LIA LOOS MAI HAMUTUK HO LORO MATAN

LIA LOOS MAI HAMUTUK HO LORO MATAN

Ba Estadu!
Estadu ida nebe?
Ba Povu!
Povu ida nebe?
Ba dezenvolvimentu!
Desenvolvimentu ida nebe?
Ba interesse nasional!
Interesse nasional ida nebe?

Pratika mak hatudu buat los
Retorika hatudu liafuan mamuk
Buat loos ema sei kaer no halo tuir
Liafuan mamuk sei semo hamutuk ho anin

Liman naruk barak subar iha nakukun laran
Matan naklosu ba kadeira sira helik-an iha nakukun
Ular susu bokur no kanten sira subar-an
Hotu-hotu subar iha foho surat tahan nia kotuk
Hodi koalia lori Estadu, Nasaun no Povo nia naran
Maibe anin boot sei huu lakon foho surat tahan
Sira hotu sei tuur molik ho sira nia moe
Lian sira hakilar ba lialoos sei hader
Povu labeik no ladelek tan ona

Estadu la'os O nia partidu
Nasaun la'os O nia interesse rasik
Povo la'os O mesak
Povu labeik no ladelek tan ona

Biar ida, biar rua
Biar hasoru anin no udan boot
Biar hasoru asu si'ak
Tuba no tuba nafatin

O nia loko-an sei naksobu
O nia foti-an sei naben
O nia bosokten sei rahun
Povu labeik no ladelek tan ona

Rona no haree
Lialos sei to’o mai
Lato’o ohin, lato'o aban ka bainrua
Maibe sei to'o mai ...
Mai hamutuk ho loro matan

Bebonuk, 08/04/2020