LAKOHI RONA
Hanesan maun-alin
Ha’u lakohi O liu dalan ida ne’e
Ha’u hakarak hatudu dalan seluk hodi O liu
Tanba ha’u liu uluk ona iha dalan ida ne’e
Ha’u hatene iha neba iha rai-kuak
Maibe O lakohi rona ha’u
O hanoin ha’u terinetik O nia dalan
O hili O nia dalan rasik
Ambisaun no kanten taka O nia matan
O la’o to’o dalan klaran ona
Ba oin ladiak, mai kotuk ladiak
Foin mak O hanoin saida mak ha’u dehan ba O
Liu hotu ona maun-alin
Ha’u rasik hili ha’u nia dalan ona
Dalan nebe O lakohi tuir
Ha’u hakarak fila ba kotuk lori O
Maibe la’o dok no dok tebes ona
Ain ne’e todan tebes atu hakiduk
Hakat ne’e todan tebes atu fila ba kotuk
Agora O hateke tun sa’en
Laharee ema ruma besik iha neba
O hakilar, O tolok no O hotar
Buat hotu agora ladiak ba O
Maibe uluk O lakohi rona
Ha’u hatene dalan nebe O liu ema tau hela sura
Ha’u hakarak atu fo hatene O
Maibe O haree ha’u ho matan ikun
Hanesan mai loke de’it ha’u nia kulit
Agora O sidi
O tanis, O tolok no hotar
Atu fo sala ba se maun-alin
Agora O fila ba sori-sorin
Laharee ona ema ruma
Sira ba hotu ona
Sira liu ona sira nia dalan rasik
Dalan seidauk taka ba O
Naran katak O labele taka an
Labele taka O nia matan no tilun
Hodi haree dalan nebe ami liu
Ain leut sira sei husik hela iha neba
Tuir de’it mai
O sei toman ami
Ita sei bele hakat hamutuk ba oin
Bebonuk, 28/04/2020
No comments:
Post a Comment