LEI MATAN LAEK

LEI MATAN LAEK

Iha nebe-nebe

Lei todan no meik ba kraik

Kaman no tetuk ba leten

Boot no poderozu sira bolu ema ho naran aat oioin

Halo abuzu poder no violasaun oioin

Lei sai hanesan ai Maria iha sira nia oin

Taka matan no tilun ba sira

Husik sira halo no ko'alia livre

Na'uk no halai

Lei hanesan kona strok

Ain kesi metin no labuka tuir sira

Biar sira na'uk, koalia no hatun entidades no orgaun sira Estadu nian

Ba ema ki'ik sira

Lei hanesan fohorai no lafaek

Prontu bobar no tolan iha sa oras no sa loron de'it

Ida ne'e mak naran demokrasia?

Ida ne'e mak naran igualdade?

Ida ne'e mak naran imparsialidade?

Ida ne'e mak naran justisa?

Lae!

Lei matan laek

Nia lafihir ema

Se mak ema boot no se mak ema ki'ik

Se mak ema riku no se mak ema laek

Se mak tau sapatu no se mak ain-tanan

Iha lei nia oin ema hotu hanesan

Polisia no ajentes judisiariu sira

Tenki aas hanesan foho Ramelau

Tenki metin no toos hanesan foho Matebian

Labele ta'uk no hamrik metin

Tenki sai surik matan rua

Kro'at ba leten no ba kra'ik

Hodi ko'a hahalok aat hotu nebe latuir lei

Bebonuk, 16/05/2020