HO PREGO TIMOROAN SIRA MARCA NINIA HISTÓRIA BA LIBERTAÇÃO NO INDEPENDÊNCIA

HO PREGO TIMOROAN SIRA MARCA 

NINIA HISTÓRIA BA LIBERTAÇÃO NO INDEPENDÊNCIA

Hosi: Carlos da Silva L.F.R. Saky

Artigo ida ne'e halo reflexão kona ba processo balun relaciona ho referendum iha 1999, no liga mos ho processo construção estado, estado ida nebe moris mos hosi referendum. Referendum nudar mecanismo democrático ida nebe Nações Unidas usa hodi povo Timor bele determina rasik ninia direito ba autodeterminação.

Iha 1999, bainhira Indonésia aceita ona halo referendum iha Timor-Leste, buat nebe mosu uluk iha autor nia ulun mak “fim de tudo”.  Fim ba sofrimento, fim ba ameaças, fim ba terror, fim ba intimidação, fim ba mate no fim ba ocupação Indonésia. Liafuan "fim de tudo", foufoun mosu iha 1991, bainhira Portugal ho Indonésia halo negociação maka’as atu haruka Delegação Parlamentar Portuguesa (DPP) ida mai iha Timor, hodi haree rasik ho matan realidade Timor nian. Visita ne’e previsto atu halo iha fins de Outubro 1991. Iha biban ne’e, atu halo estudante Timoroan sira estuda iha Indonésia hodi fila hotu mai Timor, hodi hamutuk ho população halo manifestação boot iha Dili, RENETIL lança boato ida, ho visita DPP nian ne’e hanesan “fim de tudo”, fim ba ocupação Indonésia. Por acaso, sei relaciona ho visita ne’e, Comando Superior da Luta (CSL), iha plano ida, atu halo FALINTIL tun hotu mai vila, hamutuk ho população hodi halo acção boot ida, hodi hamos tiha hotu javanez (Indonésia) sira hosi Timor ou ita Timoroan sira mate hotu, tuir Comandante Xanana Gusmão nia liafuan.

Desde Fevereiro de 1990, RENETIL prepara tiha plano de acção ida nebe bolu Operação Aurora, operação ida hodi halo acção boot iha Dili, iha Jakarta, iha Australia no iha Portugal. Plano ida ne'e haruka mos ba CSL, maibe lato'o cedo iha CSL nia liman, no ikus mai hetan crítica maka'as hosi Comandante Xanana Gusmão tanba, dehan la-coordena uluk ho CSL. Infelizmente, DPP cansela tiha nia visita no "fim de tudo" la-acontece. 

Iha 1999, mehi "fim de tudo" mosu hikas. Acordo 5 de Maio de 1999, iha Nova Iorque, hanesan lilin ida lori naroman ba liberdade no ukun-rasik-an. Referendum hanesan mecanismo democrático ida iha nebe Timoroan hotu-hotu sei participa direitamente iha decisão kona ba sira nia destino rasik.

Durante década rua resin, Timoroan sira luta no iha certeza katak, cedo ou tarde, Timor-Leste sei hetan ninia ukun-an, maibe lahatene ho certeza bainhira, hanesan baibain ema dehan: "A vitória é certa, o tempo é incerto". Maibe, Acordo 5 de Maio mai fo certeza ida katak, ukun-rasik-an sei acontece duni iha 1999. “Fim de tudo” sei acontece duni iha biban ne’e, tanba Timoroan sira sei tun hotu no vota hodi hakotu Indonésia nia ukun iha Timor-Leste. 

Ba autor, referendum hanesan processo ida hodi cumpre de’it formalidade, katak, hodi halo confirmação de’it ba vontade povo nian ba ukun-rasik-an. Iha biban neba, autor fiar, maioria hosi Timoroan sira, sei lahili autonomia basaa, durante período ocupação, mosu ona descontentamento generalizada ida ba Indonésia, tanba injustiça, atrocidades no violações direitos humanos oioin nebe Indonésia halo hasoru Timoroan sira. Fiar ida ne’e sai metin liu tan tanba, ema barak nebe iha ínicio hanesan defensor maka’as ba integração, incluindo figuras no fundadores APODETI balun, nebe iha influência boot mos fila-an ona, hodi defende fali ukun-rasik-an ba Timor. Resultado referendum iha 30 de Agosto de 1999 mai confirma duni autor nian convição, 78.50% (344.580), maioria absoluta hosi Timoroan sira, rejeita opção autonomia. Ho rejeição ne'e lori Timoroan sira ba restaura hikas ninia ukun-rasik-an, nebe FRETILIN proclama unilateralmente iha 28 de Novembro de 1975. 

Tinan ida ne’e, dia 30 de Agosto 2019, completa tinan 20 Nações Unidas organiza referendum iha Timor-Leste. Durante tinan barak, Timoroan sira exige ba ONU, Portugal no Indonésia, atu halo referendum iha Timor-Leste, hodi Timoroan sira bele decide rasik ninia direito ba autodeterminação. 

