TIMOR IDA DE'IT BA TIMOR OAN TOMAK

TIMOR IDA DE'IT BA TIMOR OAN TOMAK

Ema balun dehan haluha tiha passadu

Maibe passadu labele haluha

Ita labele haluha hun husi fitar ida

Importante labele sukit fitar sira ne’e

Hodi labele hamosu tan kanek nebe hanesan iha futuru

Haree ba passadu

Hodi kuinese prezente

So kuinese prezente hodi bele hateke ba oin

Istoria traisaun nian naruk no moruk tebes

Traisaun mosu iha rai no fatin oioin

Traisaun halo husi ema husi klase oioin

Husi ema riku, matenek to’o ema ki’ik no kiak sira

Iha funu ba libertasaun nian

Hahoris erois no traidores

Hahoris nasionalistas no reasionarius

Traidores no reasionarius faan ona sira nia konsiensia

Hodi troka ho sasan balun

Sira lakon tiha ona sira nia personalidade

Timor oan balun hateten

Sira nebe serbisu hamutuk ho Indonezia laiha ona fatin iha Timor ukun-an

Loos, laiha ona fatin ba sira nia fiar ka konviksaun

Maibe nudar Timor oan sira iha nafatin fatin

Fatin ida ne’e funu na’in sira mak fo ba sira

Tanba funu na’in sira nia luta atu liberta mos sira

Liberta sira husi nakukun laran

Lori sira ba naroman no dalan loos

Dalan los mak ema hotu tenki livre

Laiha tan esplorasaun husi ema ba ema

Laiha tan kisuk malu no oho malu

Laiha tan diskriminasaun husi ema ba ema

Luta na’in ida luta atu hako’ak Timor oan tomak

Luta na’in ida luta atu labele diskrimina tan Timor oan sira

Luta na’in ida labele sai rasista

Luta na’in ida tenki hatene respeita direitus umanos

Luta na’in ida tenki hanorin valor toleransia no jenerosidade

Fahe Timor oan

Diskrimina Timor oan

Rasista

La respeita direitus umanus

Latane toleransia no jenerozidade

Ne’e hahalok kolonialista nian

Kombatente ba libertasaun nian

Revolusionariu ida

Nia knaar mak sobu hahalok aat kolonialista nian

La’os sai fali kolonialista foun iha nia rain rasik

Ita hotu hatene

Ema neon kiik no klot sira mak halo vingansa

Funu na’in no ema revolusionariu sira neon laklot

Funu na’in no revolusionariu sira neon boot

Tan ne’e funu na’in no revolusionariu ida la’os ema odidor no vingador

La’os liman ain kolonialista nian

La’os nakfilak-an ba kolonialista foun

Maibe ema ida funu ba unidade

Funu hodi hako’ak Timor oan tomak

Nudar Timor oan

Ita hotu tenki identifika ita nia an ho Povu

Tenki iha identidade rasik nudar Nasaun no Povu

Luta libertasaun nian iha erois, iha traidores

Istoria barak iha mundu

Hatudu barak mak kontra mudansa

Inkluindu mudansa ba mentalidade

Barak kontinua hamanas ahi odiu no vingansa nian

Buat ida kontra tebes prinsipiu no idealizmu luta nian

Nebe hakarak Timor ida moris hakmatek

Timor ida laiha diskriminasaun no laiha rasizmu

Timor ida laiha perseguisaun politika

Laiha odiu no vingansa

Ohin loron odiu ho vingansa sei moris barak iha maluk barak nia fuan

Tanba sira lahatene ho loloos prinsipiu luta ba ukun-rasik-an nian

Mak buka hakoak Timor oan tomak

Kombate hahalok aat kolonialistas sira nian

Los duni, dala barak ita lakon funu tanba traisaun

Dala barak ita mate tanba traisaun

Maibe ne’e fenomenu natural no istoriku ida

