BA HA'U NIA AMAU

BA HA'U NIA AMAU[1

Foto: 1984

AMAU
Liu tiha tinan 20 ona
O laiha tiha ona, foin ha'u hakerek linha sira ne'e
Hodi hanoin hikas O nia lala'ok sira
Fiar katak AMAU agora hakmatek iha mundu seluk

Ha’u se hanoin AMAU

Bainhira ha’u sei ki’ik
Ha'u halai tuir O nia kotuk

Ba ita nia to’os no natar

Ba kesi ita nia kuda no hein ita nia karau

Ba ko’a tua no lasu manufuik iha to'os laran

Ha'u labolu O apa, papa ka pai
Tanba husi kosok kedas
Ha'u bolu O AMAU
Ha'u labolu O ho liafuan sira

Apa, papa no pai, ba ita, ne'e malae nia lian

Ka ema sira iha kontaktu ho malae sira nia lian

AMAU, lian Naueti nian

Lian ema foho oan sira nian
Lian ema sira nebe ladun kontaktu ho malae sira nian

Ha’u boot uituan
INAU[2] no AMAU lori ha’u ba eskola

Lakle'ur INAU mos husik hela ita

Ha’u seidauk halo tinan sanulu

Foto: 1984

Nia husik hela ita iha 1972

AMAU
O hela sai INAU no AMAU hotu dala ida

Ba ami na’in sanulu
Moris ida susar
Maibe O ho pasiensia tomak
Ho forsa boot hasoru moris todan sira
Hodi bali ami

AMAU
O ema ida serbisu na’in, serbisu kalan no loron
Ha'u sei hanoin, bainhira INAU sei moris

Imi rua hamutuk

Fila-rai iha to’os laran, iha fulan naromano nia okos

Hodi kuda fehuk midar, talas, aifarina, uhi, kumbili, kontas, tohu, nsst

Ita nia to’os sai jardim ai-han nebe furak tebes
INAU laiha tiha, O serbisu mesak
Ho tulun bin sira nian
To'os sorin tenki husik hela no nakonun ho du'ut manlai
Tanba O ho bin sira loke tan to'os foun ba sorin

To'os Bubulale ka Kaiualale sai sasin ba O hisik kosar

Bainhira INAU laiha ona

Kalan loron, O hisik kosar mesak iha natar no to’os laran
Dala ruma O kesi kabun
La'os ai-han mak laiha
O mak lakohi husik hela serbisu bainhira seidauk hotu
Ha'u sei hanoin O nia kaneka boot
Nakonun ho kafe metan moruk
Kafe husi ita nia knua no rain nian
Kafe nebe O kuda rasik ho O nia kosar ben
O horuk kafe moruk lapara
Ida ne'e mak fo enerjia ba O
Fo forsa ba hodi serbisu lahatene kole

O horuk kafe moruk
Hamaluk ho tabaku lulun ho batar kulit
Tabaku sira nebe O kuda rasik iha to'os laran
Ka iha uma sorin iha knua Nunumalau laran

Ha'u mos sei hanoin AMAU
Bainhira udan tun
Ita tuur haneruk ahi
Tur hadulas ahi matan

Tunu fehuk, aifarina ka kumbili
Hahan husi ita nia to'os laran rasik

Laiha aihan Xina uman nian ka malae nian

Ha'u mos sei hanoin AMAU
Bainhira loron tun ona
Ita hatama karau iha luhan, kisuk hela oan sira iha liur
Dader hatama karau oan sira susu
Ita ho karau oan sira fahe malu susu been
Moris simples maibe furak AMAU
Ha'u Hakarak fila ba tempu uluk
Hois karau nia susun been
Hodi han ho etu malirin ka han ho fehuk tunu ka da'an

AMAU
Ema ida simples no la ijiji barak

Han no hemu saida mak iha no bele han

O ema ida onestu tebes no haraik-an

Ema ida pasiente no lasiakten

Maibe O ema ida direitu no frontal

Metan-metan, mutin-mutin

Koalia ba loos mai loos
Ba buat nebe loos no sala
O hakarak lia loos
 Loos hanesan pafulu no au-betun sira iha Kulukaha rai lolon