Iha primeiros anos ocupação Indonésia, FRETILIN nebe derrota ona UDT iha contra-golpe, halo hela guerra de posição ida hasoru militar Indonésia sira, nebe mai hamutuk ho força UDT no APODETI sira, nebe halai no atravessa ona ba fronteira sorin Indonésia nian. FRETILIN nebe sai vencedor iha contra-golpe, controla tomak ona território Timor, no proclama tiha ona República Demócrática de Timor-Leste iha 28 de Novembro de 1975,  mai ho palavra de ordem ida: “negociação não e nunca” kona ba direito Timoroan sira nian ba ukun-rasik-an. Katak laiha no sei laiha negociação ho força estrangeira ruma. Ikus mai, força sira Indonésia nian controla hotu ona vilas sira iha Timor laran tomak no haree solução militar impossível ona, FRETILIN halo recuo estratégico ida, hodi defende fali solução política no negociada ida. Ho mudança ne’e mak acontece diálogo ka conversações de paz entre Comandante Xanana Gusmão ho Coronel Purwanto, Comandante militar Indonésia nian iha Timor. Conversação de paz ne'e halo iha Larigutu, Osso, iha 1983. Iha biban ne’e mak Xanana Gusmão, nuda líder máximo Resistência nian, defende direito autodeterminação no referendum ba Timor-Leste. Antes ne’e, entre partido político hotu-hotu iha Timor, único APODETI mesak mak desde ínicio defende referendum. APODETI defende  integração Timor-Leste ba Indonésia, maibe tenki liu hosi referendum. 

Maski Resistência defende no exige ona referendum ba Timor-Leste, maibe ladun hetan eco maka'as. Referendun so hetan ressonância internacional maka’as ho surat bispo Belo nian, tanba bispo Belo nudar chefe Igreja Católica Timor, iha carisma boot, no iha influência maka’as ba Timoroan sira. Iha loron 6 fulan Fevereiro 1989, bispo Belo, nebe latahan ona haree Indonésia oho no halo tratamento aat oioin hasoru Timoroan sira, nia hakerek surat ba Secretário-Geral das Nações Unidas, Javier Perez de Cuellar, hodi husu referendum ba Timor-Leste, atu Timoroan sira deside rasik ninia futuro. Bispo Belo dehan tenki rona Timoroan sira liu hosi referendum ida, tanba to’o agora seidauk consulta ho povo, no Indonésia mak dehan povo hili ona integração. Parte balun hosi bispo Belo nia surat hakerek: 

Tomo a liberdade de escrever a Sua Excelência o Senhor Secretário-Geral para levar ao seu conhecimento que o processo de descolonização de Timor Português ainda não está resolvido pelas Nações Unidas e convém não deixá-lo no esquecimento.

Para nós o Povo de Timor, pensamos que temos de ser consultados sobre o destino da nossa Terra. Por isso, como responsável da Igreja Católica e como cidadão de Timor, venho pedir ao Senhor Secretário-Geral para iniciar em Timor o processo de descolonização mais normal e democrática que é a realização de um REFERENDUM. 

O Povo de TIMOR tem de ser ouvido através de um plebiscito quanto ao seu futuro. Até agora, o povo ainda não foi consultado. São os outros que falam em nome do Povo. É a Indonésia que diz que o povo de Timor já escolheu a Integração. Portugal quer deixar ao tempo a resolução do problema. E nós vamos morrendo como povo e como nação.

 Sua Excelência é um defensor dos direitos humanos. Peço-lhe que demonstre por actos o respeito pelo espírito e pela letra da Carta das Nações Unidas, que concede a todos os povos deste planeta o direito a decidir o seu próprio destino, livre, consciente e responsavelmente.

 Excelência, não há maneira mais democrática de conhecer o supremo desejo do Povo de Timor Oriental do que realizar um Refrendum para Timor, Referendum esse organizado pelas Naçõers Unidas.”

Iha biban ne’e kedas RENETIL haruka surat ida ba Secretário-Geral das Nações Unidas hodi fo apoio ba surat Dom Carlos Felipe Ximenes Belo nian. 

Surat bispo Belo nian hanesan bomba ida monu iha autoridade civil no militar Indonésia sira nia ulun, tanba primeira vez, bispo Belo, publicamente, hakerek surat ba Nações Unidas ho conteúdo político ida todan no incomoda tebes Indonésia. Autoridade militar no civil sira, incluindo académico no intelectual Indonésia balun, halo reação maka’as no fo naran oioin ba bispo, balu to’o halo ameaça ka halo plano atu oho bispo Belo.

 Desde ida ne’e, atu liu hosi surat, petição ka manifestação sira halo iha Timor-Leste, Indonésia, Australia, Europa, America no Asia, liafuan referendum sai hanesan ona palavra de ordem ida, nebe Timoroan sira kaer hodi exige ba Chefe Estado, Governo no comunidade internacional sira, hodi pressiona Indonésia hodi aceita halo referendum iha Timor-Leste. 

Autor nudar Timoroan ida nebe mos sai tama iha embaixadas, atu ocupa embaixadas estrangeiras iha Jakarta ka iha hasoru malu ho diplomata estrangeiros sira, assunto referendum sempre sai objeto de exigência ka discussão. Nune’e mos bainhira autor sai tiha ona ba li’ur, depois de co-lidera ocupação embaixada Estados Unidos da America iha Jakarta, iha 1994, hamutuk ho Domingos "Naga Soro" Sarmento Alves, iha colóquios no conferências internacionais iha rai oioin, nebe autor participa nudar orador, ka hanesan participante baibain, direito ba autodeterminação no referendum sempre sai assunto de discussão iha eventos internacionais sira ne’e.

