BA KIAK NO TANE LIMAN SIRA

BA KIAK NO TANE LIMAN SIRA

Tan sa ema haree imi ho matan ikun?

Imi la’os na’uk ten …

Imi la’os korruptor …

Imi la’os ohodor ema …

Imi lahadau ema nia sasan …

Imi la’os maukose …

Imi la’os ema falsu

Imi la’os ema ipokrita

Imi ema ki’ak no tane liman de’it

Tane ho fuan moos

Tane tanba imi laiha duni buat ida atu han

Imi brani husu…

Ida ne’e mak Imi nia dignidade

Ida ne’e mak Imi nia onestidade

Ida ne’e mak Imi nia integridade

Imi husu, la’os na’uk

Imi sai tane liman tanba sistema

Imi sai folin laek tanba kiak forsadu

Imi sai kiak tanba kiak estrutural

Imi sai nune’e tanba sira seluk han liu

Imi sai kiak no tane liman tanba sira seluk han barak liu

Sira hakribi imi tanba imi kiak

Sira hakribi imi tanba imi foer

Maibe…

Imi kiak tanba sira na’uk

Imi kiak tanba sira fo ba malu de’it

Imi foer tanba sira haree sira nia an de’it

Imi sai tane liman tanba sira sobak taka matan

Ema di’ak sira basa liman ba korruptor sira

Ema matenek sira hakruk ba naukten sira

Hotu-hotu simu korruptor sira nia ukun
Hotu-hotu simu naukten sira nia orden

Ema diak no matenek sira subar iha sira nia ta’uk rasik

Hotu-hotu hahii no hana’i korruptor sira

Halo korruptor no naukten sira sente dikur naruk

Sira foti no sobak buat hotu

Laharee kiak no tane liman sira

Mundu ne’e bulak ona

Mundu ne’e ladulas tuir relojiu

Mundu ne’e moras todan

Buat hotu la’o kontrariu

Sira hotu haree O ho matan ikun

Tanba O laiha buat ida atu fo ba sira

Loron matan naroman sei to’o ba O

Bainhira korruptor no naukten sira la ukun ona

Lalika lakon esperansa

Loron matan sei to’o mai

Anin foho sei doko maka’as

Aifuan dodok sei monu

Fini foun sei moris

Lori moris foun ba ema hotu

Bebonuk, 6/4/2020