AMAU, O uluk xefe povoasaun de'it
O hakarak buat nebe loos
O lakohi hakruk ba serbisu forsadu japones nian
Sira kaer no kastigu O
Haruka O hakneak no tane fatuk iha liman sorin-sorin
Tanba ida ne'e duni mak Timor tenki kore-an
Husi ema rai seluk nia haneban

AMAU, O lahatene sani no hakerek
O mos la'os ema politiku
Maibe FRETILIN tenki soe tama O iha kadeia laran
Tanba de'it O kaer kartaun APODETI nian
Kartaun ida nebe O rasik lahatene saida mak hakerek iha laran
Kartaun ida nebe O simu no hanehan ho liman de'it
Kartaun ida nebe O simu naran simu de'it
Ha'u nunka rona liafuan APODETI ruma sai husi O nia ibun
O nia partidu loloos mak O nia natar no O nia to'os

AMAU, O la eskola, maibe O matenek
 O artista natural

O sabir viola husi ai-hanek ho talin fiu kail nian
O sabir violinu husi ai-hanek
O halo talibalanda ba arku talin
Fo ba oan nia oan mane boot

Kebit no ko'a iha naroman kami nia okos

O halo kaiohi[3] no nagu[4] husi pafulu no au-kulit
O halo pokotere[5] husi pafulu

O bada’en ba instrumentu muzika balun

O mos badaen besi

Ha’u sei hanoin AMAU
Iha ita nia uma O harii tohe[6] ida

O haruka ha’u ho Akai dada no hatun tohe oan

Hodi produz anin
Hodi halo besi sai sai manas no mean
Prok, prok, prok

O tuku katana, tudik, ai-suak, baliu, diman no tara
La'os atu fa'an, maibe uza rasik
Dala ruma O tuku fo ba familia balun

O mos bada'en fatuk AMAU
Ha'u sei hanoin
O hada fatuk sira iha Nunumalau knua laran
Hada iha rai oan nebe avo Lobo-Dara fo ba ita
Hodi harii ita nia uma
Fatuk sira ne'e sai sasin
Sasin ba O nia liman fatin

Pintor: Saky (oan), 1985

Sasin ba O nia kosar suli

Ha’u fiar AMAU

Se o eskola, o mos bele sai ema pintor no eskultor

Hau haree O halo autaka husi au

Kopu Maubere nian hodi hemu tua
O mos halo urnoko ho nia matan husi husi au
Hodi tau tabaku no batar kulit

O ke’e no hamosu motivu oioin iha ataka no urnoka sira

O halo mos kopu no kanuru husi nuu kakun ho motivu oioin

O artista duni, artista tradisional no natural

O nia ran artista lamate

Suli ona iha o nia oan no bei-oan sira

O artista natural duni AMAU

Bainhira kolen

O tuur iha hadak leten ka ai-mahan

Huu o nia kaiohi no nagu hodi bolu anin
O nia liman fuan bok an iha kaiohi leten
Bok-an hanesan kadiuk la'o
Hodi produz melodia
O nia liman dada nagu nia talin
O halimar ho O nia iis

Pintor: Cesar Nunes (bei oan), 2013

Hodi produz melodia furak
O mos halo pokotere
Korneta Maubere nian
Halo ho pafulu no nuu dikin
O huu korneta hodi fo tadak
O iha nebe ka la'o ba nebe

Loron la'o, fulan no tinan ba beibeik

O nia otas mos tuan ba daudaun
Husi O nia kulit ho oin nebe namkurut

Ho lesun karau dikur nebe O halo rasik

O fai bua ho malus iha hadak ka fatuk leten

Tarutu lesun hatadak O katuas ba daudaun ona

O nia fuk mutin no nehan nakdoku ba daudaun

Maibe O tuba nafatin, serbisu iha loron no udan laran

O nia espiritu nafatin, la-muda, o serbisu maka’as nafatin
Serbisu maka'as hodi moris no haruka O nia oan sira ba eskola

Tempu la’o troka malu, tuir rai dulas hale’u loron

Funu tama, ita tenki muda fatin, laiha ona INAU[7]

Hau sei lembra, ita halai iha ailaran[8]