Funu ba libertasaun hahoris erois no traidores

Ba maluk sira nebe uluk halo traisaun

Ba maluk sira nebe uluk hanesan mauhu no kolaborador okupante nian

Ida-idak tenki hateke ba nia an rasik

Koalia ho imi nia fuan rasik

Simu ho integridade tomak ba imi nia passadu

Katak imi halo sala

Imi fa’an imi nia maun alin no fa’an imi nia povu no imi nia rain

Hodi troka ho sasan folin laek ruma

Ita nia passadu, ita labele nega

Maibe ita tenki haree oin seluk

Ita tenki haree husi lidun no sikun seluk

Hodi bele garante katak ita nia prezente no futuru

Lasei repete hikas hanesan istoria triste sira passadu nian

Ne’e la’os katak atu haluha no labele haluha duni

La’os atu nega no labele nega duni krimi sira uluk imi halo

Imi nia prinsipiu no opsaun la’os krimi

Imi mos defende buat loos tuir imi nia fiar

Maibe

Imi nia sala no krimi mak lori violensia hodi defende imi nia prinsipiu no fiar

Ita hotu-hotu ho aten brani simu ho laran mos

Simu ho laran tomak no labosok imi nia fuan rasik

Atu ita hotu hamutuk hodi harii hikas ita nia Nasaun no ita nia Rain

Ita hotu hamutuk hodi defende ita nia Rain no hakat liu buat sira passadu nian

Hodi hotu-hotu moris hikas hanesan Ema Foun ida

Ema Foun nebe livre no ukun-rasik-an

Ema Foun nebe la-atan tan ona ba ema ruma

Ita hasoru malu iha ukun-rasik-an nia laran

Hanesan Timor oan ida, Timor oan nebe fiar katak

Timor ida de’it, hun ida, abut ida, povu ida, no rai Timor ida de’it

Laiha firaku, laiha kaladi, laiha mestisu, laiha kulit metan no laiha kulit mutin ka makerek

Hotu-hotu Timor oan nebe iha rai ida no na’in ba povu ida

Maluk funu na’in sira

Maluk Timor oan tomak

Respeita Timor oan tomak nebe moris iha rai ida ne’e

Hasai tiha naran sira nebe uluk kolabora ho inimigu husi imi nia fuan

Biar fitar sira hela iha imi nia fuan nafatin

Ita koalia beibeik kona-ba passadu

Passadu lamai ona

Mate sira sei la moris hikas

Fitar sira sei lalakon

Tanba ne’e, ita tenki harii futuru foun

Ita tenki halo ai-klaletek foun

Hodi tutan pasadu ba futuru

Hodi assegura bem estar, paz no trankuilidade ba Timor oan tomak

Ita hakarak husi agora ba oin

Sai ema isin moos no Ema Foun

Ema Foun nebe fiar an

Ita hakarak, ita hotu simu valores husi Sosiedade Foun nian

Ita hakarak ita hotu hakoi isin mate uluk nian

No hotu-hotu hamutuk defende ita nia ukun-rasik-an no liberdade

Agora ba oin

Hamonu no hakoi hotu atributu sira

Mauhu, integracionista, autonomista no independentista

Ita hotu sai ida de’it

Hun ida, abut ida, povu ida no Timor ida de’it ba Timor oan tomak

Hotu-hotu hamutuk

Atu kulit metan, kulit naroman, kulit mutin

Husi rasa nebe de’it

Ita hotu mesak Timor oan

Hotu-hotu fo liman ba malu

Hahuu ho moris foun hodi sai Ema Foun

Sa’e hamutuk ba foho Ramelau, Matebian no Kablaki tutun

Laiha tan diskriminasaun ba malun

Laiha tan balun hela iha foho leten no balun hela iha foho hun

Hotu-hotu tuur no hamrik hanesan

Hotu-hotu iha direitu no dever nudar Timor oan

Hamutuk defende ita nia Rain, ita nia Povu no ita nia Estadu

Bebonuk, 05/05/2020