HAKSOLOK SIMU LORON FOUN
Iha tasi ibun furak
Warik ain tanan sira halai haksolok
Halai, haksoit ho haksolok
Hodi simu loron foun nebe sa’e dadaun
Loron foun tuda roman ba fatin hotu
Sukun tama ai-laran tuan sira
Halo maho wen turu ida-idak
Halo ai-tahan taruru
Fanu ular ai-laran sira
Loron foun mai ona
Iha ai leten sira
Manufuik sira ida-idak hamos nia fulun
Ida-idak hananu no loke nia liras
Ida-idak afina nia lian no hamanas nia liras
Hodi simu loron foun
Loron foun nabilang
Nabilang ba buat moris hotu
Hotu-hotu bok-an
La’o tuir roman loron nian
Roman laran metin nian
Roman loron foun nian
Hotu-hotu bok-an
Hotu-hotu hamanas liman-ain
Hotu-hotu hamanas liras
La’o, hakat no semo
Iha lidun neba loro matan hein imi
Nia sei fahe roman ba imi hotu
Hotu-hotu haksolok
Hananu, dahur simu loron foun
Loron foun nebe foun duni
Foun ba hanoin foun
Foun ba forsa foun
Foun ba moris foun
Bebonuk, 30/04/2020
No comments:
Post a Comment