Iha 1998, molok Acordo 5 de Maio de 1999, Nações Unidas buka consulta ho parte importante hothotu nebe involve iha problema Timor nian. Autor nudar responsável máximo Direção Geral Autónoma da RENETIL no Exterior (DIGAREX), hetan convite ida hosi embaixador Jamsheed Marker, Enviado Especial Nações Unidas nian ba Timor-Leste. Nia husu encontro ida ho RENETIL hodi rona organização ida ne’e nia hanoin relaciona ho Habibie, Presidente Indonésia, ninia proposta ida atu fo estatuto especial ba Timor. Consulta hanesan ida ne'e halo mos ho Conselho Central RENETIL nian iha Indonésia, nune’e mos ho organização Resistência sira seluk iha rai-laran no rai-li'ur. Iha Lisboa, iha 26 de Julho de 1998, autor rasik mak chefia delegação RENETIL nian ida, hamutuk ho Benjamim Martins no Martinho de Jesus Falcão, hetan malu ho Jamsheed Marker, iha Hotel Sheraton.  Iha encontro ne’e, autor ho firme expressa posição RENETIL nian, la-concorda ho estatuto especial nebe presidente Indonezia, J.B. Habibie, propõe ba Timor-Leste, tanba aceita estatuto especial significa aceita mantém Timor-Leste iha Indonésia nia okos. RENETIL hanesan uluk, consistente defende dada força Indonésia hosi Timor-Leste, no tenki halo referendun hodi Timoroan sira decide rasik ninia futuro.

 

Luta ba referendum deficil mos hanesan luta ba ukun-rasik-an, luta ida naruk no todan, tanba Indonésia, desde ínicio, considera problema Timor-Leste nudar assunto ida consumado ona. Ba Indonésia povo Timor decide tiha ona ninia futuro liu hosi Declaração Balibo iha 1975, nebe husu ona integração Timor ba Indonésia, maski declaração ne’e rasik nudar resultado hosi manipulação política ida. Manipulação tanba declaração nebe halo iha ameaça nia okos, la’os halo iha Balibo, maibe halo iha Bali Beach, Indonésia.

Indonésia de propósito buka subar iha Declaração Balibo nia kotuk hodi rejeita halo referendum iha Timor, tanba sira hatene hanesan Resistência hatene katak, bainhira halo referendum mak derrota hein tiha ona Indonésia. Tan ne’e, desde ínicio kedas Indonésia la-aceita ho referendum.  Maibe, ikus mai, hakarak ka lakohi, Indonésia tenki aceita halo referendum iha Timor, tanba pressão la’os mai hosi de’it ona Timoroan no comunidade internacional sira, maibe mos hosi povo Indonésia rasik. 

RENETIL, organização estudantil resistência nian, desde ínicio década 90, define ona ninia estrategia ida nebe bolu “Indonésiação do conflito de Timor-Leste”. Liu hosi estrategia ne’e, RENETIL consegue convence ona povo Indonésia katak, povo Timor-Leste seidauk decide ninia futuro, tan ne’e mak sira lasimu presença Indonésia nian iha nia rain. Nune’e mos conflito militar iha Timor-Leste, la’os halo Timoroan deit mak sai vitima no mate, maibe Indonésia oan sira mos. Custos funu nian boot tebes ba Indonésia, funu ida la’os de’it halo sira nia ema mate barak maibe destroe mos sira nia economia. Tinan 20 resin ona Timoroan sira resiste, ne’e hatudu katak militarmente, biar Indonésia nudar força poderosa ida iha região, sira labele manan ona funu militarmente iha Timor-Leste. Resistência nebe mal armado mos labele manan funu militarmente hasoru Indonésia. To’o ona iha conclusão ida katak, qualquer parte, labele manan funu militarmente. Única solução nebe iha mak solução política, solução pacífica no negociada ida, mak liu hosi referendum. Hafoin povo Indonésia hatene ho loloos problema Timor nian, sira mos tun hamutuk ho estudantes Timoroan sira iha dalan, exige referendum ba Timor-Leste, no referendum sai agenda principal ba partido político balun iha Indonésia.

 Regime Indonésia nian hatene ona sira sei lakon iha referendum, maibe sira buka halo política koko sorte ida. Iha acordo 5 de Maio, Indonésia tau condição ida, sira so aceita halo referendum bainhira sira rasik mak kaer segurança ba referendum nian. Indonésia tau condição ida ne’e ho duplo objetivo: Primeiro, se Portugal no Resistência la-aceita ho Indonésia mak kaer segurança, ne’e significa sei dada naruk tan problema Timor no Indonésia continua mantém ninia ocupação iha Timor-Leste. Segundo, se aceita mak Indonésia sei usa ninia militar no polisia sira nebe hanesan segurança ba referendum hodi halo pressão, terror no intimidação, hodi Timoroan sira bele hili autonomia. Portugal foufoun la-aceita atu Indonésia mak kaer segurança tanba, sira ta’uk Indonésia sei usa ninia forsa sira nebe hanesan segurança hodi halo ameaça, terror no intimidação, hodi Timoroan sira ta’uk no vota ba autonomia. Resistência rasik la-importa atu Indonésia mak kaer segurança. Buat nebe importante liu ba Resistência mak tenki halo referendum no ema ida voto ida. Tanba Resistência fiar-an katak, biar Indonésia halo ameasa, terror, intimidação no oho Timoroan sira, maioria Timoroan sira sei tun vota no lahili autonomia. Prática sira hanesan terror, intimidação no oho la’os buat foun ba Timoroan sira. Injustiça, crueldade, barbaridade no violações direitos humanos oioin hasoru Timoroan sira, hamosu tiha ona descontentamento generalizada ida hasoru Indonésia. Rasão ida ne’e duni mak halo Timoroan sira sei lahili autonomia. Referendum hanesan única oportunidade ba Timoroan sira hodi hakotu sofrimento hothotu nebe Indonésia impõe ba sira. Ho rasão hirak ne’e mak Resistência usa hodi convence Portugal hodi aceita ho Indonésia nia exigência nune’e hodi fo fatin ba referendum. 

