UMA KNUA DADOLIN DOKUMENTUS OPINIAUN SEARCH Online KANOIK LIAFUAN IMPRENSA

      PETISIONER TIMTIM

"Hau nia dignidadi la a'as liu dignidadi Nasaun nian".
RENETIL -
Nova Lideranca Mistica
.

Asaun 12 Junnu 1998: Okupasaun Edifisiu DEPLU iha Jakarta - Husi hau nia memoria rasik
LIVRO
RENETIL
LOMPAT
PAGAR
OPERASAUN
TREPE




Nasionalizmu no Patriotizmu Nudar Baze ba
Konstrusaun Nasaun no Estadu Timor-Leste

Husi:  Carlos da Silva L.F.R. Saky
 
I.   Introdusaun
Povu Timor-Leste nudar povu ida funu na’in. Ninia espiritu nasionalizmu no patriotizmu moris kle’ur ona, moris desde halo revolta dala wa’in hasoru kolonialista portugues durante tinan 450 nia laran, no ikus mai, hasoru okupasaun Indonezia iha tinan 24 nia laran.

Timor-Leste nia ukun-rasik-an, la’os hetan husi bandeiza, maibe husi luta naruk no sakrifisiu oioin husi ita nia funu na’in sira. Nasaun no Estadu Timor-Leste harii husi ema rihun ba rihun ninia ran no ruin leten.

Iha funu hasoru kolonialista portuges no okupasaun Indonezia, Timoroan sira hatudu ninia nasionalizmu no patriotizmu aas, prontu hasoru risku hotu-hotu, maibe, ohin loron, espiritu nasionalizmu no patriotizmu hahuu mihis ba daudaun. Problemas oioin nebe ohin loron ita nia rain hasoru, falta de unidade no dialogu entre ita nia lideres sira, mosu violensia no krimi oioin iha ita nia rain, reflete momoos estadu saude ita nia rain no sosiedade nian, nebe moras hela. Moras tanba buat barak la’o latuir ita nia espetativa, la’o la tuir lei, normas, regras no valores nasionais no universais.

Uluk, iha periudu rezistensia nian, unidade entre ema Rezistensia sira metin tebes, tanba sira hatene, atu manan funu ida presiza iha unidade. Hanesan mos atu konstroe Nasaun no Estadu presiza unidade entre Timoroan sira tanba, ema ka grupu ida mesak labele halo. Infelizmente, ohin loron, espiritu nasionalizmu, patriotizmu no unidade nasional hahu lakon ba dadaun nu’udar konsekuensia husi liberdade no ego ne’ebe domina ita nia sosiedade.

Artigu ida ne’e atu koalia kona-ba  nasionalizmu no patriotizmu nudar baze ba konstrusaun Nasaun no Estadu. Primeiru haree definisaun kona-ba nasionalizmu, patriotizmu, nasaun no estadu, tuir mai ko’alia kona-ba konstrusaun Nasaun no Estadu, identidade nasional,  dezafius ba konstrusaun Nasaun no Estadu no ikus liu oinsa atu hametin hikas ispiritu nasionalizmu no patriotizmu hodi kontribui ba prosesu konstrusaun Nasaun no Estadu.

II.     Nasionalizmu, Patriotizmu no Konstrusaun Nasaun no Estadu

Nasionalizmu no patriotizmu, konseitu rua nebe da’et ba malun hanesan duit ida matan rua. Nasionalizmu mai husi liafuan nasaun, enkuantu patriotizmu mai husi liafuan patria. Tuir Smith, nasionalizmu nudar ideolojia politika ida nebe defende lealdade primaria husi kualker individuu tenki ba uluk nasaun, la’os ba kualker komunidade politika ida.[1] Enkuantu nasionalizmu ba Gellner mak “prinsipiu nebe sustenta katak unidade politika no nasional tenki ser kongruente.”[2]

Wainhira ita koalia kona-ba nasionalizmu, ita koalia kona-ba ema hirak ne’ebe iha hanoin hanesan, iha sentimentu hanesan, iha vizaun hanesan, no iha vontade ka hakarak hanesan hodi luta no defende ukun rasik-an ba sira nia Nasaun. Nasionalizmu nudar doutrina ida nebe hanorin hatur nasaun as-liu ema ou nasaun sira seluk. Ema nasionalista ida mak ema nebe sempre tau uluk interesse sira nia Nasaun, Povu no Estadu iha oin. Saudozu La Sama nian liafuan: “Ha’u nia dignidade la aas liu dignidade Nasaun nian”, expressa espiritu nasionalizmu ida aas no kle’an, katak, hasees ego, hasess interesses pessoais, interesse grupu ka partidaria hodi tau uluk interesse Nasaun, Povu no Estadu nian iha oin.

 Ohin loron mosu impasse politika iha ita nia rain, provoka husi ego pessoais, ego politika, ego partidaria ka interesses partidarias husi ita nia na’i ulun sira nian nebe maka’as tebes, tanba ne’e sira buka sees malu, lakohi dialogu ka koalia ba malu, atitude ida nebe la-reflete espiritu nasionalizmu nian.

Enkuantu patriotizmu mai husi liafuan patria, nu’udar sentimentu orgullu ne’ebe sidadaun ida-idak iha, tanba hela iha rai nebe sira moris ba no hadomi sira nia rain liu ema seluk nian. Ema patriotizmu ida komunga hanoin ida, “aat ka di’ak, hau nia rain mak di’ak liu”.

Iha defnisaun no klasifikasaun oioin kona-ba nasionalizmu. Tuir Tønnesson no Antlov, nasionalizmu Timoroan sira nian nudar nasionalizmu plural ka antikolonial, nasionalizmu ida nebe dezenvovidu liu husi prosesu kolonizasaun no luta anti-kolonial.[3] Durante 450 anos, mosu revolta barak iha fatin oioin iha Timor hasoru kolonialista portuges no ikus mai, durante 24 anos reziste hasoru okupasaun Indonezia. Faktu sira ne’e hatudu ho momoos nasionalizmu no patriotizmu Timoroan sira nian.

