SAIDA MAK MAUBERE NO MAUBERISMO?

Husi: Carlos da Silva L. F. R. Saky

Iha tinan 1990, autor hakerek ensaiu rua ne’ebé sirkula klandestinamente iha tempu okupasaun Indonézia, ida ho títulu “Colonialista ka Pembangunan?” no ida seluk ho títulu “Saida mak Maubere no Mauberismo?”. Ensaiu primeiru konsege hetan fali nia kopia iha Arquivo & Museu da Resistência Timorense (AMRT), maibé ensaiu kona-ba Maubere no Mauberismo seidauk hetan. Autor koko hakerek hikas ho titulu hanesan, maibe nia kontéudu ladun hanesan loloos ona ida hakerek iha 1990.

Atu komprende saida mak Maubere no tanbasá mak Mauberismo bele sai hanoin ideolójiku, ita presiza hahú husi istória liafuan Maubere rasik, ninia utilizasaun iha sosiedade Timor-Leste no transformasaun ne’ebé akontese durante luta libertasaun nasional. Maubere la’ós de’it naran ka dezignasaun atu identifika ema. Nia sai parte importante husi prosesu istóriku ne’ebé povu Timor-Leste transforma dezignasaun ida ne’ebé iha kontestu balu lori konotasaun sosiál ne’ebé hamenus dignidade, sai símbolu orgullu, identidade, unidade, rezisténsia no luta ba libertasaun nasional.

Iha tinan 1973 (?), Ramos-Horta hakerek artigu ida ho títulu “Maubere, Meu Irmão”. Tuir Ramos-Horta, iha loron Domingu ida, nia tuur iha fatin ida, hemu serveja uitoan, no sente triste tanba haree situasaun kiak ne’ebé povu Timor moris ba. Iha situasaun ne’e, nia foti mákina hakerek ho liman ida no hakerek karta aberta ho títulu “Maubere, Meu Irmão” depois nia hateten hanesan ne’e:

“… hoje é domingo. Alguns foram à praia, outros foram à missa. E a bater no peito, meia culpa, meia culpa.

Eu estou aqui, entre esses quatro paredes, meio embrigado, e estou a pensar em ti. Tu, que mascas para enganar a fome, com o teu suor regas o solo, o chão. E eu aqui… Maubere, meu irmão, o sol já vai alto, os seus raios são também para ti. Acorda! Levanta-te! São horas!” (Entrevista ho Ramos-Horta iha AMRT, iha 2025).

Artigu ne’e lori mensajen forte kona-ba kontradisaun entre moris ema sira ne’ebé iha oportunidade atu deskansa, bá praia ka igreja, no realidade povu kiak ne’ebé tenki servisu maka’as atu sobrevive. Liafuan “Maubere, meu irmão” sai forma atu bolu povu ne’ebé moris iha situasaun opresaun no kiak, no konvida nia atu hadeer, hamriik no sai konsiénte kona-ba nia kondisaun. Iha prosesu istóriku tuirmai, FRETILIN adopta liafuan Maubere no transforma nia sai símbolu polítiku ba povu no luta libertasaun nasional.

Iha kontestu sosiál balu, Maubere uza atu refere ba ema kiak, ki’ik, to’os na’in, natar na’in, serbisu na’in, ai-leba, ain-tanan, koziñeiru, mainatu, kriadu, asulear, no ema ne’ebé lahetan oportunidade atu aprende sani no hakerek. Dezignasaun ne’e bele lori konotasaun ne’ebé hatudu distánsia entre ema ne’ebé konsidera-an iha pozisaun sosiál aas no ema ne’ebé haree hanesan ema ki’ik. Iha kontestu ida-ne’e, Maubere bele sai naran ne’ebé liga ho kiak, kuran edukasaun, dependénsia no kondisaun moris ne’ebé la-dignu.

Maibé, signifikadu ida-ne’e la-reprezenta interpretasaun hotu-hotu kona-ba Maubere. Iha luta libertasaun nasional, FRETILIN foti liafuan ne’e no fó nia signifikadu polítiku foun. Maubere la’ós de’it ema kiak ka ema ne’ebé laiha edukasaun, maibé sai símbolu ba povu tomak, ba nia dignidade, identidade, direitu no soberania. Povu ne’ebé uluk konsidera hanesan ema ki’ik, laiha kbiit ka kapasidade atu determina nia futuru rasik, transforma sai sujeitu prinsipál iha luta ba libertasaun.

Transformasaun ida-ne’e iha importánsia istórika no polítika boot tanba muda relasaun entre dezignasaun no dignidade. Povu la-simu de’it signifikadu ne’ebé ema seluk fó ba nia, maibé foti fali liafuan ne’e, fó nia interpretasaun foun no uza nia atu afirma identidade no direitu atu sai na’in ba nia destinu. Nune’e, Maubere sai símbolu polítiku ne’ebé reprezenta unidade povu nian, luta hasoru opresaun no aspirasaun atu harii sosiedade ida ne’ebé ema hotu iha dignidade no direitu hanesan. Iha perspetiva Benedict Anderson (1983), identidade nasional no sentimentu pertense ba komunidade nasional bele harii liuhusi memória, símbolu no reprezentasaun ne’ebé fahe hamutuk. Iha kontestu Timor-Leste, transformasaun Maubere sai símbolu nasional bele komprende iha prosesu afirmasaun identidade no unidade povu nian.

Iha linguajen marxismo nian karik, Maubere ne’e refere ba ema proletaridu sira. Karl Marx no Friedrich Engels, iha Manifesto do Partido Comunista (1848), halo apelo ba proletariadu hotu-hotu atu hamutuk hasoru sistema kapitalista liuhusi slogan: «Proletários de todos os países, uni-vos!» (Marx & Engels, 1848). Apelo ida-ne’e iha objetivu atu mobiliza no hametin unidade proletariadu nian. Iha dimensaun mobilizasaun polítika, ida-ne’e bele kompara ho apelo Ramos-Horta nian: “Maubere, meu irmão, o sol já vai alto, os seus raios são também para ti. Acorda! Levanta-te! São horas!” Apelu rua ne’e la’ós liafuan hanesan, maibé iha pontu komún iha esforsu atu fanu konsiénsia, mobiliza ema ne’ebé sofre opresaun no konvida sira atu hamriik hasoru kondisaun ne’ebé domina sira. Iha kontestu Timor-Leste, apelu ne’e bolu “Maubere” sira atu hamriik kontra kolonialista no defende sira nia dignidade. Durante Baze de Apoio, liafuan Maubere, domina iha diskursu sira ka iha formasaun politika no kontinua to’o iha periudu gerrilla nian. Iha textu Proklamasaun Insurreisaun Politika Estudantes Timor oan sira nian no juramentu RENETIL nian, nune’e mos iha diskusaun sira iha reuniaun sira RENETIL nian mos domina ho liafuan Maubere. Timor oan sira iha estudu boot liu,  ida mak Padre Filomeno Jacob mos uza naran funu nian “Maubere Oan”.  Liafuan “Maubere” la’os deit sai símbolu unidade nian maibé simbolu rezisténsia hasoru okupasaun Indonezia nian.  

Maibé, atu komprende istória liafuan Maubere ho kle’an, presiza konsidera interpretasaun oioin ne’ebé mosu iha kontestu sosiál no kulturál Timor-Leste. Padre Domingos Soares, por ezemplu, iha entrevista ida ho AMRT iha 2025, nia esplika katak nia naran Maubere mai husi akontesimentu ida ne’ebé iha natureza halimar. Tuir nia esplika, Padre Mateus haree nia hatais roupa ne’ebé sabraut no foer, tanba nia hadi’a hela kareta ne’ebé aat tanba dalan ladi’ak. Haree situasaun ne’e, Padre Mateus bolu nia: “O ne’e hanesan Maubere ida.” Hanesan mós malae mutin sira atu hatun Ramos-Horta, sira dehan ba nia: “O ne’e hanesan Maubere ida”, katak beikteen ida, foer no kiak.