Parte hosi terror no intimidação atu Timoroan sira bele simu autonomia mak depois de assina tiha Acordo 5 de Maio, ho aceitação ONU, Portugal no Resistência nian katak Indonésia mak kaer segurança, militar Indonésia sira hahu kedas forma milicias iha Timor laran tomak. Hosi ne'e, ho apoio militar no policia Indonésia sira nian, milicias sira hahuu halo ameaças, sunu uma no oho Timoroan sira pro-ukun-rasik-an. Violência, terror no intimidação halo ho massivo, intensivo no sistemático antes no durante referendum la’o. Maibe povo decidido no determinado ba ukun-rasik-an. Decidido no determinação ida ne’e hatudu claramente hosi inan feton ida molok 30 de Agosto, biar iha terror no intimidação nia okos, bainhira entrevista hosi jornalista sira, nia hatan laho ta’uk no categoricamente: “Phui, anatomi mak lae duni!” Inan feton simples ida, tau lipa no lahatene sani no hakerek. Nia hakarak dehan “autonomia mak lae duni.”  

Povo decido no determinado ona atu hakotu ocupação Indonésia nian iha Timor-Leste. Tan ne’e, iha loron 30 fulan Agosto 1999, Timoroan sira, feto mane, jovem sira, ferik-katuas, deficiente ka lae, hotu-hotu ho aten brani tun, biar iha terror, intimidação no mate nia okos, sira forma nadodon iha fatin votação sira. Loron ida histórico tebes, tanba iha loron ida ne’e mak Timoroan sira hatudu acto heróico ida. Se iha ìnicio década 70, Borja da Costa dehan “na ponta da minha baioneta, marcarei na história a forma da minha libertação” mak iha loron 30 fulan Agosto 1999, povo hatudu ba mundu, ho prego tutun, Timoroan sira marca ninia história ba libertação no ukun-rasik-an. 

Referendum nudar bala ikus ba Timor oan sira nian hanesan Nicolau dos Reis Lobato dehan, “a última bala é a minha vitoria”. Loos duni, liu hosi referendum Timor oan sira determina ninia vitória. Referendum hanesan kilat  povo Timor nian. Ninia bala ka kilat musan mak prego.  Ho prego tutun, povo Timor fo golpe final ba Indonésia no termina sira nia ocupação militar no administrativo iha Timor-Leste. 

“Fim de tudo” la-acontece kedas iha loron nebe fo sai resultado referendum iha 4 de Setembro de 1999, tanba militar Indonésia no milícias sira sei continua ho sira nia operação terror, intimidação no oho Timoroan sira. “Fim de tudo” foin acontece loloos iha fulan Outubro nia laran, hatadak ho soldado ikus Indonésia hit ain hosi rai Timor no tama iha roo hodi fila ba nia rain. Milicia balun halai labiban ba Indonésia, capturado no detido hosi força INTERFET no FALINTIL sira. Balun hetan tortura hosi população rasik.

Iha referendum, violência la’os provoca de’it hosi parte ida, hosi parte pro-autonomia no pro-ukun-an nian hotu, maibe halo ho massivo, intencivo no sistemático hosi parte pro-autonomia nian nebe hetan apoio maka’as no claramente hosi militar no policia sira Indonésia nian.  Violência la-acontece de’it iha Timor, maibe mos iha Portugal. Iha Lisboa, mosu violência ki’ik ida. Iha fatin votação, jovens grupo ida ataca Abílio de Araújo ho nia kaben. Triste haree Timoroan ho Timoroan sira ataca malun. Maibe mos estranho, líder destacado FRETILIN ida hanesan Abílio de Araújo, nebe desde inicio no kleur ona luta ba ukun-rasik-an, no iha obras barak iha FRETILIN, iha momento nebe determinante tebes ba ukun-rasik-an, nia ho ninia grupo fila-an tiha, sira halo fali campanhe a favor ba autonomia. Bele cumpreende, tanba sa mak jovens sira ataka Abílio de Aráujo ho nia kaben. Jovens barak lakon nia maun-alin, lakon nia inan-aman, no forçado hosi Indonésia hodi hosik hela sira nia rain, no tenki ba moris terus iha rai seluk. Abílio de Araújo ninia mudança de posição política ne’e, halo jovem sira haree nia hanesan traidor ida.  Sira lakon tiha respeito no simpatia ba Abílio de Araújo ho ninia grupo. Democraticamente, tuir loloos, respeita Abílio de Araujo nian opção, tanba referendum nebe hanesan mecanismo democrático ida, fo liberdade ba Timoroan ida-idak hili tuir nia opção. Maibe, moralmente, política Abílio de Araújo nian inaceitável.  Inaceitável tanba nudar líder boot ida, moris iha Portugal, iha rai livre ida, laiha ameaça, terror no intimidação hosi Indonésia, ninian maun-alin barak mate barbaricamente iha Indonésia nia liman, tanba luta ba ukun-rasik-an, maibe Abílio fila-an tiha, trai tiha nia maun-alin sira nia luta no mate, hodi defende fali autonomia. 

