HALAKON ODIU NO VINGANSA
Rai ida ne’e moras, dodok no iis
tebes
Nakonun ho odio no vingansa husi na’in
ulun sira
Sira hatudu hamanasa falsu ba malun
Sira hatudu kaer liman falsu ba
malu
Sira hatudu tuur hamutuk falsu ba
malu
Sira hatudu domin falsu ba malu no
ba povu
Sira hatudu momoos sira nia
ipokrizia
Buat hotu falsu no falsu
Etika no moral nebe sira koalia
mesak falsu
Odiu ho vingansana hanesan foer nebe iha sira nia fuan
Influensia sira nian hanoin rasional sira
Halo sira lahanoin rasional ona
Hahalok no hanoin aat ba sira hanesan buat baibain ona
Sira tetak no sobu buat di'ak sira hotu
Sobu malu, tetak malu, kisu malu no oho malu
Tan de’it ambisaun rohan laek ba ukun sira
Dame no hakmatek nebe hanesan kabas mutin
Nebe halo laran moos hanesan we turu sira iha talas tahan
leten
Sira doko monu ba rai no sai maran hotu
Sira troka fali ho keris sira nakonun ho foer no ran
Foer no ran husi sira nia odiu no vingansa
Biban ona tenki halakon odiu no vingansa
Kuda hikas ita nia ai-kameli no ai-kanela
Haklili hikas kohe lulik bei-alan sira nian
Tuur hamutuk iha bitu lulik nia leten
Mama hamutuk hikas bua ho malus lulik
Husi retiki ida hatun husi uma kakuluk lulik
Hodi kuda hikas dame no hakmatek
Hodi kuda hikas morin dame no hakmatek
Iha ita nia Uma Lulik
Iha ita nia Uma Lisan
Iha iha nia Knua
Iha ita nia Rain
Biban ona tenki tenki halakon odiu no vingansa
Kolu molik ita nia fuan no laran
Sobu no fase foer sira iha ita nia fuan no laran
Hodi koalia ba malu nudar maun no alin
Ran ida
Hun ida
Abut ida
Uma ida
Rai ida
Husi Uma Lisan no Uma Lulik ida
Husi hun no abut boot ida
Mak Timor-Lorosa’e
No comments:
Post a Comment