HUSIK HELA TATOLI BA OAN

HUSIK HELA TATOLI BA OAN

La’o ida ne’e sei dok tebes oan

Sei hasoru susar oioin iha dalan

Sei hasoru foho no mota

Sei hasoru loron, anin no udan boot

Sei simu terus no susar oioin

Ida ne’e duni mak moris oan

Laiha buat fasil no kaman iha moris ne’e

Buat hotu hetan husi hisik kosar

Oan, O haree ninin no rohan dok neba

Loron ida ha’u sei la’o to’o iha neba

Bainhira ha’u to’o iha neba O lalika hakfodak

Ha’u sei lafila mai ona

Hau nia otas no ha’u nia iis sei hotu iha neba

Ha’u sei horik ho ita nia bei-alan sira iha neba

Oan, O hateke ba dok neba

Rade fuik sira semo husi debu ida ba debu seluk

Sira la’o no hatama ulun ba we kidun hodi buka moris

O hateke ba rai lolon aas neba

Bibi sira la’o no haksoit liu rai ku’ak naruk sira

Sira hotu lata’uk, sira hotu luta ba moris

Laiha buat fasil iha moris oan

Hametin O nia liman fuan sira

Hametin O nia ain tuban

Kadi no fera O nia kakutak

Hodi luta hasoru susar oioin iha moris

Oan, laiha buat fasil iha mundu ne’e

Mundu ne’e nakonun ho ai-tarak

Nakonun ho balada fuik no si’ak sira

Nakonun ho funu no luta
O tenki matenek la’o iha ai-tarak laran

O tenki isin moris la’o iha balada fuik no si’ak sira leet

O tenki tahan ba susar no moras oioin

Ha’u fiar O sei la-rende, O sei manan

Oan, iha la’o dok sira

O sei hasoru ema iha soin no ksolok sira

O sei hasoru ema kiak no laran susar sira

Labele haluha hasee ema iha soin no ksolok sira

Labele hakat liu ema kiak no laran susar sira

Fo liman ba sira hodi imi hakat hamutuk

Sira mos O nia maun-alin

Oan, ha’u tau fiar tomak ba O

Ha’u la’o to'o ona ninin no rohan

Ha’u labele ba tan ona

O husik hela ha’u ne'e

O tenki la’o mesak ba oin nafatin

O tenki fiar an

Fiar O nia liman fuan

Fiar O nia ain-tuban

Fiar O nia matenek

Hodi hakat liu nafatin susar oioin nebe iha

Moris ne’e hanesan luta ida

O sei manan iha luta ida ne’e

Bebonuk, 15/04/2023