Esplikasaun Padre Domingos Soares nian ne’ebé koñesidu liu ho Amo Maubere hatudu katak iha kontestu ida, liafuan Maubere bele uza atu refere ba aparénsia ema nian, kondisaun moris ka situasaun sosiál ne’ebé ema seluk interpreta ho maneira espesífika. Maibé, esperiénsia pesoál ida-ne’e labele uza atu determina signifikadu hotu-hotu ne’ebé liafuan Maubere hetan iha Timor-Leste, liuliu hafoin nia tama iha diskursu polítiku no luta libertasaun nasional. Tanba ne’e, esplikasaun ne’e tenki konsidera hanesan testemuñu pesoál kona-ba esperiénsia ida, la’ós hanesan prova definitiva kona-ba orijen no signifikadu tomak liafuan Maubere nian.

Iha interpretasaun polítika FRETILIN nian, Maubere sai símbolu ba povu ne’ebé sofre opresaun, inklui to’os na’in no natar na’in sira, asulear sira, koziñeiru, mainatu, ain-tanan, no ema ne’ebé lahetan oportunidade atu asesu ba edukasaun. Povu hirak-ne’e la-konsidera hanesan grupu ida ne’ebé presiza simu ajuda de’it, maibé hanesan sujeitu istóriku ne’ebé tenki sai na’in ba nia libertasaun. Entaun, Maubere sai tiha ona hanesan símbolu ka figura revolusionária ida ne’ebé ho orgullu luta ba ninia libertasaun rasik.

Iha interpretasaun ne’ebé atribui ba UDT, liafuan Maubere liga ho ideia “Zé Povinho”, ne’ebé bele lori konotasaun kona-ba ema simples ka ema komún. Iha kontestu polítiku, diferensa interpretasaun ne’e sai objetu debate kona-ba identidade, reprezentasaun no signifikadu ne’ebé grupu polítiku ida-idak fó ba povu. Iha informasaun istórika ne’ebé presiza kontinua verifika liuhusi dokumentu primáriu, iha mós alegasaun katak lider sira husi UDT no Bispu D. Carlos Filipe Ximenes Belo la-simu liafuan Maubere tanba sira liga nia ho FRETILIN no ho imajen koziñeiru, mainatu, asulear ka ema ne’ebé lahetan edukasaun. Sira rezeita mós katak sira la’ós koziñeiru, mainatu ka ain-tanan. Informasaun no alegasaun hirak-ne’e presiza tau iha kontestu no verifika ho dokumentasaun relevante, atu evita transforma interpretasaun ka memória pesoál sai faktu istóriku ne’ebé lahetan fundamentu sufisiente.

Diskusaun kona-ba orijen liafuan Maubere mós merese atensaun. Padre Domingos Soares fó interpretasaun ida katak liafuan ne’e bele komprende husi elementu rua: “Mau”, ne’ebé nia liga ho lian Mambai no signifika “mane”, no “Bere”, ne’ebé nia liga ho lian Makasae no signifika “boot”. Husi interpretasaun ne’e, Maubere bele komprende hanesan “mane boot” ka “maun boot”.

Interpretasaun Padre Domingos Soares nian tenki konsidera hanesan esplikasaun ne’ebé nia rasik fó, la’ós hanesan konkluzaun linguístika definitiva. Atu afirma nia hanesan etimolojia loos, presiza peskiza linguístika ne’ebé kompara estrutura liafuan, pronúnsia, signifikadu no evolusaun istórika husi lian sira iha rejiaun oioin.

Iha kontestu ida-ne’e, diskusaun kona-ba elementu “Mau” labele limita de’it ba área Mambai. Iha área Viqueque, liuliu iha naran fatin no naran lokal sira, iha mós utilizasaun elementu “Mau” ne’ebé merese investigasaun. Ezemplu sira mak Maunaha, ne’ebé bele hakerek separadamente hanesan Mau-Naha ka Mau Naha; Mauhunu ka Mau-Hunu; Maufunu ka Mau-Funu; Mauleki ka Mau-Leki; Mauloho ka Mau-Loho; Maubai ka Mau-Bai; no Maudara ka Mau-Dara, entre seluk.

FRETILIN adopta tiha “Maubere” nudar símbolu ida tanba naran ida ne’e mak malae sira temi hodi hatun Timor oan sira, la’ós Maunaha ka seluk. Iha adopsaun ba símbolu, labele foti naran barak ka hotu-hotu, maibé foti ida. Foti naran ka figura “Maubere” tanba malae sira temi mak naran ida ne’e, nune’e mós ikus mai Ramos-Horta rasik uza hanesan figura reprezentativu ema Timor iha ninia artigu. Hanesan mós ema Portugés sira iha naran barak no oioin, maibé sira foti ida José ne’ebé koñesidu ho “Zé Povinho”.

Naran hirak-ne’e hatudu katak elementu “Mau” mosu mós iha rejiaun seluk, la’ós de’it iha área Mambai. Nune’e, naran Maunaha, Mauhunu, Maufunu no Mauleki labele ignora bainhira ita analiza utilizasaun elementu ne’e iha naran no liafuan Timoroan sira nian. Ezemplu hirak-ne’e fó razaun atu la-taka diskusaun linguístika ho konkluzaun katak elementu “Mau” iha ligasaun de’it ho Mambai.

Presiza mós klarifika katak “Mau” iha naran hirak-ne’e la’ós abreviatura ka derivasaun husi “Mao”, hanesan iha naran Mao Tse-tung. Elementu “Mau” ne’ebé mosu iha Maunaha, Mauhunu, Maufunu no Mauleki tenki analiza tuir kontestu linguístiku no kulturál Timor-Leste nian rasik, la’ós liga automatikamente ho naran ka figura polítika husi rai seluk.

Ezemplu naran hirak-ne’e la-prova katak etimolojia Maubere mai husi Viqueque, maibé hatudu katak la-loos atu taka ona diskusaun ho afirmasaun katak elementu “Mau” pertense de’it ba área Mambai. Atu determina orijen linguístika Maubere, presiza evidénsia komparativa ne’ebé kle’an, inklui análize estrutura liafuan, pronúnsia, signifikadu, tradisaun oral no evolusaun istórika iha lian no rejiaun oioin. Hanesan mos liafuan “Buibere”,  “Bui” hetan mos iha zona sira area Vikeke nian hanesan “Bui-Mau”, Bui-Lalu, nsst..

Maski orijen linguístika Maubere seidauk iha konkluzaun definitiva, interpretasaun Padre Domingos Soares nian iha dimensaun simbóliku no morál ne’ebé importante. Mane boot ka maun boot iha responsabilidade atu hamriik iha oin, tau matan ba maun-alin sira, defende família no povu, maski hasoru ameasa, perigu no risku ba vida. Nia labele husik sira ne’ebé presiza protesaun, no labele fila kotuk bainhira responsabilidade atu defende ema seluk sai todan.

Iha esperiénsia rezisténsia nian, ideia ne’e bele liga ho obrigasaun atu tau interese povu nian iha oin, la’ós tau interese pesoál ka benefísiu rasik iha leten. Lideransa, iha komprensaun ida-ne’e, la’ós estatutu ka priviléjiu, maibé responsabilidade atu servisu, proteje no hamriik hamutuk ho povu. Nune’e, Maubere bele hetan signifikadu ne’ebé liu husi dezignasaun ba ema ida ka grupu ida. Nia bele sai símbolu kona-ba responsabilidade, korajen, solidariedade no kompromisu atu defende dignidade povu nian.