III. Konstrusaun Nasaun no Estadu

Bainhira ita koalia kona-ba konstrusaun nasaun, nation building, mak hakarak ka lakohi ita mos koalia kona-ba konstrusaun estadu, state building, tanba nasaun, nation no estadu, state, lahaketak-an ba malu mos.

Tuir Smith, nasaun hanesan populasaun umana nomeada ida ho mitus no memoria sira nebe okupa territoriu ka patria istorika ida no iha kultura publika komum ida, iha ekonomia unifikada ida no iha direitus no deveres komum sira.[4] Benedict Anderson define nasaun hanesan komunidade politika imajinada ida nebe inerentemente limitada no soberana.[5]  Enkuantu Michael Leach define nasaun mak “komunidade politika husi ema sira, ho karakteristikas kompartilladas, nebe fiar sira bele ukun-an.[6]

Definisaun hirak nee hotu hatadak elementu husi komunidade ida nebe vinkuladu ho komprensaun amplamente kompartillada husi istoria ida, vizaun ida ba futuru ka forma konsiensia nasional seluk. Timor-Leste ninia istoria kolektiva mak istoria luta antikolonial hasoru portuguez no rezistensia hasoru okupasaun Indonezia tanba hakarak ukun-rasik-an. Nasionalizmu no luta ba ukun-rasik-an tanba hakarak harii Nasaun no Estadu ida demokratiku, partisipativu, respeita direitus umanos no iha toleransia, hakarak sosiedade ida nebe justu, iha igualdade, iha justisa sosial, laiha deskriminasaun no exploração do homem pelo homem.

Nasaun Timor-Leste mai ho karakteristika oioin, kompostu husi grupu “etnica” oioin nebe vinkulada ho descendência, lingua, kultura ka relijiaun kompartillada, nomos  nasaun “civica” ho baze iha territoriu kompartilladu ida, respeitu ba instituisoens no leis komuns sira, “sentimentu” komum ka aseitasaun ba valores nasionais sira. Valores nasionais balun nebe Timoroan tomak partilladu mak simplisidade, solidariedade, fraternidade no kolektividade ho ninia filozofia “matak ida-idak nian, tasak ita hotu nian”, nebe hanorin ba Timoroan sira respeitu ba direitu individual, “matak”, no direitu kolektivu nian, “tasak”.

Nudar komunidade politika ka nasaun ida, Timoroan sira mos iha ninia krensa ka fiar partillada, fiar ba nia lulik sira, fiar ba nia mota lulik, foho lulik, fatuk lulik no bee lulik. Fiar ba ninia uma lulik, no fiar ba relijiaun sira mai husi rai-li’ur hanesan Katolika, Protestante, Islam no seluk-seluk tan. Valores hirak ne’e hanesan identidade nasional Timoroan sira nian.

Enkuantu estadu tuir definisaun Max Weber nian mak organizasaun nebe mantein “monopoliu uzu lejitimu forsa fizika iha determinadu territoriu ida”.[7] Enkuantu O’Neil define estadu nudar “konjuntu husi instituisoens sira hodi halo no halo kumpri”[8] desizaun autoritativas sira iha sosiedade ida. Nosaun Weber nian kona-ba estadu “modernu” refere ba ninia kapasidade eskluziva hodi realiza asaun ka politika sira iha territoriu ida nia laran, independente husi atores esternus ka rivais internus sira. Ohin loron, iha estadu sira nebe iha rivais internus no atores esternus sira mantein kontrolu ba determinadu territoriu ka kontesta efektivamente autoridade sira estadu nian, mak ita bele dehan estadu ida ne’e sei iha hela estadu ida frajil. Bainhira hanesan ne’e beibeik, estadu ida ne’e bele sai estadu falladu. 

Nudar estadu independente, Estadu de direitu no demokratiku, Timor-Leste iha ninia orgaun no institusoens sira Estadu nian, iha leis, regras no normas nebe ninia sidadaun sira tenki kumpri. Estadu iha lejitimidade tomak uza forsa hodi impoin ba ninia sidadaun sira hodi kumpri lei no regras.

Bainhira ita koalia kona-ba konstrusaun estadu, ida ne’e atu refere ba prosesu formasaun ba komunidade politika nasional koeza ida. Komunidade politika nasional ida so bele koeza bainhira iha ninia identidade nasional klaru no metin, identidade ida nebe sidadaun hotu-hotu iha rai ne’e sente nudar sira nian rasik.

Iha periodu rezistensia nian, Timoroan sira konsegue hamosu identidade nasional ida nebe kuinesidu ho “maubere”. Figura “maubere”, reprezenta ka simboliza ema ki’ik no kiak, ema lahatene le no hakerek, ema ain tanan, ema oprimidu no esploradu, tanba ne’e Timoroan tomak luta hodi defende no liberta “maubere” ne’e. Liberta “maubere husi buat aat hotu no hasa’e hikas ninia dignidade liu husi ukun-rasik-an. Sera ke “maubere” ida ne’e kompletamente libertadu ona? Seidauk! Tanba ema ki’ik barak kontinua moris iha kiak nia laran, kontinua esploradu no kontinua moris iha injustisa no diskriminasaun nia laran.

Agora ho Timor ukun-an, kabe ba estadu, partidu politiku no sosiedade sivil sira hodi halo libertasaun total no kompleta ba “maubere” nee. Kabe ba sira konstroe Timor ho hanoin ida, harii Timor foun ida, Abut ida, Hun ida, Timor Ida de’it ba Timor oan tomak. Timor foun ida nebe laiha lorosa’e-loromonu, laiha firaku-kaladi, laiha mestisu, laiha arabi, laiha china, laiha indianu, laiha afrikanu, laiha autonomista-independestista. Harii Timor foun ida nebe laiha korrupsaun, laiha exploração do homem pelo homem no laiha diskriminasaun. Timor foun ida nebe respeita direitu ema hotu nian, defende justisa sosial no sosiedade ida fraternu, igualitaria no sosiedade ida inkluzivu. Se de’it mak nudar sidadaun Timor, independentemente husi nia pozisaun ka opsaun politika uluk nian, hotu-hotu hetan protesaun no tratamentu hanesan husi Estadu.

