FIRMI DEFENDE BUAT LOS

FIRMI DEFENDE BUAT LOS

Dala ruma ha’u hanoin

Atu hetan saida husi kritika hotu nebe ha’u halo?

Ha’u halo kritika ba hahalok no hanoin sira

Nebe hau konsidera laloos

Kritika ba los mai los

Hanesan rama oan semu ba nia alvu

Kleur ba kleur, ha’u nia inimigu aumenta

Maluk uituan tebes mak kumprende ha’u no ha’u nia kritika

Ha’u nia maluk sira nebe uluk luta hamutuk ba ukun rasik-an

Balun haree ha’u la gosta

Balun hirus

Balun haree ha’u hanesan sira nia inimigu

Balun haruka ha’u nonok

Tanba ha’u bok sira nia interesse balun

Todan tebes atu nonok ba injustisa no diskriminasaun sira

Todan tebes haree hahalok korruptu sira iha ita nia mata laran

Todan tebes haree politika no hahalok arbitraria sira nebe iha

Ha’u arriska tiha ha’u nia moris hodi luta ba ukun rasik-an

La’os agora mak haruka hau trai fali ha’u nia luta no konsiensia

Ha’u sakrifika tiha ona ha’u nia familia nebe hanesan buat hotu-hotu ba ha’u

Ha’u husik hela tiha ha’u nia familia

Hodi fila mai ha’u nia rain hodi kontinua luta ida

Ha’u fila mai atu defende ema sira nebe lahetan justisa

Hau fila mai atu dehan lae ba ema sira nebe kontinua hamoris hahalok kolonialista nian

Hau fila mai dehan lae ba ema sira nebe ukun arbitrariamente

Tan ne’e ema ida labele hapara ha’u nia hakat sira

Ha’u fiar ohin ha’u sente mesak ba luta ida ne’e

Ha’u fiar iha risku ba ha’u nia moris tanba luta ida ne’e

Tanba luta ida ne’e bok ema barak nia interesse

Bok ema poderozu sira nia interesse

Bok ema barak nia hakmatek iha sira nia kanten laran

Maluk sira nebe ha’u fiar atu adere ba luta ida ne’e

Ohin loron sira labrani hanesan uluk luta ba ukun-an

Tanba sira hakarak moris hakmatek

Sira lakohi iha inimigu ba sira nia an

Biar nune’e, ha’u fiar

Iha sira nia laran sira iha hanoin hanesan ho ha’u

So ke sira labrani de’it atu loke ibun

Tanba tauk atu lakon buat hirak nebe sira hetan ona

Laiha luta ida sein riskus

Laiha luta ida sein sakrifisiu

Luta hotu-hotu iha nia kustus

Se laiha ema ida dehan lae ba buat aat sira

Mak buat aat sira sei manan abut

Tanba ne’e tenki kontra

Tenki dehan lae ho firmi

Biar husi ema ida de’it

Bebonuk, 27/4/2020