Dimensaun nasional no polítika liafuan Maubere nian hetan esplikasaun importante iha dokumentu Konis Santana. Konis defende signifikadu nasional liafuan ne’e nian no responde ba deklarasaun João Carrascalão kona-ba laiha aseitasaun ba termu Maubere iha parte leste Timor nian. Iha dokumentu DRT 06669.017, Konis Santana hakerek:

“Oinsa mak atu aseita lider sira husi UDT iha estrutura CNRM nian se sira haree ba termu MAUBERE hanesan monstro ida, hanesan umilasaun ida ba ita nia Povu? Ha’u rona Sr. Eng. João Carrascalão nia deklarasaun ne’e husi RDP-Internasional. Ita nia parseiru istoriku sira, lider sira husi UDT nian katak termu MAUBERE laiha aseitasaun iha Lorosa’e! Ba ha’u ida ne’e hatudu laiha kuinesimentu ba realidadi loloos nian... Iha Lorosa’e nia rohan ne’eba, iha Tutuala ho Lospalos, pur izemplu, ema bolu naran Bua-Bere, Bere Vatxo, Mau Ili, sst., sst., no sira la moe ba ida ne’e! Ohin loron iha Timor-Lorosa’e laran tomak, termu MAUBERE, manan kontiudu politiku, dimensaun nasional ida iha sentidu UNIDADE no Funu hasoru prezensa okupante rai-li’ur nian! Esepsaun ba ema ida ka seluk, laiha ema ida senti umiladu! Maibe kontrariu, hotu-hotu orguillu hanesan MAUBERE!” (Konis Santana, DRT 06669.017, apud Saky, 2013).

Iha Konis nia argumentu, Maubere hetan dimensaun nasional ne’ebé la-limita ba fatin, rejiaun ka grupu ida. Nia sai símbolu unidade no luta hasoru okupasaun. Konis uza ezemplu kona-ba naran Bua-Bere, Bere Vatxo no Mau Ili iha parte leste atu hatudu katak elementu “Mau” no “Bere” mosu mós iha naran lokal sira, no katak liafuan ne’e la-presiza sai fonte moe ka umiliasaun.

Pontu importante husi argumentu Konis nian mak katak identifikasaun ho Maubere la’ós sinal frakeza ka inferioridade. Pelo kontráriu, nia bele sai afirmasaun orgullu kona-ba identidade no pertense ba povu ida ne’ebé luta atu determina nia futuru rasik. Dokumentu ne’e hatudu katak iha tempu luta, liafuan Maubere sai parte husi disputa kona-ba unidade nasional. Ba ema balu, liafuan ne’e bele lori konotasaun sosiál ne’ebé sira lakohi simu; ba seluk, nia sai símbolu ba dignidade, rezisténsia no unidade. Interpretasaun istórika tenki haree ba disputa ne’e iha kontestu polítiku ne’ebé nia akontese, la’ós foti de’it signifikadu ida no ignora esperiénsia seluk.

Iha perspetiva istórika, transformasaun liafuan Maubere bele kompara, iha dimensaun simbólika, ho transformasaun signifikadu kruz nian iha tradisaun kristaun. Kruz iha relijiaun Kristen iha tempu uluk mak instrumentu ida ne’ebé Impériu Romanu uza hodi kastigu ema ho pena mate. Kruzifikasaun (hodi kesi ka baku ema ba krus) mak forma kastigu ida ne’ebé kruél tebes, moe no hamenus dignidade umana. Kruz sai símbolu ba terus, umilhasaun, mate no opresaun husi podér ukun-na’in.

Maibé, Hafoin Jesus Kristu hetan kastigu mate iha krus, signifikadu krus nian muda iha fiar kristaun.

Mudansa ne’e bele esplika hanesan tuir mai:

1.  Molok Jesus: Kruz mak símbolu umilhasaun, terus, kastigu mate no opresaun.

2.  Depois Jesus hetan mate iha krus: Kruz hetan signifikadu foun nu’udar símbolu sakrifísiu no domin Jesus nian atu salva umanidade.

3.  Iha dezenvolvimentu relijiaun Kristen: Kruz sai símbolu fiar, perdua, redensaun husi sala, salvasaun no vitoria hasoru mate liuhusi Jesus nia moris-hi’as hikas.

Ho liafuan badak: Kruz ne’ebé uluk sai símbolu umilhasaun no mate, depois muda sai símbolu domin, sakrifísiu, salvasaun no esperansa ba fiar-na’in sira Kristaun nian.

Importante atu komprende katak mudansa ne’e la’ós mudansa ba forma krus nian, maibé mudansa ba signifikadu istóriku no teolójiku ne’ebé fiar-na’in sira Kristaun fó ba krus.

Nune’e mós, liafuan Maubere, iha kontestu istóriku Timor-Leste nian, iha tempu balu uza ho konotasaun ne’ebé hamenus dignidade povu nian. Maibé, liuhusi luta polítika no libertasaun nasional, liafuan ne’e hetan fali nia signifikadu no sai símbolu identidade, dignidade, unidade no luta povu Timor-Leste nian hasoru opresaun. Liafuan ne’ebé uluk bele uza atu hakribi ka hamenus ema nia dignidade, ikusmai sai fonte orgullu, konsiénsia polítika no símbolu rezisténsia nian.

Maubere ne’ebé iha kontestu balu hetan konotasaun pejorativa hanesan ema foer, ema ain-tanan, ema beik, ema kiak, ema lahatene sani no hakerek, ema diskriminadu, exploradu no manipuladu, ikusmai mak hamriik atu luta no liberta-an husi kondisaun sira ne’e. Nia la-simu tan katak ema seluk mak determina nia dignidade no destinu. Povu foti hikas nia identidade, transforma signifikadu ne’ebé uluk uza atu hamenus nia dignidade, no afirma nia-an hanesan sujeitu polítiku no istóriku.

Komparasaun ho kruz ne’e la-signifika katak orijen no natureza símbolu rua ne’e hanesan. Kruz iha orijen no kontestu relijiozu, enkuantu Maubere iha orijen no kontestu sosiál, kulturál no polítiku Timor-Leste nian. Maibé, sira hatudu prinsipiu ida ne’ebé bele kompara: signifikadu símbolu ida nian la-depende de’it ba ema ka instituisaun ne’ebé uza nia atu hamenus ema seluk nia dignidade. Símbolu bele transforma liuhusi luta husi ema sira ne’ebé foti fali nia dignidade no fó interpretasaun foun.

Nune’e, Maubere la’ós de’it liafuan ka naran ne’ebé uza iha luta libertasaun. Nia sai parte husi prosesu ne’ebé povu Timor-Leste transforma dezignasaun identitária ba símbolu konsiénsia polítika, dignidade no soberania nasional. Maibé, transformasaun ida-ne’e lori ita ba pergunta importante liu: se Maubere sai símbolu povu nian, saida mak Mauberismo?

Maubere no Mauberismo iha relasaun metin, maibé sira la’ós buat rua ne’ebé hanesan. Maubere mak liafuan ka símbolu identitáriu ne’ebé iha istória Timor-Leste hetan signifikadu sosiál, polítiku no nasional. Nia bele reprezenta povu nia dignidade, nia unidade, nia luta no nia aspirasaun ba liberdade. Mauberismo, iha proposta ne’ebé autor hahú dezenvolve iha tinan 1990, mak hanoin polítiku no sosiál kona-ba oinsá atu liberta povu ne’ebé identifika ho Maubere husi kondisaun opresaun, diskriminasaun, esplorasaun, manipulasaun, umiliasaun no kiak, ne’ebé nia esperiénsia moris iha kolonializmu Português no okupasaun Indonézia.