Autor rasik la-vota iha Timor, maibe vota iha Lisboa, tanba hafoin ocupação embaixada Estados Unidos da America iha 12 de Novembro de 1994, hamutuk ho estudantes na'in 28 seluk, sai tiha ba Portugal hodi continua luta iha Frente Externa ka Diplomática. Hanesan mos Timor oan sira seluk nebe sai ba li'ur tanba contra ocupação Indonésia, autor nia naran tama iha hela lista negra Indonésia nian, tanba ne'e labele fila mai vota iha Timor.

Referendum lori duni vitória boot no histórica ba Timor-Leste, maibe lori mos custos boot. Hafoin referendum no fosai ninia resultado ba mundo, Indonésia hatene katak, sira lakon tiha ona funu iha Timor, sira la’os de’it oho Timoroan inocente no indefeso sira, maibe sunu mutuk Timor tanba laran moras no moe. Sente moe no humilhado tanba rai poderoso ida iha Sudeste Asiatico, hafoin funu iha tinan 24 nia laran, lakon funu hasoru rai kiik ida nebe sem recursos militares no apoios internacionais. Indonésia provoca crise política, social, no humanitária boot, halo Timoroan sira fahe malu, oho malu, odio malu no vinga malu. Rihun atus refugia ba Dare no ai-laran balun Timor nian, no rihun atus mos refugia ba Indonésia. Sira nebe refugia ba Indonésia, barak mak sei hela iha Indonésia no seidauk fila mai sira nia moris fatin. 

Referendum mosu hosi resultado diálogo, negociação naruk no consenso entre parte sira hotu envolvida iha conflito. Referendum nudar mecanismo ida hodi tau iha prática direito autodeterminação nebe Timoroan sira kleur ona exige. Referendum nudar dalan justo, pacífico no democrático hodi Timoroan sira determina rasik ninia futuro. Maibe tanba imaturidade política no fácil monu iha jogo no manobra sira militar Indonésia nian, halo Timoroan sira monu iha violência no oho malu. Hahalok aat sira hanesan odio, vingansa, terror, intimidação no oho malu, tanba razões políticas ka pessoais, tenki sai lição boot ba Timoroan hotu, hodi labele acontece no repete hikas iha futuro. 

 Biar iha referendum mosu excesso negativos balun nebe halo ema barak kanek, mate no lakon ninia uma no riku-soin sira, tanba imaturidade política ka problemas pessoais, maibe referendum loloos lori valores positivos nebe ita presiza kaer hodi hametin ukun-rasik-an. Hanesan mos iha referendum, iha processo construção de estado, participação povo nian iha decisão sira liga ho sira nia moris no sira nia futuro importante tebes. Precisa rona no acomoda povo nia aspiração, tanba ukun-an determina hosi povo. Decisão sira nebe Estado no Governo hola, tenki tetu no acomoda povo nia aspiração, tanba povo mak soberano loloos, povo mak determina ukun-rasik-an iha referendum liu hosi votu directo, ema ida votu ida, la’os determina ho kilat musan ka hosi lider sira. Qualidade de voto lider sira nian la-diferente ho Timor oan baibain ida nian. Lider sira apenas fo orientação. 

Hafoin ukun-an tiha, Timor-Leste adopta sistema multipartidarismo no pluralismo político. Pluralismo ida ne’e mai kedas ona hosi processo referendum nebe permite ba parte hothotu, nebe iha ponto de vista lahanesan kona ba problema Timor-Leste nian, hodi tuur hamutuk hodi halo dialogo, halo negociação hodi hetan consenso. Por exemplo negociação kona ba conteúdo Acordo 5 de Maio, kona ba se mak responsável ba segurança, sese mak atu tuir referendum, ema ida voto ida ka liu hosi representação, usa termo referendum ka consulta popular, marcação data ba referendum, no seluk-seluk tan. Ne’e signifika, processo referendum rasik harii iha principio no valores sira democracia nia leten. Negociação ida complexo, naruk no todan, maibe to’o ikus, hetan duni consenso hodi realiza referendum.

Loos duni, libertação no ukun-an Timor nian la’os simu hosi bandeiza ida, maibe liu hosi luta naruk no todan ida, liu hosi fakar ran no mate barak. Buat hirak ne’e hotu mak ikus mai obriga parte hotu-hotu tenki tuur hamutuk hodi hetan consenso katak, solução militar la’os opção nebe viável ona. Ho nune’e mak parte hothotu aceita ho solução política tuir dalan democracia nian. Luta naruk no todan ne'e, ikus mai hakotu liu hosi dalan política nian, mak referendum.

