HANA MAEK FUNAN DOIS NO DODOK

HANA MAEK FUNAN DOIS NO DODOK

Ukun-an nudar kosar wen ema hotu nian

Maibe ema rihun ba rihun haluha husi istoria

Ema ida rua basa hirus matan

Seluk haklalak no naho’uk

Ita ukun-an tanba nia

Ita ukun-an tanba sira

Ha’u, ha’u, ha’u de’it

Nia, nia, nia de’it

Sira, sira, sira de’it

Ami, ami, ami de’it

Laiha ita,

Laiha Povu

Estadu mak ha’u

Estadu mak nia

Estadu mak sira

Estadu mak ami

Hau mak Estadu

Ami mak Estadu

Tansa O nega sira?

Tansa nia hasees sira?

Tansa imi hamos sira husi istoria?

Tansa sira kisuk sira husi moris lorloron?

Tansa O buti sira nia kakorok?

Tansa nia oho sira nebe hanoin lahanesan ho nia?

Poder!

Politika!

Ideolojia!

Interesse!

Ambisaun!

Ganansia!

Se mak dehan atu ukun la-presiza buat ida?

Se mak dehan ba interesse Estadu la-presiza buat ida?

Se mak dehan ba dezenvolvimentu la-presiza buat ida?

Oho maun-alin luta na’in, na’uk Povu no Estadu

Hothotu lori interesse Estadu nia naran

Hotu-hotu lori dezenvolvimentu nia naran

Ha’u nia rain

Monu iha bosokten no lohiten sira nia liman

Monu iha manipula na’in sira nia ko’us

Monu iha obskurantizmu no ignoransia nia laran

Harii iha dois no dodok sira nia leten

Dodok, dois hanesan maek funan

Oras to’o ona

Hamrik funu hasoru manipula na’in sira

Hana hasoru maek funan dois no dodok sira

Lori hikas ita nia rain ba naroman

Lori hikas ita nia rain ba unidade

Lori hikas ita nia rain ba Timor oan tomak

Bebonuk, 30/03/2020