Iha tempu ne’ebá, autor komprende katak dalan atu liberta povu husi dominasaun kolonial mak ukun rasik-an. Maibé, ukun-an mesak seidauk signifika liberdade tomak. Se, hafoin hetan independénsia, povu kontinua moris iha situasaun kiak, diskriminasaun, esplorasaun, umiliasaun no dependénsia, entaun liberdade seidauk realiza iha nia sentidu loos. Independénsia polítika tenki sai oportunidade atu transforma realidade sosiál no umana. Povu ne’ebé hamutuk luta hasoru dominasaun kolonial tenki mós hamutuk harii nasaun ne’e, no labele kontinua oho malu, halo vingansa ka fahe malu.

Husi perspetiva ida-ne’e, Mauberismo la’ós de’it hanoin kona-ba libertasaun nasional husi kolonializmu, maibé mós hanoin kona-ba libertasaun sosiál no umana. Nia objetivu mak atu harii sosiedade ida ne’ebé livre husi injustisa, diskriminasaun, esplorasaun, umiliasaun no divizionismo, no ne’ebé bazeia ba dame, unidade, solidariedade, fraternidade no igualdade. Ukun-an labele sai oportunidade ba elite foun sira atu substitui kolonialista estranjeiru no sai fali kolonista ba sira nia povu rasik. Independénsia tenki transforma relasaun podér no kria kondisaun ne’ebé povu tomak bele moris ho dignidade.

Iha ensaiu ne’ebé autor hakerek iha Bali iha tinan 1990, autor la-limita Mauberismo ba hanoin kona-ba libertasaun nasional. Desde tempu ne’ebá, autor defende ona katak luta libertasaun tenki kontinua iha dimensaun sosiál no umana. Bainhira Timor-Leste hetan ukun-an, povu labele kontinua fahe malu tuir diferensa klase sosiál, hanesan liurai ho atan, riku ho kiak, matenek ho beik, Lorosa’e ho Loromonu ka rai klaran. Diferensa sira-ne’e labele sai instrumentu atu hamosu inimigu, diskriminasaun ka violénsia entre Timoroan sira (Saky, 1990).

Divizionismo mak estratéjia dominasaun ne’ebé uza diferensa entre ema, grupu ka komunidade atu fahe povu, hamenus unidade no fasilita kontrolu husi podér dominadór. Tanba ne’e, povu ne’ebé luta atu liberta-an husi kolonializmu labele kontinua reproduz polítika fahe-malu ne’e iha sosiedade independente. Mauberismo tenki rejeita divizionismo iha forma hotu-hotu, inklui fahe povu tuir partidu polítiku, grupu sosiál, orijen, interese pesoál ka pozisaun iha luta libertasaun.

Maibé, rejeisaun ba divizionismo la-signifika rejeita diferensa ka obriga ema hotu atu hanoin hanesan. Presiza distinge entre unidade no uniformidade. Sosiedade livre tenki permite pluralizmu, debate no kritika. Diferensa polítika, ideolójika, kulturál no sosiál tenki respeita, maibé labele transforma sai razaun atu halo malu ba inimigu, diskrimina ka uza violénsia hasoru malu. Kritika polítika la’ós inimigu nasional, no diferensa ideolójika la’ós razaun atu halo malu sai inimigu. Unidade signifika kompromisu komún atu defende dignidade umana, soberania nasional, justisa no dezenvolvimentu Timor-Leste nian.

Nune’e, Mauberismo la’ós ideolojia atu troka dominasaun kolonial ho dominasaun interna, ka atu troka elite ida ho elite seluk. Nia la’ós ideolojia atu fó priviléjiu ba grupu ida tanba nia istória, pozisaun ka kontribuisaun iha luta. Nia mak proposta hanoin libertasaun ne’ebé buka elimina relasaun dominasaun, injustisa no diskriminasaun, no promove sosiedade ne’ebé ema hotu iha dignidade no oportunidade hanesan.

Husi komprensaun ida-ne’e, ukun-an la’ós objetivu ikus husi luta libertasaun, maibé kondisaun polítika ne’ebé tenki permite povu tomak determina nia futuru no dezenvolve nasaun hamutuk. Independénsia ne’ebé la-lori justisa sosiál, igualdade, solidariedade no liberdade ba povu hotu sei husik hela parte husi objetivu libertasaun ne’ebé seidauk realiza. Tanba ne’e, Mauberismo tenki lori memória luta nasional ba realidade agora, analiza relasaun podér no orienta harii futuru ne’ebé fó prioridade ba dignidade povu nian.

Iha komprensaun ida-ne’e, autor haree nesesidade atu distinge entre símbolu polítiku no ideolojia. FRETILIN fó kontribuisaun importante ba transformasaun Maubere sai símbolu polítiku no nasional. Maibé, presiza distinge kontribuisaun istórika ne’e husi afirmasaun katak FRETILIN dezenvolve ona Mauberismo hanesan ideolojia formal, sistemátika no iha estrutura teórika kompletu. Iha autor nia perspetiva, FRETILIN uza no promove Maubere hanesan símbolu povu no luta libertasaun, maibé ida-ne’e la-signifika katak Mauberismo dezenvolve ona hanesan sistema ideolójiku formal ne’ebé iha definisaun teórika, prinsípiu sistematizadu no orientasaun prátika klaru.

Símbolu ida bele mobiliza povu, hametin unidade no fó sentidu ba luta. Maibé, ideolojia presiza liu husi símbolu. Nia tenki iha konseitu, prinsípiu, interpretasaun kona-ba realidade, orientasaun ba asaun no kritériu atu avalia rezultadu. Ideolojia ida tenki iha kapasidade atu esplika relasaun podér, identifika problema estruturál, orienta desizaun no avalia se asaun polítika ida atinji duni nia objetivu ka lae.

Iha perspetiva Antonio Gramsci (1971), hanoin ideolójiku no konsiénsia polítika iha papél importante iha maneira grupu sosiál komprende realidade, organiza nia-an no disputa influénsia iha sosiedade. Hanoin polítiku ne’ebé hakarak transforma realidade labele limita-an ba slogan ka símbolu; nia presiza dezenvolve komprensaun kona-ba relasaun podér, interese sosiál no kapasidade atu orienta asaun koletiva. Tanba ne’e, Mauberismo la-presiza limita-an ba interpretasaun istórika FRETILIN nian, maski nia labele ignora papel istóriku ne’ebé FRETILIN hala’o iha transformasaun Maubere sai símbolu nasional. Proposta atu dezenvolve Mauberismo mak esforsu atu lori símbolu no memória istórika ne’e ba nivel hanoin polítiku no sosiál ne’ebé bele analiza no orienta realidade Timor-Leste nian. Ida-ne’e la’ós deklarasaun katak iha tempu luta libertasaun, FRETILIN ka organizasaun rezisténsia seluk adota ona sistema ideolojia ida ho naran no estrutura teórika hanesan ho proposta ne’ebé autor dezenvolve iha artigu ida-ne’e.

Ideolojia ajuda ema atu komprende realidade, identifika problema sosiál, analiza relasaun podér, determina prioridade no avalia polítika públika. Se Maubere sai símbolu dignidade no soberania povu nian, Mauberismo tenki dezenvolve hanesan estrutura hanoin sistemátika ne’ebé bele responde ba pergunta fundamentál sira: Sé mak kaer podér iha nasaun ida-ne’e? Sé mak hetan benefísiu husi dezenvolvimentu? Oinsá mak povu bele partisipa iha prosesu foti desizaun? Oinsá mak estadu bele responde ba nesesidade povu nian? Oinsá mak ita bele asegura katak independénsia polítika la-transforma sai forma dominasaun ekonómika ka sosiál foun?

