KARAU ATAN
Fanu karau atan hader husi mehi naruk
Loron matan nakfera dadaun ona
Karau sira hamrik hein karau atan
Hotu-hotu hamrik ho ibun nonok
Laiha nata no laiha mama
Karau atan loke tataka[1]
Karau oan sira halai tama iha luhan laran
Susu no tahek inan nia susun
Karau atan ho nia au tama iha luhan
Hasees karau oan no hois susun been
Karau oan no karau atan fahe susun been
Susun ben no sasoru manas
Etu malirin no susun been manas
Fehuk da’an manas no susun been manas
Han no hemu dader karau atan nian
Karau sira sai nadodon
Karau atan haklili kohe iha kotuk laran
Bukae fehuk ba loron aas nian
Karau atan ho hahuk iha liman
Sikat katana no kahi[2]
iha hakfolik
La’o, la’o, la’o to’o iha du’ut buras
Karau ko'a du’ut ho ninia nanal
Hanesan makina ko’a du’ut sira
Ko’a, sobak no denah
Dudu du’ut tomak lulun sira ba kabun laran
Karau aman sira kadi dikur ba duut no tahu
Tutur tahu no tuur du’ut
Prontu ona ba funu
Hasoru karau aman husi knua seluk
Tula dikur ba malu
Tuba metin iha rai
Dulas dikur no tarutu
Rai semo sa’e, du’ut semo sa’e
Karau atan ida-idak hakilar no haksolok
F o aten brani ba nia karaun aman
Toba, nata no mama du’ut sira ho hakmatek
Hodi haree karau aman sira hurlele malu
Manu meten sira titu husik ai-dik leten
Ida-idak semo ho hananu
Semo no tuur iha karau kotuk
Sira halo operasaun sasuit
Sui no dasa karau utun sira
Karau atan sadere iha sukaer hun
Liman fuan sira dahur iha kaiohi leten
Karau atan huu ninia kaiohi
hodi bolu anin
Iha ai-lok leten lakateu hatan ho hananu furak
Hananu hodi haksolok karau atan
Iha hali leten falur sira hananu no hadau malu hali musan
Karau atan dolar neineik ho nia hahuuk
Tula hahuk no huu
Hahuk oan sema hanesan rama oan
Falur semo fulun namtane tun
Hahuuk oan belit iha kalilin
Karaun atan lori karau ba mota
Karau haris no hemo bee mos
Karau nani no luku iha debu laran
Karau atan sunu ahi iha mota ninin
Tunu fehuk, tunu falur no tokir susun ben
Han no hemu ho haksolok
Loron halis ona
Karau sira sai ida-idak husi debu
Fila ba halibur du’ut tomak iha debu ninin sira
Halibur bua ho malus kalan nian
Nata no mama hodi hein loron foun
Rai besik tolan loron matan
Karau atan lulun karau fila ba luhan
Hakat, hananu no hakfuik husi karau kotuk
La’o iha soku, onu no duut manlai laran
Hakat iha ai-talik no ai-sanak sira nia leet
Karau atan simu sikote sira
Sikote husi karau ikun no ai-sanak sira
Oin no isin husik hela husik hela marka no pintura oioin
Pinta husi karau ikun no ai-sanak sira
Pinta ho tahu no karau ten
Karau atan fila ba uma ho isin morin
Morin husi tahu no karaun ten
Karau atan fila ba uma ho isin tahu
Fila ho tahu maran iha ain no isin
Tahu maran nakfera iha isin sira
Hanesan labada’en nia uma sira
Manu kokoroek atu sa’e ai
Rai tolon lakon loron
Karau atan to’o hikas iha luhan
Kisuk hela karau oan iha liur
Hein loron matan foun
Hodi fahe malu hikas susun been foun
Bebonuk, 08/04/2020
No comments:
Post a Comment