Se Loos mak Harii RENETIL?

Se Loos mak Harii RENETIL?

Hosi Carlos da Silva L.F.R.Saky*

Ikus-ikus ne’e, mosu distorção ka pengaburan maka’as ba istoria kona-ba luta libertasaun Timor nian. Distorção ba istoria, foin ba dahuluk, mosu maka’as iha kampanye politik iha eleisaun antesipada. La’os iha kampanye de’it maibe mos iha diskursu publiku hosi na’in-ulun balun.

Politiku sira uza istoria hodi dada simpatia hosi povu. Konta istoria iha kampaine politika ka halo diskursu publiku sira la’os krimi, importante mak konta istoria ho loloos hodi labele halo istoria sai malahok. Istoria nudar parte importante ida hosi edukasaun, tan ne’e, fahe informasaun nebe loos hodi ita nia oan no bei-oan sira, ka jerasaun sira tuir mai aprende buat nebe loos. Istoria mos importante tanba tulun halo formasaun karakter, formasaun ispiritu nasionalizmu no patriotizmu ba sidadaun sira. Bainhira iha kampanye ka iha diskursu publiku sira distorce ka hamalohok istoria, mak ita hahuu eduka ka forma sala jerasaun sira tuir mai. Aat liu tan halo distorção ba istoria hodi soran grupu rezistensia sira ba malun ka hatun grupu ida no foti grupu seluk sei la kontribui ba edukasaun politika nebe di’ak no hanorin istoria nebe loos ba ema hotu. Distorção ba istoria buat ida inaceitável no condenável tanba fahe informasaun nebe laloos ba publiku, no halo publiku fiar ba istoria falsu sira.

Iha artigu badak ne’e, buka haloos informasaun balun kona-ba se ka sese mak harii RENETIL, tanba iha mos ema balun koko distorce istoria RENETIL nian. Iha eleisaun antesipada 2018 no iha diskursu publiku balun, politiku ka na’in ulun balun, la hatene ou de proposito buka distorce istoria kona-ba RENETIL hodi deklara katak, Xanana Gusmão, Comandante em Chefe das FALINTIL, mak harii ka haruka ou fo orientasaun hodi harii RENETIL. Deklarasaun sira ne’e kompletamente falsu, la tuir faktu sira nebe iha.

Dokumentu barak iha Arquivo e Museu da Resistência Timorense, nune’e mos livru barak koalia kona-ba RENETIL. Iha livru nebe autor hakerek kona-ba RENETIL ho título RENETIL iha Luta Libertasaun Timor-Lorosa’e: Antes Sem Título, Do Que Sem Pátria, iha kapitulu ida esplika detalhadamente konba-ba prosesu harii RENETIL. Parte ida iha livru ne’e hakerek: “RENETIL nudar organizasaun moris espontânea de’it, katak la’os hetan sujestaun husi orgaun rezistensia ruma ka proposta husi ulun-boot rezistensia nian ruma.” (Saky, 2013: p. 50).

Saida mak autor hakerek iha livru ne’e, ikus mai konfirma no reafirma hosi fundador RENETIL seluk. Lucas da Costa Rama Metan, fundador RENETIL seluk, iha entrevista ida iha Estudio TVE, iha loron 21 fulan Junho tinan 2018, da’et ho tinan 30 ezistensia RENETIL nian, Rama Metan afirma kategorikamente katak, RENETIL harii hosi inisiativa estudante sira nian rasik, la'os lider politiku boot ka komandante boot ruma mak haruka harii.

Molok autor hakerek livru nebe temi iha leten, iha 2013, no deklarasaun Rama Metan nian iha TVE, Xanana Gusmão, Comandante em Chefe das FALINTIL, deklara uluk tiha ona iha ai-laran, iha 1990 katak inisiativa harii RENETIL hosi estudante sira rasik. Iha surat ida ho loron 30 fulan Janeiru tinan 1990, Xanana Gusmão hakerek rasik ho liman no haruka ba Fernando La Sama, Sekretariu-Jeral RENETIL, hanesan tuirmai: “Em primeiro lugar, porque a v/[vossa] luta é também das FALINTIL, a vossa organização (surgida da v/[vossa] iniciativa e do v/[vosso] espirito de combate) é também minha organização…” (haree iha http://xdata.bookmarc.pt/cidac/tl/TL6989.pdf : p. 4 no Saky, 2013: pp. 99-100).

Iha surat ne’e Comandante Xanana Gusmão hakerek ho klaru tebes, “a vossa organização [RENETIL] surgida da vossa iniciativa e do vosso espirito de combate” katak imi nia organizasaun, RENETIL, mosu husi imi nia inisiatif rasik no husi imi nia ispiritu ba luta. Ne’e signifika RENETIL harii hosi inisiativa estudante sira nian rasik, la’os inisiativa ka orientasaun hosi Comandante Xanana Gusmão nian.

Se Comandante Xanana Gusmão mak harii ka orienta harii RENETIL, nusa mak Comando Superior da Luta la rekuinese kedas organizasaun ne’e iha 1988 maibe iha ona fulan Fevereiru tinan 1989 foin rekuinese RENETIL? (Haree iha DRT 09623.054 no Saky, 2013, p. 52).