Ita bele dehan, Estado Timor-Leste moris hosi processo ida complexo, tanba inicialmente hahuu ho processo democrático ida, discute no koalia kona ba descolonização no autodeterminação, maibe interrompido tiha ho golpe UDT nebe halo Timoroan sira tama iha guerra civil. UDT ho FRETILIN halo funu hasoru malun. UDT derrotado iha contra-golpe, no Indonesia aproveita guerra civil hodi invade Timor-Leste. Indonésia consegue ocupa hotu vila sira iha Timor laran tomak, maibe sira la-consegue derrota FRETILIN no FALINTIL militarmente. Funu dura década 2 resin, laiha sinais atu hotu.  Em termos de corelação de forças, Indonésia superior liu FALINTIL, maibe FALINTIL nebe hosik hela tiha ona guerra de posição no passa ona ba guerra de guerrilha, susar tebes atu derrota hosi Indonésia. Parte 2 hotu to'o iha conclusão, parte ida lasei derrota parte seluk militarmente, tan ne'e, hakarak ka lakohi, fila fali ba solução política. Solução ida ne'e mak lori libertação no independência ba Timor-Leste.

Ohin loron Timor-Leste ukun-rasik-an ona no adopta principio Estado de direito e democrático. Ho nune’e bainhira ita koalia kona-ba construção de estado mak ita nia hanoin ho hahalok tenki tuir regras no lei sira nebe iha. Biar veterano ka la-veterano, biar luta ba ukun-an ka lae, laiha ema ida la'o iha lei nia leten. Ema hotu hanesan iha lei nia oin. Nune’e mos partido no político sira, bainhira halo política tenki tuir dalan sira democracia nian.

Infelizmente, ho triste ita assiste cena política sira nebe agora la’o daudaun iha ita nia rain, liuliu entre líder no figura histórico sira. Sira lahatudu exemplo diak ba geração foun sira atu aprende. Tanba de’it poder no hakarak hatudu se mak iha força, influência no manda liu, sira fila kotuk ba malun, laiha comunicação no diálogo entre sira. Sira la-aprende buat ida hosi ita nia história. Tinan naruk ita han malu no fahe malu tanba lakohi rona malu, lakohi diálogo. Crise política nebe lori ita monu iha conflito iha 1975 tanba fila kotuk ba malun no buka manan mesak. Crise 2006 no crise sira seluk, no ikus liu mosu impasse política nebe quase paralisa hotu funcionamento diak instituições sira estado nian no ninia impacto ladiak ba economia mos resulta hosi política infantalismo no la-democrático hosi ita nia líderes nacionais no históricos sira. 

Iha Parlamento Nacional, ita acompanha na'i deputados ho deputadas sira halo debate, hanesan loos ema iha mercado haksesuk malu, no balun hasai liafuan sira nebe tuir loloos la-merece hasai. Intervenção balun, lahatudu ética, la-educativo no la-dignifica liu uma ida nebe bolu Uma Fukun Povo nian. Parlamento Nacional sai tiha fali hanesan fatin ASBUN nian, la'os fatin de debate hodi esclarece sasan ba malun ka buka consenso ba assunto estratégico sira ka interesse nacional sira.

Iha debate kona ba lei 4, nebe iha ligação ho ratificação tratado fronteira marítima, lahetan consenso tanba na’in ulun sira labuka malu hodi halo diálogo no consenso, maibe lori de’it maioria hodi hanehan malu. Triste tebes acompanha debate iha Parlamento Nacional. Deputados hosi Maioria Aliança ba Progresso (AMP) balun, halo declaração hamoe no hatun-an tebes, dehan sira lakohi halo diálogo ho partido sira oposição tanba iha Constituição lahakerek liafuan ruma kona ba diálogo.  Deputado sira ne’e haluha tiha katak sira tuur iha Parlamento nudar ema político. Diálogo ne’e nudar mecanismo ida hosi democracia nian hodi tuur hamutuk no discute hodi hetan entendimento comum ka consenso ba assuntos estratégicos ka interesses nacionais sira. Político sira la’os ema militar nebe atu recorre acção militar hodi soluciona conflito ka divergência sira. Instrumento ba político sira hodi soluciona conflito ka divergência sira mak liu hosi diálogo. Se diálogo tenki hakerek iha Constituição mak bele halo, tanba sa mak sira tenki basa liman ba maun Xanana nebe ba mai Australia, Indonésia no rai seluk hodi halo diálogo hodi resolve problema fronteira marítima no terrestre? Tanba sa mak sira lahapara maun Xanana ba halo diálogo sira ne’e? Deputado sira ne’e tenki tau iha ulun katak, tanba mos liu hosi diálogo no consenso ne’e mak halo remodelação ba V Governo Constitucional hodi loke dalan ba FRETILIN tama iha VI Governo Constitucional nebe facilita rasik negociação ba fronteira marítima. Formação ba VIII Governo Constitucional ne’e mos resultado ida hosi diálogo entre CNRT, PLP no KHUNTO. Liu hosi diálogo mak sira entende malu hodi forma AMP. Labele haree diálogo hanesan buka atu fahe kadeira ba malun de’it, essência hosi diálogo liu tan ida ne’e. Diálogo nee parte ida hosi vontade diak político sira nian hodi buka solução no consenso ba assunto sira estratégicos ka nacionais nian, la necessariamente tenki fahe cadeira ba malu. Primeiro-Ministro ba halo diálogo ho Presidente da República, la’os tanba diálogo hakerek iha Constituição mak sira tenki semana-semana hetan malu, maibe atu discute no fahe hanoin ba malun kona ba assuntos estratégicos ka assuntos sira interesses nacionais nian. 

