Leste mos dezenvolve sai Estadu ida demokratiku liu iha Sudeste Aziatiku, ho espasu politika nebe relativu livre, imprensa nebe ativu, no mudansa lideransa liu husi mekanizmu konstitusional. Prosesu rekonsiliasaun nasional hafoin trajedia sira 1999 la’o ho dalan dame nebe raru hetan iha rai sira hafoin sai husi funu. Parte barak nebe uluk fahe ba grupu sira nebe kontra malu ohin loron moris hamutuk sein violensia, reflete maturidade sosial nebe estraordinaria husi povu nebe sofre durante tinan naruk.

 

Maibe susesu sira ne’e la’o hamutuk mos ho frakeza nebe labele tau sees. Politika nasional sei influensiadu husi figura boot sira husi jerasaun sira rezistensia nian, liuliu husi jerasaun tuan, jerasaun 75 nian. Forsa instituisaun sira nian seidauk bele ekilibra influensia individu nian, neduni estabilidade Estadu nian dala barak depende liu ba relasaun interpesoal entre lider sira nian, la’os iha mekanizmu institusional. Rivalidade tuan nebe mai husi abut periudu funu nian sei sente iha desizaun politika barak. Durante Estadu dependente ba dinamika pesoal no la’os ba sistema, mak estabilidade sei vulneravel nafatin. Lider jerasaun tuan sira, barak mak halo-an ba sistema, sira la-preokupa ho hametin sistema. Se sistema forte mak sira bele mout, tanba sistema obriga sira tenki atua tuir konstituisaun, lei no regra sira, la'os tuir ida-idak nia gostu.

 

Lider sira husi jerasaun tuan nian, ko'alia maka’as konaba unidade, dialogu no rekonsiliasaun, haree ba hanesan mestre boot duni, maibe iha pratika, sira rasik mak selok malu, siku malu, kateri malu, satan malu, hatun malu, hamonu malu, fila kotuk ba malu, lako’alia ba malu, nega malu. Buat hirak ne'e hotu lai lasai izemplu di'ak ba se de’it. Sira rasik mak kria krizi, kria impase politika hodi mantein sira nia popularidade no poder. Buat hirak hotu ninia impaktu afeta direitu ba unidade entre lider sira nune’e mos ba povu. Haree oinsa foin-sa'e barak tetak malu, fahe malu tuir lider sira nia ain-le'ut. Sira ko’alia rekonsiliasaun ba povu, maibe entre sira laiha rekonsiliasaun. Sira hanorin dialogu ba povu seluk, maibe entre sira dialogu hanesan buat tabu ida. Lahatene, ida nebe mak atu sai izemplu ba povu. Lider sira mak hanesan lalenok, sira tenki hatudu izemplu di'ak hodi povu tuir. Joven sira han malu, reflesu direktu husi atitude lider sira nian. 

  

Ekonomia mos hakdasak nafatin. Dependensia boot ba Fundu Petroleo halo Timor-Leste la-konsege hamrik iha aliserse ekonomia ida nebe diversifikada no sustentavel nia leten. Setor agrikultura seidauk dezenvolvidu hanesan setor produtivu, sei depende maka’as ba importansaun husi rai-li’ur. Kampu trabalhu formal sei limitadu, no familia barak sei dependente ba ekonomia subsistensia. Limitasaun sira ne’e iha impaktu direktu ba povu: Familia barak kontinua moris iha vulnerabilidade nia laran, oportunidade ekonomia lahanesan, no prosese dezenvovimentu dala barak lato’o ba kamada sosiedade sira hotu ho justu. Problema dezempregu kontinua aas, kampu trabalhu ladun iha, ida-ne'e mak halo foin-sa'e rihun ba rihun husik hela nia rain, ba buka serbisu iha rai seluk. 

 

Dezenvolvimentu infraestrutura lori duni progresu balu, estrada, eletrisidade, telekomunikasaun, maibe ninia impaktu dala barak la-ekilibradu ho nesesidade baziku sira hanesan serbisu nebe estavel, edukasaun ho kualidade, no serbisu saude nebe di'ak. Saude aat liu kompara ho setor sira seluk, ema mate naba-naba no lahetan atendimentu di'ak. Hospital nakonun ho ema moras sira. Falta ai-moruk no professional saude sira, la'os de'it iha zona remota sira, maibe iha ospital referal sira hotu.

 

Setor edukasaun mos hanesan, iha area remota sira ladun iha mestre sira no fasilidades nebe diak, no fatin balun aat tebes. Kurrikulu sira laklaru no la-responde nesesidade no ejijensia merkadu nian. Ita lahatene rumu edukasaun Timor nian, atu forma sosiedade Timor ida oinsa. Edukasaun sira lahanorin ema sai kritiku, forma de'it ema pasivu sira hodi fasil sai instrumentu ba ema sira iha poder nian. 

 

Dezenvolvimentu lori ona mudansa fizika, maibe seidauk produz mudansa loloos ba ema barak iha suku no area remota sira.

 

Administrasaun publika mos sei hasoru dezafiu barak. Kapasidade burokrasia sei fraku, planeamentu dala ruma latasak, no implementasaun politika dala barak sidi no kude’ik. Rekursu finanseira Estadu nian dala barak laiha balansu ho kapasidade tekniku atu implementa programa sira ho efetivu. Sasan barak halo arbiru de’it, sein planu. Balun la’o tiha ona mak foin halo planu, tanba ne’e mosu sobu no harii iha projetu klaran. Nudar nia konsekuensia, ambisaun boot Estadu nian dala barak hela de’it iha surat tahan sein rezultadu nebe di’ak ba povu.

