UKUN TUIR POVU NIA HAKARAK

UKUN TUIR POVU NIA HAKARAK

Poder sai sasan hadau malu nian
Balun uza dalan hotu-hotu hodi hetan poder
Hahuu husi hako'ak no re'i ferik-katuas sira
Ko'us no hamaus kosok no warik oan sira
Halo-an ba vitima no tanis 
Esplora ema nia emosaun
Hodi nia bele hadau ka hakoak metin ukun

Politiku no lider nebe di'ak
Lahalo manipulasaun oioin

Lakari lia bosok no veneno iha povu fuan

Lakuda odiu no vingansa iha povu nia leet
Lakehe, sunu no hamanas povu nia fuan
Lafahe no soran povu
La-provoka no inisita violensia
Buka manan povu nia laran ho serbisu no dedikasaun
Rekuinese ema seluk nia vitoria no lakoko hadau ukun

Politiku no lider nebe aat
Halo manipulasaun oioin

Kari lia bosok no veneno iha povu fuan

Kuda odiu no vingansa iha povu nia leet
Kehe, sunu no hamanas povu nia fuan
Fahe no soran povu
Provoka no inisita violensia
Depois mosu mai hanesan ema lulik
Mosu mai hanesan ema liman no fuan moos
Mosu mai hanesan salvador 
Hodi hadau no hakoak metin ukun

Ema lanu ba poder sira

Ukun kleur no kleur tan sai bulak ba beibeik
Ema lanu no bulak ba ukun
Lakon kakutak

Lakon hanoin
Lakon sensibilidade

Sai bulak no estraga buat hotu

Tan ne'e lalika alimenta ema lanuten no bulak ba ukun sira nia ego
Alimenta sira nia ego halo sira sente an semo iha kalohan leten
Halo sira sente an aas boot no aas liu hotu
Haree ema hotu sai lafolin no labele ukun

Ukun la’os O nia bei-alan sira nian

Ukun la’os O nia aman nian

Ukun povu nian

Iha eleisaun povu hatene hili

Povu nunka bosok no lohi ema

Povu hili ema nebe loos

Fiar no hili nia oan ida hodi ukun

Husik nia ukun tanba hetan fiar husi povu

Husik nia ukun tuir povu nia hakarak

La presiza haterinetik no hadau ukun husi nia

Ema lanuten ba poder sira

Sei uza dalan hotu-hotu hodi hadau ukun

Biar lahetan fiar ona iha eleisaun

Biar lahetan fiar ona husi povu

Sira uza dalan hotu-hotu hodi hadau ukun
Tempu ona dehan lae ba lanuten no bulak ba ukun sira

Ukun povu nian

Ukun la’os O nian
O labele hakoak metin

O labele hadau ukun husi povu

O keta bobar povu ho buat bosok sira
O keta lohi povu ho buat falsu sira
O keta soran povu ho buat aat sira
O keta manipula povu ba O nia interesse sira

O bobar dala ida nia sei husik
O bosok dala ida nia sei fiar
O lohi dala ida nia sei simu
O soran dala ida nia sei monu
Maibe O halo beibeik nia sei hamrik
Povu hamrik O sai batar uut

O nia kanten sei hasusar O nia isin

O nia kanten sei halo O sai ema bulak

Bulak tan de’it poder

Bulak ba buat nebe la’os O nian

O bulak no mate tan de’it poder

O sobu ita nia rain tan deit poder

O soran no oho ita nia povu tan de’it poder

Poder halo O sai bulak

Poder halo O sai diuk

Poder halo O sai delek

Poder halo O lakon ulun no fuan

Kanten ba ukun halo O moris iha mehi laran
Kanten ba ukun halo O la'o iha kalohan leten
Kanten ba ukun halo O ain lasama rai

O sei monu no uut tanba O hamrok no hamalaha tebes ba poder
O sei tara-an tanba O nia kanten ba ukun
O nia fuan sei nakfera tanba O nia kanten ba ukun
O nia kakutak sei rahun tanba odiu no vingansa nebe O kuda
O sei mate iha O nia bobar, bosok, lohi no manipulasaun sira nian leten

Hader ba ...

Konsiente ba ...

Loke fuan, kakutak no matan ba ...
Povu labeik no labeik ona

Ukun ne’e povu nian

Se mak hetan fiar husi povu

Husik nia ukun ba

Ukun tuir povu nia hakarak

Bebonuk, 15/05/2020