Construção estado no democracia sei la’o ho todan tanba dificulta rasik hosi ita nia líderes históricos no políticos egoístas no chauvenistas sira, tanba sira hatudo liu sira nia ego do que hamutuk hatudu dalan no constroe estado ida nebe sólido no democrático. Em vez de serviço hamutuk no fo apoio ba malu hodi hametin órgão sira estado nian, sira buka enfraquece órgão sira ne’e hotu. Balun usa Parlamento Nacional hodi impede Presidente da República hodi labele halo visita ba rai-li’ur no dificulta mos governo hodi labele hacompleta ninia elenco governamental. Karik sira hotu iha intenção diak atu promove boa governação, tuir lolos haruka naran sira nebe laiha caso ba Presidente da República hodi fo posse, maibe haruka fali naran sira nebe iha caso, hanesan fali atu tau sura ba malun. Bainhira Presidente da República lafo posse, sira usa ida ne'e hanesan rasão hodi fo sala no todan ba Presidente da República. Impasse política mosu tanba laiha vontade diak atu serviço hamutuk, maibe buka tau lasu ba malun no hatun malu. Liu tinan ida ona membro VIII Governo Constitucional seidauk completo tanba jogos infantis no mesquinhos sira ne'e. Além de ida ne’e, Parlamento Nacional, nebe nudar Uma Fukun povo nian, em vez de sai uma ida moos, sai fali fatin ba refugio ba ema sira nebe iha caso, tanba iha neba sira bele hetan imunidade. Sira usa sira nia maioria hodi taka dalan ba justiça, tanba bainhira tribunal husu atu levanta imunidade ba sira nebe iha caso, Parlamento rasik, liuliu maioria sira buka rasão oioin hodi labele levanta imunidade, tanba ema sira em causa ligado ho sira nia interesse no sira nia partido. Aat liu tan, líderes balun koko halo interferência ba serviço sira justiça nian hodi protege ninia ema sira. Taka malu tun sa’en la’os ona segredo ba ema ruma. Caso Emilia Pires nian no Francisco Kalbuady Lay nian, acontece iha ema hot unia matan laran. Ida halai ba Portugal tanba lahetan ona imunidade, seluk fila hosi rai-li’ur mai, teki-teki sai deputado tanba iha neba bele hetan imunidade.

Iha processo construção de estado, iha rai democrático ida, precisa tane aas mos buat ida bolu pluralismo democrático katak, bainhira iha diferenças ka divergências sira, la-precisa recorre violência ka buka manan mesak, tenki hatene halo cedência, tenki recorre dalan sira pacífico no democrático, aposta iha diálogo, negociação no buka consenso ba assuntos estratégicos sira.  Iha processo construção estado de direito no democrático hanesan mos iha referendum, tenki tane aas principio sira justiça nian, halo tuir regras de jogos democráticos nian no respeita opinião sira nebe lahanesan. Ohin buat hotu acontece iha ita nia matan laran, la’os lori argumentos ho rasões hodi convence malu, maibe lori maioria hodi hanehan minoria sira. Parlamento Nacional lasai tiha ona fatin ba concertação política, maibe sai fali fatin ba hatudu força no halo marginalização ba malun. So liu hosi diálogo ida franco no nakloke mak bele convence malu. Bainhira iha diálogo, la-entende no convence malu ona, mak foin recorre votação, la’os buat ki’ik boot tenki submete hotu ba votação de’it. Iha assunto balun merece hetan consenso tanba interesse nacional, la'os usa hodi halo política no buka votos.

Infelizmente, tanba de’it poder no buka manan mesak, líder barak lakohi diálogo, lakohi negociação, lakohi buka consenso, tanba sente-an matenek liu, hatene liu, bele manda mesak, bele halo buat hothotu mesak, no bele ukun mesak, hatudu momos carácter chavenista nian. Haluha tiha katak uluk luta ba ukun-an mos labele halo mesak hosi ema ida ka grupo ida, tanba ne’e mak iha período resistência nian, halo apelo barbarak no halo esforço hothotu hodi hametin unidade. Labele haluha mos katak construção de estado labele halo hosi ema ida ka grupo ida mesak. História no experiência hatudu, iha crise sira nebe mosu iha ukun-rasik-an nia laran, mosu tanba ego sira sem limites, lakohi rona malun, hakarak ukun no manda mesak. Crise sira ne’e to’o paralisa instituições no orgão sira estado nian. Povo sai fali refém ba ninia líder no político sira. Oinsa mak atu constroe no consolida estado se tau uluk ego político no pessoal iha oin? 

Saudoso Fernando de Araújo La Sama hosik hela lição diak ida, lição nacionalismo no patriotismo nian. Se de'it mak iha vontade diak no hakarak lori rai ida ne'e ba oin no hametin Estado  ida ne'e, tuir loloos sira haktuir buat nebe saudoso La Sama dehan:  “hau nia dignidade la’ aas liu dignidade Nação nian”. Katak ita ida-idak nia dignidade la-aas liu dignidade nação nian. La Sama tau iha prática, bainhira mosu crise loromonu no lorosa’e, nebe ameasa tebes integridade no unidade Timoroan sira nian, nia nudar Presidente da República Interino, haruka Força no PNTL, halo Operação Conjunta iha Ermera, iha baze PD nian. Nia la-interesse ho PD lakon votos iha Ermera. Nia tau uluk interesse nacional iha oin, tau uluk estabilidade, segurança, paz no unidade nacional iha oin, la’os interesse PD nian. Ida ne’e bele sai lição ba líderes no políticos sira hotu hodi hatun ego hodi tau interesse nacional iha oin, la’os interesse ida hakarak manan mesak. 