 

Iha setor sosial no politika, dezafiu boot mak dezenvolve kultura dialogu no konsensu nebe ho baze instituisaun, la’os de’it komunikasaun informal entre lider sira. Iha tinan sanulu ikus, dala barak desizaun estratejika sira estadu nian, la-determina husi konsensu elite politika sira, nein liu husi mekanizmu sira transparente nebe involve instituisaun no povu, maibe husi lider ida rua mesak-mesak. Padraun ida ne’e halo Estadu sai vulneravel ba mudansa politika nebe teki-teki no konflitu elite nebe naruk. Impase politik ninia hun mai husi buat ida buka manan mesak, halo mesak, sein konsulta publiku ka buka konsensu entre lider politiku sira. Poder no ego mak sai “guia norteador” ba politika, la’os pensamentu estadista nian. Rejenerasaun lideransa mos sai nesesidade urjente tanba jerasaun foun sira nebe atu sai jerasaun ponte kais hotu ona mos ladun hetan espasu nebe naton hodi afirma-an ka hola desizaun nasional sira. Jerasaun tuan sira ko’alia de’it mak dehan jerasaun foun sira seidauk preparadu ka laiha figura jerasaun foun nebe bele troka sira.

 

Jerasaun tuan sira haluha tiha katak sira la-prepara jerasaun foun sira tanba sira nia tempu hotu de’it ba kompete malu hodi hatudu se mak manda no se mak maka’as liu, la’os oinsa serbisu hamutuk ba interese nasional. Jerasaun tuan sira mak lakohi prepara jerasaun foun sira hodi sira bele ukun nafatin to’o mate. Ida ne’e sai ameasa boot ba futuru Timor nian.

 

Iha realidade, jerasun foun barak iha esperiensia ona, balun involve direktu iha negosiasaun fronteira maritima, halo ho responsavel no ho susesu. Sira mos involve iha rezolve krizi sira 2006 no 2007 nian, krizi sira nebek kria husi jerasaun tuan sira. Sira konsege rezolve problema sira kompleksu nian, neduni retorika sira dehan jerasaun foun sira seidauk preparadu ne’e so hatudu de’it “narcisismo político” nebe aas husi jerasaun tuan sira. Jerasaun foun barak mos lidera hela prosesu rekonsiliasaun sira. 

Retorika sira dehan jerasaun foun sira seidauk preparadu ka laiha figura jerasaun foun atu ukun, so hatudu de'it buat ida. Jearsaun tuan sira hakarak sira mak ukun nafatin.  

Rekonsiliasaun nasional, maski progresivu, maibe sei husik hela kanek no fitar istoria. Familia barak seidauk hetan esplikasaun klaru konaba paradeiru sira nia ema sira nebe lakon. Narrativa istoria nebe kesi grupu sira, atu gerrilheiru sira, ativista sira iha sidade, rede klandestina sira, ka grupu pro-autonomia sira, seidauk harii ho inkluzivu loloos. Seidauk iha narrativa nebe loos no hotu-hotu bele simu, unidade nasional sei kontinua frajil ka vulneravel nafatin.

 

Ohin, hafoin tinan limanulu proklamasaun 1975, Timor-Leste hamrik iha dalan sanak importante ida. Timor-Leste iha kapital moral no istoria nebe estraordinaria: aten-barani no determinasaun husi ninia povu sira nebe luta no mate iha tinan ruanulu resin haat nia laran, lejitimasaun internasional nebe forte, no determinasaun koletiva atu moris iha liberdade nia laran. Maibe kapital ne’e lanatoon atu asegura futuru nebe diak. Dezafiu nebe Estadu hasoru ohin loron kompleksu liu duke dezafiu sira hasoru iha periudu funu nian: dezenvolve ekonomia ida forte, reforsa instituisaun, hametin unidade nasional, no asegura desenvolvimentu nebe hasa’e lolos kualidade moris povu nian.

 

Reflexaun tinan limanulu ne’e la’os konaba haree ba kotuk, maibe konaba luta ne’e seidauk hotu. Se iha 1975 povu ne’e luta kontra kolonializmu no okupasaun, mak ohin loron ninia luta mak harii Estadu nebe justa, efetivu no prospera. Restaurasaun RDTL iha 2002 so hetan ninia signifikadu istoria tomak bainhira Estadu ne’e bele sai fatin seguru, estavel, justa no iha dignidade ba ninia sidadaun sira hotu. 

  

Honra no gloria ba aswa'in no martir sira hotu nebe lori sira nia isin no moris hodi sosa ukun rasik-an ida ne'e. Nasaun nebe boot, la'os nasaun nebe ninia rain boot, maibe nasaun nebe latrai ninia aswa'in no martir sira nia idealizmu mak hakarak Timor ida livre no unidu, moris diak, sein esplorasaun no diskriminasaun ba ema ida.  

 

Parabens ba Povu Timor tomak nebe ohin selebra tinan limanulu ba proklamasaun RDTL. Espera ba oin buat hotu ladi'ak no lori moris di'ak ba Timor oan sira hotu.