KANTEN BA UKUN SIRA
O nia ibun hanesan we matan moruk
Nakloke luan no tuda sai we merak mahar
Hatudu hamalaha no hamrok ba ukun
Hamrok ba naran boot
Hamalaha ba ukun
Husi ibun kanten ba ukun nian
Hu sai ahi su’ar metan no ahi kla’ak manas sira
Sunu no hamutuk saida de’it iha oin
Sunu no hamutuk O nia maun-alin rasik
Sunu no hamutuk O nia-an rasik
O kanten ba ukun duni
Maibe O haluha buat ida
Ukun la’os O nia bei-ala sira nian
Nein O nia inan no aman nian
Ukun Povu nian
Povu nia oan hotu-hotu
Iha direitu ba ukun
O kanten duni ba ukun
Iha O nia ulun iha de’it buat ida
Ukun, ukun no ukun
Tan ne’e O uza dalan hotu-hotu
Hodi hadau ukun
Hodi hakoak metin ukun
O la interesse atu povu ida nee moris hakmatek
O interesse de’it ba kadeira
O hamlaha no hamrik duni ba ukun
O halo O nia karizma ba maninga
Fekit ema kiak no ki’ik sira
Fekit kakutak mamuk sira
Hodi halo tuir sa mak O hakarak
Sira sai O nia soldadu prontu
Hodi sobu ita nia rain
Hodi oho ita nia povu
O dudu sira ba mate hodi defende O nia kanten
O lori O nia maninga
Hodi soran povu
Hodi fahe povu
Hodi halu povu oho malu
O mosu mai hanesan ema lulik ida
Ho tanis no matan wen falsu
Fekit ema hotu ho ninia maninga
Fila ema hotu nia laran
Hatudu katak O mak bele hakoak ema hotu
O mak hadomin liu ema hotu
O mak hadomin liu povu
O mak hadomin liu rai ida ne’e
O mak tulun ema hotu
Hadau ho dalan sai ida de’it
Naran katak ukun labele monu ba ema seluk
Ukun sai buat ida ba hadau malu nian
Kanten ba ukun sira
Kari lia bosok oioin
Kari iha nebe-nebe
Kari iha fuan sira mamuk no mutin
Kuda odiu no vingansa
Kari lia bosok oioin
Hodi manan simpatia no apoiu
Kakutak mamuk sira simu liabosok sira
Nudar buat loos
No mobilizadu ba sunu mutuk buat loost hotu
Hodi fo apoiu ba kanten hodi hakoak metin ukun
Kanten sira lanu ba ukun
Ukun kleur no kleur tan sai ema bulak
Kakutak sai laloos
Kakutak hanoin sobu no sunu de’it
Sunu no sobu hodi ukun
Kanten ba ukun sira
Hanoin ukun husi nia aman
Sira hakoak metin no lakohi husik monu ba ema seluk
Maibe sira haluha ukun husi povu
Ukun ne’e buat provizoria ida
Tan nee
Povu nia oan sira hotu iha direitu ba ukun
Bebonuk, 19/05/2020
No comments:
Post a Comment