COMPANHEIRO DA LUTA

 COMPANHEIRO DA LUTA

Companheiro da Luta

Maun-alin koran

Ha’u lakuinese O antes

Funu mak lori ita hamutuk

Funu mak halo ita sai maun-alin

Funu mak hahoris ita

Hahoris ita sai maun alin funu nian

Ita nia maun-alin metin tebtebes

Metin hanesan maun-alin ran nian

Metin hanesan maun-alin kabun laran ida nian

Ita mai duni husi kabun laran ida

Kabun laran Timor-Lorosa’e nian

Tinan barak ita funu hamutuk

Terus hamutuk

Halo sakrifisiu hamutuk

Tanis hamutuk

Fakar matan ben hamutuk

Hisik kosar hamutuk ba luta

Tanba hakarak liberta ita nia inan
Liberta ita nia aman

Liberta ita nia an

Liberta ita nia rain

Liberta ita nia povu

Husi ema aat sira nia liman kukun laran

Ohin loron O laiha ona

O ba ona mundu seluk

Ema barak fiar

O hakmatek ona iha mundu seluk

Ha’u lahatene

O hakmatek duni ka lae

Maibe ha’u fiar

O lahakmatek iha neba

Tanba O nia inan

O nia aman

 O nia maun-alin sira
Povu ida nebe O defende

 Sei terus nafatin

Maun-alin funu nian

O halo buat hothotu ba O nia rain no O nia povu

O lamate iha kilat tutun funumaluk nian

O lamate iha tudik tutun funumaluk nian

O lamate iha tali funumaluk nian

O lamate iha botas okos funumaluk nian

O mate tanba surat ida

Husi O nia maun ida

Surat ida nebe riska ho letra mean
Letra mortal ida

Hanesan samodok ikun mean ida
Nebe tafui veneno mortal ida

Ida ne’e mak halo O mate

Ha’u hanoin

Hanoin no hanoin nafatin
Fuan ne'e lasimu O nia mate
Tanba O mate tanba de'it surat ida
Surat ida nebe kro'at liu surik ida
Nebe tesi no fokit O nia fuan
O nia iis tenki kotu tan de'it liafuan tolu
Laiha kapasidade teoriku, tekniku no profissional

Labuat ida maun-alin
Se O laiha kapasidade teoriku la'os tanba O nia sala
Tanba O kumpre lema "Antes sem título, do que sem Pátria"
O tenki moris iha prizaun laran tanba defende ita nia rain no ita nia povu
Povu Maubere hatene ida ne'e
Sira mos hatene O nia kapasidade
Sira hatene O nia dedikasaun, determinasaun no abnegasaun ba rai ida ne'e
Sira hatene O nia matenek
Tanba ema beik ida labele luta hodi defende ninia povu ninia direitu
O mate tanba de'it politika no poder

Politika duru duni

Poder kro’at duni
Bainhira laiha ona etika no moral

Nia tolan rasik ninia maluk

Maun-alin funu nian

Ha’u lahaluha liafuan ikus sira
Ho determinasaun O hateten
O lata'uk hasoru baki no laloran boot iha oin
O prontu atu hasoru oin ho oin
Ohin O laiha ona
Ami kontinua O nia determinasaun
Hodi hakotu politika foer sira
Politika falsu sira, ipokrizia no laiha onestidade sira

Falsidade, ipokrizia no laiha onestidade ne'e

Halo ha’u mos hanesan O
Lakon simpatia, respeitu no konfiansa tomak ba lulik ida ne'e
Lulik ida nebe uluk
Ita hotu tane hanesan we kopu ida nebe labele fakar

Laiha odiu no vingansa ba ema ruma
Iha de'it lakon simpatia, respeitu no konfiansa
Buat ida nebe susar atu harii hikas

Maun-alin
Ha'u fiar O nia klamar sei moris

Sei la’o ba mai iha ami leet

Maibe hanesan lalatak de’it

Lalatak nebe nonok no lakoalia
Hanesan forsa nonok ida
Maibe bele muda buat aat ba diak

Ha’u fiar O iha forsa

Ha’u husu de’it buat ida ba O maun-alin

Tau matan ba O nia liman folin sira

Tau Matan ba rai no povu nebe O defende

Tane no lori sira ba moris hakmatek no diak

Bebonuk, 28/04/2020