Biar Comandante Xanana Gusmão lafo orientasaun ka laharuka harii RENETIL, maibe tanba nia haree papel importante no estratejiku nebe desempenha hosi RENETIL no luta nebe RENETIL halo hanesan mos luta FALINTIL sira nian, mak nia, Xanana, mos dehan RENETIL hanesan ninian organizasaun rasik, tanba iha periodu Rezistensia nian, RENETIL fo apoio total no inkondisional ba estratejia ho mudansa politika sira nebe Xanana halo.

Faktu ida tan katak Comandante Xanana Gusmão lafo orientasaun ba estudante sira hodi harii RENETIL mak: antes de RENETIL moris no liu tiha fulan balun hosi ninia fundasaun, estudante sira laiha kontaktu ruma ho Comandante Xanana Gusmão ka ho Frente Armada iha ai-laran hanesan hakerek iha livru RENETIL iha Luta Libertasaun Timor-Lorosa’e: Antes Sem Título, Do Que Sem Pátria: “Liu fulan balu hafoin RENETIL moris, foin buka dalan halu kontaktu ho Frenti Armada, ho grupu klandestina sira seluk, no mos ho Frenti Diplomatik. Iha tempu ne’eba, atu halu kontaktu, no kordena serbisu ho Frenti Klandestina, Armada ho Diplomatik susar tebes, tanba laduun iha meiu ba komunikasaun sira.” (Saky, 2013: p.50).

Ema balun hanoin Comandante Xanana Gusmão mak harii RENETIL, tanba loron harii RENETIL ho loron moris Xanana Gusmão nian hanesan, 20 de Junyu. Maibe, ne’e koinsidensia ida deit, tanba liu tiha tinan 2 hosi RENETIL moris, foin iha 1990, estudante sira hatene Xanana nia loron moris, hanesan hakerek iha livru RENETIL iha Luta Libertasaun Timor-Lorosa’e: Antes Sem Título, Do Que Sem Pátria: “Iha ona tinan 1990, ami foin hatene husi Joaquim Gusmão ho Sandra Gusmão, Komandanti Xanana Gusmão nia subrinu sira, katak komandanti FALINTIL nian ne’e mos halu tinan iha loron 20 fulan Juinu, tanba ne’e mak RENETIL mos haruka felisitasaun ida liu husi kaseti fonografik ida ba Xanana.” (Saky, 2013: 141). Joaoquim ho Xandra Gusmão, foin tama iha RENETIL iha 1990.

Xanana Gusmão rasik, foin hatene iha 1990 katak nia halo tinan hanesan ho RENETIL, hafoin simu felisitasaun hosi RENETIL liu hosi kasete fonografiku ida. Xanana hatan hikas felisitasaun RENETIL nian liu hosi mos kasete fonografiku ida, iha nebe nia la’os de’it manifesta ninia laran ksolok maibe koalia mos kona-ba koinsidensia ne’e: “Partikularmente ha’u agradese ho fuan tomak ba lia-fuan sira nebe companheiro LAHE-MAU [Lucas da Costa] husi Konseilu Kurador, lori RENETIL nia naran. Ha’u nia laran ksolok tebes bainhira hatene ha’u halu tinan ho RENETIL. Otas nebe fahe ita hamosu identifikasaun ida: Funu-na’in tuan Patria nian ida nebe hahoris oan sira loloos iha funu, no ha’u nia laran ksolok liu tan rona katak ha’u iha ona bei-oan sira, tanis no hakilar ba Libertasaun Foho Ramelau. Iha tinan 15 ne’e nia laran, loron 20 fulan Juinu sempre hanesan mos loron sira seluk, dala ruma ladun lori ksolok no dala ruma la haree hetan, haluha lakon no dala ruma hanoin hetan iha kilat tarutu maka’as iha kombate balun. Karisimu Joven sira, ohin ba oin loron 20 fulan Juinu sei iha signifikadu seluk: ha’u nia oan sira nia moris, ha’u hanoin ha’u bele ona lori termu aluzivu ne’e. Koinsidensia ka grasa ... ha’u dehan destinu, tanba se moris ne’e akontese, realiza destinu ne’e. Karik destinu ne’e halai ba destinu Patria nian mak ita nia destinu rasik... HA’U HO IMI RENETIL NIAN. Iha ne’e ha’u la halu festa ba tinan, karisimu joven sira, maibe iha loron oin ha’u sei komemora loron 20 fulan Juinu hamutuk ho imi iha hanoin no sei fakar matan-been ksolok nian iha komuniaun ho momentu solene sira nebe liu, nebe sei hakaman mos ha’u nia laran. No karik se ha’u mate ... “HAU NIA OAN DOBEN SIRA SEI BUKA TUIR HAU NIA RUIN”  (Saky, 2013: p. 141).

