Dili Halerik

Dili Halerik

Iha tempu uluk Dili sidade furak
Sidade kiik ida furak tebes
Aikasi tahan halo Dili sidade matak
Aikasi funan halo Dili sidade mean
Dili sidade kiik, furak no moos 

Ohin loron Dili boot ba beibeik
Foer butuk iha nebe-nebe
Asu dada foer ba mai
Fahi ten dois semo lemo-lemo
Dili tanis halerik iha foer leten

Dili uluk sidade mos no hakmatek
Laiha poluisaun lian no suar
Laiha kiak no tane liman
Ohin loron Dili nakonun ho krimi
Krimi hasoru ema no ambiente

Ohin loron Dili halerik no tanis
Udan boot no mota boot tun
Sobu ponte, sobu uma, hakoi riku soin
Lori ema no balada hakilar tuir mota ba tasi
Inan aman sira tanis, halerik ba oan sira lakon

Laiha politika ba Dili mos
Iha de’it ipokrita sira tanis no duir iha tahu laran sira
Matan wen lafaek suli hodi buka votos
Lamas tun lamas sa’en iha we-merak laran
Hatudu de’it domin malahok iha nakukun laran

Osan, feto, kadeira, projeto no kasinu
Halo ema sai hanesan balada fuik
Haree malu matan lamoos
Selok malu, hatun malu, les malu no hurlele malu
Tanba de’it osan, feto no poder

Dili hau nian Dili
Bainhira los hetan hikas bali na’in diak
Lori hikas Dili ba moris diak no hakmatek
Satan hikas Dili husi foer no mota boot
Halo ema hotu moris hakmatek hamutuk ho natureza

Dili hau nian Dili
Bainhira loos hetan hikas ema diak
Hakoak ema hotu ho fuan
Laiha tan selok malu no hakuna malu
Laiha tan poluisaun su’ar no foer

Mai ita hamutuk bali Dili
Halo Dili furak hikas hanesan uluk
Laiha kanten, laiha naukten, laiha ipokrita
Hamutuk halo Dili sai sidade mos no furak
Hamutuk halo Dili sai sidade dame no seguru

Bebonuk, 20/03/2020