Iha krizi 2006 sai ameasa boot ba koezaun, unidade no integridade Timor-Leste nian tanba issue lorosa’e no loromonu. Felizmente, Timoroan sira konsege hakat liu krizi ne’e, maibe husik hela fitar boot iha istoria Timor nian. Depois de krizi ne’e, iha estrutura sira governu nian ka partidu sira nian, liuliu partidu boot sira sempre tetu balansu rejional hodi evita mosu hikas issue “lorosa’e” no “loromonu”. Maibe, tuir autor nia hanoin, ida ne’e la’os solusaun nebe di’ak, tanba bainhira halo ida ne’e, mak hatudu katak buat ida “lorosa’e” no “loromonu” kontinua iha ka permanese. Ita haluha tiha katak, buat ida “lorosa’e” no “loromonu”, “firaku” no “kaladi”, ne’e politika ida nebe kria husi kolonialista sira hodi fahe Timoroan sira. “Lorosa’e” no “loromonu”, firaku no kaladi, lahanesan ho “mambae” no “makasae”, “bunak” no “fataluku”, “kemak” no “tokodede” no seluk-seluk tan, tanba etniku no kulturalmente eziste duni. Balansu rejional, pratika ida ladun diak, tanba laharee ona ba meritu ka kualidade, maibe tenki konsidera fali reprezentasaun rejional.

Iha formulasun klasika Benedict Anderson nian, kriasaun ‘nasaun’ ida rekere artikulasaun identidade, istoria no patrimoniu kompartilladus ida nebe mai husi diferensa relijiaun, etnia no lingua.[9] Iha kazu nasionalizmu anti-kolonial nian, prosesu hirak ne’e jeralmente hahu antes husi ukun-an, promove husi elite nasionalistas sira nebe halo opozisaun ba rejime kolonial. Movimentu nasionalistas sira luta ba ninia libertasaun no ukun-rasik-an husi kolonialistas sira.

Importante realsa katak, prosesu sira rekonstrusaun nasaun nian raramente kompletu tanba dezafius sira nebe mosu hafoin ukun-an, tanba nee prosesu konstrusaun nasaun tenki sai hanesan prosesu kontinuu ida.  

Konstrusaun estadu ladun todan hanesan ho konstrusaun nasaun. Konstrusaun nasaun halai liu ba konstrusaun mentalidade, konstrusaun regras, normas no valores. Enkuantu konstrusaun estadu halai liu ba konstrusaun fizika, konstrusaun estadus funsionais no duraveis, nebe bele kumpre atributus essensiais husi estadu modernu nian. Iha konstrusaun estadu, inklui konstrusaun ka fortalesimentu ka hametin instituisaun sira estadu nian, estabelesimentu Estadu de Direitu, reforsa kompetensia institusional sira, kriasaun ba setor seguransa funsional (polisial no militar) no fornesimentu serbisus no infraestrutura essensiais ba sidadaun sira.

Konstrusaun nasaun no estadu, ninia objetivu ida mak atu reforsa sistema politika no administrasaun. Dala ruma Timoroan sira kritika, sistema politika semi-prezidensialista ladiak. La’os sistema mak ladiak maibe karik Timoroan sira mak lahatene ho lolos ka seidauk toman ho sistema ne’e. Hanesan ema sira lori kareta, sira hatene lori kareta deit, tanba la’os mekaniku, sira lahatene oinsa makina ka pesa ida-idak funsiona hanesan sistema no subsistema funsiona hodi halo la’o kareta. Tanba ne’e, em vez de reforsa sistema nebe iha, dala barak, reforsa ka halo fali ema mak hanesan sistema. Halo tuir fali ema nia hakarak, la’os tuir funsaun sistema nian. Tanba buat hirak ne’e hotu mak dala ruma ita haree poder informal kuaze domina fali poder formal, buat ida ladiak tuir Estadu de direito no demokratiku. Buat nebe maun boot Xanana Gusmão halo hanesan lori polisia sira ba sobu lutu ka hakilar inan feton ida iha Postu Administrativu Cristo Rei nebe lakohi muda sai husi fatin neba hodi fo dalan ba ema seluk, biar halo ho intensaun diak, maibe tuir loloos la’os maun boot mak halo, tanba nia nudar sidadaun baibain, laiha kompetensia atu halo ida ne’e. Serbisu ida ne’e kompete ba instituisaun estadu nian mak bele halo, la’os ema ida-idak manda lori Estadu nia naran.

Prosesu nebe luan liu iha konstrusaun nasaun mak dezenvolvimentu komunitariu, formasaun identidade no integrasaun nasional.  Dala barak ignoradu ka lafo antensaun husi ukun-na’in sira. Hanesan saida mak akontese iha krize 2006, issue lorosa’e-loromunu nebe mosu iha forsa nia laran, lafo atensaun no solusaun lais, ikus mai sai boot no tau Timoroan sira soke malu no oho malu, iha nebe kuaze sobu tiha unidade Timoroan sira nian nudar Nasaun no Estadu. 

IV. Identidade Nasional

Konstrusaun Nasaun ijiji ba elites sira atu promove sensu ida kona-ba koezaun identidade nasional entre sidadaun sira nebe jeografikamente difundidas no dala barak lahanesan. Signifikadu no kontiudu husi identidade nasional ida no fronteira sira entre insiders no outsiders bele sai kestaun ba estratejia nasional: adopsaun identidade husi grupu ida nian normalmente kontestadu husi grupu seluk. Hanesan naran “maubere” nebe adopta husi naran ema Mambae nian, ema balun ladun aseita, ka uma tradisional husi Lauten nian, nebe ema balun la-aseita nudar identidade nasional. Maibe ho tempu, nune’e mos ho esplikasaun ida rasional no fundamentada, ikus mai, maioria simu nudar identidade nasional Timor nian. 

