Bulak sira iha Dili

Bulak sira iha Dili

Bulak sira iha Dili
Imi mak maromak
Imi mak liurai
Imi mak lia na’in
Imi mak buat hotu

Bulak, bulak, bulak
Imi duni malu buka ukun
Imi hamanasa fahe riku
Imi loko-an ba buat hotu
Imi tebe, bidu no dahur ba imi nia kanten

Rona, rona, rona
Haree, haree, haree
Rona imi nia bulak no kanten
Haree imi nia bulak no kanten
Hahi imi nia bulak no kanten

Bulak sira iha Dili
Imi hahoris bulak
Imi hahoris kiak
Imi hahoris naukten
Imi hahoris lia oioin

Iha sikun ida hetan labarik ida tanis ba susu wen
Iha ninin ida hetan tane liman ida husu osan
Iha lidun ida haree ferik ida fa’an sasan lafolin
Iha leet ida haree oan kiak sira tanis halerik
Iha husar ida hetan katuas ida hili aihan foer

Bulak sira iha Dili
Imi mak fahe emar
Imi mak soran emar
Imi mak haneban emar
Imi mak susu emar bokur

Imi haree udan boot
Imi haree rai halai taka ema
Imi haree we lori ema
Imi haree we sobu ema nia uma
Imi haree we halai tuir dalan dudu ema ba mota

Bulak sira iha Dili
Imi haree tasi siak
Imi haree ema mout iha tasi
Imi haree laloran tolan ema
Imi haree lafaek tolan ema

Imi haree ema kuna no hakuna malu
Imi haree ema baku no les malu
Imi haree ema sona no oho malu
Imi haree ema ho tali tara an
Imi haree ema falun no soe kosok oan

Bulak sira iha Dili
Imi ladiuk
Imi ladelek
Imi lafak
Imi bulak no kanten de’it

Kanten halo imi larona
Kanten halo imi laharee
Kanten halo imi haluha-an
Kanten halo imi haluha ema seluk
Kanten halo imi haluha buat hotu-hotu

Bebonuk, 13/03/2020