Iha livru RENETIL iha Luta Libertasaun Timor-Lorosa’e: Antes Sem Título, Do Que Sem Pátria, esplika kona-ba motivu sira nebe dudu estudante sira harii RENETIL hodi luta ba ukun-rasik-an no parte balun nebe hateten RENETIL la’os harii hosi ulun boot sira Rezistensia nian hanesan tuir mai: “… injustisa ho violasaun direitu ema nian oioin nebe Indonezia halu hasoru timoroan sira, haboot mos sentimentu anti okupasaun Indonezia nian iha Timor-Lorosa’e.
Buat hotu-hotu hakat husi ispiritu, vontade luta, no dever atu defende direitu povu Timor- Lorosa’e nian: ukun-an total no kompleta ba Timor-Lorosa’e. Ida ne’e mak marka diferensa entre RENETIL ho organizasaun juvenil no estudantil sira seluk Timor-Lorosa’e nian, nebe barak-liu, ulun-boot sira rezistensia nian mak harii ka haruka harii. (Saky, 2013, p. 50).

RENETIL harii iha loron 20 fulan Junyu tinan 1988, harii hosi estudante na’in 10 nebe estuda iha Denpasar, Bali.  Estudante na’in 10 nebe hanesan fundador RENETIL nian mak: Fernando de Araújo (La' Sama), José A.M.X. Gonçalves (Si'ak), Lucas da Costa (Lahe Mau/Rama Metan), Carlos da Silva Lopes (Freezip/Radihka Saky), Agapito Cardoso (Mau Loco), Marciano Octávio Garcia da Silva (Chury Sakar Subar), Julio Abel Ribeiro) (Tae Tudak), João de Araújo (Mau Terus), Adolfo Fontes Soares (Mau Lamas) no João Cardoso Fernandes (Mau Riba).

Dokumentu nebe hatadak fundasaun RENETIL nian mak Declaração da Inssureição Política dos Estudantes de Timor-Leste ho sitasaun kompletu iha dalen portugues hanesan tuir mai:

“Declaração da Inssureição Política dos Estudantes de Timor-Leste

A defesa intransigente dos direitos inaliavéis do Povo de Timor-Leste é um dever sagrado que tem de ser cumprido por todos os filhos do Heróico Povo Maubere.

Os ataques ideológicos, políticos, económicos, militares e sócio-culturais desenvolvidos pelo Imperialismo-Colonialista-Javanês no intento de destruir a identidade nacional e patriótica do Valoroso e Heróico Povo de Timor-Leste, devem ser pronta e ràpidamente neutralizados, evitando assim que o inimigo consolida a sua vil e vergonhosa dominação sobre o Pátrio Solo.

Conscientes de que a massa estudantil e a Juventude de Timor-Leste constituem o veículo de transmissão potencial de que o inimigo se serve para realizar os seus mais funestos objectivos, por este meio, os Estudantes de Timor-Leste proclamam solenemente a INSSUREIÇÃO GERAL POLÍTICA DOS ESTUDANTES DE TIMOR-LESTE.

E, para o pleno exercício dos seus deveres nacionalistas e patrióticas, os Estudantes de Timor-Leste criam a RESISTÊNCIA NACIONAL DOS ESTUDANTE DE TIMOR-LESTE (RENETIL) que visa:

1. Isolar pronta e ràpidamente todos os estudantes de Timor-Leste de todas as infuências ideológicas, políticas, económicas e sócio-culturais desenvolvidas pelo Governo Fascista-Militarista de Jakarta e seus aparelhos de aliaciamento e coerção.

2. Desenvolver actividades políticas de ressonância internacional com vista a denunciar os crimes cometidos pelo Governo Sanguinário de Jakarta sobre o Glorioso Povo Maubere e remover a presence criminosa dos invasores Javaneses e seus lacaios do Pátrio Solo.

3. Preparar profissionais eivados de consciência revolucionária para continuar a Luta de Libertação do Povo Maubere atrvés da Reconstrução Nacional de Timor-Leste.

A Luta Continua!

Pátria ou Morte! Venceremos!

Resistir é vencer!

Antes sem título, do que sem Pátria!

Viva o Heróico Povo Maubere!

Viva a Imortal RDTL!

Viva A Gloriosa Direcção Superior de Luta!

Viva a RENETIL!

Indonésia, 20 de Junho de 1988.-

O ORGÃO DIRECTIVO

1. LA’ SAMA                                                            2.   SIA’K

    Secretário                                                               Adjunto

3.      MAU-RIBA                                                    4.   TAE TUDAK

    Assistente Inf.Seg.                                                Ass. Invet. Pol.

5.    MAU LAMAS                                                   6. CHURY SAKAR SUBAR

     Ass. Organização                                                      Ass. Agit. Propag.

7.      FREEZIP                                                         8.     MAU LOCO

     Ass. Inf e Seg.                                                          Ass. Agit. Propag.

9.       LAHE MAU                                                   10.     MAU TERUS

    Ass. Inf. Segurança                                                       Ass. Organização”

Espera ho artigu ida ida ne’e bele halo ema hotu esklaresidu ona, no sei laiha tan ema ruma halo distorção ba istoria RENETIL nian.

* Fundador RENETIL
27/06/2018