Identidade nasional mak identidade ida nebe aseitadu no partilladu husi komunidade politika ida nebe hela iha determinadu territoriu. Identidade nasional hanesan buat ida nebe inventadu ho objetivu estratejiku ruma. Hanesan, uluk, FRETILIN adopta no populariza liafuan “maubere” ho estratejia ida hodi unifika Timoroan sira hodi luta hasoru kolonialista portugues no Indonezia. Adopsaun “maubere” nee efektivu tebes hodi organiza no mobiliza Timoroan sira ba luta kontra okupasaun Indonezia nian. Ohin loron, presiza hamosu tan identidade foun hodi hametin liu tan unidade Timoroan sira nian. 

Aleinde presiza identidade unifikador ida, maibe mos presiza inimigu komum ida. Iha 1974, inimigu komum Timoroan sira nian mak kolonialista portugues, maibe ho invazaun no okupasaun Indonezia nian, Timoroan sira redefine ninia inimigu komum mak Indonezia nebe hanesan neo-kolonialista. Iha ukun-an nia laran bele define inimigu komum mak pobreza no korrupsaun. Se Timoroan sira hamutuk hodi halo kombate ba pobreza no korrupsaun, fiar katak kleur ka lais, sei halakon kiak ho korrupsaun iha Timor-Leste.

Estadu ida ho afiliasoens etnikas no kulturas lahanesan, ho grau sentimentu nasional komum lahanesan, tanba foin sai husi konflitu naruk ida tanba kolonizasaun no okupasaun, ema hanoin katak susar atu mantein ninia unidade depois de ukun-an. Iha kazu Timor-Leste nian, Timoroan sira iha sorte tanba iha lingua Tetun nudar lian unifikador ida. Aleinde de Tetun, relijiaun katolika no lingua portugues, liuliu relijiaun katolika sai identidade nasional unifikador ida. Aleinde identidade hirak temi iha leten, istoria rezistensia nian hasoru okupasaun Indonezia, sai mos elementu unifikador ba nasaun foun Timor. Ideia unifikadora identidade Timoroan sira nian, hametin husi rezistensia hasoru Indonezia, tanba antes Timoroan sira nunka hamutuk. Nasionalizmu aas Timoroan sira nian nebe mai husi ema Rezistensia sira presiza transforma iha formas foun iha era pos-independensia, hanesan iha lingua, iha relijiaun no iha ideia ba destinu komum ida. Tenki transforma ba iha konstrusaun Nasaun no Estadu hodi halo Nasaun no Estadu sai metin liu tan.

V. Dezafius no obstakulus ba Konstrusau Nasaun no Estadu

Hafoin Timor-Leste hetan ninia ukun-rasik-an, Timor-Leste hasoru dezafiu no obstakulus barak ba konstrusaun Nasaun. Lideres nasionais no istorikus sira lafo izemplu diak ba jerasaun foun sira. Fahe malu, sees ba malun no lakohi tuur hamutuk. Ohin loron, Timoroan sira lakonsege hetan no identifika hamutuk inimigu komum, ne’eduni, sira ho sira la-trata malu hanesan adversariu politiku, maibe trata malu hanesan inimigu nebe la-kuinese dialogu. Atitude hanesan reflete mos iha jovens sira, fahe malu ataka malu no oho malu, hahalok sira ne’e sai potensia boot ba konflitu no bele ameasa unidade nasional. Arte marsiais sira, tuir lolos bele serbisu hamutuk hodi promove paz, unidade no estabilidade nasional. Infelizmente, sira uza sala papel no funsaun arte marsiais nian ba aktus negativus sira.

Tanba lahetan inimigu esternu ka komum ida, ema rezistensia sira, liuliu lideres sira, fila kotuk ba malu no halo malu ba inimigu. Ba ema baibain sira, tanba frustradu ho moris nebe defisil, laiha serbisu ka moris susar, sira hili maluk eis-autonomistas sira hanesan sira nia inimigu. Maibe, ba ema Timoroan sira nebe iha konsiensia nasionalista no patriota aas, sira define sira nia inimigu komum mak pobreza no korrupsaun. Pobreza nia abut mosu husi injustisa sosial, mosu husi dezempregu no korrupsaun. Tanba ne’e, tuir loloos Timoroan sira tenki hamutuk hodi kombate buat hirak ne’e. Maibe, infelizmente, ambisaun delek ba poder, halo ita nia lideres sira trata malu no funu malu hanesan inimigu no moris susar halo Timoroan baibain sira hili maluk eis-autonomistas sira hanesan sira nia inimigu.

Timoroan barak seidauk interioriza lolos valores sira demokrasia nian. Tanba ne’e, la-respeita adversariu politiku sira, la-respeita hanoin sira nebe lahanesan. Iha media sosial sira, ita haree diskusaun sira, la’os aprezenta razaun no argumentus maibe domina ho ataka malu, insulta malu, tolok malu no hatun malu bainhira mosu diskusaun husi ema sira nebe kor politika lahanesan.

Rekonsiliasaun nasional sai politika estadu ninian. Maibe, seidauk hala’o ho didiak iha pratika. Ita kontinua rona diskursu sira diskriminativus, kontraria tebes ho espiritu rekonsiliasaun nasional nebe ita defende. Kontinua fahe Timoroan sira ba autonomista no independentista, fahe Timor oan sira ba primeira no segunda klase. Diskriminasaun sira ne’e la’os mosu iha media sosial de’it maibe mosu rasik iha instituisaun sira estadu nian. Hanesan iha PNTL, fahe malu ba polisia nasionalista no polisia POLRI. Iha defeza (F-FDTL), komandante boot sira halo deklarasaun publikamente, lasimu eis-autonomistas nia oan sira iha forsa, no sira nebe tama tiha ona, lasei sae postu tan, hela no mate ho deviza nebe hetan ona. Triste boot tanba diskriminasaun sira ne’e mai husi instituisoens sira nebe tuir loloos sira mak tenki iha oin liu promove ispiritu nasionalizmu no patriotizmu, no halo ema hotu tenki moris tuir lei no ordem, moris tuir konstituisaun. Ita hotu hatene konviksaun politika la’os hereditaria, lamai husi jenetika ida, tanba ne’e, oan sira labele responsabiliza ba aman sia nia hahalok. Iha aspektu juridiku, ema ida-idak hatan ba nia krimi, la’os ema inosente ida ba hatan fali ba krimi ema seluk nian.