Iha ukun-an nia laran, em vez de trata adversário hanesan oposição democrático, trata fali hanesan inimigo. Entre inimigo sira maka laiha diálogo, maibe entre adversário sira, canal comunicação no diálogo sempre nakloke ba malun. Líder no político balun, haree hanesan atu fila fali ba política FRETILIN nian iha primeiro anos ocupação Indonásia nian: dialógo ka negociação não e nunca. Lamentável tebes. Sira lakohi aprende hosi lição boot povo nian nebe ultrapassa buat sira nebe susar atu ultrapassa nian, sira hakarak povo mak atu aprende fali sira nia política sira selok malu, fila kotuk ba malun no vinga malu. Nudar povo moe haree teatro sira ne'e. Saida mak ita atu aprende hosi sira?

Iha referendum 1999, Timoroan hotu-hotu, atu iha rai laran ka iha rai li’ur, hosi frente hothotu, tun no vota hodi fo vitoria ba ukun-rasik-an. Iha 2018, iha eleções antecipadas, tanba de’it tauk atu lakon, halo buat hotu la’o contrário. Nega malu, hatun malu no proclama-an luta mesak, haluha tiha katak ukun-an ida ne’e determina hosi povo, hosi Timor oan hothotu. Se Timoroan ho Timoroan nebe luta no terus hamutuk nega malu ona, sa tan ho sira nebe uluk vota ba autonomia. Timor biar rai ida kiik maibe natoon ba Timor oan tomak hodi halo nia moris, naran katak iha iniciativa, criatividade no badinas. 

Iha luta ba ukun-an la'os ita Timor oan deit mak luta, maibe iha mos grupos solidariedade internacionais sira nebe luta maka’as iha ita nia sorin. Organização solidariedade sira mak ajuda Frente Diplomática hodi halo campanhe iha rai oioin, no barak mos haruka tulun mai Frente Clandestina no Armada. Se ita Timor oan ho Timor oan nega malu ona, sa-tan ita nia maluk sira hosi organização solidariedade sira.

Triste tebes, haree líderes históricos sira admite ba ninia “jurkam” sira soran povo ba malun, soran Frente Armada ho Diplomática ba malun. Iha palco leten, iha loos sira nia mata laran, sira nia “jurkam” sira trata no hatun líderes históricos sira seluk, soran Frente Armada no Diplomática ba malun, sira tuur hamanasa no labuka evita ka halo los. Falsificação no manipulação ba história halo iha sira nia matan laran, maibe sira hosik de’it, tanba votos no poder mak sira interesse.

Iha campanhe ba eleições antecipadas, iha 2018, hakanek tebes espirito unidade nacional nian, tanba líderes no políticos balun lafo exemplo diak. Sira proclama-an hanesan sira mesak mak funu, sira mesak mak determina Timor-Leste nia libertação no ukun-rasik-an. Sira previlegia mesak Frente luta nian ida, subestima no devaloriza frente sira seluk. Política ida la-construtivo no educativo. Política ida la-contribui ba processo construção de estado, política ida hatudu de’it odio ho vingansa. Ninia resultado mak mosu impasse política iha tinan hira ikus. Conserteza, se laiha comunicação, laiha diálogo ho negociação, lasei iha solução ka consenso ruma. Solução ka consenso só mosu hosi comunicação, mosu hosi diálogo no negociação. So liu hosi mecanismo sira ne’e mak foin bele hetan consenso no solução ba problema sira. 

Se unidade no participação Timoroan hothotu nian importante no determinante tebes iha vitória ba ukun-rasik-an, mak unidade no participação Timoroan hothotu nian iha processo construção de estado mos indispensável tebes. Unidade, participação no contribuição Timoroan sira hotu nian hodi hametin instituição no orgão sira estado nian importante tebes. Processo construção de estado labele halo mesak hosi ema ida ka grupo ida ka rua, labele buka manan ka determina mesak. Tenki hatene halo diálogo no cendência hodi hetan consenso hodi tulun rasik processo construção de estado. Estado ne’e ema hotu nian, tan ne’e ema hotu tenki participa hodi constroe no hametin estado ne’e. Estado ne’e atu metin precisa hametin unidade entre Timoroan sira, hakribi violência no promove maka’as reconciliação, diálogo, cooperação, unidade, fraternidade no solidariedade. Tenki tane aas valores humanidade no dame nian, tane aas tolerância, respeita opinão sira nebe lahanesan, labele halo descriminação ba sese de’it tanba rasão política, ideológica, social, económica, ka crença nebe lahanesan. Iha processo contrução de estado, so kaer metin valores positivos hirak temi iha leten, foin bele harii socoedade ida metin, sociedade ida unido, fraterno, solidário, igualitário, livre, tolerante, participativo, inclusivo, democrático no próspero. So ho sociedade ida metin, unido, coeso, inclusivo, participativo no democrático mak bele sai alicerce di’ak ba estado ida metin no democrático, iha nebe bele lori Timor oan sira hotu ba iha moris ida livre, justo no prospéro. Liu hosi espirito referendum nian ita hametin liu tan ita nia democracia no unidade hodi lori Timor-Leste ba moris ida hakmatek no prospero.

Dili, 24 de Julho de 2019

Nota: Artigo ida ne'e hanesan opinião pessoal, la-representa organização ka instituição ruma nebe autor haknaar-an ba.