Pergunta hirak-ne’e transforma memória istórika sai instrumentu análize. Se Maubere signifika katak povu mak sujeitu prinsipál iha libertasaun, entaun Mauberismo tenki husu se povu kontinua sai sujeitu prinsipál iha estadu independente. Se luta hala’o ho naran dignidade no igualdade, entaun ideolojia ida-ne’e tenki avalia se dignidade no igualdade realiza duni iha moris loroloron. Mauberismo labele limita-an ba nostalgia kona-ba luta libertasaun; nia tenki sai estrutura hanoin ne’ebé iha kapasidade atu analiza realidade ohin loron, avalia podér no orienta futuru.

Iha Indonézia, Sukarno (1964) dezenvolve Marhaenismo hanesan hanoin polítiku ne’ebé tau ema kiak no povu-traballadór iha sentru luta hasoru kolonializmu no injustisa sosiál. Naran Marhaen sai símbolu ba ema komún ne’ebé moris husi nia servisu, maibé nafatin hasoru estrutura ekonómika ne’ebé limita nia liberdade no moris di’ak. Importánsia Marhaenismo la’ós de’it iha uza naran ema komún nian, maibé iha esforsu atu esplika kondisaun sosiál no ekonómika ne’ebé halo povu sai vulnerável, no atu orienta luta polítika ba mudansa.

Iha Marhaenismo, esperiénsia sosiál povu nian sai fonte ba hanoin polítiku no mobilizasaun. Nia la’ós de’it deskrisaun kona-ba kiak, maibé esforsu atu interpreta opresaun no dezenvolve orientasaun ba mudansa sosiál no nasional. Iha pontu ida-ne’e mak iha posibilidade atu dezenvolve Mauberismo. Se Maubere sai símbolu mobilizasaun povu Timor-Leste nian, Mauberismo bele uza esperiénsia povu nian atu analiza relasaun entre podér, propriedade, ekonomia, dignidade no soberania.

Maibé, Marhaenismo no Mauberismo lahanesan. Marhaenismo dezenvolve iha kontestu istóriku no sosiál Indonézia nian, enkuantu Mauberismo tenki hahú husi realidade istórika, kulturál, ekonómika no polítika Timor-Leste nian. Komparasaun ida-ne’e útil atu hatudu katak símbolu ne’ebé iha ligasaun ho povu bele sai pontu hahú ba ideolojia ida, maibé ideolojia ne’e tenki dezenvolve konseitu no konteúdu rasik, bazeia ba esperiénsia no realidade povu ne’ebé nia reprezenta.

Ezemplu seluk bele haree iha Sandinismo, ne’ebé iha ligasaun ho Augusto César Sandino no luta hasoru intervensaun no dominasaun estranjeira iha Nikarágua. Memória no símbolu revolusionáriu ne’e sai fonte ba mobilizasaun polítika no dezenvolvimentu tradisaun ideolójika ne’ebé dezenvolve-an tuir ninia prosesu rasik. Ezemplu Sandinismo nian hatudu katak figura istórika ida bele sai símbolu soberania no rezisténsia, maibé atu sai ideolojia, símbolu ne’e tenki hetan interpretasaun no liga ho problema no objetivu polítiku sira ne’ebé liu husi nia tempu. Memória kona-ba lider ida mesak la-sufisiente; presiza iha estrutura hanoin kona-ba podér, povu, estadu no transformasaun sosiál (Sebrian, 2007).

Iha América Latina, Bolivarianismo hetan inspirasaun husi Simón Bolívar no nia luta ba independénsia no unidade polítika iha rejiaun ne’e. Iha dezenvolvimentu polítika moderna, hanoin Bolivariano hetan interpretasaun no aplikasaun oioin, inklui kona-ba soberania nasional, integrasaun rejionál, justisa sosiál no distribuisaun rekursu. Nia sai referénsia ba korente polítika oioin ne’ebé interpreta no uza patrimóniu istóriku Bolívar atu defende soberania, independénsia no projetu polítiku sira (Azzellini, 2022).

Ezemplu Bolivarianismo nian hatudu katak símbolu istóriku bele hetan interpretasaun foun bainhira kontestu polítiku muda. Maibé, ida-ne’e mós hamosu pergunta importante kona-ba sé mak iha direitu atu interpreta símbolu istóriku no oinsá atu prevene naran no memória kona-ba libertasaun atu la-uza hanesan justifikasaun ba podér ne’ebé la-presta konta ba povu.

Pergunta hirak-ne’e relevante tebes ba Mauberismo. Naran Maubere labele sai propriedade eskluziva husi partidu polítiku, grupu ka lider ida. Se naran ne’e reprezenta povu tomak, nia signifikadu tenki nakloke ba debate, interpretasaun no partisipasaun demokrátika. Mauberismo tenki evita sai ideolojia ne’ebé uza memória luta atu ezije obedénsia ba lider ka instituisaun. Pelo kontráriu, nia tenki fó instrumentu ba povu atu husu responsabilidade, analiza desizaun no hadi’a injustisa, inklui injustisa ne’ebé akontese iha estadu independente.

Husi komparasaun hirak-ne’e, Mauberismo bele dezenvolve nu’udar hanoin ne’ebé foti memória istórika povu nian, maibé la-sai prizioneiru ba interpretasaun ida de’it kona-ba pasadu. Nia presiza iha kapasidade atu analiza realidade foun no responde ba nesesidade povu nian iha tempu ida-idak. Nia tenki bele halo avaliasaun kritika ba podér, lideransa no instituisaun, la’ós de’it uza memória luta nian atu justifika desizaun polítika iha tempu agora.

Atu Mauberismo sai ideolojia polítika no sosiál ne’ebé iha utilidade, nia presiza bazeia ba prinsípiu fundamentál sira. Prinsípiu hirak-ne’e la’ós sistema teóriku ne’ebé kompletu ona, maibé proposta atu dezenvolve, diskute no aprofunda liuhusi peskiza, debate no esperiénsia povu nian.

Prinsípiu dahuluk mak konsidera Maubere hanesan sujeitu polítiku no istóriku. Povu la’ós instrumentu atu hetan podér, no la’ós espetadór iha prosesu dezenvolvimentu. Povu mak sujeitu prinsipál ne’ebé iha direitu atu partisipa iha desizaun kona-ba nia moris, nia rekursu no nia futuru. Instituisaun públika tenki servisu ba povu, la’ós obriga povu atu servisu ba interese instituisaun ka grupu ida.

Prinsípiu daruak mak dignidade umana no igualdade. Ema hotu iha dignidade no direitu hanesan, la-haree ba nia orijen, kondisaun ekonómika, edukasaun, lian, kultura, pozisaun polítika ka estatutu sosiál. Laiha ema ida ne’ebé tenki konsidera nia-an aas liu tanba nia iha podér, osan, diploma ka ligasaun ho lideransa. Dignidade umana tenki sai baze ba polítika públika, asesu ba servisu, justisa, edukasaun no oportunidade ekonómika.

Prinsípiu datoluk mak soberania nasional no soberania povu nian. Independénsia nasional la-kompletu se povu kontinua laiha kapasidade atu determina nia moris no nia futuru. Soberania la’ós de’it bandeira, fronteira no instituisaun estadu; nia mós envolve kapasidade povu nian atu partisipa, kontrola desizaun públika no hetan benefísiu husi rekursu nasional. Soberania nasional tenki sai soberania ne’ebé povu sente no ejerse iha nia moris loroloron.