Loos duni, ema barak seidauk hakarak simu rekonsiliasaun tanba tratamentu no torturas sira nebe sira hetan ka familia barak mate iha funu laran. Atu hakat liu dezafius sira ne’e, tuir autor nia hanoin, tuir loloos rekonsiliasaun tenki la’o hamutuk ho justisa. Justisa tenki hahuu husi 1975 mai to’o iha 1999. Se de’it, husi kor politika nebe de’it, mak halo krimi kontra umanidade tenki ba hasoru justisa. So ho nune’e deit mak foin hatene loloos se mak halo krimi no se mak lae. Vantajen husi justisa ne’e atu liberta ema inosente sira husi pena sosial, tanba pena sosial todan liu pena iha kadeia. Ema ida, biar inosente, nia bele hetan pena sosial durante nia vida tomak, se laiha prosesu legal ruma hodi deside se mak kulpadu ka inosente. Kumpri tiha justisa uluk, depois atu hametin unidade nasional no tenki hamutuk la’o ba oin, estadu bele fo amnestia ba hotu-hotu. So hanesan ne’e mak dehan iha duni justisa ba ema hotu.

Los ka laloos, konflitu politika no militar iha 2006, rezulta husi diskriminasaun sira nebe alega akontese iha forsa nia laran, konflitu ida nebe fahe tiha Timoroan sira ba Loromonu no Lorosa’ae. Tipu diskriminasaun sira hanesan ne’e kontraria tebes ho valores nasionalizmu pluralista nebe Timor oan sira iha. La’os ne’e de’it, iha serbisu fatin sira, kontinua halo diskriminasaun ba funsionarius sira, fahe funsionarius sira tuir kor politika, privilijia sira nebe sira iha kor hanesan no diskrimina sira nebe kor seluk. Buat hirak ne’e hotu sai obstakulu boot ba prosesu konstrusaun Nasaun no Estadu.

To’o ohin loron, seidauk iha esforsu loloos hodi hametin sistema politika no administrasaun. Lideres balun halo-an ba sistema rasik, lala’o tuir sistema no lei sira nebe iha. Poder informal mak domina liu poder formal. Laiha pozisaun ruma iha governu nia laran, maibe lori ajentes seguransa sira ba halo asaun sira nebe tuir loloos ema sira ho poder formal sira mak halo. Ida ne’e sala la’os lideres sira nian de’it, maibe mentalidade seguidizmu ka subserviente husi Timoroan barak, tuir alimenta no haboot ego, ganansia no ambisaun lideres politika balun nian, hodi la-kumpre regras, leis no normas sira nebe iha. Tanba dehan buat hotu nia mak hatene, buat hotu nia mak halo, se laho nia labele. Diskursu sira hanesan ne’e la-ajuda hametin sistema no demokrasia, tanba iha tendensia atu adora ema ida. Iha demokrasia, poder iha povu nia liman, tanba ne’e, adora lider ida kontraria ho prinsipiu sira demokrasia nian no sai obstakulu boot ba prosesu dezenvolvimentu no kontrusaun nasaun. Timoroan barak lakon espiritu kritiku, no barak sai tiha seguidizmu no atan tanba tuir de’it saida mak patraun ka xefe hakarak.

Injustisa sosial kontinua mosu iha nebe-nebe. Ema riku kontinua riku, ema ki’ak kontinua ki’ak. Ema ida rua hetan projetus boboot no fila-fila, tanba sira iha koneksaun ho ema sira iha poder de desizaun. Iha foho sira, ita haree ema barak moris susar, laiha osan, laiha ai-moruk. Ema sira iha osan no kuinesidu fasil hetan tratamentu lais maibe ema ki’ik no ki’ak sira, balun nein hetan ai-moruk musan ida to’o mate. Ema balun tuur de’it no lahalo buat ida, ka la’o pasiar lemorai, fulan-fulan hetan salariu boot, maibe ema ki’ik no kiak sira laiha osan, no karik balun manan osan, fulan ida manan $150.00. Ema ki’ik ida serbisu to’o dolar, fulan ida hetan $150.00, salariu minimu, no ida lahalo buat ida, fulan-fulan simu $1.500.00 ba leten, ida ne’e mak bolu injustisa sosial.

Korrupsaun kontinua akontese iha nebe-nebe, hahalok ida nebe kontraria tebes ho espiritu nasionalizmu nian no sai ameasa boot ba konstrusaun Nasaun tanba sira mai ho mentalidade ida na’uk nian. Korrupsaun halo Timoroan balun sai kiak no balun riku matak. Se la-kuidadu estadu bele sai bankarrota tanba korrupsaun.

Exploração do homem pelo homem ka hais ema ba ema kontinua la’o. Ema traballador sira manan salariu ki’ik maibe halo serbisu todan. Sira serbisu iha fim de semana ka iha loron boot sira sein aumenta ka multiplika sira nia salariu. Labarik ki’ik no otas eskola sira, forsadu husi moris susar, tenki ba halo serbisu. Iha fatin serbisu balun, funsionariu sira lahalo atendimentu diak, sira hais utentes sira. Sira husu osan ka tenki foo san mak foin hetan atendimentu lais. Hahalok sira ne’e la’os esplorasaun de’it maibe mos korrupsaun.

Ohin loron, atu politiku, funsionariu, sidadaun baibain ka estudantes sira, barak mak lakon ona ninia etika no moral. Iha fatin publiku sira, laiha ona moe, insulta malu, tolok malu, hatun malu to’o halo asidiu seksual. Etika no falta moral, halo feto klosan balu isin rua, kosok oan sira moris mai, sira labali, maibe lori ba soe iha foer fatin sira. Etika no falta moral ida ne’e, halo ema balun, biar estudu boot, latauk no lamoe halo korrupsaun. Hahalok sira ne’e hotu latuir valores sira nasionalizmu nian no sai obstakulu ba prosesu konstrusaun Nasaun rasik.

