HAKSOLOK SIMU UDAN FOUN
Anin hu no hu
Halo ai-tahan sira hananu
Halo manu sira semu buka fatin helik-an
Hu no hu nafatin
Dudu kalohan metan mai daudauk
Taka foho, rai no tasi
Rai tarutu fekit sai ahi kla’ak
Fera kalohan metan
We turu tun
Udan boot mai daudaun
Foin sa’e sira
Mane klosan no feto ran sira
Sai husi uma laran
Halai tuir luron
Hakilar, haklalak ho haksolok
Hodi simu udan foun
Udan wen turu no turu
Fo haris ba isin manas sira
Halo rai suar no malirin
Hamos rai rahun no fase foer sira
Halo rai sai mamar
Tubun sira fera rai
Kulat sira moris nadodon
Halo rai matak no furak
Hotu-hotu haksolok simu udan
Udan wen haksolok nian
To’os na’in
Natar na’in
Hotu-hotu haksolok
Haksolok fila rai hodi kuda
Foho no rai tetuk
Ai no du’ut
Hotu-hotu haksolok
Finin foun sira moris ho haksolok
Udan foun lori matak malirin
Fase isin foer sira
Fase hanoin foer sira
Fo hikas iis foun
Hahoris hikas ai-horis foun
Hahoris hikas ai-laran foun
Hahoris hikas ema foun
Foun iha hanoin no hahalok
Foun iha moris no lisan
Bebonuk, 30/04/2020
No comments:
Post a Comment