EMA FOUN, TIMOR FOUN

EMA FOUN, TIMOR FOUN

 Tinan barak Timor monu iha funu
Funu impoin husi ema li'ur
Funu entre Timor oan sira

Tinan barak Timor oan sira terus no mate

Ema sala laek barak terus no mate

Balun mate tanba fiar politik nebe sira tuir

Timor oan sira hotu terus no mate iha funu

Iha funu laran hamosu ona konflitu no violensia

Hamosu ona rasizmu no diskriminasaun

Hamosu ona injustisa no violasaun ba direitus umanus

Hamosu ona terus, susar, kanek, matan-wen no mate

Timor oan sira terus no mate

Iha revolta sira iha periudu kolonial portugues nian

Iha periudu okupasaun Japonez nian

Iha guerra civil iha 1975

Iha periudu okupasaun Indoneziu nian

Iha ukun-rasik-an nia laran

Timor oan sira terus no mate

Iha krizi politika no militar 2006
Fahe malu ba lorosa'e no loromonu

Ohin loron odiu ho vingansa sei buras

Kehe husi ukun-nain balun tanba de’it poder

Timor oan sira fahe malu no oho malu

Tanba impoin husi situasaun ida

Impoin husi ema rai li’ur

Impoin husi ita nia beik no kanten rasik

Iha konflitu ida hamosu grupus oioin

Hamosu pro no kontra

Hamosu violensia no mate

Iha kualker funu

Mosu grupu armadu oioin

Mosu organizasaun politika no massa oioin

Ida-idak defende nia dalan

Ida-idak defende nia fiar

Provoka malu, fahe malu no oho malu

Hamosu odiu no vingansa

Tempu ona ba ita Timor oan tomak

Kolu prekonseitus no estigma oioin husi ita nia fuan no ulun

Hodi ida-idak

Hateke ho klean no onestu ba ida-idak nia fuan

Hodi ida-idak assume ho integridade

Sala sira nebe uluk ida-idak halo ka halo kolektivamente

Ida-idak tenki assume nia sala hodi ida-idak hatun nia ego

No hasa’e konsiensia kolektiva ida ba futuru

Katak uluk ita hotu sala

No tempu ona ita hotu hadia hamutuk

Tempu ona ita hotu hamutuk suku hikas kanek sira

Tempu ona ita hotu hamutuk kura kanek sira

Hodi ita hamutuk hakat ba oin

Tempu ona ba ita hotu

Ita sa’e hamutuk ba foho Ramelau, Matebian, Kablaki no Mundo Perdido leten

Hodi hateke ba Timor laran tomak
Hateke ba ita nia sala, ita nia kanek, ita nia terus no mate sira
Hodi promete, sei lahalo tan sala sira hanesan

Iha foho hirak ne'e nia tutun
Ita hateke ba dook, hateke ba Timor laran tomak
Hateke ho mentalidade foun

Hateke ho sentimentu foun

Hateke ho hanoin no hahalok foun

Hateke ho asaun foun
Asaun nebe atu halo ita sai Ema Foun
Asaun nebe lori ita ba Timor foun
Timor nebe ida de'it
Timor nebe ita hotu nian

Ita tenki hateke ba dook

Hateke ba ita nia futuru

Futuru ida hako’ak malu

Futuru ida tula dikur ba malu

Futuru ida tula kabas ba malu

Futuru ida dame malu

Futuru ida laiha tan odiu ho vingansa

Futuru ida nakonun ho justisa no moris diak

Futuru ida moris hakmatek

Futuru ida hisik kosar hamutuk

Futuru ida serbisu hamutuk

Futuru ida hamutuk tane ita nia rain

Futuru ida hamutuk tane ita nia povu

Tempu ona ita hakat hamutuk

Tempu ona ita hakur hamutuk

Hakur mota passadu nian

Husik hela fahe malu,

Husik hela odiu no vingansa

Husik hela oho malu

Husik buat aat hirak ne’e hotu ba kotuk
Husik bero lulik lori buat aat hirak ne'e hotu ba tasi

Ita hotu tenki sai Ema Foun iha Ukun-Rasik-An nia laran

Ema foun nebe moos husi buat sira passadu nian

Laiha tan pro-otonomi, laiha tan pro-ukun-an

Laiha tan nasionalistas, laiha tan traidores no reasionarius

Laiha tan mauhu, laiha tan buihu

Laiha laiha tan xina, arabi, indianu ka afrikanu

Laiha tan rai na’in, laiha tan mestisu

Laiha tan firaku, laiha tan kaladi

Laiha tan lorosa’e, laiha tan loromonu

Ita mesak ida de’it, mesak Timor oan

Tempu ona harii Timor foun ida
Timor nebe hanesan jardin botaniku ida

Jardin ida nebe furak, hakmatek no morin

Jardin ida nebe nakonun ho ai no aifunan oioin

Jardim ida nebe manu oioin semo ba mai iha laran

Hananu ho dame no hakmatek

Jardin ida nebe we suli no tarutu tuir ida-idak nia ritimu

Jardim ida nebe ema dere orkestra ho instrumentu oioin iha laran

Instrumentu sira nebe hakompleta malu no produz ritimu no melodia sira nebe furak

Ita hakarak Timor sai jardin ida nebe iha buat oioin iha laran

Hanesan rai Timor nebe kompostu husi grupu etno-linguitiku oioin

Maibe ida-idak moris, nani, suli no lian

Tuir ida-idak nia fiar no lisan
Tuir ida-idak ritimu maibe ita ida de'it
Ita hakompleta malu
Ida ne'e mak ita nia demokrasia
Ida ne'e mak ita nia riku-soin
Ida ne'e mak ita nia valor nudar ema Timor

Tempu ona ita sai jardin botaniku ida

Jardin foun ida nebe harii husi Ema Foun

Ema Foun ho mentalidae foun

Ema Foun nebe kritiku no lahakruk de’it

Ema Foun ho hanoin no hahalok foun

Ema Foun nebe harii Timor Foun

Timor Foun nebe hun ida, abut ida, povu ida

Timor Foun nebe Timor ba Timor oan tomak

Bebonuk, 08/05/2020