Muda husi fatin ida ba fatin seluk

O sei serbisu maka’as nafatin

Halo to’os no halo natar iha fatin oioin

Halo uma ho tali metan tahan

Kaiohi/Flaute. Fonte: Ros Dunlop, Lian husi Klamar

O taa no fera au
Hodi halo didin no hadak hodi ita toba

Boetreka, Uaibuileki no Uaibuakolu sai sasin

Ikus liu ita sa’e ba Matebian

Loron kalan simu bombardeamentu husi forsa Indonezia sira

Iha Matebian ita muda husi fatin ida ba fatin seluk

Hodi sees husi inimigu no bombardeamentu

Iha kalan ida, rai nakukun ona

Nagu/Kakeit.  Fonte: Ros Dunlop, Lian husi Klamar

Ita muda husi Kailelete ba Kelibuti

Sei otas nurak, hau harii diman ida iha fatuk ku'ak ida

O hakat hasoru diman
Diman ne’e sona o nia ain-ren halai ba ain-kabun

Ran suli no suli

Hau nia laran susar tebes

Lori liman ha’u tahan kanek atu halo ran labele sai

Ran malirin suli iha hau nia liman fuan ki’ik no nurak nia leet sira

O lahirus no labaku hau tanba sala boot tebes nebe ha'u halo

Ho nonok O tahan moras sira ne’e hotu

Ran foin para
Hafoin bobar O nia ain-kabun ho hena i

Ho ain kanek todan no bubu boot

Ho ai-tongka diman nebe hakanek O nia ain

Ho kude’ik ita la’o nafatin

O nunka dada iis ba buat ida
Simu todan funu nian ho nonok

O nunka koalia politika
Tanba ida ne’e la’os O nia area

Biar o kaer hela kartaun partidu ida nian

Partidu ida nebe o rasik lahatene ninia politika

Partidu ida nebe o nia oan rasik ikus mai kontra

Pokotere/Korneta. Fonte: Ros Dunlop, Lian husi Klamar

Iha fatuk kuak o tuur deit tanba kanek todan ne’e

Lori loron no semana kanek nee hahuu kura

Kura ho aimoruk Maubere nian

Kura husi o nia oan feto boot

O nia oan feto boot kuinese ai-moruk tradisional sira

Ita nia ran, ran kurandeiru tradisional nian
O nia maun boot, Boru-La’i
Matan dook no Kurandeiru tradisional maka'as ida

Tun husi Matebian

O kontinua serbisu maka’as

Hau sei lembra iha biban neba laiha ai-han

Ema atus mate ba hamalaha
Isin barak
Kulit falun ruin krekas maran sira
Matan fuan barak boot hanesan manutolun
Iha lia mate sira

Ema han de'it maek maran

Labele halo to’os no natar

Militar Indonezia sira halibur ema hotu iha vila laran

Sulan ema hanesan sulan karau iha luhan

Tempu ida susar tebtebes, entre moris no mate

O desidi ita ba taa akar

Ita ba iha Welekiluk, besik mota Saketu
Taa akar no fahe ba baluk boboot
Lahatene ita liu kilometru hira

Lakadou

Sanulu ka liu
Ita dada akar
Husi Saketu liu ba Belia, Darabai, Narikisi no Naedala
Hakur liu mota Bebui

Sa'e rai lolon Mametais
Dada hasoru fatuk no rai ku’ak

Kosar suli no suli hanesan udan tun

O nunka hatudu rende iha O nia oin no moris

AMAU
O serbisu atan no laran diak

O hadomi O nia oan sira
O halo buat hotu hodi O nia oan sira kontinua moris
Sira moris duni no tuba iha ema atus mate nia leet
Tuba iha periudu nebe ema iha sorisorin mate ba hamalaha no moras
O nunka hatudu O nia domin ba oan sira ho liafua
O hatudu de'it husi pratika no hahalok
O koalia ho liafuan mamar bainhira husu halo buat ruma

O nunka siak

Ha’u sei hanoin, O nia liman nunka kona hau to’o O husik mundu ne’e

Ha’u mos laiha lifuan ruma hodi hato’o ha’u nia domin ba AMAU

Dadolin ida ne’e nudar ha’u nia DOMIN BOOT ba AMAU

Tempu la’o, fulan no tinan ba daudaun

Lakadou. Fonte: Ros Dunlop, Lian husi Klamar

Ha’u husik hela O iha foho[9]