Espiritu nasionalizmu no patriotizmu ohin loron kuran tebes. Veteranus ka eis-kombatentes libertasaun nasional balun, uluk iha tempu rezistensia, ninia espiritu nasionalizmu no patriotizmu aas tebes, ohin loron ninia ispiritu nasionalizmu no patriotizmu hahuu mihis no lakon tanba problema ekonomika. Balun ijiji estadu tenki fo atensaun ba sira, maibe sira rasik la-kontribui diak ba prosesu konstrusaun Nasaun no Estadu. Husu projetus boboot no barbarak, maibe lahalo ho kualidade, no balun to’o impede rasik dezenvolvimentu nasional tanba hadau malu projetus.

Veteranus sira na’in ba ukun-an la-signifika halo arbiru de’it ka ijiji buat hotuhotu ba an no halo diskriminasaun ba ema sira la-luta ba ukun-rasik-an, no haluha povu. Veteranus ka eis-kombatentes sira nebe mak halo diskriminasaun, sira rasik mak trai prinsipiu sira ukun-rasik-an nian, tanba ukun-an atu halo tratamentu hanesan ba Timor-oan tomak, la-interesse nia mai husi nebe. Konstituisaun RDTL garante tratamentu hanesan ba Timor-oan tomak.  Na’in ba ukun-an ijiji iha disiplina no responsabilidade, katak tenki hatudu hahalok diak, tenki halo sasan ho diak, tenki halo buat diak ba Timor-oan tomak, la’os ba an rasik. Halo diak hodi atinji objetivu ukun-rasik-an nian, mak liberta Timor-oan tomak husi injustisa sosial no lori Timoroan tomak ba moris diak. Rin ba Nasaun signifika tenki hametin Nasaun no Estadu. Impede dezenvolvimentu, eskluzividade no pratikas deskriminativas sei la-ajuda hametin rin Nasaun nian. Rin Nasaun nian sai metin bainhira hasees an husi hahalok aat no dikriminativas, no kontinua luta maka’as ba unidade nasional no properidade Timor-oan tomak nian.

VI. Hametin Hikas Ispiritu Nasionalizmu no Patriotizmu hodi Kontribui ba Prosesu Konstrusaun Nasaun no Estadu.

Atu hametin hikas ispiritu nasionalizmu no patriotizmu, tenki hatama iha kurrikulu ensinu obrigatoriu kona-ba valores sivikus no istoria nasional, tenki halo Timor -oan sira domina linguas ofisiais sira hodi fasilita komunikasaun entre grupu sira. Nune’e mos, presiza kria fasilidades transportes no komunikasaun hodi hakbesik distansia fizika no sosial nebe fahe no izola Timor oan sira ba malu.

Tenki iha edukasaun nasionalista ida. Hakotu sistema edukasaun kolonialista nian no harii hikas sistema edukasaun nasionalista ida, iha nebe fo prioridade ba sistema edukasaun demokratika ida ho baze partisipativu, dialojiku no kritiku. Edukasaun ida nebe la’os meramente kombate analfabetizmu maibe forma sosiedade ida ativu no kritiku, la’os sosiedade ida chavenista, seguidista/subserviente no oportunista. Edukasaun ida nebe hanorin Timoroan sira sai onestu no brani hateten lae ba buat sira laloos no fo apoiu ba buat sira loos. Presiza kombate maka’as hahalok sira chauvenismo, seguidismo no oportunimo tanba hahalok sira halo ema lakon espiritu kritiku hodi kontribui ba prosesu konstrusaun nasaun. Inimigu boot nasionalizmu no patriotizmu nian maka ema sira oportunista ka “maukose” sira, sira nebe lori nanal kose ema sira iha influensia hodi hetan benefisiu pessoal ba an. “Maukose” la-interesse ho assuntu sira interesse komum nian. Oportunista ka “maukose” ida la’os ema nasionalista no patriota, tanba ema sira hanesan ne’e so kose no buka oportunidade sira hodi lori benefisiu ba sira nia an rasik, la’os ba ema barak ka interesse komum nian.

Timor-Leste presiza edukasaun ida atu halo ema hadomin malu, solidariu ba malu, serbisu hamutuk no tulun malu, la’os edukasaun ida atu halo diskriminasaun ba malun no kuda odiu ho vingansa. Presiza edukasaun ida ba paz, edukasaun ida atu unifika Timoroan tomak sein halo diskriminasaun tanba politika, ekonomika, sosial, ideolojika, fiar ka rasa. Timor-Leste hakat liu funu naruk no todan ida, halo Timor-oan sira fahe malu. Agora tempu ona tenki kuda nasionalizmu foun hodi hametin unidade nasional, nasionalizmu nebe promove Timor-Leste nebe ida de’it, hun ida no abut boot ida, Timor-Leste ida nebe rai ida de’it no povu ida deit nebe labele halo diskriminasaun ba malun. Timor-Leste ida nebe promove justisa sosial no prosperidade hanesan ba sidadaun Timor-oan tomak.

Tenki promove maka’as justisa sosial. Estadu nia prezensa atu proteje ninia sidadaun hotu-hotu no halo tratamentu hanesan. Tenki halo diskriminasaun pozitiva hodi tulun sira nebe ekonomikamente fraku hodi sira mos bele moris iha kondisaun nebe dignu. Justisa sosial so iha bainhira laiha ona hanoin no hahalok sira diskriminativus, hahalok nebe benefisia grupu balun no marjinaliza ema ka grupu seluk. Sai preokupasaun boot ita koalia kona-ba rekonsiliasaun nasional maibe iha pratika, ita marjinaliza daudaun ema sira eis-autonomistas ho nia oan sira, marjinaliza sira iha serbisu sira. Aat liu tan insulta sira sein fundamentu ruma. Pratika sira ne’e la-reflete espiritu nasionalizmu maibe mos violasaun momoos ba Konstituisaun RDTL no prinsipiu sira direitus umanos nian. Ema nasionalista ida lakoko dudu sees ninia maun-alin ida, maibe hakoak. Naton ona ba kolonialista sira fahe Timoroan sira, no ema nasionalista ida ninia papel loloos mak atu hako’ak ema hotu, tanba nia luta ba ukun-n atu hako’ak Timoroan tomak, la’os diskrimina sira politika, ekonomika no sosialmente.

