Inan Aswa'in

Ohin, 20 de Junho de 2019, RENETIL halo tinan ba dala 31. Liu hosi biban ida ne'e, hau dedika poesia ida nee ba membro RENETIL tomak nia Inan, liuliu ba membro sira no Timor oan tomak nebe sira nia inan fo ona nia oan sira hodi mate ba rai ida ne'e nia ukun-rasik-an.

INAN ASWA'IN

Inan, hau hatene
O halo buat hotu ba hau
O halo hau moris
O hader kalan loron
Simu terus no susar oioin
Hodi hakiak no bali hau to'o boot
O hanorin no eduka hau
Halo hau sai ema
Hau seidauk selu o kolen
No labele selu duni

Hau lahusu o
Atu tuir funu
Hodi defende ita nia rain
Bainhira o hatene
O nonok, ladehan buat ida
O hatene, ba funu
Ba atu mate
Laiha inan ida
Hakarak fo oan ba mate
Maibe, o hosik hau ba funu

O tahan terus oioin
Lahatene hau mate ka moris
Mate oinsa
Mate iha nebe
Hakoi iha nebe
Hakoi oinsa
O tahan todan ida
Todan tebes
Naruk tebes
Rohan laek

O fiar nafatin
Fiar hau sei moris
Moris iha nebe
Moris oinsa
Tansa seidauk fila
O terus duni
Tanis iha nakukun laran
Ema ida lasente
Ema ida laharee
Ema ida larona

Bainhira o hatene loos
Hau nia mate
Mate oinsa
Loron kalan
O tanis no lelir
Reza no hamulak
Sunu lilin no tau aifunan
Lori hau nia imajen
Tuir o nia an
Imajen ida todan tebes

Inan doben
Biar hau laiha ona
O larona hau lian ona
O laharee hau la'o ba mai ona
Maibe o tenki neon boot
Fuan boot
Loko-an
Tanba o bele
Fo nia oan ida
Mate ba rai ida ne'e

Inan doben
Hau hadomin o liu buat hotu
O inan ida fuan boot tebes
Boot liu planeta hotu-hotu
O inan ida morin tebes
Morin liu ai sandalu morin
O inan ida maka'as no boot tebes
Maka'as hanesan foho Matebian
Aas hanesan foho Ramelau
O mak aswa'in boot

Biar ema seluk lahatene
Lakonsidera no lasura o
Maibe
O nia kontribuisaun
Ba rai ida nee
Boot tebes
Boot liu buat hotu
O fo o oan
Ba povo no rai ida nee
O mak aswa'in loloos

Inan doben
Se o laiha
Hau mos laiha
O mak aswa'in loloos
Liu hosi o
Hau bele halo buat ida
Bele muda buat ida
Muda rai ida nee nia destinu
Muda mundu ida nee nia moris
Inan, o mak aswa'in loloos

F.R. Saky
Dili, 20 Junho 2019