HAMRIK NO TUBA
Ohin loron demokrasia sai de’it slogan ida
Laiha isin
Laiha unar
Laiha lalatak
Laiha klamar
Sai de’it ai-tan hodi hamos ibun
Demokrasia hanesan kuadru ida laiha pintura
Sai deit jardim ai-maran sira iha rai henek leten
Sai de’it mota maran sira
Sai de’it we matan dekor sira
Sai de’it ai-laran sira maran dekor
Sai de’it tasi laiha masin
Demokrasia mate iha O nia mauhu sira nia liman
Mate iha O nia preman sira nia liman
Mate iha O nia kosedor sira nia liman
Mate iha O nia bibi malae sira nia liman
Mate iha O nia kakutak foer nia laran
Mate iha O nia fuan lotuk no klot laran
Demokrasia hanesan hali hun boot ida
Fo mahan ba buat moris hotu
Ohin loron sai de’it ai-talik maran ida
Sai de’it du’ut maran ida
Laiha tahan no laiha funan
Laiha mahan
Ohin loron demokrasia maran iha O nia liman laran
Rahun iha O tuku tutun sira
Rahun iha O nia matan okos
O buti, buti, buti sai naben
Hodi hametin O nia ego, intesesse no ambisaun
Hodi hametin O nia preman no kosedor sira nia gostu
Maibe, nia fini monu dadaun ona ba rai
Ninia fini nakfera daudaun ona
Ninia tuban sai daudaun ona
O sei labele satan ho saida de’it
Nia sei moris hikas hanesan hali hun boot ida
Hodi halibur hikas ema hotu nebe O kisuk sai
Laiha tan liafuan seluk
Hasoru funumaluk demokrasia nian
Ho de’it lifuan rua
Hamrik no tuba
Hamrik no tuba
Tuba, tuba, tuba to’o manan
Tuba hasoru nakukun no habeik ema
Tuba hasoru injustisa no diskriminasaun
Tuba hasoru manipulasaun no instrumentalizasaun
Tuba hasoru abuzu poder no arbietraridade
Tuba hasoru ditadura no autoritarizmu
Tuba hasoru korrupsaun no nepotizmu
No comments:
Post a Comment