TOLAN MALUK RASIK

TOLAN MALUK RASIK

Politika no ideolojia

Interesse no ambisaun

Halo O haluha ita nudar maun alin funu nian

Halo O sai asu-fuik siak

Kompaineirizmu lakon

Kamaradajen rahun

Fraternidade naksobu

Solidariedade kotu

Politika no ideolojia

Interesse no ambisaun

Halo O hanesan asu fuik loloos

O duni, kaer no les ami

O tebe no kisuk ami husi moris lorloron

O hamos ami nia ain leut husi aiknanoik Timor nian

Tanba de’it politika no ideolojia

Tanba de’it O nia interesse no ambisaun

Ohin loron O tebe, bidu no dahur

O hananu, haklalak, hakfuik no hamanasa

Maibe loron lahotu ohin, nuu fuan sei duir nafatin

Moris lahotu ohin, tubun sira moris truka malu

O nia hamanasa ohin sai O nia laran susar aban

O nia hananu no hakfuik ohin sai lia todan aban

Tanba ne’e keta haluha-an maun-alin

Ita sei la’o dok

Laran metin nudar fini ida mate ikus

Sei iha fatin no biban

Seidauk to’o ninin no rohan

Sei bele hadia-an no moris hikas hanesan du’ut manlai tubun

Bebonuk, 29/03/2020