Prinsípiu dahaat mak rejeisaun ba divizionismo no defende unidade iha diversidade. Divizionismo ne’ebé uza diferensa atu fahe povu, hamenus unidade no fasilita dominasaun, labele sai parte husi sosiedade independente. Mauberismo tenki rejeita fahe-malu ne’ebé bazeia ba partidu polítiku, grupu sosiál, orijen, interese pesoál ka pozisaun iha luta libertasaun. Diferensa polítika, ideolójika, kulturál no sosiál tenki respeita, maibé labele transforma sai razaun atu diskrimina malu, halo malu ba inimigu ka uza violénsia hasoru malu. Unidade la-signifika uniformidade; sosiedade livre tenki permite pluralizmu, debate no kritika.

Prinsípiu dalimak mak justisa sosiál no ekonomia ne’ebé servisu ba povu. Dezenvolvimentu labele sukat de’it husi kresimentu ekonomia, edifísiu boot ka projetu infraestrutura. Nia tenki sukat mós husi oinsá povu asesu ba ai-han, bee moos, saúde, edukasaun, uma, servisu no oportunidade atu moris ho dignidade. Ekonomia tenki kria oportunidade ba povu tomak no labele sai instrumentu atu hametin de’it interese grupu ki’ik ne’ebé iha podér ekonómiku ka polítiku.

Prinsípiu daneen mak valorizasaun identidade Timor nian no respeitu ba diversidade. Mauberismo tenki valoriza istória, lian, kultura, naran tradisionál, memória no patrimóniu povu Timor-Leste nian. Maibé, afirmasaun identidade nasional labele sai razaun atu diskrimina ema ka kultura seluk. Unidade nasional tenki harii iha respeitu ba diversidade, igualdade no solidariedade entre komponente sira husi povu. Identidade Timor nian la-presiza subar nia diversidade atu sai forte; nia bele hametin-an liuhusi komprensaun no valorizasaun ba patrimóniu oioin ne’ebé forma Timor-Leste.

Prinsípiu dahituk mak demokrasi, partisipasaun no responsabilidade públika. Povu tenki iha oportunidade atu partisipa iha desizaun polítika, la’ós de’it bainhira eleisaun to’o. Demokrasi presiza liberdade atu ko’alia, asesu ba informasaun, debate públiku, responsabilidade lideransa no mekanizmu atu kontrola utilizasaun podér. Lideransa ne’ebé invoka Maubere ka luta libertasaun tenki prontu atu hetan kritika no presta konta ba povu. Memória luta nian labele uza hanesan lisensa atu sai livre husi responsabilidade.

Prinsípiu dawaluk mak edukasaun no konsiénsia kritika. Edukasaun la’ós de’it atu hetan diploma ka servisu, maibé mós atu dezenvolve kapasidade atu sani realidade, husu pergunta, analiza informasaun, komprende istória no foti desizaun ho responsabilidade. Mauberismo tenki promove edukasaun ne’ebé ajuda povu atu komprende nia direitu, dever no relasaun podér iha sosiedade. Konsiénsia kritika importante atu povu la-sai vítima ba manipulasaun, propaganda ka promesa polítika ne’ebé laiha rezultadu.

Prinsípiu dasiak mak solidariedade, responsabilidade entre jerasaun no protesaun ambiente. Dignidade povu nian la-limita ba ema ne’ebé moris agora, maibé envolve mós responsabilidade ba jerasaun tuirmai. Rekursu naturais, rai, tasi, bee no ambiente tenki jere ho responsabilidade atu garante katak dezenvolvimentu ohin la-estraga oportunidade ba labarik no jerasaun futuru. Solidariedade mós signifika katak sosiedade tenki tau matan ba ema vulnerável, la-husik ema kiak, ema ho defisiénsia, katuas-ferik, labarik ka komunidade remota sai ninin husi dezenvolvimentu nasional.

Prinsípiu hirak-ne’e bele sai baze ba diskusaun no dezenvolvimentu Mauberismo. Sira presiza kontinua aprofunda liuhusi peskiza, debate teóriku, esperiénsia povu nian no avaliasaun kritika ba realidade Timor-Leste. Atu sai sistema ideolójiku ne’ebé matenek no kompletu, presiza define ho klaru prinsípiu ida-idak, relasaun entre sira, konseitu analítiku, kritériu avaliasaun no orientasaun ba polítika públika.

Importánsia prinsípiu hirak-ne’e sai evidente liu bainhira ita haree ba realidade pós-independénsia. Independénsia nasional lori responsabilidade boot atu harii estadu ne’ebé servisu ba povu, maibé independénsia la-garante automatikamente katak relasaun podér iha sosiedade sai justu ka katak povu hotu-hotu hetan oportunidade hanesan. Estadu ida bele livre husi okupasaun estranjeira, maibé nafatin hasoru desigualdade, korrupsaun, eskluzaun sosiál, dependénsia ekonómika no abuzu podér.

Iha perspetiva Frantz Fanon (1963), deskolonizasaun labele limita-an ba troka podér kolonial ho lideransa nasional foun. Mudansa polítika tenki akompaña ho transformasaun relasaun sosiál no ekonómika, atu liberdade la-sai de’it priviléjiu ba elite foun. Hanoin ida-ne’e iha relevánsia ba Mauberismo tanba independénsia tenki sai oportunidade atu transforma realidade povu nian, la’ós atu kria forma dominasaun foun. Tanba ne’e, Mauberismo tenki analiza diferensa entre estadu ne’ebé iha bandeira no soberania formal ho estadu ne’ebé presta duni konta ba povu.

Se povu mak sujeitu prinsipál iha luta libertasaun, oinsá mak povu nia pozisaun iha desizaun estadu? Se luta hala’o lori povu nia naran, sé mak hetan benefísiu husi rekursu nasional? Se independénsia afirma dignidade no soberania, oinsá mak prinsípiu hirak-ne’e manifesta iha moris loroloron povu nian?

Pergunta hirak-ne’e la’ós atu nega sakrifísiu ema sira ne’ebé luta ba independénsia. Pelo kontráriu, nia atu asegura katak sakrifísiu ne’e la-sai memória de’it, maibé kontinua orienta responsabilidade estadu no instituisaun sira. Mauberismo tenki iha kapasidade atu kritika relasaun podér ne’ebé halo povu sai dependente, laiha asesu ba informasaun ka laiha oportunidade atu influensia desizaun. Nia tenki husu transparénsia, responsabilidade no distribuisaun benefísiu dezenvolvimentu ne’ebé justu.

Povu nia dignidade labele depende ba simpatia lider ida nian, ajuda partidária ka ligasaun ho elite. Dignidade mak direitu fundamentál ne’ebé estadu tenki respeita no promove. Tanba ne’e, lideransa ne’ebé uza naran Maubere ka memória rezisténsia tenki avalia tuir sira nia hahalok no rezultadu. Nia promove duni dignidade povu nian ka lae? Nia garante partisipasaun ka lae? Nia proteje rekursu públiku ka lae? Nia rezolve desigualdade ka lae? Nia simu kritika no responde ba ezijénsia povu nian ka lae?

Pergunta hirak-ne’e mak maneira ida atu lori valor luta libertasaun ba realidade ohin loron. Se luta hala’o atu liberta povu, entaun podér ne’ebé mosu hafoin independénsia tenki kontinua sai instrumentu libertasaun sosiál no umana, la’ós instrumentu dominasaun foun.

Tanba Maubere sai símbolu importante iha istória FRETILIN no luta libertasaun, iha risku atu ema balu konsidera Mauberismo nu’udar propriedade polítika partidu ida de’it. Maibé, se Maubere reprezenta povu Timor-Leste, diskusaun kona-ba nia dignidade no soberania labele limita ba membru partidu ida ka korente polítika ida. Mauberismo, hanesan proposta ideolójika, tenki sai objetu debate ba sidadaun hotu ne’ebé hakarak analiza oinsá atu promove dignidade, igualdade, soberania povu nian no justisa sosiál.