Mai Dili hodi buka matenek

Iha 1986, ha’u husik hela Dili

Ba Indonezia hodi kontinua estudus

Dala ruma, O mai Dili haree ami

Ha'u sei lembra
Dala ida, ita rua ba hasai foto

AMAU ho ninia jaket azul nakukun ida

Ne’e hanesan uniku retratu nebe hela ba ha’u

Retratu ida ne’e mak sai imajen ikus liu ba ha’u
Hodi hanoin O nia AMAU oin

Hafoin ida nee
Ha’u nunka hetan tan AMAU to’o ohin loron

Iha ona Indonezia

AMAU  rona ha’u involve iha aktividade klandestina

AMAU nia laran lahakmatek, taridu no triste

Ha’u fiar, AMAU hakarak nia oan konsentra iha estudus

Lalika mete tun meta sa’en iha buat sira seluk

Hodi bele halo hotu estudu no fila mai Timor

Hodi tulun AMAU no familia sira

Ha’u fiar

AMAU sente orgulho se nia oan ida bele eskola ba oin

Tohe

Maibe, ba ida ne’e, ha’u larona AMAU, ha’u ulun toos
Ha'u halo AMAU laran susar
Iha ha'u nia fuan no ran rebelde nian
Ha'u dehan ba AMAU

Nasaun no povu presiza ha’u atu luta iha sira nia sorin

AMAU lahirus, AMAU labuka satan netik ha'u

Karik AMAU fiar nia oan
Halo saida mak nia hatene halo

Dala rua hau fila mai Timor[10]

La’os mai ferias de’it, maibe halo ho serbisu klandestina

AMAU rona ha’u iha Dili

Biar osan laiha

AMAU halo buat hotu hodi mai Dili
Ne'e mak AMAU nia domin ba ha'u

Infelizmente, AMAU to’o iha Dili, ha’u fila tiha ona ba Indonezia

Tempu neba laiha telemovel hodi komunika malu
Hodi husu hein malu

Laran susar tebes bainhira hatene AMAU mai Dili

Sorte mak laiha duni ka destinu mak hakotu ona nune’e

Lahetan malu desde 1984 to’o AMAU fila ba mundu seluk iha 1998

Ikus liu, tanba lahetan malu ho ha’u

O hamenu hela de’it ba O nia oan Helena
Hodi hakerek ba ha’u

Ida ne’e hanesan liafuan ikus husi AMAU ba ha’u

“Ha’u iha oan mane barak, na'in haat

Sira hotu agora ba hela dok, balun serbisu, balun ba eskola

Ha’u nia oan ikun agora ba halo politika

Ha’u hatene, aban bainrua, bainhira ha’u mate, nia sei laiha iha hau nia sorin”

Triste rona liafuan nee, lifuan todan no ohin loron sei lian iha ha’u nia tilun

Maibe, ha’u deside tiha ona, ha’u labele fila ba kotuk

Ha’u labele sai oan ba AMAU mesak

Ha’u sai oan ba povu Timor tomak

Hodi luta no defende Povu ida ne'e
Nebe terus iha okupante Indonezia nia botas okos

Halo tinan atus ida O terus ba ami AMAU

O la’o ho ai-tongka no la’o labele ona foin husik hela ami

AMAU, O haree no hatene uluk tiha ona

Bainhira O mate, O nia oan ikun sei laiha iha O nia sorin

Tanba O nia oan involve iha luta klandestina

Nebe ninia destinu sei hotu iha kadeia, mate ka sei la’o dok

Los duni AMAU, O haree dok duni

Ha’u iha hela tasi sorin bainhira rona O iis kotu

Ha'u labele fila mai Timor hodi halot O nia isin

Ha'u nia naran iha lista negra Indonezia nian

Oan barak mos hanesan ha’u AMAU

Sira husik sira nia inan no aman sira

Hodi tama iha luta

Balun ema sulan iha kadeia no balun mate lakon

Liu tiha tinan sanulu resin haat lahetan malu ho AMAU
Ha'u simu de'it tatoli laran susar no aat nian

AMAU husik hela ami rohan laek ona

AMAU nia tinan nebe to'o limite ona

La permite ona ba O atu hein ha’u

Bainhira rona O fila ona ba mundu seluk

Ha’u nia laran susar tebes, maibe hau labele halo buat ida

O hatene AMAU,
Se mak hamutuk ho ha'u bainhira rona O iis kotu?
La'Sama, ha'u nia maun alin koran, maun-alin funu nian
Nia hakoak ha'u no dehan forsa nafatin Saky
Ita hotu sei liu dalan ne'e
Ida ne'e mak fo aten brani ba ha'u
Hodi hodi sai ema forti mesak-mesak iha tasi sorin
Nia agora hamutuk ho AMAU iha neba

