MORIS HAMUTUK HO NATUREZA

MORIS HAMUTUK HO NATUREZA

Ha’u nia laran ksolok no hakmatek
Ksolok iha to’os laran
Ksolok hamutuk ho natureza
Ksolok hamutuk ho ai-horis sira
Ksolok hamutuk ho manufuik sira
Ksolok hamutuk we mota sira

Iha ne’e mak sente liberdade loloos
Sente ukun-an loloos
Livre husi buat aat no foer sira hotu
Laiha hadau malu ba buat ida
Lasai intrumentu ba ema seluk
Nomos la instrumentaliza ema ruma

Iha nee ha’u nia hanoin suli
Suli iha ai-mahan no tali fuik laran sira
Oinsa sai ema livre no independente
Lasai atan ba ema ruma
Lasai liurai ba ema ruma
Sai de’it ema ukun-rasik-an

Ha’u nia laran ksolok no hakmatek
Fila ba knua
Fila ba hun no abut
Nudar ema foho oan no to’os na’in
Nebe larona makina sira nia lian
Larona ema hakilar malu tanba ukun
Larona ema laran moras ba malun
Tanba hadau malu moris no ukun

Iha to’os laran
Rona de’it katana no aisuak nia lian
Rona deit anin no manufuik nia lian
Rona de’it we mota suli nia lian
Lian dame no hakmatek nian
Dame no hakmatek iha buat hotu

Bebonuk, 07/06/2020