Nia la-presiza elimina diferensa polítika, maibé tenki fó prinsípiu atu diferensa hirak-ne’e bele diskute ho respeitu no responsabilidade. Ideolojia ida ne’ebé afirma soberania povu nian tenki permite povu atu husu pergunta, kritika lideransa no rejeita polítika ne’ebé la-servisu ba sira. Se liafuan Maubere uza atu taka ibun ba ema ne’ebé kritika, ka atu justifika priviléjiu ba grupu ida, utilizasaun ne’e kontradís ho prinsipiu dignidade no soberania povu nian.

Tanba ne’e, Mauberismo tenki sai isin hanoin ne’ebé bele avalia partidu hotu, inklui partidu sira ne’ebé invoka nia símbolu. Kritériu prinsipál la’ós sé mak uza naran ne’e, maibé se nia asaun respeita dignidade povu nian, promove justisa no aumenta kapasidade povu atu determina nia futuru. Mauberismo la’ós propriedade eskluziva husi partidu polítiku ida, no labele justifika hanoin katak partidu ida de’it iha direitu atu reprezenta povu ka katak kritika ba lider ida signifika la-respeita istória luta libertasaun.

Istória luta libertasaun Timor-Leste nian mak patrimóniu nasional, la’ós propriedade pesoál husi lider ida, grupu ida ka organizasaun ida. Memória luta nian forma husi sakrifísiu, esperiénsia no kontribuisaun husi ema barak iha situasaun oioin. Interpretasaun kona-ba luta ne’e bele mai husi perspetiva oioin, maibé tenki respeita faktu istóriku, dokumentu no esperiénsia ema sira ne’ebé partisipa iha luta. Mauberismo tenki promove kapasidade atu debate kona-ba istória, la’ós taka debate.

Atu komprende istória ho loloos, presiza distingue entre dokumentu, testemuñu, interpretasaun no memória pesoál. Testemuñu pesoál iha importánsia tanba nia lori esperiénsia ne’ebé bele lahetan iha dokumentu ofisiál. Maibé, testemuñu mós presiza tau iha kontestu no kompara ho fonte seluk bainhira dokumentasaun disponivel. Falta dokumentu la-signifika katak akontesimentu ida la eziste. Maibé, afirmasaun istórika tenki klaru kona-ba baze ne’ebé sustenta nia. Peskiza istórika presiza hatudu saida mak dokumentadu, saida mak ema testemuña, saida mak interpretasaun no saida mak seidauk iha evidénsia sufisiente atu determina. Prinsípiu metodolójiku ida-ne’e mós importante iha leitura istórika kona-ba kolonializmu no rezisténsia, hanesan relatóriu CAVR nian hatudu liuhusi rekolla no análize dokumentu no testemuñu kona-ba violasaun direitus umanus iha Timor-Leste (CAVR, 2005).

Prinsípiu ida-ne’e importante ba Mauberismo tanba ideolojia ne’e tenki bazeia ba konsiénsia istórika, la’ós mitifikasaun ka manipulasaun memória. Respeitu ba memória povu nian la-signifika proibe investigasaun ka debate kritiku. Mauberismo tenki ajuda jerasaun foun atu komprende tanbasá mak povu luta ba independénsia, saida mak nia sakrifísiu no saida mak responsabilidade ne’ebé mai hamutuk ho liberdade. Istória tenki sai fonte aprendizajen ba futuru, la’ós instrumentu atu justifika podér ka priviléjiu iha prezente.

Identidade povu nian la-forma de’it husi bandeira, lian no territóriu. Nia mós manifesta iha naran, memória família, tradisaun, relasaun komunidade no maneira ne’ebé povu komprende nia-an. Tanba ne’e, restaurasaun identidade Timor nian, inklui valorizasaun no restaurasaun naran pesoál Timor nian, tenki sai parte husi esforsu atu hametin konsiénsia kona-ba patrimóniu rasik.

Halakon ona hanoin ida katak naran ema Timor nian ne’e naran jentiu nian, naran malae nian mak naran sarani ka naran santu sira nian. Afinal ema mate ba lalehan ne’e la’ós naran mak determina, maibé hahalok, nune’e lalika muda ema Timor nia naran ba fali naran malae sira nian.

Naran la’ós de’it instrumentu atu bolu ema. Nia bele lori memória família, patrimóniu kultura, istória komunidade no ligasaun ho jerasaun sira uluk. Iha prosesu istóriku ne’ebé envolve dominasaun, mudansa kultura no influénsia externa, naran tradisionál balu bele lakon, muda ka ladun uza. Tanba ne’e, valorizasaun ba naran Timor nian bele sai parte husi esforsu atu hametin konsiénsia kona-ba patrimóniu rasik. Povu Timor tenki orgullu ho nia naran, lian, kultura no istória. Orgullu ida-ne’e la-signifika rejeita naran ka kultura husi nasaun seluk, maibé afirma katak ita la-presiza sente moe ka husik ita-nia identidade rasik atu hetan respeitu.

Restaurasaun identidade la-signifika katak naran hotu-hotu tenki mai husi lian ida de’it, ka katak interpretasaun ida bele aplika ba Timor-Leste tomak. Timor-Leste iha diversidade lian, kultura no tradisaun. Naran sira bele iha orijen no signifikadu ne’ebé diferente tuir komunidade no istória família ida-idak. Tanba ne’e, esforsu atu valoriza naran rasik tenki akompaña ho peskiza, respeitu ba komunidade no konsiderasaun ba vontade ema sira ne’ebé uza naran hirak-ne’e.

Naran Maubere rasik hatudu oinsá signifikadu bele muda. Liafuan ne’e iha kontestu ida bele hetan konotasaun negativu, maibé iha kontestu rezisténsia sai símbolu dignidade no unidade. Interpretasaun Padre Domingos Soares nian, ne’ebé liga Maubere ho “mane boot” ka “maun boot”, hatudu esforsu atu hasa’e naran ne’e sai símbolu responsabilidade no protesaun ba povu. Interpretasaun ne’e hatudu mós oinsá esperiénsia pesoál bele fó signifikadu espesífiku ba naran ne’e. Interpretasaun hirak-ne’e bele sai matéria ba peskiza no diálogu, la’ós razaun atu obriga ema hotu atu simu definisaun ida de’it.

Nune’e, restaurasaun identidade presiza espasu ba dokumentasaun, peskiza no diálogu kona-ba naran no tradisaun. Povu Timor tenki livre atu hatene nia istória no orgullu ho nia naran rasik, la’ós tanba hetan aprovasaun husi ema seluk, maibé tanba dignidade umana no kultura la-depende ba aprovasaun externa. Iha komprensaun ida-ne’e, restaurasaun identidade no dezenvolvimentu Mauberismo iha ligasaun metin. Se Maubere sai símbolu dignidade povu nian, Mauberismo tenki defende direitu povu nian atu mantein, komprende no dezenvolve nia identidade, no iha tempu hanesan rejeita utilizasaun identidade hanesan instrumentu diskriminasaun ka eskluzaun.

Mauberismo tenki iha kapasidade atu lori nia prinsípiu ba prátika. Ideolojia ne’ebé laiha ligasaun ho realidade povu nian bele sai liafuan abstratu, enkuantu ideolojia ne’ebé iha prinsípiu no orientasaun prátika bele ajuda povu atu analiza problema no buka solusaun. Ba Timor-Leste, pergunta kona-ba futuru la-limita ba kresimentu ekonomia ka kapasidade instituisaun estadu nian. Nia mós kona-ba oinsá atu garante katak dezenvolvimentu fó benefísiu ba povu, oinsá atu hamenus desigualdade, proteje ambiente, garante edukasaun ne’ebé di’ak no harii instituisaun ne’ebé responsivu ba nesesidade sidadaun sira.

