INTELEKTUAL LA’OS MANDUKU
Ha’u hanoin ema intelektual sira libertadu tiha ona
Libertadu hamutuk ho liberta ita nia rain
Maibe ha’u sala
Afinal sira seidauk libertadu
Barak sei kontinua hili dalan sai atan
Hili dalan hakruk hanesan ruin kotuk laek
Hili dalan seguidista ka subserviente
Barak sei hanesan manduku
Subar iha kakun okon
La sai ba luta
Sira labrani loke ibun
Sira labrani dehan lae
Tanba ta’uk
Ta’uk lakon pozisaun
Lakon projetu
Lakon serbisu
Matenek ida ta’uk uza nia matenek ba buat di’ak
Nia trai ninia matenek rasik
Nia la valoriza ninia matenek
Nia la uza ninia matenek hodi liberta-an
Matenek ida hanesan la serve ba sosiedade
Serve de’it ba nia an mesak
Triste!
Matenek katak tenki iha hanoin kritiku
Matenek tenki hatene haketak buat loos no sala
Matenek tenki haketak buat diak no aat
Buat aat no sala tenki sai alvu kombate nian
Kombate hodi hadia
Intelektual
Tenki semo aas no dok
Tenki hateke bad ok hanesan makikit
La’os sai fatuk kalsu ba poder korruptu sira
Maibe tenki sai lili nebe lakan iha nakukun laran
Tenki sai matadalan
Hodi lori ema hotu ba naroman
Matenek hodi serbi ema barak
La’os atu halibur riku soin ba an rasik
La’os tuur iha foho tutun haree de’it
Tenki tun mai foho hun hodi sente rasik
Hodi kaer rasik
Hodi muda situasaun
Husi aat ba di’ak
Bebonuk, 28/04/2020
No comments:
Post a Comment