TATOLI BA BELUN BOOT

TATOLI BA BELUN  BOOT

Belun Boot

O la’o iha kalohan leten

O bidu no dahur iha kalohan leten

Duni mehi aas no boot

Atu sai ida neba, sai ida ne’e mai

Maibe bainhira lahetan mehi ne’e

O tuku tebe no halo rahun kalohan

Kalohan rahun no naksobu

O monu tun mai rai

Belun Boot

O soe sala ba ema hotu

O dun sala ba ema hotu

O tanis no halerik lemo-lemo

Tanba lahetan buat nebe O duni

Belun boot

Molok O soe sala ba ema hotu

Molok O dun sala ba ema hotu

Molok O tuku no tebe tan anin sira

Husu uluk ba O nia fuan

Iha belun ruma uluk fo hanoin ba O ka lae

Iha belun ruma uluk tatoli liafuan husi anin ba O ka lae

Nia hatudu dalan ruma ba O atu tuir ka lae

O se tilun no rona belun ne’e ka lae

Tuur no rona didiak O nia fuan Belun Boot

Nia sei dehan buat loos ba O

Belun Boot

Tuur hanoin halo didiak molok O hakat sala dok liu tan

Molok O dun no soe sala ba ema hotu

Molok O tuku no tebe anin sira tan

O labele mehi iha kalohan leten

Tanba iha kalohan okos mak O nia moris fatin

Iha kalohan okos mak O halo O nia moris

Iha kalohan okos mak O hisik kosar

Iha kalohan okos mak O halo belun ho ema hotu

Belun boot

Karik O labosok O nia fuan

O simu sala sira ne’e tomak tanba O nia sala rasik
O monu iha sura sira ema tau iha dalan
Tanba O lakohi rona no simu tatoli husi anin sira

Tanba O nunka hakarak rona no simu tatoli sira husi O nia belun sira

Belun boot

Husi anin ha’u tatoli ba O

Buat hotu mosu ona

Manu tolun nebe nakfera ona

Labele halo tomak hikas

Lalika koko halo rahun tan manu tolun nebe sei tomak

Husik nia nakfera rasik bainhira nia tempu to’o

Hodi manu oan ne’e sai no semo

Karik O sei hadomin atu manu oan ne’e semo aas no dok

Belun boot

We nebe suli iha mota sei lamaran

Nia turu no turu nafatin

Sei iha biban ba O ba hemu we ne’e

Sei iha biban ba O ba haris iha mota ne’e

Hodi hamos foer sira iha O nia isin no kakutak

Hodi sai hikas ema foun

Ema foun nebe realistiku

Ema foun nebe simu O nia sala rasik

Ema foun nebe lasoe sala ba ema seluk

Ema foun nebe simu nia sala rasik

Ema foun ho hanoin foun

Hodi fo hakat foun hamutuk ho belun sira seluk

Hakat ho sama rai metin

La’os hakat iha kalohan leten

Hakat iha rai leten

Hakat ho foti ulun

Hakat ho fiar-an

Bebonuk, 20/05/2020