Iha área ekonómika, Mauberismo tenki husu se kresimentu no investimentu fó benefísiu ba povu maioria ka se benefísiu ne’e konsentra de’it ba grupu ki’ik. Iha área edukasaun, tenki husu se sistema edukasaun forma duni ema ne’ebé bele hanoin kritika no partisipa iha sosiedade. Iha área kulturál, tenki proteje diversidade no promove identidade nasional ne’ebé inkluzivu. Iha área governasaun, tenki husu se instituisaun públika sira transparente, responsavel no la-domina husi interese pesoál ne’ebé kontra interese komún.

Iha relasaun internasionál, Mauberismo tenki defende soberania no dignidade nasional, maibé ida-ne’e la-signifika taka-an husi mundu. Soberania bele hametin liuhusi kooperasaun ne’ebé respeita interese nasional, igualdade entre nasaun sira no direitu povu nian atu determina dalan dezenvolvimentu rasik.

Iha dimensaun sosiál, Mauberismo tenki evita romantizasaun ba kiak hanesan karakterístika autentika Maubere nian. Kiak, analfabetizmu no falta asesu ba servisu báziku la’ós valór ne’ebé tenki preserva. Se Maubere reprezenta dignidade povu nian, entaun luta hasoru kiak no eskluzaun sosiál tenki sai parte prinsipál husi orientasaun Mauberismo. Nia la’ós ideolojia atu glorifika sofrimentu povu nian, maibé atu transforma esperiénsia sofrimentu no rezisténsia sai konsiénsia, justisa no kapasidade atu harii futuru ne’ebé di’ak liu.

Bazeia ba diskusaun ida-ne’e, Mauberismo bele define provizoriamente hanesan ideolojia polítika no sosiál ne’ebé foti Maubere nu’udar símbolu dignidade, identidade no soberania povu Timor-Leste nian, no orienta nia hanoin ba liberdade, igualdade, justisa sosiál, partisipasaun demokrátika, responsabilidade públika no dezenvolvimentu ne’ebé tau dignidade umana iha prioridade. Mauberismo buka transforma identidade no memória istórika povu nian sai estrutura hanoin ne’ebé bele analiza realidade, orienta asaun no avalia instituisaun sosiál no polítika.

Definisaun ida-ne’e mak proposta atu dezenvolve, la’ós deklarasaun katak Mauberismo iha ona sistema teóriku kompletu no formalizadu iha tempu luta libertasaun. Nia baze presiza kontinua dezenvolve liuhusi peskiza istórika, estudu sosiál no ekonómiku, debate filosófiku no esperiénsia prátika iha sosiedade Timor-Leste. Prinsípiu ida-idak tenki sai klaru no bele aplika, no nia orientasaun tenki bele avalia tuir rezultadu ne’ebé afeta moris povu nian.

Limite konseituál ida-ne’e ajuda mós atu distinge Mauberismo husi nasionalizmu ne’ebé limita de’it ba identidade nasional. Mauberismo la’ós de’it afirmasaun katak Timor-Leste tenki independente. Nia mós husu oinsá mak independénsia bele garante dignidade povu, igualdade, justisa sosiál no kontrolu demokrátiku ba podér. Nia la’ós de’it ideolojia kona-ba ema kiak ka komunidade rurál. Povu ne’ebé Maubere reprezenta labele define de’it bazeia ba kondisaun ekonómika ka nivel edukasaun, maibé tenki komprende hanesan sujeitu polítiku no istóriku ne’ebé iha direitu atu partisipa iha desizaun kona-ba nia moris no futuru nasaun nian.

Tanba ne’e, Mauberismo tenki responde ba pergunta fundamentál sira: Oinsá mak povu bele iha soberania efetiva? Oinsá mak estadu bele garante justisa sosiál? Oinsá mak instituisaun bele presta konta? Oinsá mak dezenvolvimentu bele fó prioridade ba ema ne’ebé vulnerável? Oinsá mak identidade nasional bele hametin unidade sein elimina diversidade? Se laiha resposta ne’ebé dezenvolve ho seriedade ba pergunta hirak-ne’e, Mauberismo sei hela de’it hanesan símbolu ka ideia jerál. Maibé, se nia dezenvolve prinsípiu, teoria no orientasaun prátika ne’ebé klaru, nia bele sai isin hanoin ne’ebé ajuda atu analiza realidade no orienta mudansa sosiál.

Ikusmai, Mauberismo tenki iha kapasidade atu avalia-an rasik. Se nia afirma dignidade umana, tenki rejeita diskriminasaun. Se afirma soberania povu nian, tenki rejeita abuzu podér. Se afirma justisa sosiál, tenki analiza desigualdade no distribuisaun rekursu. Se afirma demokrasia, tenki simu debate, kritika no pluralizmu. Ideolojia ne’ebé labele simu kritika no laiha kapasidade atu avalia nia prátika rasik iha risku atu sai dogma, la’ós instrumentu libertasaun.

Ba autor, Maubere mak símbolu povu nian, enkuantu Mauberismo tenki sai hanoin ne’ebé orienta asaun ba povu. Nia valór labele sukat husi naran ka deklarasaun de’it, maibé husi nia kapasidade atu defende dignidade, aumenta soberania povu nian no kontribui ba harii Timor-Leste ne’ebé livre, justu, solidáriu, igualitáriu no demokrátiku. Maubere la’ós de’it memória kona-ba ema kiak ne’ebé uluk sofre opresaun; nia mak afirmasaun kona-ba povu ne’ebé iha direitu atu determina nia futuru rasik. Mauberismo, tanba ne’e, tenki sai kompromisu ideolójiku atu asegura katak liberdade ne’ebé povu konkista la-para iha independénsia polítika, maibé kontinua to’o ba liberdade sosiál, ekonómika no umana.

Referénsia no fonte

Anderson, Benedict. Imagined Communities: Reflections on the Origin and Spread of Nationalism. London: Verso, 1983.

Azzellini, Dario. (2022). “Chavismo: Revolutionary Bolivarianism in Venezuela.” In Marcel van der Linden (Ed.), The Cambridge History of Socialism, Vol. 2, pp. 517–541. Cambridge: Cambridge University Press. https://doi.org/10.1017/9781108611107.025.*

CAVR — Comissão de Acolhimento, Verdade e Reconciliação de Timor-Leste. Chega! Relatório Final. 2005.

Soares, Domingos. Esplikasaun pesoál kona-ba orijen nia naran Maubere. Entrevista ho autor, 2025, Arquivo & Museu da Resistência Timorense.

Fanon, Frantz. The Wretched of the Earth. New York: Grove Press, 1963.

Gramsci, Antonio. Selections from the Prison Notebooks. Edited and translated by Quintin Hoare and Geoffrey Nowell Smith. New York: International Publishers, 1971.

Konis Santana. Dokumentu DRT 06669.017, kona-ba termu Maubere no nia signifikadu polítiku-nasional.

Marx, Karl, no Friedrich Engels. Manifesto do Partido Comunista. 1848.

Ramos-Horta, José. “Maubere, Meu Irmão”. Artigu, 1973 (?). Entrevista ho autor, 2025, Arquivo & Museu da Resistência Timorense.

Saky, Freezip Radihka. “Saida mak Maubere no Mauberismo?”. Ensaiu hakerek iha Bali, 1990.

Sebrian, Raphael Nunes Nicoletti. (2007). “Pátria e liberdade, luz e verdade: a formação do ideário político de Augusto ‘César’ Sandino.” e-l@tina: Revista Electrónica de Estudios Latinoamericanos, Vol. 5, Núm. 18, janeiro–março de 2007.

Soekarno. (1964). Di Bawah Bendera Revolusi, Jilid I. Jakarta: Panitia Penerbit Di Bawah Bendera Revolusi.