Timoroan sira tenki iha karakter nudar Timoroan. Tenki aprende valores no moral sira. Tenki iha etika. Etika mai husi etos katak karakter no kustume. Nu’udar Timoroan iha ninia kultura no kustume rasik. Ema tenki iha etika hodi kontrola ninia emosaun no tenki iha moral hodi regula ninia komportamentu. Siensia deit lato’o, maibe presiza iha moral no etika mos. Ema nebe iha etika no moral hatene respeita ema seluk, hatene tau-an no lahalo buat aat sira hodi afekta ba ninia integridade. Ema nebe iha etika no moral latolok arbiru, la-insulta no hatun ema, la-ataka no oho ema. Etika no moral ninia funsaun mak atu kontrola ema hodi labele monu ba buat aat sira hanesan prostituisaun no droga. Prostituisaun no droga halakon joven sira nia futuru ne’ebe ikus mai bele halakon mos Nasaun no Estadu nia futuru.

Ema nebe iha espiritu nasionalizmu forte, iha etika no moral, sei lahalo korupsaun tanba ninia etika no moral la-permite ba nia atu halo korrupsaun, tanba nia hatene korrupsaun hanesan hahalok aat ida nebe bele lori nasaun no estadu ba bankarrota. Etika no moral nudar instrumentu ida hodi halo kontrolu internu no sempre fo hanoin katak, labele uza sala fiar ne’ebe publiku fo hodi buka benefisiu pessoal ba-an rasik. Nasionalizmu hatudu husi hadomi ita nia nasaun no ita nia povu. Ita tenki hadomi ita nia rain, maibe mos tenki komprende saida mak hetan iha fatin seluk. Labele sai ema nasionalista ida chauvenista maibe sai nasionalista ida pluralista katak hadomin buat nebe ita nian maibe respeita mos buat nebe ema seluk nian. Filozofia “matak ida-idak nian, tasak ita hotu nian, hanorin klaru, respeita buat nebe ema seluk nian, matak, no kaer metin buat nebe ita nian, tasak.

Presiza mos ritual sira estadu nian hodi hametin espiritu nasionalimu no patriotizmu nebe kontribui rasik ba konstrusaun nasaun. Labele halo ema dekora ka memoriza deit inu nasionais sira iha eskolas, maibe halo sira tenki kumprende no interioriza. Hanesan iha eskola sira, ka iha ministriu sira, kada fulan halo seremonia dada bandeira no katan Inu Nasional Patria Patria, labele dekora  de’it Inu ne’e mak tenki interioriza. Inu ne’e hanorin atu honra, respeita no glorifika ita nia povu no heroi sira, nune’e mos defende povu ida livre. Povu ida livre la’os povu ida diskriminadu no moris iha presaun politika, ekonomika, sosial no psikolojika nia okos. Tenki proteje povu husi kapitalista sira nian ganansia nebe ibun elastiku hanesan fohorai nia ibun, nebe bele tolan buat hotu. Inu Patria Patria mos ijiji no ho firme afirma lae ba esplorasaun: Não, não, não `a exploração”

Aleinde hirak ne’e, ispiritu nasionalizmu no patriotizmu bele kuda mos liu husi desportos, artes, teatru, muzika no kultura, valores hirak nebe importante ba konstrusaun nasaun no estadu. Prezervasaun ba patrimoniu nasional hanesan fatin istoriku sira nudar parte ida husi konstrusaun Nasaun, kria “ambiente konstruidu” ida ba memoria nasional, hanesan Centro Nacional Chega halo daudaun. Liu husi buak hirak ne’e hotu hodi promove simbolus, rituais no valores sira Timor nian nebe sai identidade nasional. 

Presiza ekonomia nasional ida moderna no integrada, hodi fasilita interkambiu no interkoneksaun husi ema no bens iha territoriu nasional tomak hodi hametin rasik integrasaun nasional. Bainhira Timoroan sira moris diak no hasees an husi hahalok sira nebe ameasa unidade nasional sei hametin liu tan integrasaun politika, ekonomika no sosial nebe sai objetivu loloos ba konstrusaun Nasaun no Estadu. Atu reforsa liu tan ekonomia ida ne’e, presiza kria ekonomia nasionalista ida, ekonomia ida nebe halo Timor-oan sira tenki hamrik iha ninia ain-leten rasik, la’os dependente los de’it ba ema ka rai seluk. Kooperativa bele sai baze ba ekonomia nasionalista ida bainhira organiza no jere didiak.

Presiza kria no dezenvolve media sira nebe kritiku no responsavel, la’os de’it nudar meiu kontrolu sosial ida ba ukun-na’in no sidadaun sira, maibe mos hodi fahe informasaun loloos no halo ligasaun entre estadu no sosiedade sivil. Media ida nebe ho karakter nasionalizmu no patriotizmu hodi promove unidade nasional, hodi kombate diskriminasaun no hodi promove valores nasionalizmu no patriotizmu. La’os media ida nebe promove odio ho vingansa. Timor-Leste presiza media ho jornalistas sira nebe promove unidade, paz no rekonsiliasaun, la’os ida soran ema ba malun ka promove odio no vingansa.

Ita mos presiza proteze no konserva ita nia identidade no valores sira hanesan unidade, integridade moral, respeita malu, toleransia, fraternidade, kolektividade no solidariedade. Timoroan hotu-hotu tenki assume responsabilidade hodi proteze no konserva valores nasionais sira hodi hametin liu tan ispiritu nasionalizmu no patriotizmu no dudu prosesu konstrusaun Nasaun no Estadu ba oin. 

Nasionalizmu la-signifika katak ita tenki izola-an hosi mundu internasional, maibe ita tenki nakloke no respeita kultura no valores rai seluk nian. Ita nia ukun-an la’os hetan husi luta izolada no eskluziva ida, maibe ho apoiu ema husi rai oioin. Tanba ne’e ita nia nasionalizmu la’os nasionalizmu ida klot no taka-an, maibe nasionalizmu ida pluralista nebe respeita kultura no tradisaun rai seluk nian. 