Rona tatoli aat ne'e
Ha'u lahanoin tan buat seluk

Ha’u sosa lilin falun ida
Hau ba rate malae nian
Laiha kruz boot
Ha'u hili sikun ida
Ha'u sunu lilin,

Ha’u hamulak no harohan

Atu AMAU bele hetan fatin nebe aas no hakmatek iha mundu seluk

AMAU nebe ha'u HADOMIN TEBES

Ha’u labele selu O nia kolen ho saida de’it

Ha’u fiar

AMAU sente kontente no orgulho tebes

Karik ha’u eskola sai boot

Hodi bele goza mos hanesan ema barak nia oan nebe eskola boot

Ha’u fiar AMAU nia laran triste, tanba ha'u lahatan AMAU nia hakarak

Maibe, karik AMAU sei moris

AMAU bele orgulho no kontente nafatin

Basaa, luta ida nebe O nia oan involve iha laran
Ikus mai hetan duni nia ninin no rohan
Indonezia hasai duni nia botas husi ita rain
Timor oan sira livre ona husi Indonezia nia botas okos
Ita hetan duni ita nia ukun-rasik-aan
No kursu nebe O hakarak ha'u hasai

Ikus mai hau hasai duni maski tarde liu

 Biar ha'u hasai kursu ona

Maibe kursu ne'e laiha folin
Tanba ha’u labele halo O laran ksolok ona AMAU

Tanba iha biban nebe ha’u hakarak halo O laran ksolok

O ba tiha ona mundu seluk no lafila mai ona

Hein iha neba amau

Ita hotu sei liu dalan ida ne’e

Dalan nebe laiha ema ida bele sees ba

Bainhira tempu to’o

Ha’u sei ba hamutuk ho AMAU, INAU, maun no bin sira iha neba

Ita ba halo to’os no halo natar

Ita ba kesi kuda no hein karau

Ita ba ko’a tua no ku’u kafe
Laiha tan ona sikun malu tanba politika
Laiha tan oan hasees malu, satan malu, baku malu no oho malu
Tanba politika ka tanba laran moras

Ita fila ba ita nia moris simples hanesan ema baibain

 AMAU
O laiha ona iha ami nia leet
Maibe O husik hela valores osan mean lubuk ida ba ami
O husik hela valores sira
Serbisu maka'as
Disiplina
Responsabilidade
Lafasil rende
Kriatividade
Honestidade
Hamrik iha ain-rasik
La tane liman
Valores hirak ne'e mak sai O nia ain leut
Nebe ami sei sama no hakat tuir

Ha’u fiar AMAU agora laran ksolok iha kalohan leten

Ka iha ita nia knua

Hamutuk ho INAU no maun ho bin sira

Ikus liu
Ha'u husu de'it buat ida ba AMAUN
Ami sei hela iha mundu ida nebe nakonu ho terus, moras oioin no krimi oioin

Tau matan nafatin mai ami AMAU

Tau matan nafatin mai O nian oan sira, bei-oan sia no lulik oan sira hotu
Hodi livre husi buat aat sira iha mundu ne'e nian

---

[1] Aman

[2] Inan

[3] Flaute

[4] Bobokasa ho au

[5] Korneta

[6]Halo ho au beton rua. Kada au ida ninia naruka liu metro ida. Au rua ne’e hakoi tiha ninia rohan ba rai laran no iha parte okos halo kuak ida ba kada au. Depois koa pafulu rua hatama ba kuak sira no ninia rohan se ba ahi matan. Iha au nia laran, kesi manufulun iha ai rua nia tutun, depois ema ida ka rua dada tun-sa’e hodi produz anin hodi huu ahi hodi halo besi sai manas no mean.

[7] Nebe fila on aba mundu seluk desde 1972

[8] Halai iha ai-laran entre 1975-1978

[9] Iha 1980, hau mai Dili hodi kontinua estudus.

[10] Hau fila mai Timor iha 1987 no 1991