Prosesu dezenvolvimentu presiza sentidu patriotizmu hodi luta kontra hahalok aat hotu-hotu. Ohin loron ita tama iha era globalizasaun, era ida hasoru dezafius oin-oin, tantu esternal ou internal. Ita preokupa tebes ho futuru Timor nian, preokupa lakon ita nia identidade ka kultura rasik, ne’eduni, Timoroan hotu-hotu iha dever no obrigasaun atu kuda sentimentu hadomi ita nia rain no sosiedade, sentimentu nasionalizmu no patriotizmu ba foin sa’e sira. Nasionalizmu ida nebe prezerva ita nia kultura, tradisaun no indentidade nasional sira hotu.

Lideransa sira tenki sai modelu ba jovens sira. Sai modelu nasionalizmu no patriotizmu nian, modelu demokratiku, tolerante, respeita opiniaun sira lahanesan, modelu buka konsensu no serbisu hamutuk. Modelu nebe respeita lei no ordem. Modelu nebe rona no hakoak ema hotu sein diskriminasaun. La’os modelu sira eskluzivizmu, la’os modelu sira halo ema adora no hulan iha kaba’as. Sein buat hirak ne’e konstrusaun Nasaun no Estadu sei susar la’o ba oin.

Konstrusaun nasaun no Estadu halo liu husi hametin orgaun no instituisaun sira estado nian no hametin sistema politika, ekonomika, sosial no administrasaun. Tenki halo ema hotu moris tuir sistema, lei no regras sira nebe iha, la’os ida-idak halo no manda konforme nia hakarak.

Povu seidauk libertadu lolos tamba ohin loron ita lori ita nia povu ba hakraik-an ba hahalok kapitalista sira nian. Ita nia Inu Nasional Patria-Patria fo hanoin ba ita atu luta kontra imperialista no kapitalista sira nebe esplora ita nia povu, maibe iha pratika, dala ruma ita bolu kapitalista balun mai Timor, la’os tulun ita maibe esplora ita.

Nasionalizmu no patriotizmu mos ijiji Timoroan tomak atu serbisu badinas, serbisu ho matenek no maka’as hodi lori Timor ba oin. Barukten la’os karakter ema nasionalista no patriota ninia espiritu. Presiza promove serbisu badinas no maka’as hodi lori Timor-Leste ba moris ida diak liu.

Nasionalizmu no patriotizmu identiku ho domin, sakrifisiu, determinasaun, abnegasaun no responsabilidade. Tenki halo serbisu ida ho determinasaun, ho domin no responsabilidade. Obras sira nebe halo laho kualidade, hatudu halo serbisu laho domin no responsabilidade. Kaer metin ita nia valores  pozitivus sira no valores universais sira hodi konstroe ita nia Nasaun no Estado.

VII. Konkluzaun
Nationalizmu nudar ideolojia politika ida iha nebe defende primeiru lealdade husi inidivudu hotu hodi tau uluk interesse kolektivu, interesse nasaun, povu no estadu nian iha oin. Nune’e mos buka hametin unidade nasional hodi tulun rasik dezenvolvimentu no prosesu konstrusaun Nasaun no Estadu.
Nasionalizmu no patriotizmu ijiji hatun ego, hatuur uluk interesses komum iha oin, tuur hamutuk hodi dikskute no buka konsensu ba assuntus estratejikus ka assuntu sira ho karakter interesse nasional nian.
Iha Nasaun demokratiku ida, dialogu nudar meiu efikaz ka dalan nebe diak liu hodi solusiona diferensas sira. Gerilla politika la’os karakter ema nasionalista no demokratiku ida nian. Demokrasia ijiji konfrontasaun de ideias hodi hetan ideia nebe diak liu ho dinamiza rasik prosesu dezenvolvimentu no konstrusaun Nasaun no Estadu. Konfrontasaun ideias la’os sinonimu ho violensia, maibe liu husi hanoin sira nebe lahanesan hodi hetan hanoin nebe diak liu, hanoin nebe konsensual hodi dudu prosesu konstrusaun Nasaun no Estadu ba oin.
Ema nasionalista no patriota lolos mak sira nebe iha espiritu prontu halo sakrifisiu, iha espiritu abnegasaun, dedikasaun, determinasaun no responsabilidade ba ninia Nasaun no Estadu. Katak teki hatene kuida no halo buat hotu nebe diak ba nia Nasaun, Povu no Estadu. Buka promove valores sira pozitivu, promove ispiritu nasionalizmu no patriotizmu, promove unidade nasional, dialogu, toleransia,  justisa sosial, demokrasia, paz, rekonsiliasaun no  respeito ba lei no regras nebe nudar ba baze konstrusaun Nasaun no Estadu nian.



[1] SMITH, A apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 6.                                                                                                         
[2] GELLNER, E apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 6.
[3] TONNESSON, S. and ANTOLOV, H apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 12.

[4]. SMITH, A apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, pp. 3-4.
[5] ANDERSON, B apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 5.
[6]  LEACH, M. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 4.
[7] WEBER apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 4.
[8] O’Neil apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, p. 4.
[9] ANDERSON, B apud, LEACH. Nation-Building and Nastional Identity in Timor-Leste. London and New Yourk: Routledge, Taylor & Francis Group, 2017, pp. 4-5.

No comments:

Post a Comment


123456789
1. Membru RENETIL Ho Matan Ben Simu Matebian Lasama 2. Primeiru-Ministru Louva Livru RENETIL Publika kona-ba Kontribuisaun Istóriku ba Ukun An 3. Sekjer RENETIL ho Hakerek nain Carlos Saky entrega livru ba PR Taur MR 4. STL - Livru RENETIL iha Prosesu Libertasaun Timor-Lorosae 5. Lansamentu Livru Antes Sem Titulo do Que Sem Patria 6. Sasin no envolvimentu Dr. Rui de Araujo alias Agil nudar militante RENETIL 7. RENETIL - Nova Lideranca Mistica 8. Homenagem a Fernando Lasama de Araújo 9. PN Diskuti Malu Tamba Livru RENETIL